Mateo 10
10
Ri Jesús keb'ucha' kab'lajuj utaqo'n
(Mr. 3:13-19; Lc. 6:12-16)
1Ek'u ri Jesús xeb'usik'ij ri kab'lajuj utijo'n y xuya pakiq'ab' keb'ekesaj b'i itzelilaj uxlab'ixel y kakikunaj ronoje yab'il y ronoje k'axk'ob'ik. 2E kib'i' taq wa' wa kab'lajuj e taqo'n:#10:2 “Taqo'n”: Kil “apóstol” pa vocabulario.
Nab'e e Simón ri kab'i'x Pedro che
y ruchaq' Andrés,
Jacobo
y ruchaq' Juan (wa ka'ib' e uk'ajol ri Zebedeo),
3Felipe,
Bartolomé,
Tomás,
Mateo ri aj tz'onol puaq re tojonik,
Jacobo ruk'ajol ri Alfeo,
Lebeo ri kab'i'x Tadeo che,#10:3 También kab'i'x “Judas” che. Lc. 6:16
4Simón ri kab'i'x che “ri Cananista”,#10:4 “Cananista”: Kil “Zelote” pa vocabulario.
k'isb'al re, e Judas aj Iscariot,#10:4 “Iscariot”: Wa' e utinamit ri Judas. ri xk'ayin re ri Jesús.
Ri Jesús kuya b'i kichak ri kab'lajuj utaqo'n
(Mr. 6:7-13; Lc. 9:1-6)
5Ri Jesús xeb'utaq b'i ri kab'lajuj y e pixab'anik wa' xuya b'i chike:
«Mix'ek pa taq ri luwar ke ri na e ta aj judi'ab', mixok ne pa taq ri tinamit re Samaria. 6Jix k'u nab'e kuk' ri b'exex e sachinaq, wa' e ri e aj judi'ab' re ri tinamit Israel. 7Jix y jewa' chitzijoj: “Rutaqanik ri Dios petinaq chila' chikaj xa naqaj chi k'o wuloq.”
8»Cheb'ikunaj konoje ri yewa'ib' kuk' taq ri k'o ri yab'il lepra chike, cheb'ik'astajisaj ri ekaminaq y cheb'iwesaj b'i itzel uxlab'ixel. Wa chuq'ab' kik'ul ri'ix e rutzil nuk'u'x chiwe; jek'ula' mitz'onoj rajil ri chak ki'an ruk'.
9»Mik'am b'i imeyo re oro, re plata o re cobre. 10Mik'am ne b'i teb' re ub'itaq iwe, mik'am b'i jun chik ikoton, jun chik mola'j ixajab' o jun chik ich'ami'y. Ma e junoq kachakunik, lik taqalik kaya'i' janipa ri kajawax che.
11»Echiri' kixopon pa juna tinamit o pa juna aldea, chitzukuj junoq jusuk' ub'inik usilab'ik y chixkanaj k'u kan chirocho k'ate kixel b'i chiri' echiri' kix'ek pa jun chik tinamit.
12»Echiri' kixok chuchi' juna ja, chiya'a rutzil kiwach ri e k'o chiri', kitz'onoj k'u ri utzil chomal re ri Dios pakiwi'. 13We kixkik'ul k'u ri e k'o pa ri ja, kakanaj ri utzil chomal itz'onom kan pakiwi'. No'j we rike na kixkik'ul taj, ri utzil chomal katzelej tanchi lo iwuk'.
14»We na kixkik'ul taj y na kakaj tane kakita ri kitzijoj, chixelub'i chupa ri ja o pa ri tinamit yey chipupa' kan rulew k'o che ri iwaqan. 15Ma paqatzij wi kamb'i'ij chiwe: Chupa ruq'ijol ri q'atb'al tzij, más lik k'ax ri kape pakiwi ri tinamit na xkik'ul ta ri Utzilaj Tzij, chwa ri kape pakiwi ri e aj Sodoma y ri e aj Gomorra.#Gn. 19:24-25
Taq ri k'axk'ob'ik kapetik
16»Chitape': Ri'in kixintaq b'i pacha' ix b'exex chikixo'l utiw. Lik chichajij k'u iwib' chi utz jela' pacha' ru'anik kuchajij rib' ri kumatz, yey chi'ana pacha' ri palomax na jinta k'o ku'an che junoq.
17»Lik chichajij k'u iwib' chikiwach ri winaq, ma kixkik'am b'i pa taq q'atb'al tzij y kakijich' ipa pa taq sinagogas. 18Wuma ri'in, kixkik'am ne b'i chikiwach taq raj q'atal tzij y ri taqanelab'. Ruk' k'u ri' wa', utz kiq'alajisaj nuwach ri'in chikiwach rike y chikiwach konoje taq ri tinamit che ruwachulew. 19Ek'uchiri' kixkiya chikiwach, mub'isoj ik'u'x sa' ri kib'i'ij; ma echiri' kopon ru'orayil re kixch'a'tik, e ri Dios kaya'w lo ich'a'tem. 20Ma na ix ta ri kixch'a'tik, e ri Ruxlab'ixel Riqaw; e Rire kuya ich'a'tem.
21»E taq k'u ri tikawex kekiya ri katz-kichaq' pa kamik; ri k'o kalk'o'al kekiya taq ri kalk'o'al pa kamik; ri kalk'o'al keyaktaj chikij kichu-kiqaw y kekiya pa kamik. 22Taq ri winaq lik tzel kixkil ri'ix xa ruma ikojom ri nub'i'; no'j china k'u ri kuchuq'ub'ej rib' k'a chupa ri k'isb'al re, e ri' ri kakolob'etajik. 23Echiri' lik kixternab'ex ruk' k'axk'ob'ik pa juna tinamit, jix che jun chik. Ma paqatzij wi kamb'i'ij chiwe, k'amaja' ne kik'iso kixik'ow chupa ronoje taq ri tinamit re Israel, echiri' kak'un tanchi Ralaxel Chikixo'l Tikawex.
24»Na jinta juna tijo'n más k'o uwach chwa rutijonel y na jinta ne juna aj chak más k'o uwach chwa ri rajaw. 25Juna tijo'n kub'uloq we xu'ana jela' pacha' rutijonel y juna aj chak kub'uloq we xu'ana pacha' ri rajaw. We kab'i'x “Beelzebú” che ri kiqaw rak'alab', ¿mak'uwari' ri kab'i'x chike ri ralk'o'al?
Mixi'ij iwib' chikiwach ri winaq
(Lc. 12:4-9)
26»Mixi'ij iwib' chikiwach ri winaq. Ma kopon ri q'ij echiri' janipa ri na q'alajisam taj, kaq'alajisax na; yey janipa ri ewatalik, keta'maxik. 27E janipa ri kamb'i'ij ri'in xew chiwe ri'ix, chib'i'ij ri'ix chiwachil; yey ri kanweswa' ri'in chiwe, chixsik'in che ub'i'xikil pa taq b'e.
28»Mixi'ij iwib' chikiwach ri k'o pakiq'ab' kixkikamisaj, ma wa' xew che ri cuerpo kaki'an wi, no'j na jinta pakiq'ab' kakisach uwach ruk'aslem junoq chwach ri Dios. E chixi'ij iwib' chwach ri Jun k'o puq'ab' keb'uk'aq b'i ri tikawex junam ruk' ri kicuerpos y ri kanima', chi xib'alb'a' re tijb'al k'ax.
29»Iweta'am, ka'ib' raltaq ko tz'ikin kek'ayix xa chwa jun ralko meyo. Na ruk' ta k'u ri', na katzaq tane junoq chike pulew we ri Qaqaw na kuya ta luwar. 30Mak'uwari' ri'ix lik puq'ab' ix k'o wi, ma xa ne chujujunal riwi' ajilam ruma Rire. 31E uwari'che, mixi'ij iwib'; ma ri'ix más k'o iwach chikiwach ri raltaq ko tz'ikin.
32»E junoq kuq'alajisaj chikiwach ri winaq, kub'i'ij: “In tijo'n re ri Jesús”; jek'uri'la' kan'an ri'in che rire, kamb'i'ij chwach ri Nuqaw k'o chila' chikaj: “Qatzij, wa jun e nutijo'n” kincha'.
33»No'j k'u ri kub'i'ij chikiwach ri winaq: “Ri'in na in ta tijo'n re ri Jesús.” Jek'uri'la' kan'an ri'in che rire, kamb'i'ij chwach ri Nuqaw k'o chila' chikaj: “Qatzij, wa jun na nutijo'n taj” kincha'.
Ri jachb'al kipa ri tikawex ruma ri Jesús
(Lc. 12:49-53; 14:26-27)
34»Mich'ob'o we ri nuk'unik che ruwachulew kuk'am lo utzil chomal. Na e ta ri', ma e kuk'am lo ch'a'oj chikixo'l taq ri tikawex.#10:34 Taq ri tikawex kech'o'jin chikiwach, ma ri na kek'uluw ta re ri Cristo keyaktaj chikij ri kakikoj rub'i', kaki'an k'ax chike y laj ne kekikamisaj. 35Ruma k'u ri nuk'unik,
ri tikawex kakijeq kech'o'jin chikiwach
rala ruk' ruqaw,
rali ruk' ruchu
y ralib'atz ruk' ruchu-ralib'.
36Ek'u ri' ri tzel keb'ilow re juna tikawex,
e mismo ri e k'o pa rocho. Mi. 7:6
37»China ri más lik e k'ax keb'una' ruchu-uqaw chinuwach ri'in, na taqal ta che katerej chwij; jek'ula' china ri más lik e k'ax keb'una' ri ralk'o'al chinuwach ri'in, ri' na taqal ta che katerej chwij.
38»China ri na karaj taj kutij k'ax ruma e nutijo'n,#10:38 Pa ri ch'a'tem griego kub'i'ij “ri na ruk'a'am ta rucruz”. ri' na taqal ta che katerej chwij. 39China ri kutij uq'ij lik kel chi utz ruk'aslem wara che ruwachulew, ri' e kujam ri k'aslemal chila' chikaj; no'j ri kuya ranima' ruk'aslem wuma ri'in, ri' e kuriq ri chomilaj uk'aslemal chwach ri Dios.
Ri rajil uk'axel taq ri chak
(Mr. 9:41)
40»China ri kak'uluw iwe ri'ix, in ri kinuk'ulu; yey china ri kak'uluw we ri'in, e kuk'ul ri Jun taqayom lo we. 41China ri kak'uluw re juna q'alajisanel ruma e q'alajisay re rutzij ri Dios, ri rajil uk'axel kuk'ulu e jela' pacha' ri kuk'ul juna q'alajisanel. China ri kak'uluw re juna tikawex ruma jusuk' rub'inik chwach ri Dios, ri rajil uk'axel kuk'ulu e jela' pacha' ri kuk'ul ri jusuk' ub'inik usilab'ik chwach ri Dios. 42China k'u ri kusipaj tob' xa juna tzima ya' joron che junoq chike wa' wa ch'uti'q ruma e nutijo'n, paqatzij wi kamb'i'ij chiwe, ri' na kujam ta k'ana ri rajil uk'axel» xcha ri Jesús.
اکنون انتخاب شده:
Mateo 10: acrN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2009, Wycliffe Bible Translators, Inc. All rights reserved.
