MAFIYU 13

Sakpegi é vile woza‐vili nui va

1Nà maʋoloi nɔ Ziizɛ wuloni pɛlɛi wu é li ziɛ wala wukũigi va é zei na. 2Kpɔ kpakpa ɣaa lɛɛni ba ma. Kpɔgi wala ƃakpai ɣɛ nà kɛ ʋɔlɔ é vili ziɛ‐ɣa ŋee su é zei na. Kpɔgi ɣaazɔ ɣɛni loni ziɛ walai laavɛ. 3Ziizɛ zɛba sa é faa lamaa wo te ma sakpe goo zu yíɛ ɣɛ tea, “Woza‐vili nu ta liini wozai vilizu. 4Tei sa é ɣɛni wozai vilizu, mɔlɔ ɣai taniga te looni pele ma, wɛ̃niitiɛ te va te natiɛ ƃoale. 5Zɔitiɛ te looni kwɔti‐wɔti zuu ma vɛ pɔlɔ maa nɛɛ lɛ ŋɛni na te ʋaa ma. Te wũ kuloni ga maa ʋilea, tei tɔwɔ pɔlɔi lɛ ŋɛni zuwuni te ma. 6Kɛ̀ tei foloi kuloni, te ʋulu‐ʋuluni. Tei tɔwɔ te maŋasa lɛ ŋɛni vilini, te woto‐wotoni. 7Mɔlɔ ɣai zɔitiɛ te looni ŋai kpɔʋɔ zu, ŋaigi ƃɔlɔ te ma é te maa ƃoale. 8Zɔ mɔlɔ ɣaitiɛ wɔ te looni pɔlɔ vagɔ ŋada laa. Na ɣa ɣɛɛ na taniga te maɣai ɣɛni ɣɛɛzu te ɣa ga wũ gile‐gile, taniga tiɛ ɣɛ gá ga zee lɔzita‐lɔzita, taniga tiɛ ɣɛ gá ga zee sava‐sava. 9Nui faa‐mɛni gui wũ ba, pagɛ é mɛni.”

Sakpegitiɛ zɔɔ zaƃui

10Kala dopoitiɛ vaa vele ɣa na ɣɛ te ɣɛ Ziizɛ ma, “Zɛƃɛ ɣa é kɛɛ yìɛ ƃɔɛ te wɔ sakpe goo zu?” 11É te woi ɣaa woteni é ɣɛ te ma, “Wa dɛi, pelei laa laogɛ wo ʋaa ma ga wo Gala ta masadai zu loowu ʋaitiɛ wɛ̃ɛ. Kɛ̀ ta dɛi, nà mavelei laa lɛ laoni te luo. 12Ƃɔvɛlaale nui ŋɛnii ta zéea, towa ta ɣa ʋe zéea é vɛɛ bá. Na ɣa ɣɛɛ na sú ɣa wɔɔlɔ ma zéea. Kɛ̀ nui ta lɛ zéea, nii ƃalaa yá ɣɛ zéea ta nà wulo zéea. 13Nii mazaƃui ɣa gè ƃɔɛzu la te wɔ sakpe goo zu. Na ɣa ga ta wɛlɛ, kɛ̀ tɛ lɛ ná maa ƃɛɛ, ta wui to tɛ lɛ mɛniga ɔ́ nɔ ɣɛ ga te gaa ɣa. 14Fai nii Gala daa woo‐wo nui Aizeea ná yɛni ná luo é bo, ta ƃɔɔƃɔɔ ka teveai ma te maazu. Na ɣa ga nii é boni ga Gala ka ɣɛɛzu tea,

‘Wa faa mɛni wo mɛni,

kɛ̀ wɛ lɛ wɔlɔ‐wɔlɔ gaa ɣaa.

Wa wɛlɛ wo wɛlɛ,

kɛ̀ wɛ lɛ wɔlɔ‐wɔlɔ ŋada maa ƃɛɛ.

15Ƃɔvɛlaale numai niitiɛ ta ʋaa ɣaa‐ɣaazu ƃaave.

Te wui litigɛ, te ɣaazu laa wulugɛi.

Ɔ́ ƃe na ɣɛɛzu ga nà te ɣaazu ɔ́ ŋada maa ƃɛɛ,

te wui yìɛ faa mɛni.

Te ɣigi ɔ́ faa ɣaa ɣa,

na ɣa ɣɛɛ na tɔ lite wɔnɔ te va pɔ̀ vɛ

ga te valo.’ ”

16Ziizɛ ɣɛni tea, “Kɛ̀ wa dɛi, tuuyiɛ ɣa wo ɣaazu ɣɛzɛgitiɛ ma, ƃɔvɛlaale ta ŋada maa ƃɛɛ. Tuuyiɛ ɣa wɔnɔ wo wuitiɛ ma, ƃɔvɛlaale ta faa mɛni. 17Gè bo wiɛ ga gaama, Gala daa woo‐wo bea lamaa vɛɛ tele‐bo tuo‐wo bea lamaa va te ɣɛni ná maa‐wõi‐wõi kulozu ga te nii vɛtɛ wo pɛtɛsu, tɔwɔ tɛ lɛ pɛtɛni. Te ɣɛni wɔnɔ ná maa‐wõi‐wõi kulozu ga te nii mɛni wo mɛnisu, tɔwɔ tɛ lɛ mɛnini.

Ziizɛ woza‐vili nui mazakpegi zu‐wulo‐zuvɛ lɛɛni

18Ziizɛ ɣɛni tea, “A wui to ná ma wo woza‐vili nui mazakpegi zu‐wulo‐zuvɛ mɛni. 19Nu ta nɛpɛ ka woi nii mɛni na piligɛi Gala ta masadai va lɛ gaa ɣaani, tuƃo‐vele‐yowũ nui ɣa va, nii seiyai nui ƃɔɔ yii zu é ŋasa na. Na ɣa é ga mɔlɔ ɣai te bilini pelei ma. 20Nii na dɛi te bilini kwɔti‐wɔtigi zu nà ɣa ga nui nii yá Gala goi mɛni é yee zei bu ɣaʋu ga kuu‐zu‐nɛɛ. 21Na pɛ ge ɣɛɛvɛ mayãtai lɛ vilini. Towaa yɛ nɔ na ga ta wolo. Tɔwɔ faa ƃoei ɔɔ kpɔɔla ka wu ziɣi na Gala goi mazaƃu ma, manui ɣa ziɣi sa pele va ga maa ʋilea. 22Nii te bilini ŋai kpɔʋɔi zu, nà zu‐wulo‐zu ɣa ga nui nii yá Gala goi mɛni, tɔwɔ zui nii zu ŋɛnii maƃala‐ma ʋai ta kpɛtɛ ʋai mawõi‐ɣɛɛ ʋai manui ma natiɛ ta Gala goi maa ƃoale, nà wɔ malɔnɔ lɛ sa ɣɛɛ ba. 23Nii é looni zuu vagɔi zu nà maʋaa zu‐wulo‐zu ɣa ga nui nii yá Gala goi mɛni é gaa ɣa. Na ɣa ɣɛɛ na manui malɔnɔ ƃɔɔƃɔɔ gíɛ ɣɛ sa ba è ɣɛ velei mɔlɔi niitiɛ ta ɣɛɛ la, taniga te mavaa yìɛ ɣɛ te ɣa ga wũ gile‐gile, taniga tiɛ ɣɛ gá ga zee lɔzita‐lɔzita, taniga tiɛ wɔnɔ ɣɛ gá ga zee sava‐sava

Sakpegi é vile gui va

24Ziizɛ sakpegi ta ƃɔnɔ sɔɔni te ma yíɛ ɣɛ tea, “Gala ta masadai maʋaa ɣa wulo ga zunui nii é mɔlɔ zuwu vagɔ vilini ná kpalagi ɣa. 25Kɛ̀ tei numaitiɛ te ɣɛni ŋiizu, sili nui liini é gui ɣai vili mɔlɔi zu é li. 26Na ma tei mɔlɔi wuloni su, guitiɛ te wɔ̃lɔni ƃalaa pɛ. 27Pɛlɛ keea nui na tii‐ɣɛɛ veaitiɛ te vaani pɔ́ vɛ te ɣɛ ma, ‘Kèea, kɛ̀bɛ è mɔlɔ zuwu vagɔ vilini kpalagi zu? Tɔ ɣɛ le mu gui wuloai su?’ 28É ɣɛ te ma, ‘Sili nu ɣa na é nii ɣɛɛ.’ Tii‐ɣɛɛ veaitiɛ te ɣɛ ma,‘? È wõini mu gé li gé guitiɛ wulo?’ 29Kɛ̀ é ɣɛni te ma, ‘Ƃa. Wo mɛ lɛ yɛ gui wulozu wɔ mɔlɔi vɛɛ te va wɔ kulo. 30Ƃe ba te zei‐zu felegɔ pɛ te ƃɛtɛ é yɛsu mɔlɔ‐leve ziɛgi ziiti. Mɔlɔ‐leve ziɛgi zu gà bo mɔlɔ‐leve veaitiɛ ma te guitiɛ wulo ga maa wũ te te ɣili ba ga te te ɣala. Kɛ̀ gà bo te ma ga te mɔlɔi ɣaa lɛ ba te pu nà kwɔtai zu.’ ”

Sakpegi é vile gulu ɣai va

31Ziizɛ sakpegi ta zɔɔni te ma yíɛ ɣɛ tea, “Gala ta masadai wulovɛ è ɣɛ gului dáa ga ‘mɔsitai’ maɣai nii zunu ta siɣini é sei ná kpalagi zu. 32Gulu ɣai nii ɣa pɛnɛi gulu ɣai ƃɔgɔpɛ ba. Kɛ̀ tɔwɔ mawului ɣa wɔɔlɔ na towaa leve tife wũ kpɔgɔpɛ ba. Towaa ɣɛ ga gulu ga wɛ̃niitiɛ tiɛ va tiɛ laɣa to mavekegitiɛ ɣa.”

Sakpegi é vile kpoolo‐ʋɔɔ bokolo ŋɛnii va

33É sakpe ta ƃɔnɔ sɔɔni te ma. É ɣɛni te ma, “Gala ta masadai wulovɛ è ɣɛ kpoolo‐ʋɔɔ ƃokolo ŋɛnii nii ŋaza nu siɣini é pu felavai nii zu é ɣɛni ga kpɔlɔ‐su ɣila é yɛsu ƃɔɔ é kpɔgɔpɛ kpokolo.”

Tii‐ɣɛɛ ʋai Ziizɛ vɛ ga sakpega

34Ziizɛ é nii ɣaazɔ woni kpɔgi ma sakpe goo zu. Ƃɔɔƃɔɔ su ɛ́ lɛ faa ta nɛpɛ boni te ma ɔ́ ƃe bosu sakpe goo zu. 35Nii ɣɛɛni kɛɛ ʋaa ma fai Gala daa woo‐wo nui boni é leve ma. Na ɣa ga tei é ɣɛni tea,

“Gà laa wu ziɣi faa ma sakpe goo zu,

Gà fai nii wo doowugɛi yɛga é ziɣi ƃɔɔ

ŋetea lɔɔ‐zei ʋolo ma.”

Ziizɛ sakpegi zu wuloni pilegɛi gui va

36Ziizɛ kpɔgi yɛni sa na é ziɣi na é lɛ pɛlɛ wu. Na ɣa ɣɛɛ na ná kala dopoitiɛ te vaani pɔ́ te ɣɛ ma, “Sakpegi pilegɛi gui va ta kpalagi, kavele zu wulo gé ma.” 37Ziizɛ gaa woteni é ɣɛ te ma, “Nui é mɔlɔ ɣai vagɔi vilizu tɔ ga nu ƃuse lui. 38Kpalagi wɔ ka ga ŋeteai nii. Na ɣa ɣɛɛ na mɔlɔ ɣai vagɔi zu‐wulo‐zu ɣa ga Gala ta masadai zu veaitiɛ. Guitiɛ wɔ ta ga tuƃo‐vele‐yowũ nui maa veaitiɛ. 39Kɔ̀ɔ yɔ̃wɔi wɔgi é te zeiya tɔ ga dɛvele. Mɔlɔ‐leve ʋai zu‐wulo‐zu ɣa ga ŋeteai ɣaa‐ƃela‐suvɛ. Mɔlɔ‐ɣaa‐lɛ‐ba veaitiɛ ta ga Gala ta ɣeelaa. 40Velei nɔ gui ɣaa ɣa lɛɛ la ba é ɣala ga ŋabu, vele nɔ na yá ɣɛɛ la ŋeteai ɣaa‐ƃela‐suvɛ. 41Nu ƃuse lui ɣa ná keelaitiɛ leve. Niitiɛ ɣaazɔ ta va ga faa yowũ ta te wulo ná masadai zu te te ɣaa lɛ ba te vɛɛ tuƃo‐vele‐yowũ‐wulo vea ɣaazɔ va. 42Na ɣa ɣɛɛ na ta te vili ŋabu zebei zu. Ná ɣa numaa ta ɣɛ wɔlɔzu na tiɛ yì gaa mi. 43Tele‐bo tuo‐wo beaitiɛ wɔ ta sa ta ɣɛ ʋolozu te ɣeea Gala na masadai zu è ɣɛ folo. Nui faa‐mɛni gui wũ ba, pagɛ é mɛni.”

Sakpegi é vile tɔnɔ‐ba ŋɛnii va doowugɛi

44Ziizɛ ɣɛni tea, “Gala ta masadai wulovɛ è ɣɛ naʋolo lama‐lamagi nii doowugɛi ɣɛ kpala ta zu nii zunu ta pɛtɛni é zɛba é maazu laa wulu. É liini sa ga kuu‐zu‐nɛɛ, niitiɛ ɣaazɔ te ɣɛni zéea é te zɔ̃wɔ wulo é kpalagi na ɣeea la.”

Sakpegi é vile tɔnɔ‐ba wɔtii va

45É ɣɛni wɔnɔ tea, “Gala ta masadai wulovɛ è ɣɛ podi‐lɔɔ nui nii é tɔnɔ‐ba wɔti vagɔ ɣaa ziɛzu. 46Tei sa é wɛlɛni ta va tɔnɔ wala ƃakpai ba, é liini é ŋɛnii ɣaazɔ zɔ̃wɔ wulo é ɣɛni zéea é zɛba sa é geea.

Sakpegi é vile ƃelei va

47Ziizɛ ɣɛni tea, “Gala ta masadai wulovɛ wɔnɔ è ɣɛ ƃelei na te pilini yuwu wu feza mazii ɣaazɔ vili su. 48Tei su laa ʋeni ga feza, numaitiɛ te kuloni te da kake ɣa te zei sa te feza pagɔitiɛ wulo su te pu ŋɛni yãka zu te mayowũitiɛ vili ya. 49Vele nɔ na yá ɣɛɛ la ga ŋetea‐ɣaa‐ƃela foloi. Gala ta ɣeelaitiɛ ta va te tuƃo‐vele‐yowũ‐wulo veaitiɛ wulo tele‐bo tuo‐wo beaitiɛ zu te te vili ŋabu zebei zu. Ná ɣa numaa ta ɣɛ wɔlɔzu na tiɛ yĩ gaa mi.

Ŋɛni niinɛ ƃɔga mawɔlɔ‐zaɣa

51É ɣɛni tea,“? Wo niitiɛ ɣaazɔ ɣaa ɣaa?” Te ɣɛ ma, “Ooi.” 52É ɣɛ te ma, “Na ma tɔ‐dɛɛ ɣala‐mɔi nɛpɛ kála bogɛi Gala ta masadai ʋaa ma máʋaa wulovɛ è ɣɛ pɛlɛ wũda nui yá ŋɛni niinɛ ƃɔga ŋɛni wɔlɔ‐zaɣa te wulo weligi zu.”

Te ɣɛlɛni Ziizɛ va Nazɔi lai zu

53Tei sa Ziizɛ woloni ga sakpegi niitiɛ zɔɔ, é ziɣini na é li. 54Tei é vaani kpɔɔ yui zu, é numaitiɛ ɣala boni ta Ɣala‐feli wɔtaitiɛ wu máʋai wala wulo ga tiɛ tiɛ ɣɛ tea, “Minɛ ɣa zunui nii kele‐ɣelegi nii zɔlɔ woni na ta faa maa‐wɔlɔ‐wɔlɔ kpaaza‐kɛɛ ʋai nii? 55?Nii lei ɔ́ ɣɛ ga kamidai dui? ?Nii lei dée ɔ́ ɣɛ ga Meele? Kɛ̀bɛ déɣɛ zinaitiɛ ta ga Jĩi ƃɔga Zoosɛ é vɛɛ Saimɔ va ta Dudia, kɛlɛi? 56?A da ná seelaitiɛ ɣaazɔ lei dɔ ɣe vɛ? Minɛ mu ka zunui nii fai niitiɛ maa zɔlɔ woga na?” 57Maʋai ɣɛni sa wãlasu te ma. Kɛ̀ Ziizɛ ɣɛni te ma, “Gala daa woo‐wo nu lɛ ga nui ƃaa ɔ́ ƃe ɣɛɛzu má é wulo kpɔɔ yui zu wulu ta kpɔɔ wɔ pɛlɛ wu vɛ.” 58Tɔwɔ ɛ́ lɛ sa faa maa‐wɔlɔ‐wɔlɔ kpaaza tamaa ɣɛɛni na, toku ge zei ta yee‐la‐ma lalai va.

Tällä hetkellä valittuna:

MAFIYU 13: DN1971

Korostus

Jaa

Kopioi