Tuima 12
12
1Dila powa, Naab Ayerod a jam basi kama ate Kirisita bisaŋa a nya ninam. 2Wa jam basi kama ate ba yik Jɔɔn suoku Jeemsi a ko ale gebik. 3Wa ale ga nya ale wanni de a te Juuma popeentik la, wa yaa ŋman yik Piita. Ba yik wa a magsi chaab ale ka diipo ate Juuma a dɛ tigi kpienni diipo ate ba kan ŋɔbi boroborok kuui ale ta dabinta la. 4Ba ale jam yik Piita la, ba ta wa a ga lik kama, a yaali tugurik tɔŋdɔba pi ale bayuebi ate ba a limisi wa. Wa poori ba ka tɔgatɔga bunaansi. Naab Ayerod jam nye dila a poli kama ayen Gaambasika Tigini a dan taam abe wa ta wa nyini peelim ate ba bo wa buusa ate waai meena nya. 5Ba yaa ta Piita a ga lik. Wa ale jam bo likka dɔkku po la, Kirisita bisaŋa ale a tu chaab la yaa jam puusi nalimnyiini a te wa.
6Yok kuui ate Ayerod jam a poli ayen vari a dan veenti abe wa lagri Piita a ta nyini a te nuruma la, Piita jam doa ka limisidɔma baye suŋsuŋ a goa. Ba jam pai ka chɔrin kpiema a bobi wa. Limisidɔba mɛ a jam za ka likka dɔkku nɔi. 7Naawen maarɔ yaa deri jam za dula ate ku yaa nyaksi nna yegayega likka dɔkku po, a tiri Piita gauŋku a weeni wa ayen, <<Nye nwuli, yiti.>> Chɔrimaŋa yaa deri nyini Piita nisima po a gebi lo. 8Maarɔwa yaa ŋman weeni ayen, <<Pa fi gattaŋa a jo abe fi su fi nuesaŋa.>> Piita yaa nye dila ate Maarɔwa a ŋman weeni ayen, <<Pa fi kasaauku a jo abe fi jam va mu.>> 9Piita yaa va wa nyini likka dɔkku po a nyini alege zɛ ayen maarɔwa ale nye diila a sum ka wensie. Piita jam a poli ayen dii ale a nye la ka goadaasima. 10Maarɔwa ale Piita yaa jam va chaab a cheŋ a jam gaam niŋka limisidɔma a ŋman jam gaam baai ale pai saŋ la, a yaa ga paari nɔi dii ate ba pai kutaŋa a nye ate fi gaam ku abe fi yaa deri a jo tɛŋka po la. Ba ale jam a paari tuok kula la, ku yaa deri lak ku dek ate ba taam nyini a va chaab a cheŋ suik duoku po. Ba ale cheŋ maga la, Maarɔwa a yaa deri basi Piita wadek wa nyiini ale ge cheŋ.
11Piita yaa deri miŋ dii ale nye wa jigi la ate wa yaa weeni ayen, <<Yɔgyɔgla de m seba ayen ka Naawen ale tom wa maarɔwa ate wa jam vari mu Ayerod ale Juuma ale jam a poli diila nisima po a basi.>>
12Wa ale miŋ nna la, wa yaa cheŋ Mɛɛri yenni. Mɛɛri a jam ka Jɔɔn ma. Jɔɔn yuei di choa jam le Maak. Piita ale jam a paari Mɛɛri yenni la, nuru boari ale jam tu chaab dula a boro a puusi. 13Piita ale ga a nak dɔkku nɔnni la, pɔkdɔklie wa yuei jam ale Aroda, yaa jam tulisi Piita. 14Wa ale ga wom lueluku ale ka Piita la, ku yaa deri te wa suipeentik nna yegayega ate wa an ŋman poom lak dɔkku nɔnni alege deri chali a ga weeni ayen, <<Ka Piita ale jam za peelim.>>
15Ba yaa tulisi wa ayen, <<Fi a yesiŋ kama?>> Alege wa ŋman ŋmasi weeni ba ayen, <<Mi a biisi ka wensie.>> Ba ŋman tulisi wa ayen, <<Ka wa chiika.>>
16Ba ale jam a biisi dila la, Piita a diem a nak dɔkku nɔnni kama. Ba ale lak nya wa la, ku yaa deri cha ba. 17Wa yaa yuk nisa ayen ba goori ale ge yaa weeni ba Naawen ale nye dii ate wa nyini likka dɔkku po a nyini la. Wa yaa weeni ba ayen ba weeni nya kude a sak Jeemsi ale mbala meena ale ta siaka la. Wa ale biisi nna a ga nueri la, wa deri basi ba ale ge nyini cheŋ jigi yoŋ.
18Vari ale veenti la, ku yaa nye nna ŋaglam tugurik tɔŋdɔma suŋsuŋ ate ba a bek chaab jabuui ale nye Piita la. 19Ayerod yaa weeni ba ayen ba nyiem gisi yik wa a ta jam. Ba jam gisi ka nalimnyiini alege ba an nya wa. Wa yaa wi tugurik tɔŋdɔma a bek ba alege a yaa weeni tugurik tɔŋdɔba ba chaab ayen ba ta ba a ga ko. Ku ŋaaŋnyiŋ Ayerod yaa basi Judia tɛŋka ale ge cheŋ Siizariya a goa dula maga dega.
20Ayerod sui ale jam a puuri nna yegayega ale Taaya ale Saidon demma. Dai yeŋ, ba yaa nye nɔiyeŋ a cheŋ ayen ba nya wa. Ba jam dɛ ka niŋ a nya nuru waai ale jam soa Naawa yenni meena a nya la. Wa yuei ale Balastus. Ba yaa jam nya wa ayen wa maa maari ba ate ba nya Naawa. Wa yaa siak te ba suik. Ba yaa jo Naawa jigi a saalim wa ayen wa basi ate masim ale nyemagsika a jam ba suŋsuŋ ate ku basi ate ba ŋman a nya ba ŋandiintaŋa ase wa nyiem ale poom a nye diila.
21Dai yeŋ ate Ayerod a potim lueri dai a yaa pai wa naam gattaŋa a jo, a kali wa naam zukpaglika zuk a piilim biisi a te ba. 22Nuruma yaa kaari ate ku jueli nna yegayega ayen, <<Daa nuru ale a biisi, ka wen.>> 23Naawen maarɔwa yaa deri fɔbi wa, dii nyiŋla, wa an zuli Wen ya. Nanzue ale jam dɛ wa ate wa kpi.
24Naawen wamaŋsaŋa a kasim jam tagli ka jigi meena ate nuruba jam piisi a gum du.
25Banabas ale Sɔɔl yaa jam tom ba tuimaŋa a nueri kama Jerusalem tɛŋka po ale pilim ŋman Antiok. Ba jam ta ka Jɔɔn waai ate ba maara wi wa ayen Maak la a jam.
Tällä hetkellä valittuna:
Tuima 12: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
