Tuima 11
11
1Tuimtomdɔma ale ba suataŋa ale bo Judia la a wom ayen baai ale kan daa Juuba la mɛ a siak a te Wen Wanni kama. 2Piita ale ŋman pilim cheŋ Jerusalem tɛŋka la, Juuma yaa ŋma wa ayen, 3<<Ka boa ate fi cheŋ nuru baai ale kan daa Juuba la jigi a dɛ ŋandiinta ale ba?>> 4Piita yaa piilim a tɔk dii meena ale nye la ayen,
5<<Mi ale jam boro a puusi Jopa tɛŋka po la, ku yaa nye mi jigi nna ase gɔdaasima la, ate mi a nya jaab a nyini wenŋmazuk gugotta tinaansiwa siŋ cheena tɛŋ a jam zaani a moata mi. 6Mi yaa ŋmasi nya jaamu po nalimnyiini a yaa nya ale yeri duŋsa ale gɔi duŋsa ale ŋan baai meena ale a cheŋ ba lɔga nyiŋsa, ale nuinsa. 7Mi yaa wom ale lueluk a weeni mi ayen, <Piita, yiti ŋmai. Ko a ŋɔbi.> 8Mi yaa tulisi ayen, <M Naawen yaa, aaya, mi an diem maa dɛ jabuui ale kan welema la nya ya.> 9Alege lueluku a nyini wenŋmazuk a weeni mi a nye buye ayen, <Wen ale weeni jabuui ayen wa ka jaweleŋ la, ku a fɛ kama ayen fi kan weeni jaab wala ayen wa an welema.> 10Nya kude a jam nye ka buta ale ge ate gattiaka a yaa ŋman yiri jueli wenŋmazuk. 11Diipo ate jaamu a yiri a jueli la, nidoaba bata yaa nyini Siizariya tɛŋka a jam yenni, diipo ate mi jam boro la a weeni mu ayen ba nyɔnɔwa ale bo Siizariya la ale tom ba mi jigi. 12Wen Chiika yaa weeni mi ayen m yiti a cheŋ abe m kan basi ate ku daani mu. M suataŋa bayuebiwa de abe maa va ka mi a nyini Jopa a jam ate ti meena a yaa jo Koniilos yenni po. 13Wa yaa weeni a sak ti wa ale nya Wen maarɔ wa yenni po ate wa weeni wa ayen, <Tom nuru ate wa cheŋ Jopa tɛŋka a ga wi nuru wanyi ate ba a wi Simon waai ate ba a wi ayen Piita mɛ la. 14Wa ale biisi wie ale fu ate fi ale fi dɔkdemma meena a nya varibasika.> 15Mi Piita ale jam piilim boro a biisi ale ba la, Wen Chiika a deri siŋ jam ba suiniima po ase wa ale jan jam tama jigi piilimka po diila. 16Ate mi yaa teeri ti Nyɔnɔwa Yeezu Kirisita ale jam weeni dii ayen, <Jɔɔn Sokateerɔwa a pai ka nyiam a te ni soka alege yɔgyɔgla de mi ale te ni soka ale Wen Chiika.>#11:16 Tuima 1:5 17Wen abe jam pai ka tiirim bula a te ba ase wa ale jam pai bula dekdega a te tama diipo ate tama a jam siak a te ti Nyɔnɔwa Yeezu Kirisita la. Wen abe dan nye dila mi ka wana ate mi baga a weeni Wen ayen wa kan nye dila?>>
18Ba ale ga wom nna la, ba yaa nye diki ale te Wen pimpauk ayen, <<Wen a be poom te baai mɛ ale kan daa Juuma la suik kama ayen ba basi ba tuimbaataŋa tomka ate ba nya nyuvuri paalik.>>
19Diipo ate ba jam ko Sitiven ate ninam a jan jam baai ale ta siaka jigi la, ba jam chali waaŋ ka chaab. Dila powa, ba gela a jam chali cheŋ Fonisia ale Saipurus ale Antiok tɛŋsaŋa a sak Juuma nyiini Wen wamaŋsaŋa. 20Ba gela mɛ a jam ka nidoaba a nyini Saipurus ale Sairini tɛŋsaŋa a cheŋ Antiok tɛŋka. Ba ale ga paari dula la, ba yaa sak baai ale kan daa Juuba la mɛ. Ba jam sak ba ka Wen wamaŋsaŋa a magsi chaab ale ti Nyɔnɔwa Yeezu Kirisita. 21Ti Nyɔnɔwa pagrimu a jam bo ale ba kama ate nuru boari a jam ta siaka ale sinsaŋŋa a tagri badek a va ti Nyɔnɔwa.
22Kirisita bisaŋa ale a tu chaab Jerusalem tɛŋka po la ale ga wom nna la, ba yaa tom Banabas ayen wa cheŋ Antiok tɛŋka a ga nya. 23Wa le jan jam a nya Wen ŋmanteka la, wa sui yaa peenti. Wa yaa te ba meena nyiŋbiiri ayen ba kasim ta wensie ale ti Nyɔnɔwa ale popola yena, 24dii la wa jam ka nuru maŋ ate Wen Chiika a sueri wa ate wa ta siaka. Ate nuruba yega a gum ti Nyɔnɔwa nuruma po.
25Banabas yaa cheŋ Taasus tɛŋka ayen wa gisi Sɔɔl. 26Wa ale ga nya wa la, wa yaa yik wa a ta cheŋ Antiok. Ba nɔi bayewa a jam bo ka dula ale Kirisita bisaŋa ale a tu chaab la ate ku ga paari bein. Ba jam a sak ka nuru boari. Ku jam ka Antiok tɛŋka de po ate nuruba piilim te baai ale ta siaka ale Yeezu la, yuei ayen Kirisita Bisa.
27Dila powa, Wen biisiteerɔba gela yaa jam nyini Jerusalem tɛŋka a cheŋ Antiok tɛŋka. 28Biisiteerɔma de wanyi yuei a jam ale Agabus. Wala yaa yiti zaani ale Wen Chiika pagrimu a ayen kom pagrik ale za bu jam tɛŋzuk de meena. Kommu a sum jan jam kama diipo ate naab kpioŋku Kilɔdiyus a jam boro la. 29Ŋaaŋviirɔma yaa jam maa chaab a poli waai meena wanyi wanyi ale baga a te ligra dii ate ba pai ŋa a maari ba sua tintila baai mɛ ale ta siaka a bo Judia tɛŋka po la. 30Ba yaa cheesi ba ligraŋa a pai ŋa a te Banabas ale Sɔɔl ate ba ta ŋa a ga te Kirisita bisaŋa ale a tu chaab la nisɔmma dula jigini.
Tällä hetkellä valittuna:
Tuima 11: BWU
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2023, Ghana Institute of Linguistics, Literacy and Bible Translation
