Mt 7
7
Të miatsig ntol
Mk 4,24; Lk 6,37.41
1Të miatsig ntol, asu yë na të batsig mina ntol. 2A kyaè watsig ntol, akyaè endzò fë bayi wa tsig ntol. Ehëg wahëg e mod mbòg, endzò bayi wa hëg ete. 3Dze wabëbë ekan enë manyòṅ a dis, otoa të yen mboṅ onë wa a dis? 4Ngë ki na, eyë onë dzam dzo ai manyòṅ ya na: Dzoge, mëvaa wa ekan a dis? 5A mod mvol, tarigi vaè mboṅ onë wa a dis, eyòṅ te wayi toan yen na ovaè ekan enë a dis manyòṅ. 6Të miavë mvu e dzi enë mfuban#7,6«E dzi enë mfuban», nala onë «ayëgëlë Yesus.». Mibë woa ngoe minsanga mian, eza kòòdò miè ai mëkol, a mvus te, engatonde mina.
Siligan, dzëṅan, kudan
Lk 11,9-13
7Siligan, bëvë mina, dzëṅan, miayi sòm; kudan, bayi mina yaè. 8Amu e nyò osë asili, abi; e nyò osë adzëṅ, asòm; bayaè e nyò osë akud. 9Mod mfe y'abë mina ayi vë mòn ngòg, eyòṅ asili nyè mbaṅëla? 10Ngë ki na, eyòṅ asili nyè kòs angavë nyè nyòl? 11Ngë e mina ya minë bëbe, mina yëm vë bòn baan mimbëmbë bifaè, esoa ya yob ayi vë e ba badzaè nyè mimbëmbë mi byem fog fe? 12Ndò hm e byem bisë miayi na bod bëbò mina, mibò bò nala. Mvende nyili ai bëprofet. 13Minyiigi mbè ya onë abòd. Amu, onë ndam abui ai anen asë, mbè ya wakë a ndzaṅ kòm, ndò abui bod lanyian ete. 14Zen enë abòd, ndzòṅ otoa fëan, a biakë a enyiṅ; e ba basòm wa bëtoa abòd.
Bayëm ele a bibuma bie
Lk 6,43.46. 13,25-27
15Mikalëga bëprofet minnal, mbò bazu abë mina ai biyie mintomba, hë da a nnëm ete bëtoa ayòg anë mvu afan. 16Miayi bò yëm a bibuma biaban. Yë bënë dzam koe tòm a bongo, ngë ki na mvud a ele biyò? 17Na, ele esë enë mbëṅ yawum mimbëmbë bibuma, e dzi ki enë abe, yawum bëbe bibuma. 18Mbëmbë ele asëki dzam wum bëbe bibuma, mbë ele ny'asiki dzam wum mimbëmbë bibuma. 19Ele esë yawum ki mimbëmbë bibuma yayi tsigëban, ewoaban a ndoan. 20Miayi fò bò yëm a bibuma biaban.
Mayëm ki mina
21Së ki e nyò osë adzo ai ma na: A Nti, a Nti, ṅnyè ayi nyian a edzoe ya yob, dzam da e nyò abò ṅyian tara wama ya yob. 22Abui dzam layi dzo ai ma amos te na: A Nti, a Nti, së a dzoe doe ngò bingabò abui biyëṅ bi mam a? 23Eyòṅ te hm mayi bò yalan na: Maayëyëm mina. Subugan ma oyab, a e bod miabò abe ba!
Tin mimfim kan ebè asu mëloṅ
Lk 6,47-49
24E mod osë awog bibug biama anyiṅi fë anë biadzo, bëngahëg nyè ai mfëfëg mod ya ongaloṅ nda dzie a nkom. 25Mvëṅ enòṅò, biyëyëg bisòò, nkulu avuṅu, odzimbi nda te, dzam da etë ku, amu engayëmban a nkom. 26E nyò ki awog bibug biama bi, hë da tègè nyiṅ anë biadzo, bëngahëg nyè ai akud mod ya angaloṅ nda a nsëlëg a yob. 27Mvëṅ enòṅò, biyëyëg bisòò, nkulu avuṅu, bidzimbi nda te, ekuu a si, mfaṅ nkuan. 28Ndò hm lazu bò na, amana Yesus angaman kòbò e bibug bi, ndò minkunda mingakam ṅyëgëlan woe. 29Amu angabë ayëgëlë bò anë e mod abëlë edzoe, asëlan ai bësaṅa bëkalara baban.
Tällä hetkellä valittuna:
Mt 7: NTE12
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
MKPAMAṄ AMVOE Nouveau Testament en langue Ewondo © Bible Society of Cameroon, 2012.
