JOHN 10
10
Nyeeyompa Ümei
1“Üting tingha me Taowe numante ipha ning: aowe nyeekhok taten kaiye ye-ong, hüyangpoi ülao yete jhotte pei, I kuhpa hüyange leihpa. 2#Mk 6.34.Hüyangpoi aowe taten kaiye ongnang I nyeelan tepu nyeeyompa. 3Taten yompawe Ite ta ep tamnang, hüyange nyeelanne I ngao jainang; Iye yoi nyeelan te min me nyiknang hüyange iman woi teinang. 4Aope Iye yoijing nyeelan ükhok eplakei iman shaote I kemnang, hüyange nyeelan I pheite woinang hangjingne iman-e I ngao shing. 5Yeshingpu kahta ja phei iman yewoilak, hüyangpoi I mepu phette tailak hangjingne iman-e ngaowüng yeshing.”
6 #
Jn 16.25. Jesuwe imante tüopa ngaolep i, hüyangpoi Iye hanghe i, iman-e yeshing ok.
Jesu Nyeeyompa Ümei
7Tüokhei Jesuwe imante üne-o i, “Üting tingha me Taowe numante ipha ning: Nyeelan jingne taten-a Tao. 8#Jer 23.1; Eze 34.2.Ülaolan üshei aoyin Ü-sheshao me pei iman kuhpa hüyange leihpalan; hüyangpoi nyeelanne imante yejaikülak. 9Tao taten. Ütam Tao kaiye ongma-a yinlak, hüyange yulak onglak hüyange heeijong tüolak. 10Kuhpalan kuhlak jingne, toilak jingne hüyange mengtamlak jingne hei peinang. Iman-e üyin tüolak, hüyange hatüowa wangngoiye tüolak jingne Tao pei.
11 #
Isa 40.11; Eze 34.11-16; Heb 13.20; 1 Pet 5.4; Ütah 7.17; 1 Jn 3.16; Jn 15.13. “Tao nyeeyompa ümei. Nyeeyompa ümeiye nyeelan jingne yoi üyin angtamnang. 12Nanpa kahta, ao nyeeyompa yejema-a nyee nokpu ne yemeng, Iye aope sho peipu ngelakei, nyee tüohyange phette tainang; hüyange showe shüknang hüyange nyeelan yantam nang. 13I phette tainang hangne ima-a, I nanpa ja hüyange nyeelan jingne yeteihtüo. 14Tao nyeeyompa ümei: Taowe ü-nyeelan shingnang hüyange iman-e Tao shingnang; 15#Mt 11.27.Hüke Üpawe Tao hangke shing hüyange Taowe Üpa shing; Hüyange nyeelan jingne ü-üyin angtam nang. 16#Isa 56.8; Jn 11.52; 17.20; Eph 2.13-18; 1 Pet 2.25.Tüopa nyeelan phei ye-ompu üjing ülao nyeelan-o ngohnang; Taowe iman-o woipeilak hüyange iman-e ü-ngao jailak. Hüyange iman ükhong ja, hüyange nyee yompa ja ngohlak.
17“Tüojing üne Üpawe üte kennang hangjingne Taowe nishe leih-e tüolak jingne ü-üyin phanang. 18#Jn 14.31; 15.10; Phi 2.8; Heb 5.8.Aowe-o ü-mepu üyin yahteipu ye-ok. Hatüo ü-nying nyingke Taowe angnang. Hatüo anglak üme wong ngohnang, hüyange hatüo yahyepu oklak wong üme ngohnang. Tüopa nyinge tampu Taowe Üpa mepu tüo.”
19 #
Jn 7.43; 9.16. Üne-o hatüo ngao kaiye Jehudilan yo me teitampu ngai; 20#Jn 7.20; 8.48; Mt 11.18.Iman maapuwe hüke i, “I me laa ngohnangki! I nganang! Hangne Ite jainangki?” 21#Jn 9.32; Woi 4.11.Hüyangpoi ülaolanne i, “Laa ngohpu kahta jawe hüke yengao oklak! Laawe hangke mükmüopa mük eppe tamlak shi?”
Jehudilanne Jesu Yeyah
22Jerusalem me khümjing ghuwaipu mo molak hipak ngoi; hatüo eanyu ne ngoh. 23#Lam 3.11; 5.12.Hüwante Solomon, nokshüm khümjing phang me Jesu kemme ngoh. 24Hüwante Jehudilan I neikonne jemme ta hüyange i, “Nange hangshin ne toman nüngnei ne tamlak shi? Messiah ne jeküma-a tomante üting me ngaiye ipha?”
25 #
Jn 5.36; 10.38. Jesuwe jan, “Taowe numante iyangki, hüyangpoi numan-e üte üting yelak. Taowe Üpa minme lingpu toiye üjing saki phanang; 26#Jn 8.47.hüyangpoi numan-e üting minlak ja hangjingne numan ü-nyeelan ne yeje. 27Ünyeelanne ü-ngao jainang; Taowe iman shingnang, hüyange iman ü-pheite woinang. 28#Jn 17.2; 1 Jn 2.25.Taowe imante jintepu üyin phanang, hüyange iman aope-o yelilak: hüyange aowe-o ü-yak mepu iman yenyie-oklak. 29Üpawe hanghe üte pha hatüowa üshei phei sheyongpupa, hüyange Üpa yak mepu aowe-o nyiene ye-ok. 30#Jn 17.21.Üpa hüyange Tao ja.”
31 #
Jn 8.59; 11.8. Tüophei me Jehudilanne üne-o Ite shüplak jingne long toon. 32Jesuwe imante i, “Üpawe phapu toimei maawe numan sheshao me Taowe linge hüoyangki, tüolan yo mepu ja jingne numan-e üte longe shüp hupu a?”
33 #
Lev 24.16; Mk 14.64. Jehudilanne Ite jan ye; “Toimei jingne toman-e nangte longe yeshüp hu, hüyangpoi nange Kahwang ye-i-yeshepu jingne! Nanga kahta ja, hüyangpoi nange Kahwang ne menghu nang!”
34 #
Jn 8.17; Tüo 82.6. Jesuwe imante jan: “Taowe inang, ‘numan kahwanglan’ she numan ngaokeng me nyanyange yenang a? 35Ngaolaiye hanghe i, jinte üting she toman-e shingnang: hüyange kahta aoyinte Kahwang ngaolan pha imante Iye kahwanglan she nyiknang. 36Üjingnepa-a, Üpawe Tao le hüyange kahtoknyu te Tao shon. Hüma-a, Taowe Kahwang Üha she ipu jingne Taowe Kahwang ye-i-yeshe ja she numan-e iye ok? 37Taowe Üpa toishao yelingpu ne mengma-a, üte üting tahlak. 38Hüyangpoi Taowe tüolan lingküma-a, numan-e üte üting yelakyapoi, numan-e ü-toishaote ütinglak yah, hümme nakshih numan-e Üpa-a üme hüyange Tao Üpa me she teihlak hüyange shinglak.”
39 #
Jn 7.30; 8.59; Lk 4.30. Tüokhei iman-e üne-o I pho ne ngang, hüyangpoi iman yak mepu I yin.
40 #
Jn 1.28. Tüophei me üne-o Jordan yengyin kaiye üwangne Johnne baptipu kente Jesu tai, hüyange tüome I ngoh. 41Kahta maawe I tangte pei. Iman-e i, “Johnne kahnyingwüngha füo hango yeling.” “Hüyangpoi Iye hatüo kahta jeng hanghe yin i üting,” 42#Jn 7.31; 11.45.hüyange tüome ngohpu kahta maawe Ite ütinglak.
اکنون انتخاب شده:
JOHN 10: KONYBSI
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.
