Tuima 13
13
1Kirisita bisaŋa ale a tu chaab Antiok tɛŋka po la, a jam ta ka biisiteerɔba ale sagrɔba ba gela ba po. Ba yue jam le Banabas ale Simon waai ate ba jam a wi ayen Asoblik la, ale Lusiyas Sairini denɔwa, ale Manayen waai ale jam bo ale Naawa Ayerod waai ale jam ka Galili naab la, ale Sɔɔl. 2Dai yeŋ ate ba yaa boro a puusi Naawen a bobi noa, ate Wen Chiika yaa weeni ba ayen, <<Ni poori Banabas ale Sɔɔl a te mu ate ba tom tuim dii ate mi wi ba ayen ba tom la.>>
3Ba yaa maa chaab a bobi nɔi a puusi Wen a pai ba nisima a vi ba zuk ale ge a yaa tom ba ayen ba a cheŋ.
4Wen Chiika yaa tom Banabas ale Sɔɔl ate ba cheŋ Seliusiya tɛŋka a zaani dula a jueli ŋaaruŋ a cheŋ Saipurus tɛŋka 5a yaa ga siŋ cheŋ Salamisi tɛŋka. Ba jam cheŋ ga jo Juuma tuka diinaŋa po a sak ba Wen wanni. Jɔɔn Maak ale jam maa boro ale ba a maari ba ale ba tuimaŋa.
6Ba yaa ŋman jam basi dula jigini ale cheŋ Pafos tɛŋka. Tɛŋ kala po ba yaa jam nya sampoporik. Wa jam ka Juu. Wa yuei jam le Bar Yeezu. Wa jam ka venta biisiteerɔ. 7Wa jam boro ale ka tɛŋka kpagni ate ba a wi ayen Saajus Pɔɔlus la. Pɔɔlus jam tagri ka Aroom kpaŋŋa zuk a nya Saipurus tɛŋka. Wa jam ka yam nyɔnɔ nna yegayega. Wa yaa wi Banabas ale Sɔɔl ayen ba jam weeni Wen wanni a sak wa. 8Alege sampoporika Elimas waai yuei di choa a jam le la ale Girik tɛŋka biika, a kasim jam a zɛri ba kama ayen Gominawa kan nya suik a ta siaka ale Wen wamaŋsaŋa. 9Alege Sɔɔl waai yuei mɛ ale jam ka Pɔɔl ate Wen Chiika a sueri wa la, yaa nya wa nna ziin 10ayen, <<Fi jabiok biiga, fi wayɔrisima dachiaga, waai ale kasim ka pimpaasima ale venta meena nyɔnɔ, fi kan basi fi ale a kaasi Wen wanni dii la basika? 11Yɔgyɔgla de, nya de, Naawen nisimaŋa a siŋ fi zuk kama. Fi le yi, fi kan baga a nya wenbinni ate ku beni maga dega.>> Pɔɔl ale ga biisi dila a nueri la, pik ale legi yaa jam, ate wa yaa cheŋ a gilim a gisi ayen nuru a yik wa nisima a ta wa a kuli. 12Gominawa ale ga nya dila la, wa yaa ta siaka yɔgla. Ku jam cha wa ka nna yegayega ate wa wom sinsaŋŋa de chaab a magsi chaab ale Naawen.
13Pɔɔl ale wa vaanchaama yaa nyini Pafos a jueli ŋaaruŋ a cheŋ Periga tɛŋka kaai ale bo Pamfiliya tɛŋka po la. Alege Jɔɔn Maak a jam pai ba a basi ka Pamfiliya ale ge pilim ŋmani Jerusalem. 14Ba yaa basi Periga tɛŋka ale ge cheŋ Antiok tɛŋka kaai ale bo Pisidiya tɛŋka po la. Juuma Vuusum Danni ale jam paari la, Pɔɔl ale Banabas yaa jo ba tuka diinaŋa po a kala. 15Nuru wanyi ale ga karim ba Moosis Sinsaŋŋa gbaŋsaŋa po wieŋa ŋa gela ale biisiteerɔma ale ŋmarisi dii la nueri la, ba tuka diinaŋa kpaŋŋa a yaa tom tuntomiŋ Pɔɔl ale Banabas jigi a weeni ba ayen, <<Ti suata, ti a yaali kama ayen ni dan ta wari ayen ni deŋsi ti kpa ni be weeni a sak ti.>> 16Pɔɔl yaa yiti zaani a zak wa nisima a puusi ba a yaa piilim biik ayen, <<Izirali demma ale baai ale kan daa Izirali demma alege a chali Wen la, nama meena a wom dii ate m tara ayen m weeni a sak ni la. 17Tama Izirali demma de Wenni ale lueri ti kokpieŋsaŋa. Diipo ate ba jam chim nicham Ejipiti tɛŋka po la, Wen jam basi kama ate ba chim nuru kpienta. Wen jam pai ka wa pagrimu a nye ate ba nyini Ejipiti tɛŋka po a nyini. 18Wa kasim jam duŋ wa sui sagni po ale ba kama ate ku ga paari bena pisinaansi. 19Wa jam kaasi ka Keenan satɛŋsa siyopɔi ale ge ate wadek nuruma a soa tɛŋ sila. 20Nyaŋa de meena abe pai paari ka bena kobsinaansi ale pisinu ate Wen yaa jam te ba niŋdeerɔba ayen ba a nya ba zuk, ate ku ga paari diipo ate Biisiteerɔwa Samuel a jam la. 21Ba yaa weeni ayen ba a yaali ka naab, ate Wen a te ba Kis nidoabinni Sɔɔl, wa nyini ka Benjamin dɔkku. Wa nya ba zuk ka bena pisinaansi.#13:21 1 Samuel 10:21-24 22Ku ŋaaŋnyiŋ Wen yeeri wa ale ge zak Deevid a zaani ayen wa chim ba naab waai ate wa weeni ayen, <Mi nya Jese nidoabinni Deevid ale wa a nye mi suinum ale a yaali dii la, (1 Samuel 13:14) waai ale wa tom dii ate mi a yaali la meena.> >>
23Dila Wen ta ka Yeezu, Deevid ŋaaŋbisaŋa wanyi a jam Izirali ayen wa chim ba varibasidɔwa ase wa le puulim diila. 24Jɔɔn ale liŋ jam dɛ niŋ a sak Izirali demma meena ayen ba tagri a basi ba wabaataŋa tomka abe ba tuesi soka ale ge ate Yeezu yaa jam piilim wa tuimaŋa. 25Jɔɔn ale jam moata wa mɛ tuimaŋa tom kpeglimka la, wa yaa bek nuruma ayen, <Nama dek a ta a poli ayen mi ka wana? Mi daa nuru waai ate ni a limisi la. Aaya, ni be nya wa bo ka mi ŋaaŋ a cheena. Mi pɔsima kama ale m nin yeeri wa nuesaŋa a te wa.>
26<<M suata, Abrayam ŋaaŋbisa, ale nama baai ale a chali Wen la, ka tama meena jigi ale varibasidɔwa tuntomiŋka de a jam. 27Nuru baai ale bo Jerusalem tɛŋka ale ba niŋdeerɔma la, a jam zɛ ayen Yeezu ka varibasidɔwa. Ba be an jam miŋ biisiteerɔma wieŋa ate ba jam a karim Vuusum Daaŋa meena la a chak ya. Dila nyiŋla, ba niŋdeerɔma yaa bo buusa mini wa ayen ba ko wa. Ba ale nye dila la, ba jam zɛ ayen ba poom a nye dila a magsi chaab ale ka biisiteerɔma ale poom weeni diila ate ku chim wensie. 28Ba an jam poom baga a weeni dii ate wa kaasi a magsi ba ko wa la, alege ba diem jam saalim Gominawa Paalɔt kama ayen wa basi ate wa nuruma ko wa. Wa yaa siak ate ba ko wa. 29Ba ale ga nye wa wieŋa de meena a magsi chaab ale dii ale ŋmarisi la, nuruba yaa yeeri wa jabarimu nyiŋ a ta siŋ tɛŋ a ta wa a ga dueni puŋ vɔrup po. 30Alege Wen a nak wa kama a yiti kum po. 31Ate wa yaa jam pai wadek a sak baai ale jam va wa a nyini Galili tɛŋka a cheŋ Jerusalem la. Wa jam pai wadek a sak ba dila ate ku paari ka daa dii choa. Bala abe ale nya nyaŋa de la ale soa ate ba weeni a sak Izirali demma. 32Ate ti yaa ta wamaŋ paalaŋa ayen dii ate Wen a puulim ale ni koma la, 33wa nye te tama ba bisaŋa kama a ta va wa le nak Yeezu yiti kum po la, ase ku le ŋmarisi Yiila Gbaŋsa buyewa wa po dii ayen, <Fi ka M Nidoabili ya. Jinla mi chim ka fi Ko.> (Yiila 2:7) 34Wen abe ale weeni dii a magsi chaab ale wa ayen wa le nak wa a yiti kum po ate wa kan puak vɔrumu po la ale nna, <Niak kaai ale welema ate m puulim ale Deevid ate ku a fɛ ayen ku nye la, m le pai a te fu.>#13:34 Azaya 55:3 35Ase Deevid ale weeni jigi di choa Wen Gbaŋka po dii ayen, <Fi Wen kan basi ate fi nuru weleŋka a puak vɔrumu po.>#13:35 Yiila 16:10
36<<Diipo ate Deevid a vua la wa tom tuim ŋaai ate Wen a yaali la kama ale ge a kpi ate ba gu wa ale wa kokpieŋsaŋa ate wa puak. 37Alege waai ate Wen a nak wa a yiti kum po la an puak vɔrumu po. 38M suata ni be miŋ dii ate tama a weeni ni la a chak, fi baga a nya biem vɔŋ teka kama Yeezu nyiŋ, 39wa nyiŋ mɛ waai meena ale ta siaka la a nye fasiyaa kama wari meena po dii ate di daam an baga a nye fasiyaa Moosis Sinsaŋŋa nyiŋ la. 40Dila nyiŋla, ni kpesi seba ate Biisiteerɔma ale biisi diila, a kan nye ni jigiya, 41<Ni wom de, nama baai ale a lɛ Wen ale biisi diila, ku le cha ni ate ni cheŋ bɛ a kpi. Mi ale a nye dii jinla la, ka wa dii ate nuru a dan poom tɔgi di kiri a sak ni, ni kan diem a ta siaka la.> >> (Yabakkuk 1:5)
42Pɔɔl ale Banabas ale ga sak nueri a nyini tuka dɔkku po a nyini la, nuruma yaa weeni ba ayen ba ŋman pilim jam ŋaaŋnyiŋ Vuusum Danni a ŋman sak ba wieŋa de a gum du. 43Nuruma ale ga basi tuka dɔkku la, Juuma yega ale baai ale kan daa Juuba a maa chim Juuma suiku vaaroba la, yaa va Pɔɔl ale Banabas. Tuimtomdɔma a yaa biisi a deŋsi ba kpa ayen ba kasim boro ale Wen ŋmanteka.
44Juuma Vuusum Danni ale ŋman jam paari la, waai meena ale bo ba tɛŋka po la, a yaa jam ayen ba wom Naawen wanni. 45Juuma ale ga nya ale nuruma piisi a soa diila, ba suiniimaŋa yaa deri sueri ale nyuri ate ba yaa weeni ayen Pɔɔl ale a biisi diila ka venta. Ba yaa jam a lɛ wa mɛ. 46Alege Pɔɔl ale Banabas yaa nyini peelim a biisi ale kan chali yɔgsum a weeni ayen, <<Ku a fɛ kama ayen nama Juuma a liŋ wom Wen wanni. Alege ni zɛri di kama ale a poli, ayen ku an poom magsi ni nya nyuvuri dii ale kan ta kpeglimka la. Tama abe le basi ni abe ti cheŋ baai ale kan daa Juuba la jigi. 47Dii nyiŋla, Naawen a weeni ti kama ayen, <M gomsi ni a magsi kama ayen ni sak baai ale kan daa Juuba la wensieŋa ase nuru waai ale ta bolim a jam legi po la. Ayen m ta varibasika a jam tɛŋzuk de meena.> >> (Azaya 49:6)
48Baai ale kan daa Juuba ale wom nna la, ku yaa te ba suipeentik ate ba a te Naawen pimpauk wa wamaŋsaŋa nyiŋ. Nuru baai ate Wen lueri ba ayen ba nya nyuvuri dii ale kan ta kpeglimka la yaa ta siaka ale Pɔɔl ale Banabas ale sak ba diila.
49Ate Naawen wanni yaa tagli tɛŋ kala meena. 50Alege Juuma yaa paasi nipok baai ale kasim jam a yaali wensuiku vaka wie ate nuruba a te ba zula mɛ la, ale kpaga kpiemaŋa ale a nya tɛŋka zuk la ayen ba basi ate Pɔɔl ale Banabas nya ninam. Ba yaa yiak ba ate ba nyini ba tɛŋka po a nyini. 51Pɔɔl ale Banabas yaa kpaanti ba naŋsaŋa tantaŋa a basi ba tɛŋka po ayen ku sak ayen ba kaam ba kama. Ba nye dila ale ge a yaa cheŋ Ikoonium tɛŋka. 52Suipeentik ale Wen Chiika yaa jam sueri Yeezu ŋaaŋviirɔma nalimnyiini Antiok tɛŋka po.
Tällä hetkellä valittuna:
Tuima 13: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
