Mt 6
6
Jesús dapaĝaguenataĝaneque jodaa'me qat'onataqa jo'ne 'noote'
1“Ena'te ch'e aualoĝoñiyalo gaa'me at'onataqadi' jo'ne 'noote' ga'me jiyaĝadipi, qom nach'edata da'me jetaque ami qoyauanalo. Qom naq'aeta da'me auauoyi, ñe'me Adet'ai jo'ne na'ague di'me piyem ja ami 'te yanema ga'me anejetenaguequi.
1. Da'me qadecochaĝac
2“Qo'che', qom alecochiiyalo gaa'me 'uo da'me louenaĝanaĝa'j, ena'te aueñi naua'alo naa'me layat ladico da'me a'uaĝatetapeñigue, ena'am nale ga'me yauote jogaa'me ja yataĝalo'te, nale yec'atalo gaa'me nemaĝaiqui' nataq'aen nale ueteda'a ga'me nadic jo'ne noĝoyaĝac, nach'edata da'me qaedi ga'me jiyaĝadipi yiyamaĝade'tape jogaa'me. Ami ja'aĝatema queda'me joote qoya'uo ga'me lajo'vi'y, qaya'te laqaya qomle. 3Qom alecochiyalo ga'me 'uo da'me louenaĝanaĝa'j, ena'te a'uaqataĝanem ga'me mate mane'e yataqachiñe anaigaĝaua. 4Ja auen 'te di'yoq da'me aua'uo. Qama'le ñe'me Adet'a, jo'ne yauana ga'me aua'uo jo'ne ja auen 'te di'yoq, ya'uo qomle ga'me anejetenaguec.
2. Da'me qanetamenaĝac
(Lc 11.2-4)
5“Qom anetameñi, ena'te aueñiya'ama gaa'me jo'ne ja yataĝalo'te, jogaa'me jo'ne noqopideta da'me nechatetedañe nale netame'n da'me uetauelo gaa'me nemaĝaiqui' nataq'aen nale ue'talo gaa'me netaetedeuo ga'me laeñi ga'me noic, qaedi ga'me jiyaĝadipi yauanalo. Ami jayatenaĝaneque queda'me joote qoya'uo ga'me lajo'vi'y. 6Qalaĝaja am, qom anetamen, aue ga'me at'emec, auapadiñgui ga'me jom qama'le ja aualoĝon da'me anetamenot joñe'me Adet'a. Qama'le ñe'me Adet'a da'me yauana ga'me aua'uo jo'ne ja aualoĝon, am yanem qomle ga'me adajo'vi.
7“Mane'e nale anetameñi, ena'te a'viyelaqayitapelo'te naa'me at'aqataqadi', qa'a qaya'te chiyaqayilo. Nach'eda da'me yauote gaa'me ja p'iida'a, jo'ne yepetedapega queda'me jalcote 'laqataqa qama'le yataqachiñe yoqocha'alo ñe'me Dios. 8Ena'te aueñiya'ama jogaa'me, qa'a ñe'me Adet'ai joote yayaten ga'me jo'ne auoviñetaque, qom maliaĝa ja aviyaĝañiyaque. 9Nale anetameñi, aueñeetojo':
«Am Qadet'a 'me ona'ague di'me Piyem,
'Noota qom qo'nonaĝachigui da'me adenaĝat.
10'Noota qom nach'e eta't qo'mi anejaliaĝatelo'te.
Ga'me aleua laje'pi, 'noota qom yauote da'me adoequenataĝanaĝac,
Nach'e naq'aeta nale yauote gaa'me neteda'ague di'me piyem.
11'Noota qom qo'mi auanema ga'me jaliguinaq yemeda naa'me noloqo'ote.
12Auapalaĝa't gaa'me ja 'noe'n jo'ne jauoqo'oe,
Nach'e naq'aeta nale japalaĝata' gaa'me ja 'noe'n jo'ne qo'mi qo'yeteque.
13Ena'te qo'mi auachalo'te da'me qanapiyenaguec,
Dite da'me qo'mi auachiyoĝo'toto joñe'me ja no'en.»
14“Qa'a qom auapalaĝachi' gaa'me ja 'noe'n jo'ne ami 'yeteque gaa'me adaqayadi', ñe'me Adet'ai jo'ne na'ague di'me piyem nach'e ena'am yapalaĝa't gaa'me ja 'noe'n jo'ne at'onataqadi'. 15Qalaĝaja qom ja auapalaĝachi' gaa'me laviyaĝaco joga'me anaviyaqatoqo'tpi, nach'e ena'am ñe'me Adet'ai ja yapalaĝa't gaa'me adoecodi'.
3. Nale qanoqouaqatela't
16“Qom anoqouaqachela't, qama'le ena'te lichiguilo naa'me adai'lidi', qaedi ja aueñiya'ama gaa'me ja yataĝalo'te jo'ne enetapela'ajalo totelo'te nale qaedi ga'me jiyaĝadipi yauanalo queda'me noqouaqatela'ajalo jogaa'me. Ami jayatenaĝaneque queda'me joote 'uo ga'me lajo'vi'y. 17Qalaĝaja da'me am qom anoqouaqatela't, auen yoqovita na'me adatajoĝoc nataq'aen yataqachiñe aniyamaĝatetac, 18qaedi ga'me jiyaĝadipi ja yetade'n queda'me anoqouaqatela't. Qama'le ñe'me Adet'a jo'ne uetaue ga'me ja di'yoq nach'eñe yetaden, qa'a yauana ga'me ja di'yoq aua'uo, qama'le ya'uo qomle ga'me anejetenaguec.
Neuoyaĝac 'me ue'tague di'me piyem
(Lc 12.33-34)
19“Ena'te auauoyi adaponequi ga'me adeuoyaĝaqui 'me uetalegue jena'me aleua, qa'a ua'a ga'me potoĝolo da'me yolaĝa't gaa'me uo'oe qama'le ne'uela'ajalo, nataq'aen gaa'me cachaĝayaqa yenoĝodeuo nale qama'le decachita. 20Nach'edata da'me alapoñegue di'me piyem, jo'ne qaya'te potoĝolo ta'le en dec'oyi ga'me 'uo nataq'aen qaya'te cachaĝaic ta'le taue qaedi decachi. 21Qa'a ga'me ue'ta da'me adeuoyaĝac, nach'e ena'am ue'ta na'me adauel.
Jaga'me lecoyadaĝanaqate da'me qat'oyaĝac
(Lc 11.34-36)
22“Naa'me qat'ae'te nach'enaua lecoyadaĝanaqate da'me qat'oyaĝac. Chane'eja qom 'noote' naa'me at'ae'te qama'le yema da'me at'oyaĝac netaye da'me 'yoqochiñe; 23qalaĝaja qom ja 'noe'n naa'me at'ae'te, qama'le yema da'me at'oyaĝac uetaue da'me 'lalaĝa. Chane'eja, qom ga'me 'yoqochiñe 'me te'me am netaye taya da'me 'lalaĝa, qama'le ¡yataqachiñe napidiyi ga'me 'lalaĝa 'me am netaye!
Joñe'me Dios nataq'aen gaa'me neuoyaĝaco
(Lc 16.13)
24“Qaya'te yaqanatet ta'le en dos gaa'me ladi'p qaedi t'onataĝanoto, qa'a yañoĝot da'me niquiya'a ga'me onolec mate mane'e noqopita ga'me laqaya, nataq'aen yoqo'cha ga'me onolec qama'te 'yotan ga'me laqaya. Qama'le nach'e ena'am da'me ami: ja qoyaqanatet ta'le qot'onataĝaneuo'o ñe'me Dios choqodaa'me neuoyaĝaco.
Dios netelalo jogaa'me c'oqo'tolqa
(Lc 12.22-31)
25“Chane'eja, ami ja'aĝatema: ena'te diyachitapiyelo naa'me adai'lidi' qa'a jouaĝat da'me at'oyaĝaqui qom qaya'te aualiqui, uotaĝa ga'me aniyomiyigui uotaĝa ga'me adeuodi'. Qa'a da'me qat'oyaĝac, ¿qo'li ja napacalegue ga'me qoyalic? Nataq'aen da'me qanejiyaĝauayaĝac, ¿qo'li ja napacalegue ga'me qoyaiñe? 26Auec'achiñe' ga'me mayodipi jo'ne uayodelegue jena'me p'ajeguem: ja danaĝa'n, ja daqataĝa'n, uotaĝa ta'le yauo'oe liquipi'; qalaĝaja, ñe'me Adet'ai jo'ne na'ague di'me piyem yanema ga'me yali'j joga'me. Qama'le da'me ami, ¡yataqachiñe anapaquiyalo'te joga'me mayodipi! 27Qama'le qom aueñi diyachitapiyelo naa'me adai'lidi', ¿qo'li auaqanachichi ta'le aueñi nichiguegue da'me at'oyaĝaqui?
28“Qama'le, ¿toqoch'e aueñi diyachitapiyelo naa'me adai'lidi' qa'a jouaĝat ga'me adeuodi'? Auec'achiñe' gaa'me lolelaĝail jo'ne nolelidijeguem nale. Ja t'onataĝa'n uotaĝa ta'le dacalitenaĝa'n. 29Taqaeue'ta, ami ja'aĝatema queda'me naq'aeta taĝa di'me jaliaĝanec Salomón, yema da'me li'yoĝodic, ena'am taĝa gaa'me leuo jogaa'me lolelaĝail. 30Qa'a qom ñe'me Dios naqaeteque gaa'me lolelaĝail, jo'ne uo'oe ga'me 'nonaĝa nayi qama'te yavi'j qom 'yoĝoñi da'me qoyachaĝauelo jaga'me c'atoĝonaĝaqui, qama'le ¡yataqachiñe p'ajaye da'me ami yanema ga'me adeuodi', ami jiyaĝa'u jo'ne qaya'te adepi'i! 31Chane'eja ena'te aueñi diyachitapiyelo naa'me adai'lidi' da'me anenachetapega't: «¿Jach'e jogamaĝa jaliguinaq?» uotaĝa «¿Jach'e jogamaĝa ñiyomaĝaye?» uotaĝa «¿Jach'e jogamaĝa janaĝadiñi jo'ne qadeuo?» 32Ena'uaque joga'me jiyaĝadipi jo'ne qaya'te lepe'e' ch'e yelotedaque daa'me daajo', qalaĝaja da'me ami 'uo ñe'me Adet'ai jo'ne na'ague di'me piyem jo'ne joote yayaten queda'me auoviñetapiye. 33Chane'eja 'uaeñe aueloyaque da'me lejaliaĝa joñe'me nataq'aen auauoyi ga'me chimaqachiñe 'me yiyamaĝaden joñe'me, qama'le nach'e ena'am ami qoyanema ena'uaque naa'me naajo' uo'oe. 34Ena'te aueyachitapiye't qa'a jouaĝat qom 'yoĝoñi, qa'a qom nete' 'uo ga'me adedaqa' da'me aueyachitapiye't. Yemeda naa'me noloqo'ote nalochilo gaa'me qayoĝode' laqalaico.
اکنون انتخاب شده:
Mt 6: TSN
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuevo Testament Toba del Oeste © 2010 Sociedad Bíblica Argentina
