MAFIYU 14

Bataize‐ɣɛɛ Jɔ̃ zaa ʋai

1Nà maziɛ su masa‐zee‐wu masagi Yɛloo é faa mɛnini é vile Ziizɛ lɔwɔi va. 2É ɣɛni sa ná tii‐ɣɛɛ veaitiɛ ma, “Bataize‐ɣɛɛ Jɔ̃ ɣa na. É wu ziɣia saa ya. Nà ɣa é gaa‐ƃaa ɣɛɛ zéea ga yíɛ tii niitiɛ ɣɛ.” 3Ƃɔvɛlaale Jɔ̃ zogɛi sa ɣɛ Yɛloo vɛ é pili kpidi vɛlɛ wu Yɛloodia mazaƃu ma. Na ɣa ga Yɛloo ƃɔɔ deɣei Fele ŋazai. 4Su‐wulo‐zu ɣa ga Jɔ̃ ɣɛni má, “Ɛ́ lɛ tɔ su ga ŋaza nui nii ɣɛ è ya.” 5Tɔwɔ velei ƃalaa é ɣɛni wõi ɣɛɛzu é Jɔ̃ vaa la, é ɣɛni luozu numaitiɛ va. Toku ge zei ga natiɛ te Jɔ̃ ziɣini ga tɔ ga Gala daa woo‐wo nu. 6Kɛ̀ foloi te Yɛloo ɣaani ma, tei nà maʋoloi ziitini, Yɛloodia duu ŋaza nui ɣaani nu ƃulugi laa wu, ná Yɛloo yii zo. 7Na ma é kí toni ga woto‐levea ga zɔi nɛpɛ yá ʋa ma towaa fe zéea. 8Ŋaza nu lomai dee lɔɔ vele ma wũ su é ɣɛni Yɛloo ma, “Gè wõini ga Bataize‐ɣɛɛ Jɔ̃ mawũgi vɛ pelete wala zu.” 9Ɣalasogi maa wõini. Kɛ̀ koto‐levei é boni maa wɛ̃ɛtiɛ ɣaazu nà mazaƃu ma é deʋeni é da numaitiɛ ya ga te Jɔ̃ mawũgi ʋe lopoi ya. 10É keela leveni sa te Jɔ̃ wũ teve kpidi vɛlɛi wu. 11Te vaani ga mawũgi peletei zu te fe ŋaza nu lomai ya, tɔ wɔ é lii la dée wɔ. 12Jɔ̃ wulu veaitiɛ te vaani sa te mawomai ziɣi te doowu. Te li sa te bo Ziizɛ ma.

Ziizɛ nu wulu dooluo wɔ̃nɔ kuloni

13Tei Ziizɛ wɔ ge nii mɛnini, te vilini ziɛ‐ɣa‐ŋee su te wulo ná va te li ŋada ta ná ƃu ta letele. Kɛ̀ tei kpɔgi mɛnini, te wuloni taitiɛ zu te vile púlu tiɛ ziɛ wɔwaa. 14Kɛ́i ma sa liizu kake ma, é wɛlɛni kpɔ kpakpa va. Te ɣaazu‐maa‐wõi soni é zɛba sa é seeƃɛ veaitiɛ valo. 15Tei sa é ɣɛni ga kpɔkɔ, kala dopoitiɛ te vaani pɔ́ te ɣɛ má, “Vɛ ɣa ga ŋadɛi nu lɛ na. Tɔwɔ foloi liai sa. Kpɔgi leve te li kpaƃaitiɛ zu te daa‐mii ŋɛni ɣeea ƃɔɔ ʋaa ma.” 16Ziizɛ ɣɛni te ma, “Ɛ́ lɛ dɛ ga kɛni ta ziɣi vɛ te li. A ŋɛni ʋe te ya te mi.” 17Kala dopoitiɛ te ɣɛ ma, “Kpoolo‐ʋɔɔ looluo nɔ ɣa é gé ya vɛ é vɛɛ feza felegɔ va.” 18Ziizɛ ɣɛ tea, “A va ga tiɛ vɛ pɔ̀.” 19É boni sa kpɔgi ma ga te zei gui zu. É zɛba do é kpoolo‐ʋɔɔ looluoi ziɣi ta feza felegɔi é ɣaazu lɛ gee zu é mama fe Gala bɛ é kpoolo‐ʋɔɔ ƃumei zu ɣale‐ɣale é fe kala dopoitiɛ ya. Kala dopoitiɛ wɔ te fe sa kpɔgi ya. 20Te pɛ te miini te vile. Kpoolo‐ʋɔɔ vɛnɛi é wuloni na wulu te zɛvɛni é kpɔlɔ puugɔ kai felegɔ laa ʋe. 21Taitiɛ te miini tɔ zoo te ziiti nu wulu dooluo zu, ŋazaitiɛ ƃɔga lopaitiɛ te ziɣiai ba.

Ziizɛ ziɛni ziɛi ɣa

22Ziizɛ kɛɛni sa ná kala dopoitiɛ te vili kẽe su te ziɛi leve te li túo ga zɔlaavɛ vele, tɔwɔ é kpɔgitiɛ leve sa wɔ taa zu. 23Tei sa é kpɔgi leveni wɔ taa zu, é lɛɛni gizigi ma tɔ ɣilekpu ga é Gala feli. Tei kpɔkɔ ziitini, tɔ ɣilekpu ka é ɣɛni na. 24Kɛ̀ nii maziɛ su kẽegi maa woozai sa ɣɛ é ziɛi zaama. Ziɛ ɣiligi ɣɛni dowa‐lowasu, toku ge zei ga fãgai ziɣini ga te luo vele yíɛ zei te va. 25Tei sa é ɣɛni ga gusu laa yɔɔzu, Ziizɛ ɣɛni ziɛzu ziɛi ɣa yíɛ va te wɔ vɛ. 26Kɛ̀ tei kala dopoitiɛ te wɛlɛni bá yíɛ ziɛ ziɛi ɣa, te zuwuni te va tiɛ ɣɛ tea, “Gɔʋɛ ve.” Te loba sa ga duo. 27Kɛ̀ é ƃɔɛni te wɔ ga maa ʋilea yíɛ ɣɛ tea, “A mɛ lɛ yii wulo va. Nà vee de. A mɛ lɛ luo.” 28Pite wɔ ge gói ɣaa woteni sa yíɛ ɣɛ ma, “Màliɣii, ani yà ve, bo mà gè va è wɔ vɛ ziɛi ɣa.” 29Ziizɛ ɣɛ ma, “Va.” Na ma Pite wuloni kẽegi zu é vile ziɛi ɣa yíɛ li Ziizɛ wɔ vɛ. 30Kɛ̀ tei é wɛlɛni fãgai vaa velei va, é ɣɛni luozu. Nà wɔ ge ɣɛɛni nɔ é vɛɛ sa ga lɔɔ ziɛi wu. É zɛba é loba yíɛ ɣɛ tea, “Va bɛ̀, màliɣii.” 31Ziizɛ zɛba sa é yee zakpa é so é ɣɛ ma, “Yài ŋɛ ni zee‐la‐ma vɛnɛi è ya, zɛƃɛi é kɛɛ zakpe gìɛ ɣɛ è yii zu?” 32Tei sa te vilini kẽegi zu, fãgai ƃɔlɔni ga vaa. 33Taitiɛ te ɣɛni kẽegi zu te vɛɛni kɔ́wɔ wu tiɛ ɣɛ ma, “Ƃɔɔƃɔɔ su yà ga Gala duu.”

Ziizɛ seeƃɛ veaitiɛ valoni Gɛnɛsɛlɛ yui zu

34Tei sa te ziɛi leveni, te lɛɛni kake ɣa Gɛnɛsɛlɛ yui zu. 35Tei minɛ veaitiɛ te kwẽeni, te keela leveni ná ligi zu wɔlɔ‐kɔlɔ ma ɣaali te va ga seeƃɛ veaitiɛ ɣaazɔ. 36Na ɣa ɣɛɛ na te Ziizɛ maa nɛɛnɛni ga te ʋowũ nɔ ná seɣei mayifegi va. Tɔwɔ nu liigoitiɛ nɛpɛ te ʋowũni ba te valoni.

Tällä hetkellä valittuna:

MAFIYU 14: DN1971

Korostus

Jaa

Kopioi