युहन्ना 7
7
ईसुन भायसे भुरसु नी करे
1यहुदा जीला वाळा यहुदी मुख्या ईसुक मार नाखणेन वीच्यार कर रवला, तेरेमां चु यहुदा जीला मां जाणे नी हींडतेलु ने ईसु आपसा चेला भेळुत गलील जीलात मां सेवा करतु जाय्न हींडतु रयु। 2बाकुन हीयु यहुदी माणसेन आसरान तीहवार#7:2 पर्व सातेत आय रवलु। 3तेरेमां ईसुन भायस ईसुक कह्यु, “जां सी यहुदी जीलाम जां काहाकी ज काय काम तु करे तीनु कामेक तारा आखा चेला बी देखे। 4काहाकी असु काहनु नी हसे चु नाव कमाय्णे चाहे ने डुकायन#7:4 छिपकर काम करे। कदी तु ज काम करे ती खुद काजे कळी पर उजेंतु कर।” 5काहाकी ईसुन भाय ईसु पर भुरसु नी करतेलु करीन चु असी वात कर्यु।
6तत्यार ईसु तीनुक कह्यु, “मारे वाटे हाल लगुन वारु टेम नी आवी बाकुन तुंद्रे वाटे आखी टेम वारलु छे। 7ईनी कळीन माणसे मे तुंद्रे सी कुहराय नी राखो, बाकुन जे मारे सी कुहराय राखे काहाकी मे तेरा वीरुद मां जी गवाय दम की तेरा काम भुंडात छे। 8तुहुं तीहवार मां जावु, मे हय ईना तीहवार मां नी जातु, काहाकी हय लग मारी टेम पुरी नी हय रय।” 9जी वात कय्न ईसु गलील जीलात मां रय गुयु।
भगवान नक्खी करला टेमे ईसु खपड़ीन तीहवार वाळने हुगलुत जाय
10जत्यार ईसुन भायस तीहवार वाळने जाती रया, ती ईसु बी गुयु, बाकुन उजेंतु नी हयु, चु हुगलुत चां गुयु। 11खपड़ीन तीहवार मां यहुदी माणसे ईसु काजे हेरता जाय्न असा पुछतेला, “चु माणुस कां छे।”
12खपड़ीन तीहवार मां माणसे ईसुन बारामां कळेन कळे बेसकी वात करतेला, “हयु भलु माणुस छे।” ने थुड़ाक कहंतेला, “नी हयु भलु नी हय बाकुन माणसे काजे भटकाड़ र्यु।” 13कुय बी तेरे बारामां जुर सी वात नी करतेला, काहाकी चे यहुदी नेता सी बीहतेला।
14तीहवारेन आदा दाहड़ा जाती रया, ने ती ईसु मंदीरेन आंगणा मां जाय्न सीकाड़ने बाजी गुयु। 15ईसुन वात सामळीन यहुदी माणसे घाबराय्न ईसुन बारामां असा कह्या, “काहना बी गुरुन साहरे सीके बीगुर ईना माणसेम असी अक्कल कां सी आय गुय।”
16असा कहण्याक ईसु कह्यु, “मारु भगवान बास मेसेक मकलने वाळु छे। वात सीकाड़ने वाळी मारी मनेन वात नी हय बाकुन मेसेक मकलने वाळान छे। 17कदी काहनुक तेरी मरजी पर चालने हींडे, ती हयु ईनी भणावली वातेन बारामां जाण जासे की, ज भगवान भीणी सी छे, की मे मार भीणी सी कहंणे बाजी रयु। 18जु काहनुक आपसुत खुद काय कह्वे, चु आपसान बड़ाय करनु चाहे, बाकुन जु आपणा मकलने वाळान बड़ाय करनु चाहे हयुत छाचलीन छे, ने हेरेम काय बी पाप नी हय। 19काय मुसु तुहुंक नेम कायदु नी देदु काय? तेबी तुंद्रे मां सी काहनुक मुसान साहरे लिखला नेम कायदा पर नी चाले। तुहुं काहा मेसेक मारेन हींडी रया?”
20माणसेन टुळाम सी काहनाक जपाप आप्या, “असो लागे तारे मां भुतड़ो भराय रयो। कुण तुसेक मारने हींडे?” 21ईसु तीनुक जपाप आप्यु, “मे आरामेन दाहड़े एक मांदलाक वारु करलु करीन, ने तुहुं आखा देखीन चकराय रया। 22हेरे वजे सी मुसु तुहुंक फतरी काटणेन रीती पाळनेन नीयम आप्यु, ज नी की मुसा भीणी सी बाकुन डाहा बुड़ा सी चालती आय रय ने तुहुं आरामेन दाहड़े माणसेन फतरी काट्या करु। 23जत्यार आरामेन दाहड़े माणसेन फतरी काटाड़े, काहाकी मुसान नीयम नी टुटे, ती तुहुं मारे पर काहा रीस करु की मे आरामेन दाहड़े एक माणसे काजे वारु कर्यु। 24मुंहडा देखीन दसा तसा नीयाव मां करु, वारु वीच्यार करीन खरु नीयाव करु।”
काय ईसुत मसी छे?
25तीनी टेमे यरुसलेम सहर वाळा थुड़ाक यहुदी माणसे कहंणे बाजी गुया, “काय जु हयुत माणुस छे ने हय तीनाक हामरा पुडार्या मार नाखणेन वीच्यार कर रया। 26ने देखु जु ते उजेंतु वात करने बाजी रयु, ने कुय हीनाक काय नी कह्ता। काय यहुदी नेता छाचलीन जाण लेदा काय हयुत मसी छे? 27बाकुन हीनाक ते हामु जाणजे की, जु कां सी आवलु छे; बाकुन मसी जत्यार आवसे ती कुय नी जाणे की चु कां सी आयु।”
28तत्यार ईसु मंदीर आंगणा मां सीकाड़तु जाय्न आयड़ीन कह्यु, “तुहुंक असो लागे की हीनाक उळखी रया, ने ज बी जाणु की मे कान छे। मेते मारी मरजी सी नी आयु, बाकुन मेसेक मकलने वाळु खरलु छे, तीनाक तुहुं नी जाणु। 29मे तीनाक जाणो काहाकी मे तेरे भीणी सी आयु ने हयुत मेसेक मकेल्लु छे।”
30थुड़ाक माणसे ईसुक धरीन ली जाणे हींडी रवला, बाकुन आज लग ईसुन मरने टेम नी आय, जी टेम भगवान नक्खी करलु। 31तेबी माणसेन टुळा मां सी बेसका माणसे ईसु पर भुरसु कर्या, ने कहणे बाजी गुया, “अतरा चकराड़न्या वारु कामेन सहलाणी दीसरु काहनु बी, नी देखाड़ सके।”
यहुदी माणसे ईसु काजे धरनेन कुसीत करे
32फरीसी माणसे ज सामळ्या की, माणसे ईसुन बारामां कळे-कळे वात करने बाजी र्या; ती चे मंदीरेन डाहला पुजारा साते वात करीन ईसुक धरीन लावणे करीन मंदीरेन राखवाळ्या सीपायड़ा काजे मकल्या। 33पछेन ईसु कह्यु, “हय मे ईतरीक वार तुंद्रे पुठ्ये रय्स। ने अळतेन मेसेक जु मकेल्लु छे, तेरेन्चां पछु जाती रय्स। 34तुहुं मेसेक हेर्या करसु बाकुन मे तुहुंक नी जड़ो। ने मे जां जाणे हींडी र्यु चां तुहुंक नी आवाये।”
35जी वात सामळीन यहुदी-मुख्या आपसा-आपसात कह्या, “जु काहा जासे की हयु हामुक नी जड़े, काय हयु पला धड़े जासे जे युनानी मां रावण्या-तीवण्या हय्न रवे ने युनानी काजे वारलु वात सीकाड़ देसे? 36जां काय वात छे, ची जु कह्लु, की तुहुं मेसेक हेरसु बाकुन मे नी जड़ो; ने चां मे छे चां तुहुं नी आय सकु?”
ईसु चुखली-आत्मान बारामां सीकाड़े
37खपड़ीन तीहवारेन खास दाहड़े जु पेहलु दाहड़ु छे, ईसु उबु हयु ने आयड़ीन कह्यु, “कदी कुय पीसलो हय ती मारे धड़े आवे ने पाणी पीणु चाहजे। 38जु मार पर भुरसु करसे जसों चुखला सास्तुर मां अनसारे आवलो छे, तेरा डील मां सी जीवनेन पाणीन नदी उहवसे।” 39ईसु ज बुल चुखली#7:39 पवित्र आत्मान बारामां कह्यु, ज कुय हेरे पर भुरसु करने वाळा हेरेत पर हतला; काहाकी आत्मा हय लग नी उतरी काहाकी ईसु हय लग तेरी सेक-सींगार लग नी पुग्यु।
ईसुन बारामां माणसे वात वीच्यार करे
40ईसुन जी वात सामळीन माणसेन टुळा मां सी काहना-काहनाक जी वात कह्या, “छाचलीन हयु भगवानेन अघली वात बताड़ने वाळु माणुस छे।”
41थुड़ाक माणसे कवतेला की,
“जु मसी छे, बाकुन काहनाक कह्या, काहाकी मसी गलील जीलाम वाळु नी हय सके? 42काय चुखली-सास्तुर मां ज नी लिखलो आयो काय मसी दावुदेन कळी मां पयदा हवसे ने बेतलहम गांव सी आवसे जां दावुद रहतेलु।” 43असो करीन ईसुन बारामां माणसे मां बेरजु पड़ गुयु। 44तींद्रे मायन थुड़ाक माणसे ईसु काजे धरीन ली जाणे हींडी रवला बाकुन तीनाक धरीन ली जाणे करीन कुयन हिम्मत नी हय।
यहुदी नेता भुरसु करने सी मना करे
45तत्यार ईसुक धरने करीन गुयला मंदीरेन राखवाळ्या-सीपायड़ा मंदीरेन डाहला पुजारान्चां ने फरीसी माणसेन्चां पछा जाती रया। ती चे डाहला पुजारा ने फरीसी माणसे तीनुक कह्या, “तुहुं तीना ईसुक काहानी लाया?”
46मंदीरेन राखवाळ्या सीपायड़ा जपाप आप्या, “चु माणुस जसी वात करे तसी वात आज लग कुय नी कर्यो।”
47जी वात सामळीन फरीसी माणसे तीनुक जपाप आप्या, “काय चु तुहुंक बी भुले पाड़ देदु काय।” 48कुय बी यहुदी नेता ने फरीसी माणसे मायन कुय बी ईना ईसु पर भुरसु नी कर्या? 49बाकुन ईनु टुळाम माणसे काजे मुसा सी लिखली सास्तुर मालम नी हय, करीन जे ईसुन सामळीन भुले पड़ गुया। ने हींद्रे पर ते भगवानेन गरा छे।
50नीकुदेमुस चु पेहेल ईसु काजे भेळु हवणे गुयलु, चु तीनु फरीसी माणसे मायन एक हतलु। चु तीनु काजे कह्यु। 51काहना बी माणुस काजे पुछीन तेरा गुनान पतु लागाड़े बीगुर जसों तसों तेरु नीयाव करीन तीनाक तु गुनाळु छे, कहीन डंड आपणु आपसा नीयम अनसारे संय छे काय? 52चे तीना नीकुदेमुस काजे जपाप आप्या, “तु बी गलील जीला वाळा पुठ्ये भेसकायलु छे? सास्तुर मां हेर ने भणीन देख तत्यार तुसेक मालुम पड़से की गलील जीलाम सी भगवानेन अघली वात बताड़न्यु माणुस उजेंतु हय्न आवण्यु नी हय।”
53ने तत्यार चे आखा आपणे-आपणे घर जाती र्या।
اکنون انتخاب شده:
युहन्ना 7: NTBSP23
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
