Yoane 8

1Sombi ŵaYesu ŵaliile kulupili lwaMaolife. 2Ŋgamailo ulucelocelo ŵaliisile liŵili kwitempuli, lomba aŵantu ŵonse ŵaliisile kuli ŵo; naŵo ŵaliikele pansi nekuŵasambisya. 3Peŋka aŵalembesi neŵaFalisi ŵaliletele umwanakasi uwaikatilwe ili alukucito'wucende; peŋka pakumwikalika pakati keŵumba, 4ŵalilaŵile kuli ŵaYesu ati: MweŵaSambisi, uyu-mwanakasi aikatilwa ili alukucito'ŵucende; 5peŋka Mose alituŵulile mumafunde akwe ati, aŵakuŵe'fi muŵapamale amabwe: mbamweŵo mulukumulaŵilila syani? 6Sombi ŵalilaŵile lukoso ifyo, pakuti pakuŵesya, ati ŵaŵone ifyakuŵasinina. Sombi ŵaYesu ŵaliineme lukoso ukulukulemba peloŵa kumunwe. 7Sombi pakulukuŵepusisya liŵili liŵili ŵo ŵaliinucile, nekulaŵila kuli ŵo ati: Pali mweŵo uyo utaakwete-fyakuŵifya ataŋge-ko ukumupose'bwe! 8Peŋka ŵaliineme liŵili ukulukulemba peloŵa kumunwe. 9Naŵo, pakumfwe'fyo, nekupamwa muli ŵacimaŋga ŵaŵo, ŵalifumine umo umo, ukutatika kumukulu-ŵantu nekufika nakuŵakupela-ko; nekusyala ŵaYesu ŵeŋka nemwanakasi uyo uwaimakene pakati. 10Eli ŵainucile ŵaYesu, nekulaŵila kuli ye ati: Wemwanakasi, mbaŵali kulipi? Tapali-po uwakukusinina? 11Naye ati: Papa neli umo, Sikulu. Lomba ŵaYesu ati: Naneŵo, tesi ŋkusinine-po; koya, tekubwesya-mo liŵili ukuŵifya.

12Nakaŵili ŵaYesu ŵalilaŵile kuŵantu ati: Neŵo enekutuŵa ukwamucalo capansi. Uyo uwakundonda neŵo taakenda mumfinsi, sombi akalukwikele nekutuŵa kwamweo. 13Pakuti pali fyefyo aŵaFalisi ŵalilaŵile kuli ŵo ati: Mweŵo mulukulisimicila mweŵene; lomba ukusimika kwenu takuli kwacine. 14Sombi ŵaYesu waliwaasucile ati: Naŋgaŵa ati ndukulisimicila nemwine, ukusimika kwanji kwacine: pakuti ndiisi-ko uku nafumine, nakoko uku ndukuya; sombi mweŵo tamwisi-ko uku mfumine, neli nikoko uku ndukuya. 15Mweŵo mulesya ukwamunefu kweŋka: neŵo nsiesya-po aŵantu neli umo. 16Cine naŋkesye, ukwesya kwanji kwacine; pakuti nsili neŋka, sombi ndi naŵo ŵaTata aŵantumine. 17Icine, namumafunde mulilembelwe ati ukusimika kwamboni siŵili kulaŵa-po kwacine. 18Neŵo enendukulisimicila; nakaŵili ŵaTata aŵantumine naŵo ŵalukusimika ifyakuli neŵo. 19Pakuti pali fyefyo aŵo ŵaliŵepwisye ati: MbaŵaWiso ŵali kulipi? Kumfwa ŵaYesu ati: Tamunjisi neŵo, naŵaTata tamuŵesi: ŋga mulinjisi neŵo ŋga muliŵesi naŵaTata. 20Amasiwi ayo ŵalialaŵilile mucipinda icakuŵicilamo amaŵoni, pakusambisya mwitempuli; sombi tapali-po umuntu uwaŵekete-po, pakuti impindi yaŵo lomba taiŋgatika.

21Peŋka ŵalilaŵile liŵili kuli ŵo ati: Ŋkakumbuluka; lomba mweŵo mukalukumfwaya-fwaya; sombi mukafwilamo mukuŵifya kwenu: uko uku ŋkaya neŵo, tamukesiŵa' mweŵo ukwisa-ko. 22Pakuti pali fyefyo aŵaJuda ŵalilaŵile ati: Kani akaJiipaya? pakuti alukulaŵila ati—Uko uku ŋkaya neŵo, tamukesiŵa mweŵo ukwisa-ko. 23Naŵo ŵalilaŵile kuli ŵo ati: Mweŵo mulitulile pansi; neŵo nditulile kwiulu; mweŵo muli ŵamucalo cino; neŵo nsili wamucalo cino. 24Pakuti pali fyefyo epo nalaŵilila kuli mweŵo ati—Mukafwila-mo mukuŵifya kwenu; pakuti kani tamulukucetekela ati NDI, icine mukafwila-mo mukuŵifya kwenu. 25Peŋka kaŵalaŵila kuli ŵo ati: Mbamwe nimweŵanani? Kumfwa ŵaYesu kaŵaŵeŵa ati: Ndi wopele uyo unalukumuŵuleni napakutaŋga. 26Ifyeŵo ifinji ifyakuli mweŵo ndi nafyo ifyakulaŵila nekusololola; sombi aŵo aŵantumine eŵacine; kaŵili ndukulaŵila kuŵantunsi ifyeŵo ifyo ifi naumfwile kuli ŵo. 27Sombi aŵantu aŵo taŵaisiŵile-po ati ŵalukweŵa ifyaŵaWisi. 28Pakuti pali fyefyo ŵaYesu ati: Ili mukamusuntula Umwana waMuntunsi, elyo mukesiŵa ati neŵo NDI; kaŵili ati nsilukucita-kantu neŋka: sombi koti nifyopele'fyo ifi ŵansambisye ŵaTata, efi ndaŵila. 29Kaŵili aŵo aŵantumine ŵali naneŵo; taŵandekele neŋka lukoso; pakuti ndacita impindi yonse ifyakuŵatemwesya. 30Lomba pakulaŵile'fyo aŵantu aŵenji ŵaliŵacetekele.

31Pakuti pali fyefyo ŵaYesu ŵalilaŵile kuli ŵaŵo-ŵaJuda aŵacetekele kuli ŵo ati: Kani mulukwikala mumasiwi anji, muli ŵasambile ŵanji icine; 32kaŵili mukalukwisiwa ŵucine, naŵo ŵucine ŵukamukakululeni. 33Naŵo ŵaliŵaasucile ati: Sombi fweŵo tuli ŵana ŵakwe Ablaamu, tatuŋgatekwa-po insiku syonse kuŵantu ŵonse neli umo; mbanindo mweŵo mulukulaŵilila ati—Mukakakululwa? 34ŴaYesu naŵo nekuwaasuka ati: Cine cine, ndukumuŵuleni ati: A ŵantu ŵonse ulukucita ŵumbifi, uyo musya waŵumbifi. 35Sombi umusya taekalilila muŋanda, koku; umwana ewikalilila. 36Peŋka kani Umwana akamukakululeni, mukalukukakulucile icine.

37Ndiisi ati muli ŵana ŵakwe Ablaamu; sombi mulukufwayo'kunjipaya; pakuti amasiwi anji taabwene injikalilo mumitima yenu. 38Ifyo ifi nalukuŵona kuli wa'Tata, efi ndaŵila; fyopele'fyo namweŵo ifyo ifi mwalukumfwa kuli ŵawisinwe, efi mucita. 39Naŵo ŵaliŵaasucile nekulaŵila ati: Wisifwe niAblaamu. ŴaYesu nekulaŵila kuli ŵo ati: Ŋga muli ŵana ŵakwe Ablaamu, ŋga mulukucita ifyakucita fyakwe Ablaamu: 40sombi ŵukumo mulukufwayo'kunjipaya, nemuntu uwakulaŵila kuli mweŵo ŵucine, uŵo naumfwile kuli ŵaLesa. Ablaamu taacitile-po ifyo, tau. 41Mulukucite'fyakucita fyakwe wisinwe. Naŵo ŵaliŵaasucile ati: Tatwafyelwe kuŵucende; ŵawisifwe ŵamo tuli naŵo, niŵaLesa. 42ŴaYesu ŵalilaŵile kuli ŵo ati: ŴaLesa ŋga ŵo niwawisinwe, ŋga mulintemenwe naneŵo; pakuti kuli ŵaLesa eko mfumine ukwisa kuno; pakuti nsiisile lukoso nemwine, sombi niŵo aŵantumine.

43Mbanindo tamulukwisiwa ifi ndaŵila? Nipakuti mwafilwa ukumfwa amasiwi anji. 44Muli ŵana ŵakwe wisinwe umusensesi; kaŵili ukukumbwa kwakwe wisinwe eko mulukufwayo'kucita. Uyo ali mwipaisi napakutaŋga; kaŵili taemakanine muli ŵucine, pakuti muli ye tamuli ŵucine neli ŵunini. Pakulaŵila ye uŵufi, alukulaŵile'fyakwe umwine eŋka: pakuti ye waŵufi, euŵufyala. 45Sombi neŵo, pakuti ndalaŵila ŵucine, tamulukuncetekela. 46Mbaninani pali mweŵo uŋgansinina ukuŵifya? Kani ndalaŵila ŵucine, mbanindo tamulukuncetekela? 47Umuntu waŵaLesa alomfwisya amasiwi aŵaLesa; pakuti pali fifi mweŵo tamulukuomfwisya, pakuti tamuli ŵaŵaLesa.

48Lomba aŵaJuda ŵaliŵaasucile ati: Kansi tatulilaŵile bwino pakweŵa ati: NiwemuSamalya, uli neciŵanda? 49ŴaYesu nekwasuka ati: Nsikwete-ciŵanda; sombi ndalemya ŵaTata; peŋka mweŵo mulukumpufya. 50Sombi nsilukufwayo'ŵuleme bwanji nemwine; epo ŵali Aŵafwaya nekusololola. 51Cine cine, ndukumuŵuleni ati, aŵantu ŵonse uyo ulukulama amasiwi anji, taakaŵona-po imfwa insiku syonse lukoso. 52Naŵo aŵaJuda kaŵaŵeŵa ati: Cine pano tuliisi ati uli neciŵanda. Ablaamu alifwile, neŵakusimika naŵo ŵalifwile; lomba weŵo ulukulaŵila ati: Uyo ulukulama amasiwi anji, taakomfwa-po imfwa insiku syonse lukoso. 53Kani weŵo ulicilile uŵukulu napali wisifwe Ablaamu, uyo uwafwile? Kaŵili neŵakusimika ŵalifwile. Mbaweŵo ulukuliesya ati niwenani?

54ŴaYesu nekwasuka ati: Kani ndukulilemya nemwine, uŵuleme bwanji bwalukoso; niŵaTata aŵalukundemya, ŵopele aŵo mulukweŵa ati, niŵaLesa ŵesu; 55kaŵili tamwaŵesiŵile-po, sombi neŵo ndiŵesi. Kani neŵo niŋgakana ati nsiŵesi, lomba niŋgapalana nenu, waŵufi; sombi ndiŵesi, nemasiwi aŵo ndalama. 56Ablaamu wisinwe walukusaŋgalalo'kuwona akasuŵa kanji; naye alikabwene, nekutemwa. 57Pakuti pali fyefyo aŵaJuda ŵalilaŵile kuli ŵo ati: Nemyaka yoŵe taiŋgakumana neli makumi asanu, weŵo lomba walimubwene Ablaamu? 58ŴaYesu nekulaŵila kuli ŵo ati: Cine cine, ndukumuŵuleni ati, ili taaŋgawa-po Ablaamu, lomba neŵo epo NDI. 59Pakuti pali fyefyo ŵalitolawile amabwe ati tuŵapame, sombi ŵaYesu ŵalifiseme nekufuma-mo mwitempuli.

اکنون انتخاب شده:

Yoane 8: AAL59

های‌لایت

به اشتراک گذاشتن

مقایسه

کپی