San Marcos 5
5
Gadara rȩjȩ ttü̧ja̧sa̧rü̧ epíritu-tu̧ suropätü kka̧kui̧nä̧tü̧
(Mt 8.28-34; Lc 8.26-39)
1Rü̧ä̧ dubora ji̧jȩnä̧, Gerasa #5.1 Gerasa Kkoro tti̧wȩyu̧ti̧nü̧nä̧mä̧ (mss-nä̧mä̧) Gadara pä'ü'i̧nä̧ Gergesa pä'ü'i̧nä̧ rütäwa'a räopa'a (Mt 8.28). ttü̧ja̧ tti̧rȩjä̧nä̧ tti̧rȩbȩwi̧'ä̧ja̧'a̧. 2Jesú-mä̧ woi'kattü u̧wä̧mi̧'i̧'o̧mȩnä̧, ya̧tȩ epíritu su̧ro̧pa̧ ü̧jä̧ku̧, wa'are ikuäwä idoriyättü rä'o'ü ichi'inä̧ku̧. 3Jua̧u̧mä̧ wa'are idoriyänä̧tä̧ ojusode jü̧nä̧ kki̧nü̧. Ya̧tȩ'i̧nä̧ ti̧ttä̧dü̧ juiyünä̧ winü̧, kä̧rȩnä̧sa̧nä̧ ti̧ttä̧do̧mȩnä̧'i̧nä̧ ttiweyekunä̧tä̧. 4Ja̧'wa̧ta̧nü̧, kko̧ro̧nü̧ jü̧ta̧'a̧nü̧ kuoräu isobünä̧, kuoräu i̧sä̧sa̧nä̧, ü̧jä̧pü̧nä̧'i̧nä̧, u̧mü̧nä̧'i̧nä̧ ti̧ttä̧dä̧'cho̧mȩnä̧ jua̧ro̧kuä̧rü̧ ikuä'ija'a ji̧na̧'a̧, ya̧tȩ'i̧nä̧ 'chuädü juiyünä̧tä̧. 5Jua̧u̧mä̧, mo̧ro̧'i̧nä̧, yodo'i̧nä̧ 'kuäo'ünä̧tä̧ müä'kiyunä̧'i̧nä̧, wa'are wattomȩ'i̧nä̧ wopü kue'ächinü̧, ido o'kinä̧ a̧mü̧nä̧ pa̧ja̧tü̧ saräkuäu kkä̧nü̧. 6Ja̧'wa̧nü̧ wä'ijümä̧, Jesú-ru topo'ü, pä̧i̧ku̧nä̧ jopipünü̧ ichi'ü, Jesú ä'ka jo̧mȩ iwe'kiyunä̧, kkä̧mä̧dü̧, 7wopi'ünü̧ pä'inü̧:
—¡Mȩkuo̧pä̧rä̧ttü̧, Dio, mo̧ro̧jä̧ Ru̧wa̧ I̧tti̧, Jesú-mä̧, usurä chȩmä̧u̧nä̧mä̧ jȩ'kuä̧ttü̧, Dio i̧mi̧nä̧ jädepäkujä̧!, 8¡epíritu su̧ro̧pa̧, jua̧u̧ttü̧mä̧ rä'opächi pä'ü!, Jesú weäku: —woina̧'a̧ jua'amä̧. 9Jesú, jäepinä̧ku̧:
—¿Toku mi̧kua̧jä̧ttü̧?
—Päkumä̧, ädätinü̧:
—Chi̧mi̧mä̧, Legión pä'ü mi̧kua̧sä̧. Jua'amä̧ rekuätü ta'attü̧. 10Ja̧'wa̧nü̧ ja̧'a̧mä̧, Jesú-ru rü̧ȩnä̧ ajuäkuäwinü̧, juä̧jä̧ rȩjȩttü̧ rä'epü iku juiyarü pä'ü. 11Ja̧'wa̧nü̧ ja̧'a̧nä̧ juorü tü'künä̧nü̧, mü̧ä̧'ka jäyä ku̧chi̧tü̧ rekuätü ttu̧kuȩ kuä̧nü̧ kka̧kui̧nä̧tü̧. 12Ja̧'wa̧nü̧ ja̧'a̧ epíritu-tu̧ suropätümä̧, ajuäkuäunü̧, —¡ku̧chi̧tü̧nä̧tä̧ dotächünä̧ we'itü, pä'ü jä̧ttȩpä̧ri̧nä̧ku̧!.
13Jättepäku, A̧ tätukui pä'ü weinä̧u̧. Weomȩnä̧, epíritu-tu̧ suropätümä̧ jua̧u̧ ttü̧ja̧sa̧ttü̧ rä'opächü ku̧chi̧tü̧nä̧ dodepächinä̧tü̧. Ja̧'wa̧nü̧ pä̧i̧'ä̧u̧, juätü ku̧chi̧tü̧ jisate isotümä̧, idose dȩa̧'a̧ku̧ ma̧'ä̧chü̧, rü̧ä̧ duboranä̧ a̧'ä̧kuä̧u̧ ikuinä̧tü̧.
14Ja̧'wa̧nü̧ päi'omȩnä̧, ku̧chi̧tü̧rü̧ tta̧'a̧rä̧jä̧tü̧mä̧, juorü tü'ipächü ppo̧ü̧ ütawiyära̧'a̧ kka̧kuä̧tü̧rü̧'i̧nä̧ ja̧'wa̧ta̧nü̧ rü̧ö̧ ütawiyänä̧ kka̧kuä̧tü̧rü̧'i̧nä̧ ji'äwä'chinä̧tü̧ jua̧u̧ 'kuäopäji tü'kümä̧. Ja̧'wa̧nü̧ jittäwiyä̧u̧, däjé 'kuäopäja'a ja̧ pä'ü topü 'chi̧nä̧tü̧, ttü̧ja̧mä̧. 15Jesú ü̧jo̧mȩ tti̧'chi̧'o̧mȩnä̧. Jua̧u̧, epíritu-tu̧ suropätü ttü̧jä̧'i̧jä̧ku̧ päjimä̧, ü̧'ka̧tä̧wä̧ta̧ 'ka̧tü̧ rütäwa'a, adiwächäjitä ü̧'a̧'a̧ topü, ttü̧ja̧mä̧ rü̧ȩnä̧ ye'inä̧tü̧. 16Ja̧'wa̧nü̧ ja̧'a̧, jua̧u̧ epíritu-tu̧ suropätü ttü̧ja̧kuä̧'i̧jä̧ku̧ru̧ 'kuäopäji ji'äu kkä̧nü̧ ja̧'wa̧ta̧nü̧ ku̧chi̧tü̧rü̧ 'kuäopäji'i̧nä̧, topäjätümä̧ kkorotürü ji'äwinä̧tü̧. 17Ja̧'wa̧nü̧ jȩä̧ji̧yä̧u̧, Jesú-rumä̧, tti̧rȩjä̧ttü̧ räopächa pä'ü, esekutä we'ü ttikuinä̧ku̧.
18Pä'äjita'anü̧, Jesú-mä̧ woi'kara̧'a̧ ichi'omȩnä̧, epíritu-tu̧ suropätü ttü̧jä̧jä̧ku̧ päjimä̧, chutäku kueächa pä'ü ajuäkuäunü̧ jä̧ȩpä̧ri̧nä̧ku̧. 19Ja̧'wa̧nü̧ ajuäkuäwa'anä̧, Jesú-mä̧ o'ipü jui'ü, päinä̧ku̧:
—Kuojusodera̧'a̧, kuawaruwärütä jikuäwa ppa̧'ä̧chi̧. Ku̧ru̧wa̧, ukuru rü̧ȩnä̧ jü̧ ppädäji ji'äu kkä̧nü̧, rȩrü̧jü̧ toäji'i̧nä̧ jikuäwäkua'anü̧. 20Ja̧'wa̧nü̧ jä̧ji̧ o'ka'a, jua̧u̧mä̧, Decápoli rȩjȩnä̧ Jesú ppädäji tü'kü ji'äu kue'ächinü̧. Ja̧'wa̧nü̧ jiäwomȩnä̧, ttü̧ja̧mä̧, ¡Isoo pä'ü, eseäkuäwinä̧tü̧!
Na̧'ä̧chä̧ju̧ru̧'i̧nä̧, Jairo ittijuru'i̧nä̧ aditü ikuinü̧
(Mt 9.18-26; Lc 8.40-56)
21Pä'äjita'anü̧, Jesú-mä̧, woi'kanä̧ kkäwächü rü̧ä̧ dubora ji̧jä̧ku̧nä̧ i̧rȩbȩwi̧'ä̧ja̧'a̧ ttü̧ja̧ rü̧ȩnä̧ ttü̧ka̧ka̧kuä̧ji̧yä̧ku̧, juȩnȩ jäyoranä̧tä̧ kki̧nü̧. 22Ja̧'wa̧nü̧ ü̧ja̧'a̧, ya̧tȩ, sinagoga u̧ru̧wa̧, Jairo pä'ü mi̧kua̧ ichi'inü̧. Jua̧u̧mä̧ Jesú-ru topo'ü, ü̧jä̧pü̧ jo̧mȩ iwe'kiyunä̧ pä̧mä̧dü̧, 23rü̧ȩnä̧ ajuäkuäwinü̧:
—Chittiju täkü 'korupäji'omȩtä̧ ji̧yä̧ku̧sä̧; ku̧mü̧nä̧, mȩ'ä̧chi̧yi̧ttü̧, a̧'kua̧ttü̧ juo'ü kka̧'kua̧ri̧'i̧ya̧ttü̧. 24Pä'ü ajuäkuäwäku, Jesú-mä̧ jua̧u̧tä̧ku̧ i̧'cha̧'a̧ ttü̧ja̧ rekuätü, ppi̧ttä̧chä̧rü̧nä̧tä̧ päi'ünä̧ 'chi̧nä̧tü̧. 25Ja̧'wa̧nü̧ tti̧'cho̧mȩ 'kä̧tȩnä̧, Yajute ttü̧jä̧pü̧ttü̧nü̧ todäre a̧'ȩ jo̧mȩnä̧ ppü'ottü usurä ȩmä̧wä̧'i̧jä̧ju̧'i̧nä̧ 'chi̧nä̧ju̧. 26Jawapü adikuä isotürü wȩjä̧rä̧kuä̧wa̧'a̧nä̧'i̧nä̧, yabokutä usurä ȩmä̧wi̧nä̧ju̧, kkiäre pärätä kku̧ju̧nä̧rü̧ o'kajuiyünä̧ bejekua'anä̧ kku̧mä̧richeimä̧ yabokutä juoächinä̧kua̧. 27Jesú ütü'kü ttukuokua'a ä̧ju̧kui̧pü̧, aboja̧'a̧ku̧nä̧, ttü̧ja̧ ttü̧'kä̧tȩnä̧ 'chä̧wi̧'ü̧ ü̧'ka̧tä̧wä̧ta̧nä̧ mȩ'i̧nä̧ju̧. 28Jua'amä̧, kka̧'kua̧nä̧ «Suro, ü̧'ka̧tä̧wä̧ta̧nä̧tä̧ mȩdü̧ttü̧'i̧nä̧ chü̧'i̧pä̧kua̧ju̧sä̧» pä'ü, kka̧mü̧kuäda'attü̧. 29Ja̧'wa̧nü̧ mȩjo̧mȩnä̧, yotäku, kkukuojamä̧ ojuchi'inä̧kua̧. Ojuchi'omȩnä̧, na̧jä̧chä̧ji̧ttü̧mä̧, kkidepä a̧'kua̧ttü̧ päia'a wo̧jui̧'i̧nä̧ju̧. 30Jesú-mä̧, chutättü ujuru räopächäjäku wo̧juä̧u̧, ttü̧ja̧rü̧ kkärächi'ü pä'inü̧:
—¿Chü̧'ka̧tä̧wä̧ta̧nä̧mä̧, dí mȩä̧jä̧ttü̧ttü̧?
31Päomȩnä̧, u̧wo̧juȩtä̧u̧mä̧ pättinä̧ku̧:
—Ttü̧ja̧ rü̧ȩnä̧, ppi̧kuä̧chä̧rü̧nä̧, o'katoi'ünä̧ jȩtta̧'a̧mä̧ ¿Toku pä'ü, Dí mȩä̧jä̧ttü̧ttü̧ päkua'ajä̧ttü̧?
32Ja̧'wa̧nü̧ pätta'anä̧, Jesú-mä̧, yabokutä ippeyänä̧ kka̧kuä̧tü̧rü̧, dí mȩä̧ja̧rü̧ já̧ pä'ü topä'chinü̧. 33Ja̧'wa̧nü̧ ji̧yä̧kua̧ na̧'ä̧chä̧jä̧ju̧mä̧ rü̧ȩnä̧ ye'ü tti̧'ä̧u̧ kkä̧nü̧, jua̧u̧ 'kuäopäjimä̧ kku̧wo̧jua̧'a̧ttü̧ 'chä̧wi̧'ü̧, jua̧u̧ ä'ka jo̧mȩ kkiwe'kiyunä̧ pä̧mä̧dü̧ o'kajuiyünä̧ jueünä̧ jijäwinä̧ku̧. 34Ja̧'wa̧nü̧ jijäwäku, Jesú-mä̧, päinä̧kua̧:
—Chittiju, kua̧'kua̧ ku̧wȩnä̧ra̧'a̧ttü̧ na̧kuä̧chü̧ttü̧mä̧ pi̧'ä̧ju̧jä̧. Kua̧'kua̧ tta̧kuȩkuo̧ka̧'a̧ täi, täkü kumä̧richeittümä̧ pi̧'ä̧jä̧ju̧jä̧.
35Jesú-mä̧, ja̧'wa̧nü̧ ukuokua'a 'kä̧tȩnä̧, Jairo ojusodera̧'a̧ttü̧ ichi'ü jittäwinä̧ku̧:
—Kuittijumä̧, täkü 'koru pä'i'äjäju ¿tta̧'a̧nü̧ pä'ü wo̧juȩkuä̧ i̧sa̧rü̧ yabonü̧ o̧kui̧pä̧ra̧'a̧jä̧ttü̧?
36Ja̧'wa̧nü̧ pätta'a ä̧ju̧ku̧ Jesú-mä̧ sinagoga u̧ru̧wa̧, Jairo-rü, pä'inü̧:
—Yekuekuä, suro esetütä eseti.
37Pä'ü kkä̧nü̧, kkorotürümä̧ oipoka'a Peduru-kutä ja̧'wa̧ta̧nü̧ Sa̧ti̧a̧ku̧ku̧tä̧ ü̧jä̧wa̧ Ju̧a̧-kutä o'ipächü i̧'chi̧nä̧u̧. 38Ja̧'wa̧nü̧ ja̧'a̧, sinagoga u̧ru̧wa̧ Jairo ojusodenä̧ i̧'chi̧'o̧mȩnä̧, ttü̧ja̧ rü̧ȩnä̧ ajuäkuäu wotta'a topinü̧. 39Ja̧'wa̧nü̧ ja̧'a̧, do'ächi'ü päinä̧u̧:
—¿Tta̧'a̧nü̧ pä'ü rü̧ȩnä̧ ajuäkuäu wo'kuätukua'ajä̧ttü̧? ji̧'ki̧chawajumä̧ 'korujuo'ächokoju päjäju ja̧'a̧, suro ä'ütä ä'äju.
40Päomȩnä̧, ttü̧ja̧mä̧ Jesú-ru ya̧'a̧wä̧'chi̧nä̧tü̧. Ja̧'wa̧nü̧ ja̧'a̧nä̧, o'katoi'ünä̧rü̧ rä'epo'ü iku, kkä'orütä, kka̧ju̧rü̧tä̧ ja̧'wa̧ta̧nü̧ chutäku ichäjätukutä o'ipächü, ji'chichawaju kkü̧'o̧mȩ do'ächi'inü̧. 41'Chä̧wi̧'ü̧, kku̧mü̧ ȩmo̧po̧'ü̧ päinä̧kua̧:
—Talita kumi (mü̧ä̧yaju ukuru pä'üsä, ä̧rä̧mi̧'i̧), päinä̧kua̧.
42Päomȩnä̧, mü̧ä̧yajumä̧ ttü̧jä̧pü̧ttü̧nü̧ todäre año-nü̧ jo̧mȩnä̧ kku̧nä̧rä̧ju̧ ja̧'a̧, yotäku ä̧rä̧mi̧'ü̧ kue'ächinä̧jü̧. Ja̧'wa̧nü̧ kuejächiyä̧u̧ ttü̧ja̧mä̧ ¡isoo! pä'ü to̧pä̧ri̧nä̧tü̧. 43Ja̧'wa̧nü̧ ja̧'a̧nä̧, Jesú-mä̧ ya̧tȩrü̧'i̧nä̧ jittäu juiyünä̧ we'ünü̧ ro̧ȩpi̧nä̧u̧, jua̧u̧ o'ka'amä̧ ji'chichawajurumä̧ ku̧kuȩ ttiya pä'ütä weinä̧u̧.
انتخاب شده:
San Marcos 5: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
