Matiu 17

U tuenrei tere Iesu e palis

(Mak 9:2-13, Luk 9:28-36)

1I murina u tönomo u lan be Iesu e lue raiena ere Pita, na u muntoulana ere Jemis mere Jon, me peigi pepeisa mera neien ieluna u pokus u pannen koru. 2Ba tara pöata ti tara uaien tere Iesu, ba nori e tareier te palis uu tuenrei tere Iesu: a matanen e alesala herei a pitala, na u hasobö i tanen e hiakan töa bate alesala hatagala koruna. 3Be Mosis mere Elaitsa e songotei butu hasingoto ria i rehinen be ranga gono meren.

4Be Pita e rangana me poeiena tere Iesu, “O Tsunono, e nigana te ka uariara teka. Tego ngil ia lö, ba lia te kuiegou a topisa taluhu teka, a töa i tamölö, na töa tere Mosis, na töa tere Ilaitsa.” 5Tara pöata te ranga noaien, bu köasi u alesala koru emi hoho ranen ba u töa u raranga e butu nama turu köasi me poeiena, “Nonei a Pien Tson a tsomi koru i tar teka. Alia e haniga korue gen. Alimiou ego hengoe men!” 6Pöata ti hengoeia u katunun tsitsilo u raranga teka ba nori e matout korur, me tuhatukun rana i puta.

7Be Iesu e la uanama i taren me sebele ranen me poeiena, “Takei iam. Alimiou goma matoutmi!” 8Ba pöata ti tara seien ba nori e tareier e Iesu pepeisa. 9Pöata ti koul puta men turu pokus be Iesu e ranga mera nen, “Alimiou ema tatei hatei moi ta töa ta katuun aha te tara muma limiou e antunana te takei pouts goa lia, Alia tu butun Katunuma, tara tou mate.”

10Ba u katunun tsitsilo e rangateier e Iesu, “Taraha tsiponi ba u tson hihatuts tara Lo te poeier e Elaitsa ega mam nema e Mesaia?” 11Be Iesu e ranga palis ranen me poeiena, “E Elaitsa ena la mam pouts hamana nama ba nonei temi kato hamatsköena a mamanaka. 12Na lia e hatei ragou limiou e Elaitsa e la hakapama, kaba u katuun ima tara mareien ba nori e markato hohomi menarien ti mar ngil uaien. Na nonei noahas tena markato hohomi has meroien lia, Alia tu butun Katunuma.” 13Ba u katunun tsitsilo i tanen e töan atei siler nonei e ranga meraien e Jon a Tsonun Baptais.

E Iesu e kato haniga poutsi a pien tson te kamei a liliahanei a omi

(Mak 9:14-29, Luk 9:37-43)

14-15Pöata ti la uamen turu katuun, ba töa katuun e la uanama tere Iesu, me hatukunna i matanen me poeiena, “O Tsunono, alö go taatagi nema a pien tson i tar! Nonei e roron kotskotsibonguna na peisanen e omi koruna, na nonei e roron rus uana turu tula na iahana ramun. 16Alia u la mena meien turu katunun tsitsilo i tamölö, kaba nori ima antunan kato hanigeien.”

17Be Iesu e ranga palis ranen me poeiena, “Alimiou u katuun u hahamana koru na limiou ema matskömi! A lahisa pöata ti ka gono meraia lia limiou? Na lahisa pöata ti söateia lia u nikamits i tamilimiou? La mena mumei a pien i tar!” 18Be Iesu e tsuga barena u liliahanei u omi ti kaia tara pien, ba nonei tara tsi pöata puku noahas ba pien tson e niga poutsuna. 19Ba u katunun tsitsilo e la uarima tere Iesu memi rangata momouse ren, “E hana ba lam tema antunan tsuga ba ramulei u liliahanei u omi?”

20-21Be Iesu e poeiena i taren, “Taraha, a tsi nihamana i tamilimiou e tetenei koruna. Na lia e hatei hamana koru ragou limiou, Sanena u nihamana i tamilimiou ega popoia tara ngalin mastet, alimiou e tatei peimiou turu pokus teka, ‘Takei ban a makum teka bate la uamula ili,’ ba nonei te takei hasina bate lana. Ba limiou te tatei katoe mou a mamanaka.”

E Iesu e ranga lenin tegana mate uen bate takei poutsuna

(Mak 9:30-32, Luk 9:43-45)

22-23Ba pöata ti gono hobotoia u katunun tsitsilo i Galili, be Iesu e poeiena i taren, “Alia tu butun Katunuma e susukun hala menari i limar u katuun tena atung hamate riou lia. Kaba turu hatopisana u lan ba lia te takei pouts gou.” Ba u katunun tsitsilo i tanen e taatagi korur.

E Iesu e hol a takis tara Luman Lotu Pan

24Ba tara pöata te la uu e Iesu na u katunun tsitsilo i tanen i Kapenium, ba u katunun lulu monina tara Luman Lotu Pan e la rima memi rangateier e Pita, “A tson hihatuts i tamilimiou e hol hasena a takis tara Luman Lotu Pan, tsime?” 25Be Pita e poeiena, “Aa.” Ba tara pöata te tasuia e Pita i luma me katsin rangana, be Iesu te ranga mam tsiponna i tanen me poeiena, “O Saimon, u saha u mar hakats i tamölö? Esi te holena a takis turu king tara man han i puta? U katuun hamatskö tere king tsi u katuun halhal?” 26Be Pita e ranga palisenen me poeiena, “U katuun halhal.” Be Iesu e poeiena, “Aa, Na tega markato has uen i tarara. 27Kaba, ara ena mots kato haraharaha raiera u katuun teka. Lala i ramun balö tena lase muma ta iena. A iena tutuun tena lase mölö alö na hoso hapange mou a rungunen bate sabie mou a töa a moni, balö tena lue mumen batemi hole mien a takis i tarara.”

انتخاب شده:

Matiu 17: HLA 2020

های‌لایت

به اشتراک گذاشتن

کپی