HINI UWASI-BIADRCIMOWA ya-sfadoci MAFIYO 14
14
1Hina lrqv Halade inv nakutah-fapvti ugimv nodrga ini ya-lrcimo-fulici Jesiseli, 2macimi, Jrne yrmv inv Fvfvhqi-ulalhi-wanv; unskv inv nili na-palici uci; macimi ini waci yolumv wrsi-kvki pakvtafe-yrlici weyrgi, u talvhi nihi ut vlolrkvnhi. 3Xvga Halade u mahci masanrli Jrneli, macimi u gijepi-lrli, chena giphudewa-nagi u tah bonrli xvga nili Holotivseli uci-hr-li, wewvli Filvbe u janinrli Halade. 4Xvga, Mvtv ini mvyrwvtwi kutaladewa-nagi wvhsi gelv bonvci inv, u tagoli Jrneli. 5Chena iah wesv naiahkv nfrci nili, u kufvhi nihi mahsa-lalici, xvga nihki mrmosigesqatv u ta lvgimr-wrli nili. 6Pvyaqv iah biayrgi Halade u negewi grsagigi, nili u drnah-fvli Halotivse manya-loli ini alaghi, macimi u manwi lapwv-hagoli Halade. 7Heni uci mah-ci-miwa gilagi jeginga-mowa wvhsi melrci nili goqa-nahi-grci inv wih nvtutv. 8Chena inv, u pami nen-grgoli u gali, Meliku utvsi msi-saswi-lrkv-nagi ini wesi Jrne inv Fvfvhqi-ulalhiwanv, isiwa. 9Chena mvci-lapwv inv ugimv; pvyaqv xvga nili u jeginga-mowanv chena nihi wa-wetvbe-makuci tvh wihfanigi uci tapigamu wvhsi ini meli-wagi; 10macimi wrwenga, chena u gisgiqat-whrli Jrneli ini gip-hudewa-nagi. 11Chena wesi inv biadota msi-saswi-lrkv-nagi, macimi melofu inv iqafv : macimi inv u biadr-wrli ini u gali. 12Chena inv u kvgahgimrfhi biahi, chena nihki u mvmr-wrli nili we-yrnvli, macimi u lakunr-wrli; chena wapfaki nihki macimi u wetv-mvwr-wrli Jesiseli.
13Huwa iah notvgi ini Jesise, ’n’uci srwa ulvgalhu, tvh pv-psqvh-gigi hawv nrnsihkv : chena nihki mahsa-lagiki iah nodrga-wrci yomv, u nakvlr-wrli nili udawanv uci gituh-faki. 14Chena biaci wapfa inv, macimi u nawvhi maci mahsa-lalici, chena u gitaminr-qala-mvhi, chena u gegahtv-wvhi ut vhqiluga-milici. 15Chena ia hulrqe-figi, nihki kvgahgimrfvki utfr-wrli, Cah’ pvpsqvhgi utvsi, chena ini grsagigi naiahkv pamfaiv; hrmaskvwi nihki mahsa-lagiki, wvhsi manvw’ hr-wrci nili udawa-nafv, macimi tapanvmu-wrci wih-fanewa pasiqi welvwv, u tair-wrli. 16Pvyaqv Jesise, Naluhci nihki wih wapfaki; melahku wvh meci-wrci, u talvhi. 17Chena nihki, Ni bonrpa utvsi nyrlvnwi pvyaqv wapsqada-wvli, chena ne-swi nvmahfvki, u talr-wrli. 18Chena Biatv-wiku nili mrtvsi, isiwa. 19Macimi u tapi-mvhi nihi Mahsa-lalici wvhsi lamtv-pilici svhgigi usgici nili mskuta-qvlu; chena u tah mvmanv nili nyrlvnwi wapsqada-wvli, macimi nihi neswi nvmafhi, chena spamagi pami lrpi manqvtugi, gisrtafi, chena u pusku-nrnv macimi u tah melvhi nihi kvgahgimrfhi nili wapsqada-wvli, chena nihki kvgah-mrfvki uci nihi mahsa-lalici. 20Chena wihfa-neki jrivhki, macimi dabho-loki : chena nihki u mrwvtunr-nrwv sa-sqvdo-dagi nili ba-xgahgrki uci, matvhfwi-gita-neswi sosoni-wvli uqihfanu. 21Macimi nihki wa-wihfani-cki nvwitu nyrlvna matvhfana-tabawa ila-neki, tabrna iqaki chena vpaluhfvki.
22Chena walanv u wihqihkv-wvhi nihi kvgahgimrfhi wvhsi ini ulvga-lagi lkv-malici, chena wvhsi ini vsuwa grmagi si negr-nelici, brluhi wi hrmaskv-wvhi nihi mahsa-lalici. 23Macimi iah mahci rmaskv-wrci nihi mahsa-lalici ini maqvhgigi si kuqic-sinwv nrn-sihkv wvhsi mvmrtu-maci : chena nrnsihkv ’’n’tvsi vpiwv ia hulr-qefigi. 24Wakv ini ulvgasi uwa ini lrutaqa ini msi-napi biat-hvnwi, u qelvhsi-lapwvhaku-nrwv nili babokvki; xvga u nvxgr-nr-wv ini mahsigikvgi. 25Chena ini mvwi-nyawana gcitvwrfewa ini tapahgi utfvhi, pami gituhfa usgi-tapia ini msi-napi. 26Macimi nihki kvgahgimrfvki iah nawr-wrci pami gituhfali usgi-tapia ini msi-napi, patfvgi-tahaki nihki, Inv jepv, iwvki; macimi wiv-kvhotv-moki xvga grwilv-waki. 27Pvyaqv walanv Jesise u talvhi, Uwasi-labwrku; nelv inv; tagi kih grwilvwa-pwv isiwa. 28Macimi Betv ud rpvftv-wrli, Dabalamiwatv, gelr-wivna inv, birlu isilu wvhsi bialu-dolv usgi-tapia ini napigi isiwa. 29Macimi inv Birlu, u talrli. Chena Betv lrsiwa ini ulvga-lagi uci, macimi ini usgi-tapia napigi pamfa, macimi u bialutv-wrli Jesiseli. 30Pvyaqv iah namagi ini mahsigikvgi, grwilvwa; macimi vlami gogi, wivkvho-tvmwv, Dabalamiwatv, wrpvnas-hilu, isiwa. 31Macimi walanv Jesise mrsi jegi-lacaskv u tah fogi-nrli, chena, 0gelv cv-gi dapwah-safv, nahiwa g’uci rnwahsa? u talrli. 32Chena nihki spamagi ini ulvga-lagi ia hr-wrci, nvgaskv ini mahsigikvgi. 33Chena nihki ulvga-lagi ya-picki usvsilvwahr-wrli nili, Dabwawa, inv u Qihfvli Mvnatu gelv, isiwaki.
34Chena iah mahci kvbr-wrci nihki, ini vsisgegi si biaki Ginasuladewi-drmqa. 35Chena nihki ’n’tvsi uci ’laneki iah wr-kumr-wrci nili, mafhega si wrwengaki ini gryrugi drmqa, chena u biatvwr-wrli jrivhki ya-qiluga-lici; 36macimi u kvtuwvmr-wrli wvhsi manvwvhga kvtasgi pahsanv-mvwr-wrci ini tv npaniqr-dalici u betanikv : chena ya-tfwi pahsanvmu-wrci mafafiho-foki.
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Published for Thomas Wildcat Alford in 1929
