San Marcos 8
8
Jesú rekuätürü ttu̧kuȩ iyinü̧
(Mt 15.32-39)
1Jua̧u̧nü̧ pä̧nä̧ pä'äjita'anü̧ ttü̧ja̧ rekuätü ttü̧ka̧ka̧kui̧'ä̧ja̧'a̧, ttu̧kuȩ juiyiyäku, Jesú-mä̧ u̧wo̧juȩtä̧u̧rü wopo'ü pä'inü̧:
2—Pitü ttü̧ja̧rü̧ rȩrü̧jü̧ tochünä̧ jä̧ku̧sä̧, wäbodäkuä mo̧ro̧ päi'ünä̧ ttüku ttü̧ja̧kua̧'a̧nä̧, ttu̧kuȩ juiyiyäku. 3Ja̧'wa̧nü̧tä̧ ttu̧kuȩ ttukuoka'anä̧ ttojusodera̧'a̧ we'ü chikuttümä̧, mä̧nä̧ttü̧ na̧ttä̧chi̧pü̧'a̧nü̧ jä̧ku̧sä̧ yotukupünä̧mä̧ otottü tticha ja̧'a̧.
4Ja̧'wa̧nü̧ pä̧i̧yä̧u̧, u̧wo̧juȩtä̧u̧mä̧ ttädätinä̧ku̧:
—¿Torü ȩmü̧, ttiyü'anü̧jä̧ttü̧ ttukua pä'ümä̧, ttü̧ja̧ tomȩ ja̧'a̧mä̧?
5Pättäku Jesú-mä̧ jä'epü ä̧ju̧kui̧nä̧u̧:
—¿Tta̧'a̧nü̧ rü̧ȩnä̧ o̧si̧tä̧ ku̧ju̧nä̧rä̧tu̧kua̧'a̧jä̧ttü̧ trigo o̧si̧mä̧?
—Jäepomȩnä̧, kko̧ro̧mü̧ttü̧nü̧ to̧si̧rȩtä̧ pä'ü, ttädätinä̧ku̧.
6Ja̧'wa̧nü̧ pättäku, ttü̧ja̧rü̧ rȩjȩ ttü̧'ä̧mä̧dü̧nä̧ we'äji̧'ka̧, kko̧ro̧mü̧ttü̧nü̧ to̧si̧rȩ trigo o̧si̧ 'chu'ädo'ü, Dio-rü eseu ukuokuäji̧'ka̧, te'ädo'ü u̧wo̧juȩtä̧u̧rü iyä'chinü̧, juȩnȩ yabo ttü̧ja̧rü̧ ttiyä'cha pä'ü; ja̧'wa̧nü̧ weüta'anü̧ jȩpi̧nä̧tü̧. 7Ja̧'wa̧ta̧nü̧ po̧i̧rü̧'i̧nä̧ a̧'u̧ku̧nä̧tä̧ ttu̧ju̧nä̧ra̧'a̧; Jesú-mä̧ juätürü'i̧nä̧ jä'o Dio-rü eseu ukuokuäji̧'ka̧ iyinü̧ ja̧'wa̧ta̧nü̧ juätürü'i̧nä̧ ttiyä'cha pä'ü we'inü̧. 8Isopäi'ünä̧ suttädi'omȩbü päi'ünä̧ ttukuäja'a; kka̧kui̧pä̧ji̧ttü̧mä̧ kko̧ro̧mü̧ttü̧nü̧ tokäre püttäwä okä su̧'pȩnü̧ jo̧mȩnä̧ ka̧ka̧ti̧nä̧tü̧. 9Ttu̧kuȩ kuinä̧tü̧ ttü̧ja̧mä̧ cuatro mil-nü̧ jo̧mȩnä̧ ji̧na̧'a̧. Jua̧u̧nü̧ o'ka'a Jesú-mä̧ we'ü ikuinü̧. 10Ja̧'wa̧nü̧ we'ü iku kkä̧nü̧ u̧wo̧juȩtä̧u̧ku woi'kanä̧ pä̧mä̧dü̧ Dalmanuta rȩjȩra̧'a̧ku̧ ichinü̧.
Jȩtto̧kü̧ juei jȩa̧'a̧ totta pä'ü jä'epinä̧tü̧
(Mt 16.1-4; Lc 12.54-56)
11Fariseo wotümä̧ ichi'äkuäwi'ü, Jesú-ku pä'ä'chäkuäwinä̧tü̧. Jesú-ru kka̧kuä̧mü̧ topü we'inä̧tü̧ jȩtto̧kü̧ juäi jȩi̧ya̧tü̧ pä'ü, Dio wȩ'ä̧wa̧ jü̧ttü̧mä̧. 12Jesú-mä̧, rü̧ȩnä̧ juäpünü juätürü pä'inü̧:
—¿Tta̧'a̧nü̧ pä'ü pitü ttü̧ja̧mä̧ jȩtto̧kü̧ juei jȩchi̧ya̧tü̧ pä'ü jä'epätüjä̧ttü̧? Juätürü pä'üsä, jȩtto̧kü̧ jueimä̧ jȩä̧kuä̧wo̧ka̧'a̧ jä̧kua̧'a̧, pitü ttü̧ja̧ totta pä'ümä̧. 13Ja̧'wa̧nü̧ pä'ipütä, juätüttümä̧ rä'opächü woi'kanä̧ ppä̧mä̧dü̧ rü̧ä̧ dubora ji̧jä̧ku̧ kkäwächi̧nü̧.
Fariseo wotü ttütü'kü u̧wo̧juȩti̧nü̧ wȩnȩ
(Mt 16.5-12)
14U̧wo̧juȩtä̧u̧mä̧ trigo o̧si̧ ttȩpo̧ka̧'a̧ unichi'äjä'kotü, woi'kanä̧mä̧ suro ji̧si̧tȩtä̧ kku̧nä̧nä̧ri̧tü̧. 15Ja̧'wa̧nü̧ ja̧'a̧ Jesú-mä̧ ro̧ȩpi̧nä̧u̧:
—To̧pä̧rä̧kuä̧u̧ tta̧'a̧rä̧kuä̧wä̧tu̧kui̧, fariseo wottü ttu̧ju̧nä̧rü̧ levadura-ttümä̧ ja̧'wa̧ta̧nü̧ Herode u̧ju̧nä̧rü̧ levadura-ttü'i̧nä̧. 16Ja̧'wa̧nü̧ päomȩnä̧ u̧wo̧juȩtä̧u̧mä̧ pä'inä̧tü̧: Jua'amä̧ trigo o̧si̧ ti'kächokomȩ jäjo̧mȩnä̧ pä'a, jü̧nä̧. 17Ja̧'wa̧nü̧ ttukuoku wo̧jui̧'ü̧ Jesú-mä̧, päinä̧u̧:
—¿Tta̧'a̧nü̧ pä'ü trigo o̧si̧mä̧ jui'ätüjä̧ päkuätukua'ajä̧ttü̧? ¿Yoriso ji̧nä̧ wo̧jui̧'o̧ko̧tü̧jä̧ tä̧jí̧? ¿Kuamükuädätukumä̧ 'ki'ätüjä̧ tä̧jí̧? 18¿Kui'äretukumä̧ ku̧ju̧nä̧rä̧tu̧kua̧'a̧nä̧ topokotüjä̧ tä̧jí̧ ja̧'wa̧ta̧nü̧ ä̧ju̧kuä̧kuä̧wä̧'i̧nä̧ ku̧ju̧nä̧rä̧tu̧kua̧'a̧nä̧ ä̧ju̧kuo̧ko̧tü̧jä̧ tä̧jí̧? ¿Yoriso kuamükuädi'ätuku juiyünä̧ ja̧'a̧ tä̧jí̧? 19Cinco mil-nü̧ wotürü ji̧mü̧tȩ jäwä trigo o̧si̧ 'to'ope'ü chiyinü̧mä̧, ¿tta̧'a̧nü̧ rü̧ȩnä̧ jo̧mȩnä̧ püttäwä okänä̧mä̧, kka̧kui̧pä̧ji̧mä̧ ku̧ka̧ka̧ti̧nä̧tu̧kuä̧ttü̧?
Päomȩnä̧, ttädätinä̧ku̧:
Ttü̧jä̧pü̧ttü̧nü̧ todäre okä jo̧mȩnä̧.
20—Ja̧'wa̧ta̧nü̧ cuatro mil-nü̧ wotürü, kko̧ro̧mü̧ttü̧nü̧ to̧si̧rȩtä̧ trigo o̧si̧mä̧ jä̧ja̧'a̧nä̧, kuiyä'chätukuomȩnä̧mä̧ ¿Tta̧'a̧nü̧ rü̧ȩnä̧ püttäwä okä su̧'pȩnü̧ ku̧ka̧ka̧ti̧nä̧tu̧kuä̧ttü̧?
Jäepomȩnä̧, ttädätinä̧ku̧:
—Kko̧ro̧mü̧ttü̧nü̧ tokäre jo̧mȩnä̧, pättinä̧ku̧.
21Pättiyäku, päinä̧u̧:
—¿Ja̧'wa̧nü̧ ja̧'a̧nä̧'i̧nä̧, tta̧'a̧nü̧ pä'ü wo̧jui̧'o̧ko̧tü̧jä̧ttü̧?
Jesú, Betsaida-ttü ä̧to̧ka̧rü̧ aditü ikuinü̧
22Jua̧u̧nü̧ o'ka'a Betsaida ütawiyära̧'a̧ ichi'äji'ka̧ ü̧ja̧'a̧, ä̧to̧ka̧rü̧ Jesú ü̧jo̧mȩku̧ i'chächipü mȩi̧ya̧tü̧ pä'ü ajuäkuäunü̧ jä'epinä̧tü̧. 23Ja̧'wa̧nü̧ ja̧'a̧ Jesú-mä̧, ä̧to̧ka̧ u̧mü̧nä̧ 'chu'ädo'ü ütawiyä jäyäku o'ipächäji̧'ka̧ ä isoya i'ärenä̧ su'opo'ü u̧mü̧nä̧ mȩ'ü̧ jä'epü ä̧ju̧kui̧nä̧ku̧ ¿a̧'u̧ku̧nä̧ topüjä̧? 24Päku, topü kkä̧nü̧ ädätinü̧:
—Ttü̧ja̧rü̧mä̧, dauwiyä kueächa'a 'kua̧rü̧nä̧ topüsä. 25Jua̧u̧nü̧ o'ka'a pä'äjita'anü̧ ü'äriyänä̧ u̧mü̧ mȩ'ü̧nü̧ toünä̧ weomȩnä̧, adiwächi'inü̧; yoriso o'kajuiyünä̧ adiunä̧tä̧ toünä̧. 26Jesú-mä̧ ojusodera̧'a̧ we'ü iku päinä̧ku̧;
—Ütawiyära̧'a̧mä̧ ppa̧kuä̧chä̧.
Peduru, Jesú-ru ukumä̧ Crito-jä̧ pä'inü̧
(Mt 16.13-20; Lc 9.18-21)
27Jua̧u̧ o'komȩnä̧ Jesú-mä̧ u̧wo̧juȩtä̧u̧ku Cesarea ütawiyära̧'a̧ku̧, Filipo rȩjȩra̧'a̧ku̧, ütawiyä ppo̧ü̧ wȩjo̧mȩku̧ mä̧nä̧nä̧ tti̧'cho̧mȩnä̧ jä'epü ä̧ju̧kui̧nä̧u̧:
—¿Ttü̧ja̧mä̧ disädo pättä'ijä̧ttü̧, ttürümä̧?
28Jäepomȩnä̧ ttädätinä̧ku̧:
—Yotukunä̧mä̧ bautizo jȩä̧kuä̧wä̧ i̧sa̧ Ju̧a̧-jä̧do pättä'ijäkujä̧, kkorotümä̧ Elía pinü̧ pä'ä'ijätü ja̧'wa̧ta̧nü̧ kkorotütä profeta isotü pinä̧tü̧ttü̧ ya̧tȩjä̧do pä'ä'ijätü.
29Ja̧'wa̧nü̧ pätta'anä̧ ukuturumä̧, ¿dí cha'ajä̧ttü̧, ttümä̧? pä'ü jäepomȩnä̧.
Peduru-mä̧ ädätinü̧:
—Ukumä̧ Crito-jä̧. 30Ja̧'wa̧nü̧ ädätäku, Jesú-mä̧ ro̧'ȩpü̧nü̧, ya̧tȩrü̧'i̧nä̧ jikuäwätukuä päinä̧u̧, chutä ütü'kü jittäu juiyünä̧tä̧.
Jesú-mä̧ to̧ȩ'ä̧chä̧kuȩ wȩnȩ ji'äwinü̧
(Mt 16.21-28; Lc 9.22-27)
31Ja̧'wa̧nü̧ ja̧'a̧ Jesú-mä̧ kkä̧mä̧dü̧ u̧wo̧juȩtä̧u̧rü pä'inü̧: Ttü, Ubo I̧tti̧mä̧ rü̧ȩnä̧ usurä chȩmä̧wä̧kua̧sä̧. Ttürü kkü'kü jui'ü, a̧ci̧a̧nu̧tu̧'i̧nä̧, sacerdote tturuwotü'i̧nä̧, weäwä wȩnȩ wo̧juȩtä̧tü̧'i̧nä̧ kuä'ü ttikunä̧ wȩttä̧kua̧sä̧. Ja̧'wa̧nü̧ ja̧'a̧nä̧ wäbodäkuä mo̧ro̧ päi'omȩnä̧ tto̧dä̧chä̧kua̧sä̧. 32Ja̧'wa̧nü̧ wäjuönä̧tä̧ jiäwiyäku, Peduru-mä̧ kkatärütä o'ipächü jua̧u̧ 'kuäopü juiya pä'ü ro̧ȩpi̧nä̧ku̧. 33Ja̧'wa̧nü̧ päku Jesú-mä̧ kkärächi'ü u̧wo̧juȩtä̧u̧rü topü, Peduru-rü ra̧wä̧ri̧pü̧nü̧ pä'inü̧:
—¡Ttüttümä̧ 'kȩ'i̧pä̧chi̧ Satanás-jä̧! ukumä̧, Dio jäwä to'kua pä'ümä̧ amükuädoküjä̧, suro pi̧jä̧ ttü̧ja̧ tottü'anü̧tä̧ topüjä̧.
34Jua̧u̧nü̧ o'ka'a Jesú-mä̧, u̧wo̧juȩtä̧u̧rü'i̧nä̧, ttü̧ja̧rü̧'i̧nä̧ wopo'ü, pä'inü̧:
—Ya̧tȩ cho'ka'anä̧ icha päüttümä̧, kua̧mü̧nä̧ jäwämä̧ unichi'i, mo̧ro̧ ji̧nü̧ a̧'u̧kuä̧ ü̧jo̧kä̧jäi ȩmi̧pü̧ täi ja̧'wa̧nü̧ jȩpü̧ cho'ka'anä̧ ichi. 35Ja̧'wa̧nü̧ ja̧'a̧ttü̧ ya̧tȩ a̧'kua̧rü̧ ü̧ji̧pa̧ pä'ümä̧, toe'ächä̧kua̧; ja̧'wa̧nü̧ ja̧'a̧nä̧ ttü jäwänä̧, a̧'kua̧rü̧ to'e'ächümä̧, a̧'kua̧rü̧mä̧ ü̧ji̧pä̧kua̧. 36Ja̧'wa̧nü̧ ja̧'a̧ttü̧ ¿däjé ppädäkua̧jä̧ttü̧, ya̧tȩ ttü̧ja̧sa̧ pi̧jä̧ ruwäkuiyä o'kajuiyünä̧ ȩma̧ja̧ pä'üdä̧jä̧, a̧'kua̧rü̧ ȩmo̧ko̧mȩnä̧mä̧? 37Ja̧'wa̧ta̧nü̧, ¿däjenä̧ i̧mi̧tü'anü̧ttü̧, ttü̧ja̧sa̧ a̧'kua̧rü̧ mikuämä̧? 38Ja̧'wa̧nü̧ ja̧'a̧ttü̧ ya̧tȩ ttü chütü'kü'i̧nä̧, chi̧wȩnȩ'i̧nä̧, pitü ukuotokotü, suronä̧ jȩpä̧tü̧ ttü̧ja̧ ttä'ka jo̧mȩttü̧ udäpekuttümä̧ ja̧'wa̧nü̧ jü̧ta̧'a̧nü̧ Ttü Ubo I̧tti̧'i̧nä̧ chä'o uruwoku, á̧gȩrȩ-ku̧ chichomȩnä̧ chüdä̧pȩkuä̧kua̧sä̧ jua̧u̧rü̧mä̧.
انتخاب شده:
San Marcos 8: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
