Yokana 3

1 # Yok 7:50; 19:39. Kojai etuŋanan loka Iparisayon, ekekiror Nikodemo, ekayaiton loka Iyudayan, 2#Mat 22:16. Kobu ŋol mama ejai Yesu kuare, kotema ŋes atiar, “Rabi, kijeni ebe irai ijo Ekesisianakinan loibunit kama ejai Edeke; naarai emamei ituŋanan yenepedori aswam aanyuneta nu nuiswamai ijo, dimikito ejai Edeke kaŋes.” 3#Mat 18:3; Luk 17:21; 1 Pet 1:23. Koboŋok Yesu kotema ŋes atiar, “Abeit, abeit, katemari jo atiar, Arai mam ituŋanan eurio nakiareit, mam epedori aanyun ajakanut naka Edeke.” 4Kobala Nikodemo ŋes ebe, “Ikwaikini ai ituŋanan eurio kemojoŋ? Epedori kereka airucakin alomar akoik naka totoke, kouriai?” 5#Esk 36:25-27; Pes 5:26; Tit 3:5. Koboŋok Yesu ebe, “Abeit, abeit, katemari jo atiar, Arai mam ituŋanan eurio kakipi ka Emoyo, mam epedori alomun ajakanut naka Edeke. 6#Yok 1:13; Age 5:3; Sab 51:5. Ibore yeneuriei akuan erai akuan; ka yeneuriei Emoyo erai emoyo, 7Sirikiwumok naarai kabala jo ebe, Ibusakinit yes aurio nakiareit. 8#Mk 4:41; Lim 11:5. Ekusi ekwam mama ekot, ipupi airurumake; konye mam ipedori aijen kama kebunio, karaida mama ebei; ikoni nen ŋinituŋanan yeneuriei Emoyo.” 9Koboŋok Nikodemo kotema ŋes atiar, “Ikwaikinete ŋun ai epedoros?” 10Koboŋok Yesu kotema ŋes atiar, “Irai tope ijo ekesisianakinan loka Isirael, komam ijeni akiro ŋun? 11#Yok 7:16; 8:26,28; 12:49. Abeit, abeit, katemari jo atiar, Kinera nukijeni, kitejenuni da nukianyunit; konye do mam yes icamunito akosiitejenun. 12#Luk 22:67. Arai abu kalimok yes akiro nuka akwap komam iyuunete, ikote Iyuunete ai arai kaalimokis akiro nuka akuj? 13#Awa 30:4; Pes 4:9. Emamei yenabu kodokarite toma akuj, dimarai ŋol lokedokuni kotoma akuj, ŋes Okoku loka etuŋanan. 14#Mar 21:8,9. Kwape kolo kikajakinia Musa emun kamodiŋ, ibusakinit Okoku loka etuŋanan da aikajakinio kwape kwaŋin: 15tetere ŋinituŋanan yeniyuuni ŋes kojaas kaijar naka ikar kere.”

16 # Rom 5:8; 8:32; 1 Yok 4:9. Naarai komina Edeke akwapin kwanata, abu koinak Okokuke loteluna, tetere ŋinituŋanan yeniyuuni ŋes kinye aolior, konye kojaas kaijar naka ikar kere. 17#Yok 5:22; 12:47; Luk 19:10; Asw 17:31. Naarai mam Edeke ejukunit Okokuke akwapin tetere itelekarete akwapin akiro, dimarai tetere itajario akwapin kanukeŋ. 18#Yok 3:36; 5:24. Ŋin yeniyuuni ŋes mam itelekarete akiro; yenimam iyuuni ŋes adaut akiro aitelekar, naarai mam abu kiyuu ekiror loka Okoku loteluna loka Edeke, 19#Yok 1:5,9-11; 12:48. Lo da ŋes etube, ebe abu aica kobu akwapin, konye kominas ituŋa amuton aitelekarit aica, naarai aroko aswamisiokec. 20#Pes 5:13. Naarai ŋinituŋanan yeniswamai nueroko elait aica, kwabo mam ebuni neejai aica, kinyeis akeswamisio aideleleun. 21Konye yeniswamai nukabeit ebuni neejai aica, tetere etakanete akeswamisio, ebe iswamatai kotoma Edeke.

22 # Yok 4:1,2. Kokau kaŋun kolot Yesu ka ikekesisiak akwap nako Yudaya; kiboie kaŋina nepepe kakes ibatisai. 23#Mat 4:12. Kibatisai Yokana da kAenon naeapias ka Salim, naarai kejaas akipi nuipu nen; kolosenenete ituŋa mamakeŋ kibatisai, 24#Mat 14:3; Mk 6:17; Luk 3:19-20. Naarai koriŋa Yokana eenikina aidaris.

25Aso kojau epeget ikekesisiak luka Yokana ka Eyudayat kanuka aitalaun. 26#Yok 1:26-34. Koloto mama ejai Yokana, kotemasi atiar, “Rabi, ŋol loajai nenipe kajo okekwa Yorodan, lokitejenunit, koany, ibatisai ŋol, ido elosenenete ituŋa kere mamakeŋ.” 27#Bur 5:4. Koboŋok Yokana ebe, “Mam epedori ituŋanan adumun akirot kere dimikito einakinitai abunore kotoma akuj. 28#Yok 1:20,23,27; Mk 1:2; Mat 11:10. Itejenut yesi ikulepek ebe, abu kener ebe, Mam eoŋ arai Kristo, dimarai kejukunitai aiŋarenikin ŋes, 29#Mat 9:15; 22:2. Loejaas kateran ŋes eteran; konye epapero loka eteran, loebwoi iirari ŋes, elelakinit noi eporoto loka eteran; aso adol do akaiyalama ŋin. 30#2 Sam 3:1. Ibusakinit ŋes aiyatakin, konye eoŋ aiŋoŋar.”

31 # Yok 8:23. Ŋol loebuni kokuju eyait kere; ŋol loerai loka akwap erai loka akwap, inera nuka akwap; ŋol loebuni kokuju eyait kere. 32#Yok 3:11. Itejenuni ŋun nueanyunit ka nuiirarit da, kwabo emamei yeniyuuni akeitejenun. 33Yeniyuunit akeitejenun itogogoŋit ebe Edeke ŋes abeit. 34#Yok 1:33,34. Naarai lokijukuni Edeke inera akiro nuka Edeke: naarai mam Edeke einakini Emoyo kaitemis. 35#Mat 11:27; Luk 10:22; Yok 5:20; 17:2. Emina Papa Okoku, ititiŋit iboro kere. 36#Yok 3:18; Luk 3:7; 1 Yok 5:12. Yeniyuuni Okoku ejaas kaijar naka ikar kere; konye yenimam erima Okoku mam eanyuni aijar, konye esalakini ŋes anyunyura naka Edeke.

اکنون انتخاب شده:

Yokana 3: AOV1961

های‌لایت

به اشتراک گذاشتن

کپی