Ubwandilo 9
9
U Chala akufinga ulufingo nu Nowa
1 #
Ubw. 1.28
U Chala akamusaya u Nowa poka na bana bache nukunena ukuti, “Mupapanaye umwakuti muchizuzye ichisu ichapasi. 2Ivinyamana vyosi, iviyuni sona niswi vikwiza pakukunyilagha. Navibika pasi pabulaghili bwinyu ivyabumi vyosi ni viyuni vyope, ni vinyamana ivyakwavula, niswi zyosi izya munyanja. 3Ilelo mungalya ivinyamana vyosi ukuyana na muno nkabitikizizya pakulya ivyamani. Nabapa vyosi pakuba chakulya chinyu.
4 #
Lev. 7.26-27, 17.10-14, 19.26; Ukk. 12.16, 23, 15.23 “Loli mutakalyanje inyama yiyo yichili yili ni banda. Nabakanizya chinichi pachifukwa ichakuti ubumi ubwa chinyamana buli mwibanda. 5Nanti umuntu akumughogha umuntu uwamwabo, wepe akwiza pakufundiwa. Nanti ichinyamana chikumughogha umuntu, chope chikwiza pakughoghiwa. Umuntu wesi yuyo akumughogha umuntu uwamwabo, wepe aghoghiwanje.
6 #
Ubw. 1.26; Ukf. 20.13 Pakuti umuntu akapeliwa muchifwani icha Chala,
polelo umuntu wesi yuyo akumughogha umuntu uwamwabo,
wepe akwiza pakughoghiwa.
7 #
Ubw. 1.28
“Mupapanaye, umwakuti muchizuzye ichisu chosi ichapasi.”
8U Chala akamubuzya u Nowa na bana bache akati, 9“Ilelo nkufinga nawe ulufingo, poka na baluko lwako, 10ni vyabumi vyosi, ni viyuni, ni vitekwa, ni vinyamana ivyamuzi. Ivi vyo vintu vyosi vivyo vikafumila kuzi poka nawe mubwato mula. 11Ulufingo lulo nkufingana nawe lo ulu: Ntakwiza pakuzimizya sona ivintu ivyabumi na mizi aghakwizula. Naloli Ntakwiza pakutuma amizi aghakwizula pakuchinangannya ichisu ichapasi.”
12U Chala akati, “Ichi cho chimanyilo icha lufingo ulwa bwila na bwila, lulo indi pakufingana nawe, sona ni vintu vyosi ivyabumi: 13Nkubika ichipingavula mwibingu pakuba chimanyilo icha ulufingo ulwa pakasi papane ni chisu ichapasi. 14Akabalilo kosi nanti kumwanya kwaba amabingu, sona nanti ichipingavula chaboneka, 15nkwiza pakukumbuka ulufingo lulo luli pakasi papane namwe, sona ni vinyamana vyosi ukuti amizi aghakwizula ghatakwiza pakuzimizya sona ivyabumi vyosi. 16Nanti ichipingavula chaboneka mumabingu, nkwiza pakuchennya nukukumbuka ulufingo ulwa bwila na bwila, lulo luli pakasi papane na vyosi ivyabumi pachisu ichapasi.”
17Po u Chala akamubuzya u Nowa akati, “Ichi cho chimanyilo icha ulufingo lulo indi pakufingana ni vintu vyosi ivyabumi.”
U Nowa na bana bache abalumendo
18Abana aba Nowa babo bakafuma mubwato mula bakaba bo aba: U Shemu nu Hamu nu Yafeti. U Hamu weyuyo akaba we wise uwa Kenani. 19Abana aba Nowa batatu banaba bo babo bakaba banyenya aba bantu bosi aba muchisu ichapasi.
20U Nowa akaba muntu mulimi, sona akaba wakwanda pakulima umughunda uwa mampesya. 21Isiku limo bo ang'wela bulo uvinyo, akakolwa. Po akavula amenda ghache ghosi nukughona nkule muchisakasa chache. 22Bo u Hamu uwise uwa Kenani, ennya ukuti uwise ali nkule, akufuma kuzi nukubabuzya abawamwabo babili bala. 23Loli u Shemu nu Yafeti bakasenda inkazo nukuyibika kunyuma muvipunko vyabo. Bakanyokela chinyumanyuma nukumuvwinka. Batakennyako kuko uwise akaghona, po batakayennya inkule iya wise.
24Bo u Nowa uvinyo amala mumutu, akazyaghannya zizyo umwana wache umunandi nkani akabomba. 25Po akati,
“U Kenani aghuniwanje!
Akwiza pakuba muzya uwa bawamwabo.
26Apaliwanje u Mwene, u Chala uwa Shemu!
U Kenani akwiza pakuba muzya uwa Shemu.
27U Chala akuzye impaka izya Yafeti.
Abaluko lwache bagabanaye ulusayo
na baluko ulwa Shemu!
U Kenani akwiza pakuba muzya uwa Yafeti.”#9.27 Yafeti: Itabwa ili likwivwika ngati ilya mu Chihebeli kokuti, Ukonjelezya.
28Bo amizi aghakwizula ghamala, u Nowa akikala nubumi amaka aghanji 350. 29Po akafwa bo ali na maka 950.
انتخاب شده:
Ubwandilo 9: LMB2024
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lambya Bible © Bible Society of Malawi, 2024.