Tuima 15
15
1Nuruba ale jam nyini Judia a jam Antiok tɛŋka a deri piilim a sak baai ale ta siaka ale Yeezu la sinsaga ayen, <<Nuru karo a baga nya varibasika see ka kula nyɔnɔwa a nin gebi wa yoanni ase Moosis Sinsaŋŋa ale a sak diila.>> 2Dila nyiŋla Pɔɔl ale Banabas yaa jam ta nanpaga nna yegayega ale ba. Baai ale ta siaka la yaa lueri Pɔɔl ale Banabas ale baai ale ta siaka la gela a bo Antiok la ayen ba cheŋ Jerusalem a ga nya tuimtomdɔma ale kpaŋŋa wanni de zuk.
3Kirisita bisaŋa ale a tu chaab la yaa basi ba suiku po ayen ba cheŋ. Ba ale jam va Fonisia ale Samaria tɛŋsaŋa po a cheŋ la, ba yaa va ba Kirisita bi chaama ale bo dula la jigi, a weeni sak ba ayen nuru baai ale kan daa Juuba la a tagri va Wen. Wa paalaŋa de ate ba weeni a sak ba la yaa ta masim ale suipeentik a jam ba meena jigi. 4Ba ale jam paari Jerusalem la, Kirisita bisaŋa ale a tu chaab la ale ba kpaŋŋa ale tuimtomdɔma a jam maa chaab a nye ba tia kama ate ba weeni a sak ba meena Wen ale pai ba a tom tuima diila. 5Baai ale ta siaka la, baai ale ka Farisiima po nuruba la, yaa yiti zaani ŋmai a weeni ayen, <<Ku a fɛ kama ayen baai ale kan daa Juuba la a gebi ba yoaŋa. Ku a fɛ kama mɛ ayen, ba kaam ba ayen ba a zuli Moosis Sinsaŋŋa ale a weeni diila.>>
6Tuimtomdɔma ale nisɔmma yaa tu chaab ayen ba biisi wanni de. 7Ba ale nak nanpaga di nyiŋ ate ku beni la, Piita yaa zaani a biisi ayen, <<M suata, nama dek seba ayen a ta nyini dipo, Wen ale jam lueri mi a ta nyini nama po a nyini ayen m ga sak baai ale kan daa Juuba la, wapaala maŋsaŋa ate ba wom abe ba ta siaka ale ŋa. 8Wen dii abe ale seba nurubiik meena popola ale ka diila, a te Wen Chiika baai ale kan daa Juuba la kama ase wa ale te tama mɛ diila ayen ku sak ayen wa ta yaalika ale ba kama ase wa ale ta yaalika ale tama mɛ diila. 9Wa be nye ba jigi kama ase wa ale a nye, tama jigi dii mɛ la. Suik kula po, wa va ka ba siaka ale wa a yaa sugri ba wabaataŋa ba suiniima po a basi. 10Yɔgyɔgla de, ka boa ale soa ate nama a yaali ayen ni pai jib kpiemu de buui ate ti kokpieŋsaŋa a yaase tama dek an baga ji bu la ayen ŋaaŋviirɔma ji? Ni dan a nye nna, ni a nye ka Wen a nya. 11Alege tama seba a chak kama ayen tama ale va ti Nyɔnɔwa Yeezu ŋmanteka nyiŋ a nya varibasika ase bala mɛ ale nya diila.>>
12Ba meena tuka po a kasim jam goori ka nna chorototo, ale a wom Pɔɔl ale Banabas ale jam a weeni Wen ale pai ba a tom wakperikaliisa ale baai ale kan daa Juuba po diila. 13Ba ale ga biisi nueri la, Jeemsi yaa tulisi ayen, <<M suata, ni meena a wom mi. 14Ni wom Simon Piita ale tɔk Wen ale liŋ nye dii a sak baai ale kan daa Juuba la a yaa piilim lueri ba wa yuenni nyiŋ dii la. 15Biisiteerɔma ale biisi dii la a cheŋ ale kude kama, ase ku le ŋmarisi ayen, 16<Nya kude ŋaaŋnyiŋ, m le pilim jam a nye ate Deevid yenni ale lo la a ŋman zaani. M le ŋman pilim sɛ di juijui ale lo la, abe m nye ate di ŋman pagra. 17Ate nurubiik meena ale gisi Naawen. Baai meena ale kan daa Juuba ate mi wi ba ayen m nuruba la. (Amos 9:11-12) 18Naawen ale weeni, waai ale nye nyaŋa de ate ni seba a ta nyini dipo la.> >>#15:18 Azaya 45:21
19Jeemsi yaa ŋman biisi a cheŋ a weeni ayen, <<Dila nyiŋ mi a poli kama ayen ti kan daani baai ale kan daa Juuba a tagri va Wen la. 20Ku magsi ka ti ŋmarisi gbaŋ a te ba ayen, ba kan dɛ bɔgta ŋandiinta dii nyiŋla, ŋandiin tila an welema. Ti weeni ba mɛ ayen ba kan bobi nipok baai ale kan daa ba pooba la a goa, abe ba kan a ŋɔbi jabuui ate ba an tɔgri la lammoa#15:20 Kaabka 17:13-14 abe ba kan a dɛ ziimoa. 21Baai ale kan daa Juuba la, le deri siak nyaŋa de kama, boan nyiŋŋa ba seba kama ayen Juuma baai ale bo juijui meena ale ba la, ba sak Moosis Sinsaŋŋa de kama ate ku beni yegayega. Ba be wom ale karim ŋa kama ba tuka diinaŋa po ba Vuusum Daaŋa meena po.>>
22Tuimtomdɔma ale niŋdeerɔma ale Kirisita bisaŋa ale a tu chaab la yaa a poli ayen ku nala kama ate ba lueri nuruba a ta nyini ba po a tom ba ale Pɔɔl ale Banabas ate ba cheŋ Antiok. Ba yaa lueri nuruba baye baai ale ta siaka la a te ba zula nalimnyiini la. Nuruba bayewa ale Judas waai mɛ ate ba a wi wa ayen Baasabas la, ale Silas. Ba yaa tom ba ayen ba ta gbaŋka a cheŋ. 23Ba ale jam ŋmarisi gbaŋka a weeni diila ale nna ayen,
<<Tama ni suataŋa tuimtomdɔma ale kpaŋŋa a maa chaab a puusi ti suataŋa baai ale potim kan daa Juuba a nyini biam po ate ba bo Antiok ale Siriya ale Silisiya tɛŋsaŋa la.
24<<Tama wom ayen nuruba gela ale nyini tama po a jam biisi wie ate ŋa daani ni ale nye ate ni popola kaasi. Ti a weeni a sak ni kama ayen ni nya nuru bala an tuesi sinsaŋŋa tama jigi ayen ba jam biisi dila. 25Dila nyiŋ ate tama meena a nye tuka a yaa poli ate ti yaa siak a lueri nuruba ayen ba va Pɔɔl ale Banabas ti sua tii ate ti mariŋ la a jam ni jigi. 26Pɔɔl ale Banabas ka nuru baai ale pai ba nyuvoa a da ti Nyɔnɔwa Yeezu Kirisita nyiŋla. 27Dila nyiŋ ate ti yaa tom Judas ale Silas ni jigi. Ba ale poom weeni a sak ni dii meena wuu ate ti ŋmarisi gbaŋka de po la.
28<<Wen Chiika ale tama a siak kama ayen ti kan pai jib bu choa a ji ni. Ti ta ka wieŋa de nyiini ayen ti weeni a sak ni. Ku a fɛ kama ayen ni va ŋa. 29Wieŋa de ale, Ni kan a dɛ bɔgta ŋandiinta, ni kan a dɛ ziimoa, ni kan a ŋɔbi jabuui ate ba an tɔgri la lammoa, ni kan a bobi nipok baai ale kan daa ni pooba la a goa. Ku a le nala kama ase ni nin kaa nye wieŋa de. <<Ni boro nalimnyiini.>>
30Ba yaa basi Jerusalem ale cheŋ Antiok, a tigsi baai ale ta siaka la a te ba gbaŋka. 31Ba ale ga karim ka la, gbaŋka wieŋa yaa ta suipeentik a jam ba jigi. 32Judas ale Silas dek ale jam ka biisiteerɔba la, ba yaa deŋsi ba kpa ale wie yega ayen ba nya pagrim. 33Ba ale ga daliŋ maga dega la, Antiok demma yaa te Judas ale Silas suik ale suiyɔgni ate ba pilim cheŋ baai ale tom ba la jigi. 34Alege Silas jam nya kama ayen ku nala kama ate wa wari dula.
35Alege Pɔɔl ale Banabas a jam wari ka Antiok, a sak ale a mooli ale nuruba ba chaab mɛ, Naawen wanni.
36Ku ale ga beni maga dega la, Pɔɔl yaa weeni Banabas ayen, <<Basi ate ti pilim ŋmani cheŋ jigi ŋaai meena ate ti sak Naawen wanni la a ga nya ase Kirisita bisaŋa a nye ka sɛ.>> 37Banabas a jam a yaali kama ayen Jɔɔn Maak a maa va ba a cheŋ. 38Alege Pɔɔl an jam poli ayen ku magsi ayen Jɔɔn Maak a maa va cheŋ dii nyiŋla wa an jam maa boro ale ba ate ku ga paari ba tuini kpeglimka. Wa jam zaani ka Pamfiliya tɛŋka a basi ba. 39Nanpaga yaa deri jam ba suŋsuŋ ate ba poori chaab. Banabas yaa yik Maak ate ba jueli ŋaaruŋ a cheŋ Saipurus tɛŋka 40alege Pɔɔl a jam lueri ka Silas ate ba cheŋ. Siarɔma ale bo Antiok la yaa pai Pɔɔl a nyo Naawen ŋmanteka po, 41ate ba cheŋ Siriya ale Silisiya tɛŋsaŋa a ga a deŋsi Kirisita bisaŋa ale a tu chaab la kpa dula a te ba pagrim.
Tällä hetkellä valittuna:
Tuima 15: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
