Awˬ hkuiˉ puiˍ ve li‸ 3
3
Chaw yaˇ venˇbaˆ te ve awˬ lawn
1Vuiˬ teˇ ceuˬ lehˬ, Jawˇmawˇ Gʼuiˬsha hkʼa hpanˍ taˍ ve awˬ kaˍ awˬ nu to nuˇ to shaˆ teˇ hpaˍ a‸ kehˉ laˆ ve yoˬ. Yawˇ yaˇ miˇ geh laˬ leh, Hko hkʼaw lo cawˬ ve iˉ shiˍ teˇ hpaˍ hta‸ maˇ gʼa caˇ teh‸ Gʼuiˬsha kʼoˆ laˇ taˍ ve laˇ, teh‸ na nyi ve yoˬ.
2Yaˇ miˇ oˇ ve lehˬ, Hko awˬ kʼaw ji lo cawˬ ve iˉ shiˍ oˇ ve maˇ heˆ kʼo, awˬ nu ve iˉ shiˍ hkʼa peu-eˬ hta‸ ngaˬ hui caˇ hpeh‸ ve yoˬ. 3Gʼuiˬsha lehˬ, iˉ shiˍ oˇ ve teˇ ceuˬ hta‸ htawˇ ka‸ taˇ htawˇ, caˇ ka‸ taˇ caˇ teh‸ kʼoˆ laˇ taˍ ve yoˬ. Ngaˬ hui oˇ hkʼe te ve kʼo gʼa suh tuˬ yoˬ, teh‸vuiˬ hta‸ kʼaw‸ kʼoˆ piˇ ve yoˬ.
4Ya‸ hkʼaˇ vuiˬ kʼoˆ ve, Nawˬ hui maˇ suh taˬ. 5Nawˬ hui awˬ shiˍ oˇ ve hta‸ caˇ ve kʼo, nawˬ hui ve mehˆ shiˍ teˇ cawˬ haˉ hpaw la leh Gʼuiˬsha hkʼe hpeh‸ la ve awˬ hkʼoˆ, da‸ ve leh maˇ da‸ ve awˬ ceuˬ hta‸ shiˍ la tuˬ ve hta‸ Gʼuiˬsha shiˍ taˍ ve yoˬ, teh‸ kʼaw‸ kʼoˆ piˇ ve yoˬ.
6Yaˇ miˇ chi, iˉ shiˍ oˇ ve nyi sha leh caˇ mehˬ ngaw ngaw cawˬ ve hta‸ gʼa mawˬ ve teˇ yanˇ, yawˇ cuˇ yiˍ cawˬ ve kʼo hkʼaˬ ma da‸ jaˇ tuˬ ve hta‸ dawˇ mawˬ la ve yoˬ. Hkʼe te leh iˉ shiˍ oˇ ve hta‸ shaˉ yuˬ leh caˇ nyi ve yoˬ. Yawˇ ve awˬ hpawˇ hta‸ htawˇ caˍ piˇ leh, awˬ hpawˇ htawˇ caˇ ve yoˬ. 7Oˇ htaˇ, yawˇ huiˉ maˬ ve mehˆ shiˍ hpaw la leh, nyiˇ gʼaˇ gʼaˇ awˬ kʼu nyi hpeh‸ chehˇ taˍ ve hta‸ gʼa mawˬ ve yoˬ. Chi hta‸ pa taw, yawˇ huiˉ maˬ maˉ nawˆ hpa‸ chehˆ leh teˇ maˬ peuˬ teˇ maˬ tawˉ nehˉ da‸ peuˬ hkʼaw‸ nawˉ, yawˇ hui ve awˬ to hta‸ beh taˍ ve yoˬ.
8Mvuhˇ hpeu‸ la hpawˇ, Jawˇmawˇ Gʼuiˬsha hko hkʼaw lo laˬ chehˇ ve awˬ hkawˇ hta‸ yawˇ huiˉ maˬ gʼa kaˇ ve teˇ yanˇ, suhˆ cehˬ teˇ hpaˍ awˬ kaˍ lo ca hpaw va‸ taˍ ve yoˬ. 9Ya‸ hkʼaˇ, Jawˇmawˇ Gʼuiˬsha hawˉ hkʼaˆ hta‸ kuˬ leh, Nawˬ hkʼaˬ lo chehˇ le, teh‸ na nyi ve yoˬ.
10Yawˇ kʼaw‸ yaw hkʼaw‸ leh kʼoˆ ve, Nawˬ hko hkʼaw laˬ chehˇ ve awˬ hkawˇ hta‸ ngaˬ gʼa kaˇ ve yoˬ. Chi beu‸ ngaˬ awˬ kʼu nyi hpeh‸ leh kawˆ jaˇ ve pa taw ca hpaw va‸ taˍ ve yoˬ, teh‸ kʼoˆ piˇ ve yoˬ.
11Gʼuiˬsha yawˇ hta‸ kʼaw‸ na nyi leh kʼoˆ ve, Nawˬ awˬ kʼu nyi hpeh‸ peuˬ, teh‸ a shu kʼoˆ laˇ ve le. Ngaˬ taˇ caˇ, teh‸ kʼoˆ piˇ taˍ ve iˉ shiˍ hta‸ nawˬ caˇ leh laˇ, teh‸ yawˇ hta‸ kʼoˆ piˇ ve yoˬ.
12Yawˇ kʼaw‸ kʼoˆ ve, Nawˬ ngaˬ hta‸ piˇ laˇ taˍ ve yaˇ miˇ ma chi, iˉ shiˍ oˇ ve hta‸ shaˉ veu laˇ leh ngaˬ hta‸ caˍ laˇ ve pa taw ngaˬ gʼa caˇ peuˬ, teh‸ kʼaw‸ yaw hkʼaw‸ piˇ ve yoˬ.
13Oˇ htaˇ Jawˇmawˇ Gʼuiˬsha lehˬ, Aˬ hto‸ ma pa taw nawˬ chi hkʼe te ve le, teh‸ yaˇ miˇ hta‸ kʼoˆ piˇ ve yoˬ. Yaˇ miˇ kʼaw‸ kʼoˆ ve, Vuiˬ ngaˬ hta‸ heˍ laˇ ve pa taw ngaˬ gʼa caˇ peuˬ, teh‸ kʼaw‸ yaw hkʼaw‸ piˇ ve yoˬ.
Gʼuiˬsha suhˉ jehˬ ve
14Gʼuiˬsha vuiˬ hta‸ kʼoˆ piˇ ve, Nawˬ chi hkʼe te ve pa taw, to nuˇ to shaˆ hkʼa peu-eˬ awˬ hkʼaw lo hkeu ve chi teˇ ceuˬ hta‸ nawˬ gʼa hkanˍ tuˬ yoˬ. Nawˬ a sha‸ te‸ chehˇ ve teˇ co-e, nawˬ ve gʼoˇ peˬ miˬ chaˇ hkʼoˆ lo gʼa gʼawˬ sheh toˇ leh je‸ hta‸ gʼa caˇ tuˬ yoˬ. 15Nawˬ leh yaˇ miˇ maˇ kʼoˆ, nawˬ ve awˬ yaˇ awˬ duˬ leh yaˇ miˇ ve awˬ yaˇ awˬ duˬ maˇ koˆ, hkʼaˬ htaˆ ka‸ canˇ paˍ hpeh‸ tuˬ yoˬ. Yawˇ lehˬ nawˬ ve oˉ kʼoˍ hta‸ dawˆ leh, nawˬ lehˬ yawˇ ve hkui mehˍ cu hta‸ htawˆ tuˬ yoˬ, teh‸ kʼoˆ piˇ ve yoˬ.
16Yaˇ miˇ hta‸ htawˇ, Nawˬ yaˇ hu yaˇ paw htaˇ naˬ ve teˇ ceuˬ ngaˬ maˇ la piˇ lawˬ tuˬ yoˬ. Ya‸ hkʼaˇ htawˇ, nawˬ ve awˬ hpawˇ geh nawˬ zuh‸ gaˇ tuˬ sheˬ leh, yawˇ ve tawˇ hta‸ nawˬ na yuˬ tuˬ yoˬ, teh‸ kʼoˆ piˇ ve yoˬ.
17Hawˉ hkʼaˆ hta‸ htawˇ, Nawˬ lehˬ nawˬ miˇ ma hkawˇ na leh ngaˬ taˇ caˇ, teh‸ kʼoˆ piˇ taˍ ve iˉ shiˍ hta‸ caˇ ve pa taw, miˬguiˬ chi lehˬ nawˬ hta‸ pa taw hkeu ve hta‸ gʼa hkanˍ tuˬ yoˬ. Nawˬ a sha‸ te‸ chehˇ ve teˇ co-e gʼa caˇ gʼa dawˬ tuˬ awˬ pon kanˉ gʼaˇ hte‸ gʼa te tuˬ yoˬ. 18Aˉ chuˇ buiˇ teˇ hpaˍ leh mvuh‸ teˇ hpaˍ nawˬ awˬ pon tawˆ la piˇ tuˬ yoˬ. Suhˆ hpa‸ hawˆ hpa‸ hta‸ ceh tiˉ nawˬ gʼa caˇ tuˬ yoˬ. 19Nawˬ miˬguiˬ hkʼaw lo kʼaw‸ kʼo‸-e htaˇ hkʼa gaˬ, awˍ gʼa caˇ tuˬ naˍ kʼaˍ pui hkʼoˆ lo kuiˍ maˇ maˇ tawˆ la tuˬ yoˬ. Awˬ lawn kʼo nawˬ hta‸ je‸ yuˬ te taˍ ve pa taw, je‸ lo nawˬ gʼa kʼaw‸ kʼo‸-e tuˬ yoˬ, teh‸ kʼoˆ piˇ ve yoˬ.
20Aˍdanˍ #3:20 Chi lehˬ chaw yaˇ teh‸ kʼoˆ ve yoˬ. leh, yawˇ ve aw miˇ ma hta‸ Eˇva‸ #3:20 Chi lehˬ a sha‸ te‸ ve teh‸ kʼoˆ gaˇ ve yoˬ. teh‸ meh piˇ ve yoˬ. Awˬ lawn kʼo, yawˇ lehˬ chaw hkʼa peu-eˬ ve awˬ e hpeh‸ ve pa taw yoˬ. 21Jawˇmawˇ Gʼuiˬsha lehˬ, Aˍdanˍ leh Eˇva‸ hta‸ shaˍ guiˬ kʼuˉ tawˉ feuˉ piˇ ve yoˬ.
Yawˇ huiˉ maˬ hta‸ hko hkʼaw gʼa‸ tawˆ ve
22Oˇ htaˇ Gʼuiˬsha kʼoˆ ve, Chaw chi teˇ hpaˍ lehˬ ngaˬ hui hkʼa shuˍ da‸ ve leh maˇ da‸ ve awˬ ceuˬ hta‸ shiˍ ve chaw hpeh‸ la peuˬ. Chi hta‸ pa taw, yawˇ hui hta‸ co co te‸ chehˇ piˇ lawˬ gʼa ve iˉ shiˍ oˇ ve yawˇ hui hta‸ kʼaw‸ caˍ piˇ maˇ hpeh‸, teh‸ kʼoˆ ve yoˬ. 23Hkʼe te leh, Gʼuiˬsha lehˬ yawˇ huiˉ maˬ hpeh‸ tawˆ la kuiˬ miˬguiˬ chi awˬ hkʼoˆ lo ca muiˬ caˇ tuˬ, yawˇ huiˉ maˬ hta‸ Eˍdenˍ hko hkʼaw gʼa‸ kʼoˬ ve yoˬ. 24Oˇ ve hkʼaw‸ nawˉ, Eˍdenˍ hko mvuhˇ nyi tawˆ hpawˇ lo, Gʼuiˬsha lehˬ aˉhtaw pfuhˇ taˍ ve Hkeˍruˆbenˍ hta‸ chehˇ tcuh leh, a sha‸ te‸ piˇ lawˬ ve suhˆ cehˬ lo kʼai ve ya‸ kʼaw hta‸ shaw tcuh taˍ ve yoˬ.
اکنون انتخاب شده:
Awˬ hkuiˉ puiˍ ve li‸ 3: LHBE
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lahu Bible Edited © Thailand Bible Society and Bible Society of Myanmar, 2010, 2020.