GENESIS 3
3
Nagkasala an Tawo
1Sa gabos na hayop na ginibo nin Kagurangnan Dios, an halas an pinakatuso. Hinapot kan halas an babae, “Totoo mananggad na tinaraman kamo nin Dios na dai magkakan kan bunga kan arin man na kahoy sa laog kan tatamnan?”
2Nagsimbag an babae, “Pwede ming kakanon an bunga kan arin man na kahoy sa laog kan tatamnan 3alagad tinaraman kami nin Dios na dai nanggad kami magkakan o magdotdot kan bunga kan kahoy sa tahaw kan tatamnan; kun gibohon mi iyan, magagadan kami.”
4Alagad nagsimbag an halas, “Bakong totoo iyan; dai kamo magagadan. 5Itinaram iyan nin Dios huli ta aram niya na sa oras na kumakan kamo kaiyan, makakaarog kamo sa Dios asin maaaraman na nindo an marahay asin an maraot.”#5 Hilingon sa 2:17.
6Nahiling kan babae na magayon an kahoy asin garo masiram pagkakanon an bunga kaini patin naisip niya na an kahoy makakatao nin kadonongan. Kaya kuminua siya kan bunga dangan kuminakan. Dangan tinawan man niya an saiyang agom asin kuminakan man ini. 7Pakatapos nindang magkakan, nagkaigwa sinda nin pakasabot, asin naaraman ninda na sinda huba; kaya nagtahi sinda nin mga dahon kan higera dangan ginibo ninda ining pantahob sa saindang hawak.
8Kan hapon na idto nadangog nindang naglalakaw sa tatamnan an Kagurangnan Dios, kaya nagtago sinda sa kakahoyan. 9Alagad inapod nin Kagurangnan Dios an lalaki, “Haen ka?”
10Nagsimbag siya, “Nadangog taka sa tatamnan; natakot ako kaya nagtago ako huli ta huba ako.”
11“Siisay an nagsabi saimo na huba ka?” an hapot nin Dios. “Nagkakan ka kan bunga kan kahoy na ipinapangalad ko?”
12Nagsimbag an lalaki, “An babaeng itinao mo tanganing magin kaibahan ko iyo an nagtao sako kan bunga, kaya nagkakan ako.”
13Hinapot nin Kagurangnan Dios an babae, “Tano ta ginibo mo ini?”
Nagsimbag an babae, “Dinaya ako kan halas kaya nagkakan ako.”
An Padusa nin Dios
14Dangan tinaraman nin Kagurangnan Dios an halas, “Huli ta ginibo mo ini, isinusumpa taka sa gabos na hayop. Poon ngunyan magkakamang ka asin kabokabo an saimong kakakanon sa bilog mong pagkabuhay. 15Papag-iwalon ko kamo asin an babae; an saimong banhi asin an saiyang banhi: roronoton kaini an saimong payo, asin hahampakon mo an saiyang bool.”
16Dangan tinaraman niya an babae, “Dadagdagan ko an kulog na titioson mo sa saimong pagbados asin pag-aki. Alagad, dai mawawara an saimong pagmawot para sa saimong agom asin siya an saimong pagkukuyogon.”
17Pakatapos, tinaraman niya si Adan, “Huli ta dinangog mo an saimong agom asin nagkakan ka kan bunga na dai ko saimo ipinapakakan, isinusumpa ko an daga huli saimo. Kaipuhan na maglapigot ka sa pagtrabaho sa bilog mong buhay tanganing magkaigwa ka nin pagkakan. 18Matalubo sa daga an mga doot saka mga tonok, asin mapipiritan kang magkakan nin mga tinanom sa kadlagan. 19Magpapatagdo ka nin ganot tanganing mapabunga nin anoman an daga, sagkod na ika magadan. Ginibo ka sa kabokabo nin daga kaya sa kabokabo ka mabalik.”
20Eva#20 EVA: Sa pandangog, an ngaran na ini nakakaarog sa Hebreyong tataramon na nabubuhay na sa traduksyon na ini ginamit an gabos na tawo. an inginaran ni Adan#20 ADAN: Sa Hebreyo, an ngaran na ini nangangahulogan katawohan. sa saiyang agom, huli ta siya an ina kan gabos na tawo. 21An Kagurangnan Dios naggibo nin mga gubing hale sa anit nin mga hayop para ki Adan asin sa agom kaini, dangan ginubingan niya sinda.
Pinaluwas sa Tatamnan si Adan asin si Eva
22Dangan nagtaram an Kagurangnan Dios, “Ngunyan, arog na satuya an tawo: aram na niya an marahay asin an maraot. Kaipuhan dai na siya makakakan kan bunga kan kahoy na nagtatao nin buhay, asin mabuhay sagkod lamang.” 23Kaya pinaluwas siya nin Kagurangnan Dios sa tatamnan nin Eden asin pinapag-oma kan daga na ginikanan niya. 24Dangan nagbugtak an Kagurangnan Dios nin mga kerubin#24 KERUBIN: Hilingon sa Glosaryo. sa sirangan na parte kan tatamnan asin nin sarong naglalaad na espada na nagbibirik sa gabos na direksyon tanganing magbantay kan dalan pasiring sa kahoy nin buhay.
اکنون انتخاب شده:
GENESIS 3: BPV
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Philippine Bible Society, New Testament © 1981, Bible © 1992