Ubwandilo 13
13
U Abulamu nu Loti bapaghunkana
1Bo u Abulamu nu muchi wache epamo muchisu icha Ijiputi, poka nu katundu wache wesi, akakwela ku Negebu, wepe u Loti akabuka poka nawe. 2U Abulamu akaba muntu umukabi nkani. Akaba ni ng'ozi, ni mbuzi ni ng'ombe nu siliva, sona nu golide.
3Akendelela nu bulendo bwache ubwakwimakwima pakubuka kukaya aka Beteli, kuko kale akazengako ivisakasa vyache pakasi pa kaya aka Beteli naka Ayi. 4Panapo po papo kale akazengapo ichighemo. Kulakula u Abulamu akamwiputa u Mwene.
5U Loti yuyo akendagha nu Abulamu, wepe akaba mukabi nkani. Akaba ni ng'ozi, ni mbuzi, sona ni ng'ombe, poka na bamunyumba yache, sona na babombi bache. 6Loli ubuzilo ubwakudimapo ivitekwa vyabo bukaba bunandi ukuti abantu babili banaba bikalaye poka. 7Po ivyongo vikanda pakasi pa badimi aba Abulamu na badimi aba Loti. Pakabalilo kalakala, aba Kenani naba Pelezi bakaba bachili bakwikala muchisu chilachila.
8Po u Abulamu akamubuzya u Loti akati, “Awe nane twe banamuntu, polelo patakabe ivyongo pakasi papako nane, sona na pakasi pa badimi bako na badimi bane. 9Zagha tupaghunkane, usale ichigaba chosi icha chisu chicho ukuchilonda. Nanti ukubuka kumitu, ane nkwiza pakubuka kuntende. Nanti ukwinjilila kuntende, ane nkwiza pakwinjilila kumitu.”
10 #
Ubw. 2.10
U Loti akatalankannya nukwennya ukuti ikombe lyosi ilya Yolodani mupaka ku Zowala likaba na mizi aminji nkani. Ikombe lila likayana nu mughunda uwa Mwene#13.10 mughunda uwa Mwene: Ghukunena nizya Mughunda uwa Edeni. pamo ichisu icha muvundo icha Ijiputi. Zinizi zikabombiwa pakabalilo kako bo nu Mwene achili atazimizizye akaya aka Sodomu naka Gomola. 11Po u Loti akasala ikombe lyosi ilya Yolodani. Akanyamuka nukubuka ichakubufumilo bwizuba. Umu momumo abantu babili banaba bakapaghunkanilana.
12U Abulamu akikala muchisu icha Kenani, loli u Loti akikala pakasi pa twaya utukulu nkani utwa mwikombe, po akazenga ivisakasa vyache papipi nu Sodomu. 13Abantu aba mu Sodomu bakaba babibi nkani, sona bakamunangila nkani u Mwene.
U Abulamu akusamila mu Hebuloni
14Bo u Loti abuka, u Mwene akamubuzya u Abulamu akati, “Talankannya akiza nkani, kumitu na kuntende, sona kubufumilo na kubwinjililo bwizuba. 15#Imbo. 7.5Nkwiza pakukupa awe na baluko lwako ichisu chosi chicho ukuchennya, po chikwiza pakuba chako ni chako bwila na bwila. 16Nkwiza pakukupa abaluko abinji nkani umwakuti atalipo nayumoyumo yuyo angababelenga. Nanti umuntu angabelenga ulufumbi ulwa muchisu ichapasi, kokuti angababelenga abaluko lwako. 17Nyamuka endela ichisu chosi chinichi pakuti nakupacho.”
18Po u Abulamu akasamya ivisakasa vyache nukuzenga papipi na makwi agha mupandapanda pabuzilo ubwa Mamule mukaya aka Hebuloni. Kulakula akamuzengela ichighemo u Mwene.
انتخاب شده:
Ubwandilo 13: LMB2024
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Lambya Bible © Bible Society of Malawi, 2024.