San Marcos 3
3
Jesú-mä̧ u̧mü̧ su̧ro̧pa̧rü̧ sawaru mo̧ro̧ aditü ikuinü̧
(Mt 12.9-14; Lc 6.6-11)
1Pä'äjita'anü̧, sinagoga isodenä̧ Jesú-mä̧ doächi'omȩnä̧; ya̧tȩ u̧mü̧ jo'ächächinü̧rü̧ ü̧ja̧'a̧ po̧kui̧pi̧nü̧. 2Ja̧'wa̧nü̧ ja̧'a̧nä̧ fariseo wotümä̧, Jesú-ru sawaru mo̧ro̧, jua̧u̧ru̧ aditü ikuaja pä'ü, to̧pä̧ri̧nä̧tü̧, kkorotürü jittäwa pä'ü. 3Ja̧'wa̧nü̧ ja̧'a̧, Jesú-mä̧, jua̧u̧ u̧mü̧ joächächinä̧ku̧ru̧ pä'inü̧:
—Ä̧rä̧mi̧'ü̧, yȩna̧ja̧, kkä'ko kkä̧mä̧di̧.
4Pä'ü kkä̧nü̧, kkorotürü jä'epü ä̧ju̧kui̧nü̧:
—¿Sawaru mo̧ro̧mä̧ däjetä jȩtta̧ pä'ü weäwa'ajä̧ttü̧: adiu jȩtta̧ pä'ü tä̧jí̧, surojü jȩtta̧ pä'ü tä̧jí̧? ¿Tta̧'kua̧ra̧ pä'ü ppättädü'anü̧ tä̧jí̧, totte'ächa'anä̧ ja̧'a̧tä̧ tottü'anü̧ tä̧jí̧?
Päomȩnä̧, yoriso ädätokotü pinä̧tü̧. 5Ja̧'wa̧nü̧ jä̧ku̧, Jesú-mä̧ juȩnȩ kka̧kuä̧tü̧rü̧ üjü'kü juiyünä̧ toa'anä̧, a̧'kua̧tta̧nü̧'i̧nä̧ toinä̧u̧, ttesetü juiyünä̧ juottächini̧yä̧ku̧. Ja̧'wa̧nü̧ ja̧'a̧nä̧ päinä̧ku̧:
—Ku̧mü̧ te'ädi. Päku, teädomȩnä̧ u̧mü̧nä̧ adiwächi'inä̧ku̧. 6Ja̧'wa̧nü̧ ja̧'a̧ topü, fariseo wotümä̧ juorü rä'opächü, Herode umüwäyotüku ka̧ka̧ku̧ pȩjä̧mü̧, Jesú-ru kuä'ü ttikua pä'ü, amükuädü kku̧ni̧nä̧tü̧.
Rü̧ä̧ dubora jäyä ttü̧ja̧ ka̧ka̧kui̧nä̧tü̧
7Jesú-mä̧, u̧wo̧juȩtä̧u̧ku rü̧ä̧ dubora jäyoraku i̧'chä̧ja̧'a̧, Galirea ttü̧ja̧'i̧nä̧, judea ttü̧ja̧'i̧nä̧ rekuätü 'chi̧nä̧tü̧. 8Ja̧'wa̧ta̧nü̧ Jerusarȩ́ ütawiyä ttü̧ja̧'i̧nä̧, Idumea rȩjȩ ttü̧ja̧'i̧nä̧, Jordán ji̧jä̧ku̧nä̧ ttü̧ja̧'i̧nä̧, Tiro rȩjȩ ttü̧ja̧'i̧nä̧, Sidón rȩjȩ ttü̧ja̧'i̧nä̧, jȩü̧ rü̧ȩnä̧ ukuowi̧yä̧u̧ totta pä'ü rekuätü ichinä̧tü̧. 9Ja̧'wa̧nü̧ jä̧ku̧, Jesú-mä̧, ttü̧ja̧ rekuätü päi'omȩnä̧, rü̧ȩnä̧ ppi̧'ä̧chä̧rü̧ jui'ü, u̧wo̧juȩtä̧u̧rümä̧ woi'ka jo̧mȩnü̧ jȩpü̧ ttü̧ni̧ya̧rü̧ pä'ü we'ü u̧ju̧ni̧nä̧u̧. 10Jua'akumä̧, rekuätürü aditü ikua'anä̧'i̧nä̧, kkorotü na̧nȩpä̧tü̧'i̧nä̧ mȩtta̧rü̧ pä'ü rü̧ȩnä̧ ma̧ttä̧mi̧nä̧ku̧.
11Ja̧'wa̧ta̧nü̧, epíritu-tu̧ suropätü'i̧nä̧ ttiwe'kiyunä̧ ä'ka jo̧mȩ kka̧kuä̧mä̧rü̧.
—¡Ukumä̧, Dio I̧tti̧jä̧! pä'ü wottinä̧ku̧.
12Ja̧'wa̧nü̧ ja̧'a̧nä̧ ttü̧ja̧ ttu̧wo̧jui̧pü̧ juiyünä̧ Jesú-mä̧, pä̧i̧ku̧nä̧ ro̧ȩpä̧ri̧nä̧u̧.
Apótore doce-nü̧ wotürü pojopinü̧
(Mt 10.1-4; Lc 6.12-16)
13Jesú-mä̧, mü̧ä̧'kara̧'a̧, u̧ju̧'kä̧u̧ku̧tä̧ wopo'ü 'cha'ächäji̧'ka̧ ka̧ka̧kui̧pü̧ pä̧mä̧di̧nü̧. 14Juätüttü, ttü̧jä̧pü̧ttü̧ ta̧ju̧nü̧ wotürü pojopü ȩmi̧nü̧, chutäku kuettächa pä'ü, jareü wȩnȩ jittäwa pä'ü wȩä̧kuä̧u̧ru̧mä̧, juätümä̧, we'äwotü pä'ü o̧i̧nä̧u̧, (Apótore jü̧nä̧). 15Juätürümä̧, epíritu-tu̧ suropätürü rä'epü ttikunä̧, ttukuo iyinä̧u̧. 16Juätü, ttü̧jä̧pü̧ttü̧ ta̧ju̧ wotü, pojopü ȩmi̧nä̧u̧mä̧ pitü ji̧na̧'a̧: Simón ja̧'a̧nä̧, Peduru pä'ü oinä̧ku̧'i̧nä̧, 17Zebedeo i̧tti̧mü̧, Sa̧ti̧a̧ku̧'i̧nä̧, i̧jä̧wa̧ Ju̧a̧'i̧nä̧, juätürümä̧, Boanerges pä'ü o'inä̧u̧, (ja̧'wa̧nü̧ pä'ümä̧ «ku'upä kürüa'a i̧tti̧mü̧» pä'ü päwä). 18Ja̧'wa̧ta̧nü̧ André'i̧nä̧, Felipe'i̧nä̧, Bartoromé'i̧nä̧, Mateo'i̧nä̧, Tomá'i̧nä̧, Alfeo i̧tti̧ Sa̧ti̧a̧ku̧'i̧nä̧; Tadeo'i̧nä̧, canaá̧ ttü̧ja̧sa̧ Simón'i̧nä̧. 19Ja̧'wa̧ta̧nü̧ chutä, Jesú-ru iyü ikuinü̧ Juda Icariote'i̧nä̧ ji̧na̧'a̧, ȩmi̧nä̧u̧mä̧.
Jesú-ru suronä̧ pä'inä̧tü̧
(Mt 12.22-32; Lc 11.14-23; 12.10)
20Jua̧u̧nü̧ o'ka'a, Jesú-mä̧ isodenä̧ doächi'omȩnä̧, pä'äjita'anü̧ ttü̧ja̧mä̧ rü̧ȩnä̧ ka̧ka̧kui̧pi̧nä̧tü̧, Jesú-mä̧ u̧wo̧juȩtä̧u̧ku'i̧nä̧ u̧kuȩ uku juiyünä̧tä̧ päi'ünä̧ ji̧na̧'a̧. 21Jua̧u̧ jȩü̧ ä̧ju̧kui̧päjä'kotü, Jesú awaruwämä̧, amükuädü jui'ächächü 'kua̧ra̧'a̧, pä'ü ȩmü̧ ttichinä̧ku̧.
22Ja̧'wa̧nü̧ ja̧'a̧nä̧, weäwä wȩnȩ wo̧juȩkuä̧ isotü, Jerusarȩ́-ra̧'a̧ttü̧ ichäjätü'i̧nä̧, pättä'chinä̧ku̧: «Beelzebú ü̧jä̧ku̧, epíritu-tu̧ suropätü ttu̧ru̧wa̧, jua̧u̧tä̧ ujurunä̧tä̧ rä'epä'chü iku pättinä̧ku̧.»
23Ja̧'wa̧nü̧, pättäku Jesú-mä̧, wopo'ü wȩnȩtü̧ päinä̧u̧: ¿Chutä, Satanás-mä̧, toku a̧mü̧nä̧ pa̧ja̧tü̧mä̧ rä'epäkuäu iku'anü̧ ja̧'a̧jä̧ttü̧? 24Yo̧mȩtȩ ru̧wa̧ weomȩttü̧ pä'ä'chäkuäu 'kȩttȩkuä̧chü̧ttü̧mä̧, jua̧u̧ ruwomä̧ rekuomä̧ 'chu̧'ä̧ro̧kü̧. 25Ja̧'wa̧ta̧nü̧, yotüte tti̧tti̧mü̧ku̧ rowäkuäu 'kȩttȩkuä̧chü̧ttü̧mä̧, juätü tti̧tti̧mü̧ku̧mä̧ rekuomä̧ kka̧kuo̧ko̧tü̧. 26Ja̧'wa̧nü̧ ja̧'a̧ttü̧, Satanás chutä a̧mü̧nä̧ pa̧ja̧tü̧ rowäkuäu 'kȩkuä̧kuä̧u̧ttü̧mä̧; uruwomä̧ juȩnȩbütä beipäkua'a.
27Ya̧tȩ'i̧nä̧ toa'a, ujuru kku̧nä̧rü̧rü̧ ojusodenä̧ do'ächächü iäre nä̧u̧kui̧'ü̧mä̧, ä'kanä̧ jua̧u̧ru̧ ünü'koka'anä̧; ja̧'wa̧nü̧ jȩpi̧'ü̧'kotütä nä̧u̧kuä̧kuä̧wa̧'a̧ jua̧u̧ iäremä.
28Isopäi'ünä̧ pä'üsä ukuturu: o'kajuiyünä̧tä̧ ttü̧ja̧ suronä̧ jȩttä̧'i̧ja̧'a̧nä̧'i̧nä̧, suronä̧ ttukuokuä'ija'anä̧'i̧nä̧, surojü jui'ätü jü̧nä̧ Dio-mä̧ jȩpü̧ i̧kuä̧kua̧. 29Ja̧'wa̧nü̧ ja̧'a̧nä̧ Epíritu Sa̧tu̧rü̧ suronä̧ pä'ätürümä̧, suronä̧ jȩttä̧'i̧jü̧mä̧ yorisotä surojü jui'ätü jü̧nä̧mä̧ jȩpü̧ ikuäwokotü ttäkuotü ja̧'wa̧nü̧ ja̧jü̧ jueimä̧ 'kuä'opünä̧ usurä ttȩmä̧wa̧ pä'ütätä jȩpü̧ kkü̧nä̧wä̧kuo̧tü̧.
30Jua'amä̧, Jesú-mä̧, epíritu su̧ro̧pa̧rü̧ kku̧nä̧rü̧ pättä'chäku päinä̧u̧.
Ja̧ju̧'i̧nä̧, i̧jä̧wa̧tü̧'i̧nä̧ Jesú-ru usinä̧tü̧
(Mt 12.46-50; Lc 8.19,21)
31Ja̧'wa̧nü̧ jiäwa'anä̧, Jesú ja̧ju̧'i̧nä̧, ü̧jä̧wa̧tü̧'i̧nä̧ ichi'äjä'kotü, u̧mi̧nä̧ kka̧ku̧, Jesú-ru jittäwiyatü pä'ü we'inä̧tü̧. 32Jesú, ippeyänä̧ pȩjä̧tü̧mä̧ pättinä̧ku̧:
—Kua̧ju̧'i̧nä̧, kui̧jä̧wa̧tü̧'i̧nä̧ u̧mi̧nä̧ kka̧ku̧ ttusäkujä̧.
33Ja̧'wa̧nü̧ pättäku ädätinä̧u̧:
—¿Tajujä̧ttü̧ cha̧ju̧mä̧, titujä̧ttü̧ chi̧jä̧wa̧tu̧mä̧?
34Pä'ü kä'ädü, ippeyänä̧ pȩjä̧tü̧rü̧ topü, pä'inü̧:
—Potä kka̧kuä̧tü̧ chü̧jä̧wa̧tü̧mä̧, potä kkä̧ju̧ cha̧ju̧mä̧, 35isopäi'ünä̧ Dio-rü pä̧wä̧rü̧jo̧mȩnä̧ jȩpä̧tü̧tä̧ ja̧'a̧ isopäi'ünä̧ chü̧jä̧wa̧tü̧mä̧ ja̧'wa̧ta̧nü̧ isopäi'ünä̧ cha̧ju̧mä̧.
انتخاب شده:
San Marcos 3: PNT13
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedades Biblicas Unidas en Venezuela
