Matiu 16

U katuun i ngilin tarein tu mirakol

(Mak 8:11-13, Luk 12:54-56)

1Na tara pöata ti lama u Parasi na u Sadiusi tere Iesu. Ba nori e rangate rien tegi hatara meraien tu mirakol tego harötein a nitagala tere Sunahan. 2Be Iesu e ranga palis ranen me poeiena, “Pöata te tsirukuna a pitala ba limiou te pemiou, ‘Ara e ka merou a pöata a niga, taraha u kolö e röröna.’ 3Ba tara bongbong, ba limiou te pemiou, ‘A langits e polo nou i romana, taraha u kolö e röröna na e ruruhanana bate tara here nei a langits.’ Alimiou e atei silemiou te mouna uana a mar nitaratara i kolö. Kaba limiou ema atei silemi te mouna uana a man hiharöto tara kapakapana pöata. 4U katuun u omi ti hapolasa hakapa ban e Sunahan e kato siler tegi tara menaien tu mirakol. Kaba lia ema tatei haröto nagi tu töa tu mirakol. A hatöatongo lahas tere Jona a propetina i manasa te hatara ragi lia alimiou.” Be Iesu e la ba ranen.

U is turu Parasi na u Sadiusi

(Mak 8:14-21)

5Ba tara pöata tina tukuia u katunun tsitsilo tere Iesu i hapalana Ramun, ba nori e töan hakats sabe ner ti solopala mena leien ta beret. 6Be Iesu e poeiena i taren, “Alimiou go tarakap hanigaiam bate hanei silemou u is turu Parasi na u Sadiusi.”

7Ba nori e tanian hiararanga pouts ria i taren me poeier, “Nonei e mar ranga uana teka, taraha ara ema lue rimei ta beret.” 8Ba pöata te atei sileia e Iesu a saha ka ti hiararanga naien, ba nonei e poeiena i taren, “A tsi nihamana i tamilimiou e tetenei koruna. E hana ba limiou te hiaraharaha pouts silemiou tema lu mena mumei limiou ta beret? 9Alimiou bema atei noa hasmi? Alimiou go hakats pouts neiam ti posepose mena mei lia a tolima a beret tara 5,000 tara katuun na man kalobaka ti ongo hasaputeiam limiou. 10Na limiou go hakats pouts has naiam a tohit a beret tara 4,000 tara katuun na man kalobaka ti ongo hasaputeiam limiou. 11E ha koruna ba limiou tema atei sile mulei, alia ema ranga silegulei a beret? Kaba hanei sileiam u is turu Parasi na u Sadiusi!”

12Ba u katunun tsitsilo i tanen e töan atei sil taler nonei ema ranga silei u is te katoeri a beret, kaba nonei e ranga sil tegi hanei sil meien u hihatuts u omi turu Parasi na u Sadiusi.

E Pita e ngöei e Iesu e Mesaia

(Mak 8:27-30, Luk 9:18-21)

13Pöata te la uu e Iesu tara han i Sisaria Pilipai, ba nonei e rangata rena u katunun tsitsilo i tanen me poeiena, “U katuun e ngöeri, Alia tu butun Katunuma, esi?” 14Ba nori e ranga palise ren me poeier, “A palai e poeier alö e Jon a Tsonun Baptais, na palai e poeier alö e Ilaitsa na palai e poeier alö e Jeremaia tsi alö a töa turu propet.”

15Be Iesu e poeiena taren, “Ga limiou e pemiou alia esi?” 16Be Saimon Pita e ranga palisenen me poeiena, “Alö e Mesaia te hopö kapiin e Sunahan. Alö a Pien Tson tere Sunahan te töatöa nitöana.”

17Be Iesu e poeiena i tanen, “O Saimon a pien tson tere Jona, e Sunahan e kalale noulö! Taraha a niatei teka ema hatei nelalei ta katuun tuun. Kaba e Tamar te kana i Kolö te hale nameien lö. 18Na lia e hateie goulö, alö e Pita, a hatu. Na ieluna a hatu teka alia e hatakeiegoa a luman lotu i tar i tanen. Na nitagala tara tou mate ema antunan tagala saluhe ba na nouien. 19Alia e hale goi lö a kii na tara Nipepeito tere Sunahan. A saha ka te kitse moalö i puta, e kits hase roa i Kolö. Na saha ka te haniga namoa lö i puta, e haniga has naroa i Kolö.” 20Be Iesu e ranga hatagala merena u katunun tsitsilo i tanen egima tatei hate ii ta katuun nonei e Mesaia.

E Iesu e rangein u kamits na tou mate i tanen

(Mak 8:31–9:1, Luk 9:22-27)

21Tara pöata teka e Iesu e tanian hatei ri u katunun tsitsilo i tanen tega mate uen ba nonei e poeiena, “Alia e la uagou i Jerusalem balia tena sagoho kamits goa i limar u tsunono, na u pris pan, na u tson hihatuts tara Lo. Ba nori tena atung hamate riou lia, ba lia te takei pouts gou turu hatopisana u lan.”

22Be Pita e lu mena neien i harerehi mena ranga hapiou menen me poeiena, “O Tsunono, e Sunahan ega hapioun a ka teka! Ego ma tatei butu koruia i tamölö!” 23Be Iesu e habiritsina me poeiena tere Pita, “Lau i murir o Satan! Alö e hatu kap namou lia. Taraha alö ema hakei mia u hakhakats i tamölö tere Sunahan. Alö e ka lasmem u hakatsin a katuun tuun!”

24Be Iesu e poeiena turu katunun tsitsilo i tanen, “Esi te ngilin kukute nanou lia ega solopali a mamanaka te ka uana i peisanen, bate töan söatena a kuruse i tanen bate kukutie nou lia. 25Esi te pile kap haröto nena a nitöatöa i tanen e tia ba nanouen. Kaba a katuun te mate silena te ngil mena neien lia, nonei ena sabie nou a nitöatöa te ka nitöana. 26Tega lueia ta katuun a mamanaka hobotona i puta, kaba nonei e hatia hakapi a nitöatöa i tanen, ga mamanaka teka e mar taguhu menoien ime? Nonei e hala nanou ta saha ta ka bate lu poutse nou a nitöatöa i tanen? 27Alia lahas tu butun Katunuma te la gono meguma romana u angelo i tar turu ualesala pan tere Tamar, ba lia temi hala palis ragoui u katuun ti kato homi a ka a omi na u katuun ti kato haniga a ka a niga. 28Alia e hatei hamana ragou limiou, a palair u katuun te tuolur teka ema antunan materi, e antunana tegi tara menien Alia tu butun Katunuma ena la here gumei romana a king.”

انتخاب شده:

Matiu 16: HLA 2020

های‌لایت

به اشتراک گذاشتن

کپی