Matew 14
14
Juan tati Fawtisachefe tañi lan
(Marku 6.14-29; Luka 9.7-9)
1Feychi mew müten, Erode,#14.1 Erode: Erode Antipa, kiñe gobernador Galilea ka Perea trokiñ mapu mew 4 aC - 39 dC. tati gobernadorkülelu ta Galilea mapu mew, allküy ñi nütramyengen ta Jesus. 2Fey feypiyefi kisu tañi werkükeelchi pu che: “Juan tati Fawtisachefe wiñomongepetulay. Feymew ta niey tüfachi afmatufal pepiluwün.”
3Erode am püresufalfilu ta Juan, fey kadena mew trarilen yengey ta karsel mew. Fey tüfa ta femfi Erodia ñi duam, Felipe ñi kure. (Felipe#14.3 Felipe: Erode tañi chaw mew peñi mülekefulu Roma waria mew. ta Erode ñi peñi ürke.) 4Juan feypirkefuy ta Erode: “Ngelay tami kureyeafiel ta Erodia.” 5Fey Erode ayülefuy ñi langümafiel ta Juan, welu llükanierkefi tati pu che, kom feyentulelu engün am Juan tañi pelon wentrungen.
6Welu Erode nielu kawiñ ñi puwültripantun mew, Erodia tañi domo püñeñ eluwi tañi faylayael tati pu mangel ñi adkiñ mew. Fey ta Erode rume ayüfilu am ti faylan, 7eludungurkefi kiñe kuyalltun mew: “chem rume eluen pilmi eluaeyu” pirkefi tati üllchadomo. 8Feymew ñi ñuke ñi feypietew mew, feypi tati üllchadomo:
—Eluen kiñe rali mew Juan ti Fawtisachefe tañi longko.
9Fey tüfachi dungu rume weñangkülkaeyew tati longko ülmen Erode, kisu am wüldungulu kiñe kuyalltun mew tañi pu mangel ñi adkiñ mew. 10Feymew werküy tañi katrüñmamengeael ñi longko ta Juan karsel mew. 11Fey ta famngechi yelelngey kiñe rali mew ka elungepuy tati üllchadomo, fey kisu elufi tañi ñuke.
12Feymew akuyey Juan em tañi inayawülkefetewchi pu kompañ, yeñmangetuy tañi kuerpu ka rüngalmefi engün ta eltun mew. Feymew ka amuy engün tañi kimelafiel ta Jesus ñi langümngen ta Juan.
Jesus elufi iyael kechu warangka wentru
(Marku 6.30-44; Luka 9.10-17; Juan 6.1-14)
13Feymew Jesus kimlu Juan ti Fawtisachefe ñi lan, konpuy kiñe pichi farku mew ñi amuael kiñe kamapulechi lelfün mew. Welu tati pu che ngüneduami Jesus ñi kañpüle amun, feymew tripay engün ti waria mew ñi inantukuafiel engün chew ñi mülepun ta Jesus. 14Fey petu nagpulu Jesus tati pichi farku mew, pefi fentren che, fey kisu kutranpiwkeyefi, fey tremolyefi tati pu kutran tañi puwülyeel engün.
15Fey dew putrafialu am, ñi pu disipulu fülkontueyew ka feypieyew:
—Dew putrafiay, ka lelfüntripaleiñ. Feymew chalitufinge tati pu che, ñi amutuael ta waria mew ñi ngillayael ta iyael.
16Fey Jesus llowdungufi ñi pu disipulu:
—Ngelay tañi amutuael engün. Eymün eluafimün ta iyael.
17Fey kisu engün llowdunguy:
—Nielaiñ iyael ta tüfa mew. Kechu kofke ka epu challwa müten nieiñ.
18Jesus feypifi ñi pu disipulu:
—Küpalelmuchi ti kofke ka ti challwa.
19Feymew feypifi tati pu che ñi anükünuwael ta kachu mew. Feymew müten nüfi ñi kuwü mew tati kechu kofke ka tati epu challwa, fey lelipüray ta wenu mapu, mañumtufi ta Ngünechen ka wükayefi ti kofke, elufi ñi pu disipulu, fey kisu engün eluyefi tati pu che. 20Kom iyey engün fey kom ti pu che weday engün, ka apoyetuy mari epu kanasta tati sofrayechi wükanke kofke ka challwa. 21Tati pu che kiñe kechu warangka wentru ürke, welu rakintukungelay tati pu domo ka tati pichikeche no rume.
Jesus trekay ta wente ko
(Marku 6.45-52; Juan 6.15-21)
22Dew rupalu tüfachi dungu, Jesus werküfi ñi pu disipulu ñi konpuael tati pichi farku mew, femngechi ñi wüne puwael engün nome ti pichi lafken mew. Welu Jesus mekey ñi chalitufiel tati pu che.
23Dew chalitufilu ti pu che, Jesus pürapuy kiñe wingkul mew, kisu ñi ngillatuael. Fey dew punlu, Jesus kisulewey. 24Tati pichi farku dew amulewiyey alü ponwitu ti pichi lafken mew, fey tati rew rume newentu nengümkamekefi tati farku, trafyeniefilu engün am tati kürüf.
25Fey epe wünlu, Jesus trekalen amuley wente ko kisu engün püle. 26Feymew tañi pu disipulu peetew tañi trekalen ta wente ko, fey rume llükay, ka wirari engün ñi fente llükan mew:
—¡Kiñe perimon tati! ―pirkey engün.
27Welu Jesus dungufi ñi pu disipulu, feypilen mew:
—¡Yafüluwmün! ¡Iñche tati! ¡Llükakilmün!
28Feymew Pedro llowdungueyew:
—Ñidol, rüf mew eymingelmi, werkünge iñche ñi trekalen amuael wente ko tañi puwael ta eymi mew.
29—Küpange may ―pi ta Jesus.
Feymew Pedro tripay ti pichi farku mew, fey llituy ñi trekayael wente ko ñi puwael ta Jesus mew. 30Fey ngüneduamlu ñi rume newenngen tati kürüf, llükay. Ñochingelu am ñi llañnagün ti ko mew, fey wirari:
—¡Montulen Ñidol!
31Feymew müten, Jesus nüñmafi ñi kuwü ta Pedro ka feypifi:
—¡Rume pichin mupiltun nierkeymi! ¿Chumngelu am maneluwlaymi iñche mew?
32Fey püratulu engu müten tati pichi farku mew, kürüfwetulay. 33Feymew tati pu disipulu mülelu ti pichi farku mew, lukunagi engün Jesus ñi inafül ka feypi engün:
—¡Rüf dungu mew eymi ta Ngünechen ñi Fotüm ürke!
Jesus tremolyefi tati pu kutran Genesaret mapu mew
(Marku 6.53-56)
34Feymew katrürumey tati pichi lafken mew ka puwi engün Genesaret#14.34 Genesaret: kiñe rume küme lür mapu mülelu Galilea ñi inafül lafken. pingechi mapu mew. 35Tati pu che müleyelu tiye mew, kimtufi engün ta Jesus, ka kimngey kom ti trokiñ mapu mew ñi puwün. Feymew küpalelngey tati pu kutran, 36ka llellipungey ñi idañmangeael rewall tañi takuwün. Fey kom tati pu kutran idañmaetew ñi wechuñ takuwün, tremolewetuy engün.
اکنون انتخاب شده:
Matew 14: arn
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2011, Wycliffe Bible Translators, Inc. All rights reserved.
