Hch 27
27
Romawejearã Ᵽablote naᵽũataeka
1Torãjĩrã mae, “Ᵽablore, kika wẽkomaka baariwiꞌiarã imarãreoka Italiakaꞌiarã maᵽũatajĩñu”, ĩᵽarimarãre ãrĩka. Suᵽa imarĩ surara ĩᵽamaki Juliore yijare neꞌewaꞌrirũjeraᵽe.#27.1 El uso de “nosotros” (yijare) indica que el autor Lucas estaba presente con Pablo hasta el versículo 28.16. Ĩᵽi César wãmeitatarã surara ĩᵽamaki kimaraᵽe. 2Suᵽa imarĩ Adramitio wãmeika wejeaᵽi iꞌtaeka waᵽururã jãitirã yija aꞌriũꞌmuraᵽe ate. Asia kaꞌiarã ima weje ᵽaᵽitakarã turitaᵽarĩ aꞌyua simaraᵽe iꞌsia waᵽuru. Ĩꞌrĩka Aristarco wãmeikire yijaka aꞌraᵽe. Macedonia kaꞌiarã Tesalónica wejeakaki kimaraᵽe. 3Cesareaᵽi yija aꞌraᵽe. Aᵽerĩmi Sidónwejearã yija eyaraᵽe. Torã eyatirã jia Ᵽablore ĩawãrũwaꞌri jia Juliore kire baaraᵽe. Iꞌsia wejeareka imarã kijeyomarãre Ᵽablore ĩariyaᵽamaka jãjibaaberaᵽaki Julio, “Baꞌirĩjia kire jariwaꞌyua, kire nijirãñu jeꞌe”, ãrĩwaꞌri. 4Sidónᵽi yija oꞌraᵽaka ᵽoto jãjia wĩrõa yijare baeraᵽe. Suᵽa imarĩ wãjia aꞌriwãrũberiwaꞌri Chiᵽre wãmeika jũmurika rĩrĩkaᵽi jãjia wĩrõa eiberaᵽaka ᵽẽꞌrõtoᵽi yija oꞌraᵽe. 5Ciliciakaꞌia, Ᵽanfiliakaꞌia, wãjitãji yija oꞌraᵽe. Toᵽi oꞌritirã Liciakaꞌiarã Mira wãmeika wejearã yija eyaraᵽe.
6Torã eyatirã surara ĩᵽamaki Julio Italiakaꞌiarã aꞌyua ĩꞌrãkũmu waᵽuru kĩatõᵽoraᵽe. Alejandríakaka simaraᵽe iꞌsia waᵽuru. Sarã yija jãiraᵽe saᵽi aꞌyaokaroꞌsi. 7Jãjia wĩrõa baemaka, ĩꞌrãrĩmimarĩa aꞌritirã, kaꞌwisi beꞌerõꞌõ Cnido wãmeika wejea koꞌaᵽito yija eyaraᵽe. Wãjitãji sayija oꞌritaᵽaraᵽe. Yija aꞌraᵽaka wãjitãji jãjia wĩrõa baemaka, wãjia yija aꞌriwãrũberaᵽe. Wejerĩrĩka ᵽẽꞌrõtorã tẽrĩwaꞌritirã Salmona wãmeika wejea yija oꞌraᵽe. Suᵽabaatirã Creta wãmeika jũmurika wãtaᵽi, wĩrõa rãrĩtaꞌairõꞌõᵽi yija aꞌririjaraᵽe. 8Toᵽi rãkuwaꞌritirã, kaꞌwisi beꞌerõꞌõ Lasea wãmeika wejewãꞌtarã, Buenos Ᵽuertos nawãmeyeeirõꞌõrã yija eyaraᵽe.
9Ĩꞌrãrĩmimarĩa sajaritiraᵽe yija aꞌriũꞌmuraᵽaka beꞌrõ. Ᵽuꞌejẽꞌrãka koyiaja jariwaꞌraᵽaka imarĩ werika simaraᵽe riaᵽakiaka. Suᵽa imarĩ,
10—Yijeyomarã yijẽrãkoꞌaikareka õꞌõᵽi moꞌyua, werika simarãñu maroꞌsi. Waᵽuru ñaꞌmirãka, suᵽabaatirã waruakaoka ñaꞌmiᵽatarãka jeꞌe. Maririrãñu jeꞌe aᵽeyari,== Ᵽablore nare ãrãᵽe.
11Iꞌsuᵽaka kẽrĩkoꞌomakaja surara ĩᵽamakire kire ãꞌmitiriᵽẽaberaᵽe. Waᵽuru ĩᵽamakire, suᵽabaatirã waᵽuru temarĩkarimajire ĩꞌrã ĩꞌᵽarãre takaja surara ĩᵽamakire ãꞌmitiriᵽẽaraᵽe. 12“Ᵽuꞌejẽꞌrãka simarãka ᵽoto marakajeᵽããbesarãñu”, ãrĩᵽuᵽajoawaꞌri, iꞌsia ᵽaᵽitakarã ᵽuꞌea nare oꞌririka aᵽerãre yaᵽaberikoᵽeraᵽe. Suᵽa imarĩ, “Fenicewejearã Cretajũmurikarã maꞌriyeꞌe. Torã ᵽuꞌea mare oꞌrirũ”, narãᵽe. Kaꞌarirõꞌõ ᵽañaka simamaka waᵽuru ᵽããrũkirõꞌõrã jãjia wĩrõa baeberijĩka simaraᵽe.
Werika wejea nare baaeka
13Yija aꞌririyaᵽaeka rõꞌõrã jiaja wĩrõa baemaka, “Fenicerã maeyarãñu jeꞌe”, narĩᵽuᵽajoaraᵽe. Iꞌsuᵽaka ᵽuᵽajoatirã Creta jũmurika rijeᵽẽꞌrõtoᵽi yija rãkuũꞌmuraᵽe ate. 14Iꞌsia beꞌerõꞌõ noꞌojĩrãmarĩaja maꞌkaroka ᵽẽꞌrõtoᵽi waᵽururã jãjitaka wĩrõa eiũꞌmuraᵽaka. Iꞌsia wĩrõa Nordeste wãmeika simaraᵽe. 15Jãjia wĩrõa waᵽururã baemaka wãjitãji yija aꞌriwãrũberaᵽe. Suᵽa imarĩ wĩrõa eꞌewaꞌraᵽaka uᵽakaja yija aꞌraᵽe mae. 16Kũᵽajĩka jũmurika Cauda wãmeika rãrĩtaꞌaiᵽẽꞌrõtoᵽi jãjitaka wĩrõa baebeyu ᵽẽꞌrõtoᵽi yija oꞌraᵽe. Suᵽa imarĩ kaꞌwisi beꞌerõꞌõ kũmumakarãka najiꞌabaawaꞌraᵽaka neꞌeraᵽe. Waᵽururã sayieᵽããtirã sanaᵽiꞌᵽeraᵽe. 17Kũmumakarãka namaajããraᵽaka beꞌerõꞌõ ᵽãukãrõaᵽi waᵽuru naᵽiꞌᵽeraᵽe jiyia sañiꞌaokaroꞌsi, wĩrõa baemaka sañaꞌmiaꞌsi ãrĩwaꞌri. Iꞌsia beꞌerõꞌõ, “Sirte wãmeika ᵽõꞌsirõꞌõrã wĩrõa baeᵽũatarãkareka ᵽuri saweriᵽañarañu”, ãrĩᵽuᵽajoawaꞌri, wĩrõa sarã eirũkia sayaᵽãia narueraᵽe mae, waᵽuru jãjia turikoreka. Suᵽa imarĩ wĩrõa baeᵽũataraᵽaka uᵽakaja yija aꞌraᵽe mae. 18Suᵽa imarĩ aᵽerĩmi ᵽuri wĩrõa jãjia baetẽatamaka, waᵽurureka imaraᵽaka waruaka riaᵽakiakarã nabareũꞌmuraᵽe wiibaaᵽañaka sajayaokaroꞌsi. 19Aᵽerĩmi ate waᵽurureka imaraᵽaka ᵽãukãrõa, sayaᵽãia, waᵽuru tuarũkia, ritaja baꞌirĩjia riaᵽakiakarã nataaraᵽe. 20Ĩꞌrãrĩmi uᵽakaja jimarĩ oko ũmakaka imamaka, tãꞌᵽia, aiyakaoka õiberaᵽaka. Suᵽabaatirã yijare jãjia wĩrõa eimaka, “Õñia imaberijĩka maime”, yija ãrĩᵽuᵽajoaraᵽe.
21Ĩꞌrãrĩmimarĩa baꞌabekaja yija imaraᵽe. Suᵽa imarĩ miꞌmirĩkatirã ikuᵽaka Ᵽablore jairaᵽe:
—Creta ᵽaᵽitakarã yijairaᵽaka mija yiꞌririkareka, ikuᵽaka baꞌiaja majũaberijĩñu. Suᵽabaatirã waᵽuruoka bitamarĩberijĩka, waruakaoka mariataberijĩñu. 22Maekaka ᵽuri mija wayuᵽiꞌriaꞌsi. Ika waᵽuru ririkoꞌomakaja, ĩꞌrĩkaoka makaki riribesarãki. 23Ikuᵽaka sime: Ñiᵽamaki Tuᵽarã, kiyaᵽaika uᵽakaja yiyiꞌririjayuka, ñami yiᵽõꞌirã ángelre kiᵽũatakoꞌo. 24Yiᵽõꞌirã etatirã, ikuᵽaka yire kibojakoꞌo: “Ᵽablo, mikĩkiaꞌsi. Romawejearã eyatirã ĩᵽi César wãjitãji, ‘Oka yire imabeyua’, kire merĩrãñu. Suᵽabaatirã mika waᵽuruᵽi aꞌyurãroꞌsi Tuᵽarãre mijẽñerijayu uᵽakaja mire kiãꞌmitiyu. Tãrĩᵽatarãñurã nimauᵽatiji”, ángelre yire ãrĩkoꞌo. 25Suᵽa imarĩ okajãjia mija imabe yijeyomarã. Tuᵽarãte yiꞌriwaꞌri, “Ángelre bojaika uᵽakaja simarãñu”, ñarĩᵽuᵽajoayu. 26Iꞌsuᵽaka simakoꞌomakaja, jũmurikarã waᵽuru eirãka ᵽoto torã matuirãñu,== Ᵽablore yijare ãrãᵽe.
27Adriático wãmeika riaᵽakiakareka sayaᵽairõꞌõrãja wĩrõa yijare baeᵽũatayukãꞌãja ĩꞌᵽakuri jẽrĩtarika seyawaꞌraᵽe ruᵽu. Iꞌsiñami ñeꞌmetãjirõꞌõjĩrã, “Kaꞌiarã maeyaerã baayu”, waᵽuru tuarimajare ãrãᵽe. 28Suᵽabaatirã ñutakãrõaᵽi ãta kãrõbaatirã najẽrãbaaraᵽe, “¿Noꞌojĩrã ĩki sime?”, ãrĩwaꞌri. Treinta y seis metros rõꞌõjĩrã ĩki simaraᵽe. Sabeꞌerõꞌõ ñoaᵽañakarã ate najẽrãbaamaka veintisiete metros rõꞌõjĩrã ĩki simaraᵽe. 29Ãtarã waᵽuru eirãka ᵽoto yija ñamiaꞌsi ãrĩwaꞌri, botarakabi wakaika ᵽota ᵽakiaka#27.29 Cuatro anclas. ñutakãrõa ñoakaᵽi kãrõbaatirã waᵽuru itoᵽeᵽẽꞌrõtoᵽi sanañaꞌmetaraᵽe. Waᵽuru meñarãka ᵽoto sabaiᵽarũ ãrĩwaꞌri suᵽa nabaaraᵽe. Suᵽa baatirã ñojimarĩji sawãrĩrika yaᵽawaꞌri Tuᵽarãre najẽñeraᵽe. 30Torãjite waᵽuru tuarimajare ruꞌririka ᵽuᵽajoakoᵽeraᵽe. Waᵽuru ᵽũꞌearã, wakaika ᵽota ᵽakiaka ñaꞌmetaerã nabaayu ãñu uᵽakaja kũmumakarãka nayieñaꞌtaraᵽe. 31-32Iꞌsuᵽaka nabaamaka ĩawãrũwaꞌri, surararãka suᵽabaatirã niᵽamakireoka ikuᵽaka Ᵽablore bojaraᵽe:
—Waᵽuru tuarimajare rurirãkareka ᵽuri, mija tãrĩwãrũbesarãñu,== surararãkare kẽᵽakãꞌã, kũmumakarãka ᵽiꞌᵽekoᵽeka nayiitaꞌruiraᵽe, “Sõñu uᵽakaja sameñaᵽarũ”, ãrĩwaꞌri.
33Bikitojo ñamiji neiᵽuᵽurõꞌõ ikuᵽaka Ᵽablore yijare ãrãᵽe:
—Mija baꞌabe ᵽañakama kũᵽajĩ. Ĩꞌᵽakuri jẽrĩtarika sajaritiyu, wayuᵽiꞌribaraka, baꞌabekaja mija ima. 34“Jia rikitubaritirã, mija imabe, tãrĩrãñurã mija”, ãrĩwaꞌri mijare yibaꞌarũjeyu. Mija wayuᵽiꞌriaꞌsi. Ĩꞌrĩkaoka mijakaki reyabesarãki,== Ᵽablore yijare ãrãᵽe.
35Suᵽa imarĩ ᵽan rikatirã, “Jia mibaayu Tuᵽarã”, kẽrãᵽe yija ĩaraᵽaka wãjitãji. Kũᵽajĩ ñaꞌkataꞌarĩ eꞌetirã kibaꞌaraᵽe. 36Iꞌsuᵽaka kibaaraᵽaka ĩawaꞌri, okajãjia yija jaraᵽe. Suᵽa imarĩ yija imaraᵽaka rakamaki sayija baꞌaraᵽe. 37Doscientos setenta y seis rakamaki ᵽoꞌimaja yija imaraᵽe iꞌsia waᵽuruᵽi aꞌraᵽarã. 38Torã mae, yija baꞌariyaᵽaraᵽaka rõꞌõjĩrã yija baꞌaraᵽe. Baꞌaweatirã trigo nabareᵽataraᵽe, waᵽuru wiibaka jayaokaroꞌsi.
Waᵽuru ñaꞌmika
39Sawãrãraᵽaka ᵽoto waᵽuru tuarimajare jũmurika ĩakoꞌomakaja, “Iꞌsia wãmeika sime ika jũmurika”, narĩwãrũberaᵽe. Iꞌsia jũmuri ritakarã ᵽõꞌsia õimaka, “Torã maᵽããyeꞌe”, narĩᵽuᵽajoaraᵽe. 40Suᵽa imarĩ wakaika ᵽota ᵽakiaka waᵽuru ñiꞌaokaroꞌsi mamarĩ nañaꞌmetaeka nayiitataraᵽe. Suᵽa imarĩ ĩkirã okowatoᵽekarãja satuiraᵽe. Suᵽabaatirã waᵽuru temarĩkarũkia sarĩꞌmekoreka naᵽiꞌᵽekoᵽeka nakuteraᵽe ate satemarĩkaokaroꞌsi. Suᵽabaatirã wĩrõa eirũkia sayaᵽãia saruᵽurõꞌõᵽi imaekato namiataraᵽe. Suᵽa imarĩ ᵽõꞌsiᵽẽꞌrõtorã waᵽuru waawaꞌraᵽaka mae. 41Torã sawaawaꞌraᵽaka ᵽoto koᵽakaja waᵽuru riarijerã eyaerã baaraᵽaka ᵽoto ᵽõꞌsiarã waᵽuru eiraᵽe. Suᵽa imarĩ koᵽakaja saᵽũꞌerõꞌõᵽi ᵽõꞌsiarã sayairaᵽe. Marãkãꞌã baatirã moꞌriberijĩka simekãꞌãja iꞌtoᵽeᵽẽꞌrõtoᵽi jãjia saᵽaꞌkumaka waᵽuru waꞌriũꞌmuraᵽaka.
42Iꞌsuᵽaka sabaamaka, wẽkomarãre jããerã nabaaraᵽe surararãka. “Nare majããᵽajĩñu, nabariruꞌriaꞌsi ãrĩwaꞌri”, narĩbuꞌaraᵽe. 43Iꞌsuᵽaka narĩkoꞌomakaja surara ĩᵽamaki ᵽuri Ᵽablore õñia imarika yaᵽaraᵽaki. Suᵽa imarĩ kisurararãkare nare kijããrũjeberaᵽe.
—Mija bariwãrũirã wãrũaja bariwaꞌritirã riarijerã mija aꞌᵽe mae,== kẽrãᵽe mamarĩ.
44Suᵽabaatirã aᵽerã bariwãrũbeyurãte,
—Waᵽuru ᵽãimirãkaᵽi mija aꞌᵽe riarijerã,== kẽrãᵽe. Suᵽa imarĩ ĩꞌrĩkaoka riririmarĩaja kaꞌiarã yija eyaᵽataraᵽe.
Tällä hetkellä valittuna:
Hch 27: TNC
Korostus
Jaa
Kopioi
Haluatko, että korostuksesi tallennetaan kaikille laitteillesi? Rekisteröidy tai kirjaudu sisään
© 2019, Wycliffe Bible Translators, Inc. All rights reserved.
