San Mateo 23
23
Jesús ra̧huä̧ri̧pi̧nö̧do fariseos huotörö'inä, hueähuä huȩnȩ huo̧juȩtä̧tö̧rö̧'i̧nä̧
1Ja̧u̧nu̧ o'ca'a Jesús huo̧juȩti̧nö̧do u̧huo̧juȩtä̧u̧ru̧'i̧nä̧, korotö ttö̧ja̧rö̧'i̧nä̧. 2Pa̧'a̧nö̧ huo̧juȩti̧nö̧do:
—Hueähuä huȩnȩ huo̧juȩtä̧tö̧'i̧nä̧, fariseos huotö'inä “Moisés hueähuä huȩnȩ jiäcuähuä isotöjä”, pä'ätödo. 3Ja̧'hua̧ ja̧'a̧nä̧ jahuätö pättömä o'ca juiyönä jȩpä̧tu̧cui̧. Ja̧'hua̧nö̧ jȩcu̧'ä̧tu̧cuo̧mȩnä̧, jitötä jȩttö̧'a̧nö̧ jȩcu̧'ä̧tu̧cuä̧'. Jahuätömä adiu ttucuocua'anä, i̧mi̧cu̧nä̧ jȩpä̧tö̧do. 4Koro juäi ttö̧ja̧ yoröiso jȩttö̧ juiyö'a̧nö̧ jö̧ huo̧juȩtä̧tö̧ jȩcu̧'ä̧tu̧cua̧ pä'ö. Ja̧'hua̧nö̧ ttu̧huo̧juȩto̧mȩnä̧, jahuätömä yoröiso ji̧'qui̧cha̧nö̧'i̧nä̧ jȩpo̧co̧tö̧ jitötä ttu̧huo̧juȩtö̧mä̧. 5Korotö ttö̧ja̧ ttesehuatö pä'ö jȩpä̧tö̧do. Ttö'änä'inä, ttöjohuiyänä'inä Huȩyu̧cuä̧ Huȩnȩ korotöttö'inä abonänö rö̧ä̧ö̧ juäi nö'cäu jȩpä̧tö̧do, ttö̧ja̧ tottatö pä'ö. Ttö̧'ca̧tä̧huä̧ti̧yu̧'i̧nä̧ korotö ttö̧'ca̧tä̧huä̧ti̧yu̧ttu̧'i̧nä̧ abonänö otoä̧ta̧ 'ca̧tä̧huä̧tö̧. 6Jahuätömä ttu̧cuȩ ttucuomettö'inä, judíos ttu̧huo̧jui̧'i̧nodehuiyättö'inä korotöttö'inä abonänö adihuäcänä ttö̧'ä̧mä̧da̧ pä'ätödo. 7Ötahuiyänä cuettächomenä, o'ca toi'önä ucuotönö tettähuatö pä'ätödo. Ja̧'hua̧ta̧nö̧ “Huo̧juȩcuä̧ I̧sa” pättatö pä'ätödo.
8“Ja̧'hua̧nö̧ ja̧'a̧nä̧ korotömä ucuturu “Huo̧juȩcuä̧ Isotö” pättö juiya pä'ätucui. Ucutumä o'ca toi'önä ji̧nä̧ yotöte isotöjä. Ya̧tȩrö̧tä̧ Huo̧juȩcuä̧ I̧sa̧rö̧, Cristorötä ku̧nä̧rä̧tö̧jä̧ ucutumä. 9Pi̧jä̧nä̧ ka̧cuä̧tö̧rö̧ “Chä'o” päcuhuätucuä'. Ya̧tȩrö̧tä̧ Cuä'o mo̧ro̧jä̧nä̧ kö̧rö̧tä̧ ku̧nä̧rä̧tö̧jä̧. 10Ja̧'hua̧ta̧nö̧ ucuturu turuhuotö pättö juiya pä'ätucui. Ucutumä ya̧tȩrö̧tä̧ Cu̧ru̧hua̧rö̧, Cristorötä ku̧nä̧rä̧tö̧jä̧. 11Ucututtu korotörö ppädäcuähuä i̧sa̧ ö̧jö̧ttö̧mä̧, ja̧u̧tä̧ korotöttö'inä abonänö adihuä i̧sa̧do. 12Ya̧tȩ ucuo i̧sa̧ ö̧ja̧ pä'ömä, ucuo i̧sa̧ ko̧cö̧. Ja̧'hua̧ta̧nö̧ ya̧tȩ ucuo i̧sa̧ ö̧ja̧ pä'ocömä, ucuo i̧sa̧ ö̧jä̧cua̧.
13“Fariseos huotö'inä, hueähuä huȩnȩ huo̧juȩtä̧tö̧'i̧nä̧, suronä 'cuäopäcua'a ucuturu. ¡Yapareu ttö̧ja̧jä̧! Ucutumä korotö Dios i̧tti̧mö̧ pätti'ö juiya pä'ö jȩpä̧tö̧jä̧. Ucutu'inä Dios ö̧jo̧mȩcu̧ do'ächocotöjä. Korotö'inä Dios ö̧jo̧mȩcu̧ dottächa pä'ätörö dottächö juiya pä'ätöjä.
14“Fariseos huotö'inä, hueähuä huȩnȩ huo̧juȩtä̧tö̧'i̧nä̧, suronä 'cuäopäcua'a ucuturu. ¡Yapareu ttö̧ja̧jä̧! Ucutumä recuamö ttojusode 'chocuhuipätucua'anä, Diosrö rö̧ȩnä̧ ucuocuätöjä adiu jȩpä̧tö̧ pättätucuacu pä'ö. Ja̧'hua̧nö̧ jȩcu̧'ä̧tu̧cuo̧mȩnä̧, rö̧ȩnä̧ tä̧bo̧cuä̧mä̧ cuȩmä̧cuo̧tö̧jä̧.
15“Fariseos huotö'inä, hueähuä huȩnȩ huo̧juȩtä̧tö̧'i̧nä̧, suronä 'cuäopäcua'a ucuturu. ¡Yapareu ttö̧ja̧jä̧! Kara'a oto, ajehuiyä'inä abo cue'ächätöjä, ya̧tȩ ucutu cu̧huo̧juȩtä̧tu̧cu̧ eseta pä'ö. Ja̧u̧ esetomenä, ucututtu'inä abonänö suronä jȩpö̧. Ocurära̧'a̧ i̧'chä̧cua̧.
16“Ucutumä, korotörö cu̧huo̧juȩtä̧tu̧cuo̧mȩnä̧, ä̧to̧cä̧tö̧ jä̧'i̧nö̧'a̧nö̧ huotöjä. Ucuturu suronä 'cuäopäcua'a. Ucutu pä'ätöjä: “Ya̧tȩ Diosrö ucuocuäcuähuode i̧mi̧nä̧ koro juäi jȩa̧ päöttömä, ja̧u̧ juäi jȩö̧ juiyöttö'inä adihua'a.” Ja̧'hua̧nö̧ ja̧'a̧nä̧ pä'ätöjä: “Ya̧tȩ Diosrö ucuocuäcuähuode jähuä oro i̧mi̧nä̧ koro juäi jȩa̧ päöttömä, ja̧u̧ juäi iso päi'önä jȩä̧cua̧'a̧nö̧.” 17Ä̧to̧cä̧tö̧jä̧. Yoröiso jerupätöjä. ¿Ti̧yȩjä̧ttö̧ ji̧nä̧ isocu adihuä juäimä? ¿Diosrö ucuocuäcuähuode jähuä oro tä̧ji̧? ¿Diosrö ucuocuäcuähuode tä̧ji̧? Iso päi'önä Diosrö ucuocuäcuähuode ji̧nä̧ isocu adihuä juäi. 18Ja̧'hua̧ta̧nö̧ ucutu pä'ätöjä: “Ka̧ra̧ koro juäi jȩa̧ päöttömä Diosrö ucuocuäcuähuode jacuoju podä ofrenda rötähuodä i̧mi̧nä̧, ja̧u̧ juäi jȩö̧ juiyöttö'inä adihua'a. Ja̧'hua̧nö̧ ja̧'a̧nä̧'i̧nä̧ juhuodä huäme pä̧jö̧ ofrenda i̧mi̧nä̧ koro juäi jȩa̧ päöttömä, ja̧u̧ juäitä iso päi'önä jȩä̧cua̧'a̧nö̧.” 19Äto̧cä̧tö̧jä̧. Yoröiso jerupätöjä. ¿Ti̧yȩjä̧ttö̧ ji̧nä̧ isocu adihuä juäimä? ¿Ofrenda tä̧ji̧? ¿Ofrenda rötähuodä tä̧ji̧? Iso päi'önä ofrenda rötähuodä ji̧nä̧ isocu adihuä juäi. 20Ya̧tȩ ofrenda rötähuodä i̧mi̧nä̧ koro juäi jȩa̧ päomenä, juhuodätä koro juiyönämä pä'ocö. Ja̧u̧ o'ca juiyönä ofrenda rötähuodä'inä, ofrenda'inä pä'ö. 21Ja̧'hua̧ta̧nö̧ ya̧tȩ Diosrö ucuocuäcuähuode i̧mi̧nä̧ koro juäi jȩa̧ päomenä, juhuodetä koro juiyönämä pä'ocö. Ja̧u̧ o'ca juiyönä juhuode'inä, Dios juhuodenä kö̧rö̧'i̧nä̧ pä'ö. 22Ja̧'hua̧ta̧nö̧ ya̧tȩ mo̧ro̧jä̧ i̧mi̧nä̧ koro juäi jȩa̧ päomenä, Dios ö̧jo̧mȩ i̧mi̧nä̧'i̧nä̧, chutä Dios ju̧huȩnȩ kö̧rö̧ i̧mi̧nä̧'i̧nä̧ pä'ö.
23“Fariseos huotö'inä, hueähuä huȩnȩ huo̧juȩtä̧tö̧'i̧nä̧, suronä 'cuäopäcua'a ucuturu. ¡Yapareu ttö̧ja̧jä̧! Ucutumä Moisés hueinö ta'anö ye'ecunänö iyätöjä ofrenda päi'önä cuäcuähuä'inä. Ja̧'hua̧nö̧ ja̧'a̧nä̧ adihuä juäi huo̧juȩcuä̧ huȩnȩmä̧ päö ta'anö yoröiso jȩpo̧co̧tö̧jä̧. Adiunämä amöcuädocotöjä. Korotörö re rö̧jö̧nä̧ topocotöjä. Adiunämä esetocotöjä. Koro jȩcu̧'ä̧tu̧cuo̧mȩnä̧, pi̧yȩtä̧ ji̧nä̧ isocu jȩcu̧'ä̧tu̧cu̧'a̧nö̧ ja̧'a̧, Diosrö iyähuä'inä cunichi'ätucuoca'a. 24Ucutumä korotörö cu̧huo̧juȩtä̧tu̧cuo̧mȩnä̧, ä̧to̧cä̧tö̧jä̧. Ucutumä adiunä micuähuocö juäi cuamöcuädätucua'anä, ji̧nä̧ isocu adiunä micuäu juäi amöcuädocotöjä.
25“Fariseos huotö'inä, hueähuä huȩnȩ huo̧juȩtä̧tö̧'i̧nä̧, suronä 'cuäopäcua'a ucuturu. ¡Yapareu ttö̧ja̧jä̧! Ucutumä sä̧rä̧bä̧'i̧nä̧, i̧so̧'ta̧'i̧nä̧ huämetä töcätöjä, jacuänä suhuädi'önä ka̧'a̧nä̧ korotö ttöäre cu̧nä̧u̧cuä̧ri̧nä̧tu̧cua̧'a̧ttö̧. 26Fariseos ä̧to̧cä̧tö̧mä̧: äcuomenä sä̧rä̧bä̧'i̧nä̧, i̧so̧'ta̧'i̧nä̧ jacuänätä töcätucui. Ja̧u̧nu̧ o'ca'a jacuänä'inä, huäme'inä töcähuäcua'a.
27“Fariseos huotö'inä, hueähuä huȩnȩ huo̧juȩtä̧tö̧'i̧nä̧, suronä 'cuäopäcua'a ucuturu. ¡Yapareu ttö̧ja̧jä̧! Ucutu hua'are huattome adiu uhuähua'a pä'ö jȩttö̧'a̧nö̧ huotöjä. Huämenätä adiu uhuähua'a ttö̧ja̧rö̧, jacuänä hua'inätö tto'co jähuä ttihue'quiyu'inä, koro juäi idicu juäi'inä ka̧'a̧nä̧. 28Ucutumä ja̧'hua̧nö̧ huotöjä. Korotö ttä'ca jo̧mȩttö̧ adihuätö jä̧'i̧nö̧'a̧nö̧ huotöjä. Ja̧'hua̧nö̧ ja̧'a̧nä̧ cuami iso'quitucunä suronä amöcuädö yapareu ttö̧ja̧jä̧.
29“Fariseos huotö'inä, hueähuä huȩnȩ huo̧juȩtä̧tö̧'i̧nä̧, suronä 'cuäopäcua'a ucuturu. ¡Yapareu ttö̧ja̧jä̧! Ucutumä Dios i̧huȩnȩ jiäcuähuä isotörö'inä, adiu jȩpi̧nä̧tö̧rö̧'i̧nä̧ 'turu tticuinome aditätöjä, ttö̧ja̧ adiunä totta pä'ö. 30Ja̧'hua̧nö̧ jȩpö̧ kä̧nö̧ pä'ätöjä: “Täbocö tä̧'o̧tö̧ mi̧nä̧ ttö̧ja̧cui̧nö̧ ujutu tö̧ja̧cui̧nö̧ttö̧mä̧, Dios i̧huȩnȩ jiäcuähuä isotörö cuä'ö tticuomenä, tä̧do̧tö̧ mi̧nä̧rö̧ ppä'ädocotö pi̧na̧ja̧tö̧jä̧.” 31Ja̧'hua̧nö̧ päcuhuätucuomenä, ucutu huo̧juä̧tö̧jä̧ jahuätö Dios i̧huȩnȩ jiäcuähuä isotörö cuä'ö icuinätö isotöjä pä'ö. 32Ja̧u̧ttu̧mä̧ cuä̧'o̧tö̧ mi̧nä̧ kä̧mä̧dö̧ jȩtti̧nö̧mä̧ ki̧'ö̧mä̧ cä'ädätucui ucututä.
33“¡Ucutumä ä̧ca̧tö̧ jä̧'i̧nö̧'a̧nö̧ huotöjä! Dios tä̧bo̧cuä̧ ocurättö, ¿tta̧'a̧nö̧ töcuhuipächätucua'ajä̧ttö̧? 34Ja̧'hua̧nö̧ ja̧'a̧ttö̧ Dios i̧huȩnȩ jiäcuähuä isotörö'inä, rö̧ȩnä̧ huo̧juä̧tö̧rö̧'i̧nä̧, huo̧juȩcuä̧ huo̧juȩtä̧tö̧rö̧'i̧nä̧ huȩdä̧cua̧sä̧ ucuturu. Ja̧'hua̧nö̧ ja̧'a̧nä̧ korotörö cuä'ö icu, daunä pȩ'o̧pö̧ cu̧ju̧nä̧cuo̧tö̧jä̧. Korotörö judíos ttu̧huo̧jui̧'i̧nodehuiyättö cuäcuäcu'äcuotöjä. Ja̧'hua̧ta̧nö̧ jahuätö tto'ca'anä koromecu, koromecu cui̧'chä̧cuo̧tö̧jä̧, suronä jȩcu̧'ä̧tu̧cua̧ pä'ö jahuätörö. 35Ja̧'hua̧nö̧ ja̧'a̧ttö̧ adihuä i̧sa̧ Abelrö cuä'ö cuicuinätucu o'ca'a, Zacaríasmä, Beroquías i̧tti̧rö̧ Diosrö ucuocuäcuähuodenä cuä'ö cuicuinätucuome jubö, o'ca toi'önä adihuä isotörö cuä'ö cuicuinätucuä̧u̧ ttucuoja erönä, ucuturu ö̧tä̧bo̧tä̧cua̧ Dios, jahuätörö jarode'ö cuä'ö cuicuinätucua'attö. 36Iso päi'önä pä'ösä ucuturu, ja̧u̧nu̧ pä̧nä̧ cuä'ö tticuinä̧u̧ micuä päi'önä, jitä mo̧ro̧ ka̧cuä̧tö̧rö̧ ö̧tä̧bo̧tä̧cua̧ Dios, —pä'ö huo̧juȩti̧nö̧do Jesús.
Jerusalén ttö̧ja̧rö̧ amöcuädö ucuocuinödo Jesús
37Juhua'a yabonö huo̧juȩti̧nö̧do Jesús:
—Jerusalén ttö̧ja̧, Jerusalén ttö̧ja̧, ucutu cuä'ö icuinätöjä Dios i̧huȩnȩ jiäcuähuä isotörö, Dios ucuturu hueinä̧u̧ru̧. Ja̧'hua̧ta̧nö̧ ido'qui icu cuä'ö icuinätöjä chi̧huȩnȩ ji'ähuätörö, Dios ucuturu hueinä̧u̧ru̧. Äcärä isaju ki̧tti̧mö̧ kujuabä dȩa̧'a̧ tta̧jä̧rö̧'a̧nö̧, ucutu cui̧tti̧mö̧rö̧ ji̧nä̧ yo̧mȩtȩnä̧ ca̧ca̧tö̧ tta̧dä̧ra̧ pä'inösä recuo. Ja̧'hua̧nö̧ ja̧'a̧nä̧ yoröiso kö'cocotö pi̧nä̧tö̧jä̧. 38Topätucui. Cuojusode yoröiso toönä jä̧cua̧'a̧. 39Iso päi'önä pä'ösä ucuturu: “Tu̧ru̧hua̧ i̧mi̧nä̧ ichömä adiunä ö̧jä̧cua̧” päcuhuätucuome jubö päi'önä, pä'äji ta'anö ttörömä topocotö cuäcuotöjä, —pä'inödo Jesús.
انتخاب شده:
San Mateo 23: PIDNT86
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Nuevo Testamento en Piaroa © Sociedades Biblicas Unidas, 1986.
