San Mateo 25
25
To̧mö̧rȩ ruhuä nä̧tö̧ jȩtti̧nö̧ huȩnȩ huo̧juȩti̧nö̧do
1Juhua'a yabonö huo̧juȩti̧nö̧do Jesús:
—Dios hueömä to̧mö̧rȩ ruhuä nä̧tö̧ möäyotö ttöäre lámpara 'chu̧'ä̧rö̧, ya̧tȩ irecuarö ȩmö̧rö̧ topö tti̧'cha̧'a̧ jä̧'i̧nö̧'a̧nö̧ ja̧'a̧. 2Jahuätöttö ji̧mö̧tȩ ruhuä u̧ni̧chä̧rö̧ ka̧cui̧nätö̧do. Korotö ji̧mö̧tȩ ruhuä a̧mö̧cuä̧rö̧nö̧ ka̧cui̧nä̧tö̧do. 3U̧ni̧chä̧rö̧ ka̧cui̧nä̧tö̧mä̧, ttöäre lámpara ttȩpo̧mȩnä̧, isoya pä'äji ta'anö ttö'cara pä'ö ȩpo̧co̧tö̧ pi̧nä̧tö̧do. 4Korotö a̧mö̧cuä̧rö̧nö̧ ka̧cui̧nä̧tö̧mä̧ ttöäre lámpara'inä, isoya'inä pä'äji ta'anö ttö'cara pä'ö ȩpi̧nä̧tö̧do. 5Irecuarö ȩmö̧mä̧ päinö ta'anö ichoca'attö, pö̧di̧ rö̧jä̧chi̧'i̧nä̧u̧do. Ja̧'hua̧nö̧ jo̧mȩnä̧ ä'i'inätödo. 6Ja̧u̧nu̧ o'ca'a yodo kä'co päi'omenä, huotta'a ä̧ju̧cui̧nä̧tö̧do: “¡Irecuarö ȩmö̧mä̧ täcö ichö! ¡Tocu'ätucua pä'ö rä'opätucui!” 7Jahuätö nä̧tö̧ möäyotö ä̧rä̧mi̧'ö̧ ttöäre lámparas rȩdȩti̧nä̧tö̧do. 8Ja̧'hua̧nö̧ ja̧'a̧nä̧ u̧ni̧chä̧rö̧ ka̧cui̧nä̧tö̧mä̧ korotö a̧mö̧cuä̧rö̧nö̧ ka̧cui̧nä̧tö̧rö̧ pä'inätödo: “Lámpara isoya ji̧'qui̧cha̧nö̧tä̧ iyitö. Töäre lámparas na̧hui̧pä̧cha̧'a̧.” 9Ja̧'hua̧nö̧ pättomenä, korotö ädätinätödo: “Iyocotöjä. Ucuturu tiyöttömä, ucuturu'inä, ujuturu'inä pa̧ja̧cuä̧cho̧ca̧'a̧. Ttiyomettö ȩmä̧jä̧tu̧cui̧ ucututä.” 10U̧ni̧chä̧rö̧ ka̧cui̧nä̧tö̧mä̧ lámpara isoya ȩmö̧ tti̧'cho̧mȩnä̧, irecuarö ȩmö̧mä̧ ichinödo. A̧mö̧cuä̧rö̧nö̧ ka̧cui̧nä̧tö̧mä̧ ja̧u̧cu̧ do'ächinätö irecuarö ȩma̧ pä'ö. Dottächomenä, äpate mö̧ȩcuä̧chi̧na̧'a̧do. 11Ja̧u̧nu̧ o'ca'a lámpara isoya ȩmö̧ 'chä̧jä̧tö̧mä̧ ichi'inätödo. Jahuätö pä'inätödo: “¡Chu̧ru̧hua̧, chu̧ru̧hua̧, äpate ba'epitö!” 12Ja̧'hua̧nö̧ pättomenä, chutä ädätinödo: “Iso päi'önä pä'ösä, ucuturu jȩru̧pa̧sä̧.” 13Ja̧'hua̧ ja̧'a̧ ucutu'inä to̧pä̧rö̧ ka̧cuä̧tu̧cui̧. Ubo I̧tti̧ ichäcuome yoröiso jerupätöjä, —pä'ö huo̧juȩti̧nö̧do Jesús.
Ya̧tȩ ru̧hua̧ umöhuäyotörö iyinö huȩnȩ huo̧juȩti̧nö̧do
14Ja̧'hua̧ta̧nö̧ huo̧juȩti̧nö̧do Jesús:
—Dios hueömä ya̧tȩ kara'a i̧'chä̧cua̧'a̧ ä'canä umöhuäyotörö huopö pärätä iyipa'a jä̧'i̧nö̧'a̧nö̧ ja̧'a̧.
15“Ya̧tȩrö̧ cinco mil bolívares jo̧mȩnä̧ iyinödo. Ka̧ra̧rö̧ dos mil bolívares jo̧mȩnä̧ iyinödo. Ka̧ra̧rö̧ ya'ute mil bolívares jo̧mȩnä̧ iyinödo. Churutä ppa̧ttä̧dö̧'a̧nö̧ jo̧mȩtä̧ iyinä̧u̧do. Ja̧'hua̧nö̧ iyipö cue'ächö 'chi̧nö̧do. 16Chumä cinco mil bolívares jo̧mȩnä̧ ȩmi̧nö̧mä̧, koro juäi ȩmö̧'i̧nä̧, iyö'inä jitä ya'ute cinco mil bolívares jo̧mȩnä̧ ȩmi̧nö̧do. 17Ja̧'hua̧ta̧nö̧ dos mil bolívares jo̧mȩnä̧ ȩmi̧nö̧mä̧, koro juäi aditö jitä ya'ute dos mil bolívares jo̧mȩnä̧ ȩmi̧nö̧do. 18Ja̧'hua̧nö̧ ja̧'a̧nä̧ ya'ute mil bolívares jo̧mȩnä̧ ȩmi̧nö̧mä̧ 'chä̧nö̧, u̧ru̧hua̧ öäre pärätä da̧jö̧ icuinödo rȩjȩ jacuä.
19“Recuo mo̧ro̧ o'ca'a, chutä ru̧hua̧ ppa̧'ä̧chi̧nö̧do jahuätö umöhuäyotö ttimitarö pä'ö. 20Äcuomenä cinco mil bolívares jo̧mȩnä̧ ȩmi̧nö̧mä̧ ichi'ö, ru̧hua̧rö̧ cinco mil bolívares jo̧mȩnä̧ ppa̧'ä̧di̧nö̧do. Ja̧u̧ pä'inödo: “Chu̧ru̧hua̧, cinco mil bolívares jo̧mȩnä̧ cuiyinäcusä. Koro cinco mil bolívares jo̧mȩnä̧'i̧nä̧ ttö aditö chȩmi̧nö̧mä̧ ucuru iyösä.” 21Ja̧u̧ ru̧hua̧ pä'inödo: “Ye, adihua'a. Ucu adiu jȩpö̧jä̧, chu̧mö̧huä̧ya̧. Ji̧'qui̧cha̧nö̧tä̧ chiyina'a'inä adiu jȩcu̧'i̧na̧'a̧ttö̧, rö̧ȩnä̧nö̧ chi̧yä̧cua̧jä̧. Do'ächi'ö esehui ttöcu.” 22Ja̧u̧nu̧ o'ca'a u̧mö̧huä̧ya̧mä̧ dos mil bolívares jo̧mȩnä̧ ȩmi̧nö̧mä̧ ichi'ö pä'inödo: “Chu̧ru̧hua̧, ucumä dos mil bolívares jo̧mȩnä̧ cuiyinäcusä. Koro dos mil bolívares jo̧mȩnä̧'i̧nä̧ ttö aditö chȩmi̧nö̧mä̧ ucuru iyösä.” 23Ja̧u̧ru̧ pä'inödo ru̧hua̧mä̧: “Ye, adihua'a. Ucu adiu jȩpö̧jä̧, chu̧mö̧huä̧ya̧. Ji̧'qui̧cha̧nö̧tä̧ chiyina'a'inä adiu jȩcu̧'i̧na̧'a̧ttö̧, rö̧ȩnä̧nö̧ chi̧yä̧cua̧jä̧. Do'ächi'ö esehui ttöcu.” 24Ja̧u̧nu̧ o'ca'a u̧mö̧huä̧ya̧mä̧ ya'ute mil bolívares jo̧mȩnä̧ ȩmi̧nö̧mä̧ ichi'ö pä'inödo: “Chu̧ru̧hua̧, ucumä ra̧huä̧rö̧jä̧ huo̧jua̧sä̧. Cutocö ji̧nö̧tä̧, ca̧ca̧tö̧ja̧. Cu̧ju̧no̧cö̧ ji̧nö̧tä̧ ȩmö̧jä̧. 25Ja̧'hua̧nö̧ ja̧'a̧ttö̧ ye'ecuinösä. Cuhuäre pärätä rȩjȩ jacuä da̧jö̧ icuinösä. Pi̧yȩtä̧ ucutä ttörö cuiyinötä ppa̧'ä̧dö̧sä̧.” 26Ru̧hua̧mä̧ ja̧u̧ru̧ pä'inödo: “Chu̧mö̧huä̧ya̧, ucumä su̧ro̧pa̧jä̧. Ucumä ö̧tä̧hua̧jä̧. Täcö huo̧jui̧nö̧jä̧ ttö chötocö ji̧nö̧ chö̧ca̧ca̧ta̧'a̧ pä'ö. Ja̧'hua̧ta̧nö̧ chu̧ju̧no̧cö̧ ji̧nö̧ chȩma̧'a̧ pä'ö huo̧ji̧nö̧jä̧. 27Ja̧'hua̧nö̧ ja̧'a̧ttö̧ pärätä päroäcuähuodenä cu̧ju̧na̧'a̧do chöäre pärätä. Ja̧'hua̧nö̧ jȩcu̧'i̧nö̧ttö̧mä̧ ttö chichomenä, iso päi'önä ttötä chöäre pärätättö'inä abonänö ji̧'qui̧cha̧nö̧ ȩma̧ji̧sä̧.” 28Ja̧u̧nu̧ o'ca'a ippeyä ka̧cuä̧tö̧rö̧ pä'inödo: “Ya'ute mil bolívares jo̧mȩnä̧ ku̧nä̧rö̧rö̧mä̧, 'cho'ipätucui. Ka̧ra̧rö̧ diez mil bolívares jo̧mȩnä̧ ku̧nä̧rö̧rö̧ iyätucui. 29Iso päi'önä rö̧ȩnä̧nö̧ ku̧nä̧rö̧rö̧, jitä ya'ute ttiyarödo, rö̧ȩnä̧ u̧ju̧nä̧rä̧cua̧'a̧nö̧. Ja̧'hua̧nö̧ ja̧'a̧nä̧ jui̧'a̧rö̧ ji̧'qui̧cha̧nö̧tä u̧ju̧nä̧rö̧'i̧nä̧ 'chottipäcuotö. 30Ja̧'hua̧ta̧nö̧ pi̧dȩmä chu̧mö̧huä̧ya̧ su̧ro̧pa̧rö̧, u̧mi̧cu̧ yo̧mȩcu̧ do'opö icuätucuirö. Juhua'attö rö̧ȩnä̧ ubara ttu'u ajuäunu ttacu ä̧chi̧jö̧nä̧ jȩttä̧cuo̧tö̧”, —pä'inödo Jesús.
31Juhua'a yabonö pä'inödo Jesús:
—Ubo I̧tti̧ o'ca toi'önä umöhuäyotö ángelescu, adihuä Ru̧hua̧ päi'önä ichomenä, chutä adihuä i̧dȩä̧cä̧nä̧ ö̧'ä̧mä̧dä̧cua̧. 32O'ca juiyönä pa̧ja̧cu̧nä̧ ttö̧ja̧ chutä ä'ca jo̧mȩttö̧ ttö̧ca̧ca̧cui̧pä̧cuo̧tö̧. Ya̧tȩ o̧vȩja̧stö̧ tta̧huä̧rä̧cuä̧huä̧ i̧sa̧ chi̧vo̧stö̧, o̧vȩja̧stö̧ ta'anö huotörö i̧mi̧cu̧nä̧ 'quȩ'ȩpö̧ icu'a̧nö̧, Ubo I̧tti̧'i̧nä̧ ttö̧ja̧rö̧ 'quȩ'ȩpö̧ i̧cuä̧cua̧. 33O̧vȩja̧stö̧ u̧huo̧jua̧'a̧nä̧ ö̧tä̧cua̧. Koro juo'otö ieruhua'anä ö̧tä̧cua̧. 34Ja̧u̧nu̧ o'ca'a Ru̧hua̧ u̧huo̧jua̧'a̧nä̧ pȩjä̧tö̧rö̧ pä̧cua̧: “Ichätucui ttöcu. Chä'o Dios ucuturu ppädinä̧u̧jä̧. Do'ächätucui Dios ö̧jo̧mȩcu̧. Pi̧jä̧ aditinö o'ca'a, jo̧mȩ päi'önä cä'ädö aditö ucuturu iya pä'ö. 35Ko̧ro̧nö̧ chucua ppäi rö̧jo̧mȩnä̧, chu̧cuȩ iyinätöjä. Chahua a̧di̧ rö̧jo̧mȩnä̧, chahua iyinätöjä. Kara'attö ichäcuähuotö ta'anö cuedächomenä, cuojusodenä chö̧ja̧ pä'ö hue'inätöjä. 36Chö̧'ca̧tä̧huä̧ta̧'i̧nä̧ juidomenä, chö̧'ca̧tä̧huä̧ta̧ iyinätöjä. Na̧dä̧cho̧mȩnä̧, ttörö ppä'ädö ichinätöjä. Cärenä chö̧'a̧'a̧, ttörö topö ichinätöjä”, pä̧cua̧ Ru̧hua̧. 37Ja̧'hua̧ ja̧'a̧ huoinä̧u̧mä̧ pättäcuotö: “Chu̧ru̧hua̧, cucua ppäi rö̧jo̧mȩnä̧, ¿ti̧yȩnö̧ totina'ajä̧ttö̧? Cu̧cuȩmä̧ ¿ti̧yȩnö̧ tiyina'ajä̧ttö̧? Cuahua a̧di̧ rö̧jo̧mȩnä̧, ¿ti̧yȩnö̧ totina'ajä̧ttö̧? Cuahuamä, ¿ti̧yȩnö̧ tiyina'ajä̧ttö̧? 38Kara'attö ichäcuähuotö ta'anö cuecuhuächomenä, ¿ti̧yȩnö̧ huetina'ajä̧ttö̧ tojusodenä cu̧ja̧ pä'ö? Cu̧'ca̧tä̧huä̧ta̧ juicuhuomenä, ¿ti̧yȩnö̧ totina'ajä̧ttö̧? Cu̧'ca̧tä̧huä̧ta̧mä̧, ¿ti̧yȩnö̧ tiyina'ajä̧ttö̧? 39Na̧cu̧huä̧cho̧mȩnä̧, ¿ti̧yȩnö̧ ppätädina'ajä̧ttö̧? Cärenä cu̧'a̧'a̧, ¿ti̧yȩnö̧ topö ti̧'chi̧nä̧ttö̧ ucuru?” pättäcuotö. 40Ja̧'hua̧nö̧ pättomenä, Ru̧hua̧mä̧ ä̧dä̧tä̧cua̧: “Iso päi'önä pä'ösä ucuturu, ya̧tȩ ttörö esetörö, usurä i̧sa̧rö̧'i̧nä̧, ttörö esetörö ppäcuhuädätucuomenä, ttörötä ppä'ädö jȩpi̧nä̧tö̧jä̧.”
41“Ja̧u̧nu̧ o'ca'a ja̧u̧ Ru̧hua̧ ieruhua'anä pȩjä̧tö̧rö̧ pä̧cua̧: “Ttöttö'inä i̧mi̧cu̧nä̧ 'quȩ'i̧pä̧chä̧tu̧cui̧. Ucuturu suronä 'cuäopäcua'a. Ocurära̧'a̧, beipocarära̧'a̧ tätucui. Juhuarä beipocaränä ähuettäcu, umöhuäyotö ángelescu ttö̧ja̧cua̧ pä'ö aditinödo Dios. 42Chucua ppäi rö̧jo̧mȩnä̧, chu̧cuȩ iyocotö pi̧nä̧tö̧jä̧. Chahua a̧di̧ rö̧jo̧mȩnä̧, chahua iyocotö pi̧nä̧tö̧jä̧. 43Kara'attö ichäcuähuotö ta'anö cuedächomenä, cuojusodenä chö̧ja̧ pä'ö hue'ocotö pi̧nä̧tö̧jä̧. Chö̧'ca̧tä̧huä̧ta̧ juidomenä, iyocotö pi̧nä̧tö̧jä̧. Na̧dä̧cho̧mȩnä̧'i̧nä̧, cärenä chö̧'a̧'a̧'i̧nä̧ yoröiso ttörö topö ichocotö pi̧nä̧tö̧jä̧”, pä̧cua̧ Ru̧hua̧. 44Ja̧'hua̧ ja̧'a̧ jahuätö pättäcuotö: “Tu̧ru̧hua̧, cucua ppäi rö̧jo̧mȩnä̧'i̧nä̧, cuahua a̧di̧ rö̧jo̧mȩnä̧'i̧nä̧, ¿ti̧yȩnö̧ totina'ajä̧ttö̧? Kara'attö ichäcuähuotö ta'anö cuecuhuächomenä, tojusodenä cu̧ja̧ pä'ö, ¿ti̧yȩnö̧ huetoca'a ji̧na̧'a̧jä̧ttö̧? Na̧cu̧huä̧cho̧mȩnä̧'i̧nä̧, cärenä cu̧'a̧'a̧'i̧nä̧, ¿ti̧yȩnö̧ ppä'ädö ti̧'cho̧ca̧'a̧ ji̧na̧'a̧jä̧ttö̧?” pättäcuotö. 45Ja̧'hua̧nö̧ pättomenä, Ru̧hua̧mä̧ ä̧dä̧tä̧cua̧: “Iso päi'önä pä'ösä ucuturu, ttörö esetörö, usurä i̧sa̧rö̧'i̧nä̧ ttörö esetörö, ppäcuhuädätucuoca'anä, ttörötä ppä'ädocotö pi̧nä̧tö̧jä̧”, pä̧cua̧ Ru̧hua̧mä̧. 46Ja̧u̧nu̧ o'ca'a jahuätömä ocurära̧'a̧ beipocarära̧'a̧ tä̧bo̧cuä̧ päi'önä tti̧'chä̧cuo̧tö̧. Korotötä, Diosrö pä̧huä̧ rö̧jo̧mȩnä̧ jȩpä̧tö̧tä̧, kä̧cuä̧huä̧ i'co ttu̧ju̧nä̧rä̧cuo̧tö̧, —pä'inödo Jesús.
انتخاب شده:
San Mateo 25: PIDNT86
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuevo Testamento en Piaroa © Sociedades Biblicas Unidas, 1986.
