Saaŋ 4
4
Yeesu na ɓitɓa genee Samari
1-3 Farisen ca kerahha ne, ɓooɓa na woye ne taalubeeci Yeesu raak, na ɓi a na ɓokte, ɓeɗ uup ɓiŋ Yahya. Nikka haa ne a Yeesu ŋ haf ce a yi na ɓoktohe haa, e taalubeeciŋ ɗe na ɓoktohe. Wa Yeesu inah ne Farisen ca kerhiɗ woo keem, a kurkohha Yudee, a dokukka Galile.
4Ŋ kaɗaŋ ɗe, nikka ne a joy lahoh Samari#4:4 Samari : ɓi Samari na Yawuut ca kerhiɗoheeɗi ; ɓa heeftiɗohee heeftiɗoh, ɓa sangtiɗohha.. 5A kaɗeeɗa po a reesa ŋ kur ɓaah ŋ Samari na woyse Sikaar ŋ sero yohna Yaŋhooɓa onee kuɓkiŋ ɗe Yuusufa. 6Ŋ ndaam, naacaŋ Yaŋhooɓa nikee nga. Wa Yeesu yaaɓ ŋ tiindiŋ ɗe, a ɓooffa ŋ sero naaca ; wa nikee ŋ leero noh.
7-8Taalubeeciŋ ɗe kaɗta roma kañam ŋ ɗooƴ kur ka. Ɗekka po ɓitiɓ ɓaah ŋ ɓi Samari hayya neye. Yeesu woosa ɗe ne : « On ndo ŋ an. »
9Ɓitɓa loffa ɗe ne : « Waaw ! Fu yi Yawuut, fu min ndo na kiimoh masuɓ, mi ɓitiɓ gen Samari ? » Waam raak Yawuut ci tiimbkee tiimbuk ɓi Samari.
10Yeesu loffa ɗe ne : « Fu inheen ini Kooh onoh ɗah te fu inheen yi na kiimee ɗa masuɓ ɗah, a fu hee ɗe kiime masuɓ, a on ɗa masmi na onohe kipes. »
11Ɓitɓa loffa ɗe ne : « Kilifaani naaci weɗi ye nooɗan, te fu raakɗi hoc, fu ɓayohan masmi na onohe kipes ŋ nde ? 12A fu uup caaciŋ ɓoo Yaŋhooɓa yi on ɓoo naacii e ? A aniɗ nga a yi na kuɓuuciŋ ɗe, po ɗoopaat ciŋ ɗe sah. »
13Yeesu loffa ɗe ne : « Masmii, ɓo' nu an nga ɗah, a hey sifaɗkisse. 14Waaye ɓo' nu an masmi mi na hee ɗe one ɗah, a moosanɗi sifaɗuk muk. Laam, wa na hee nikee culi na hee kaɗɗe ŋ ɗooƴ ce, wa on ɗe kipes ki heyɗi reehe. »
15Ɓitɓa loffa ɗe ne : « Kilifaani, on ndo ŋ masmeem, ne ŋ sifaɗkissuu, wa etohissuu ne ŋ hayee neye ŋ ndii. »
16Weɗ Yeesu woyoh ɗe ne : « Kaɗa fu ɓeeɗka ƴaar fu, fu hayis ndii. » 17Ɓitɓa loffa ɗe ne : « Ŋ raakɗi ƴaar. » Yeesu woosa ɗe ne : « Fu woo keeh ŋ ini fu woo ne fu raakɗi ƴaar. 18Fu raakeen ƴaar yatuus, te yi fu nik na ɗe woti-woti, a ƴaar fu haa. Fu woo keeh. »
19Ɓitɓa woosa ɗe ne : « Kilifaani, ŋ hotiɗ nga ne fu woosuuɗ. 20Ɓoo ɓi ɓi Samari, caac ciŋ ɓoo, meeɗ ñaamuk Kooh ŋ tangoorii, waaye ɗu ɓi Yawuut ci, ɗu woo ne ɗiska joy ñaamkohu wa ɗaa ŋ Yerusalem. »
21Yeesu woosa ɗe ne : « Ɓitɓi, kosa ini mi na woyee ɗa wii, jamano wii hay, wa nikanɗi ne ɗu joy ñaamkoh Baabi ŋ tangoorii, wala ŋ Yerusalem. 22Ɗu ɓi Samariici, ɗu na ñaamke Kooh waaye ɗu inahɗi ɗe ; te ɓoo ɓi Yawuut ci, Kooh yi ɓoo na ñaamke, ɓoo inhiɗ ɗe ; laam muci lahoh ŋ Yawuut ci. 23Waaye jamano wa ɗii hay, te sah wa reyiɗ, ñaamkoh ci keeh-keeh ci, Fuuɗsi Hoolohngaani hey ɓa one ɓa ñaamkee Baabi findi a nikoh keeh-keeh. Ñaamkoh mand ɗaa ɓeɗ Baabi waaɗ. 24Kooh, a Fuuɗsiŋ kipes ki, weɗ tah ɓooɓi na ñaamkee ɗe joyiɗa tum taamboh ŋ Fuuɗsi Hoolohngaani na ɓayohe ŋ keeh ki. »
25Ɓitɓa woosa ɗe ne : « Ŋ inhiɗ ne Mucɗohi Gapohse yi na woyse Kiristaani hey haye. A hay ɗah, a hey ɓoo teeɓe in ci jen. »
26Yeesu woosa ɗe ne : « E ñam, mi yi na woye na ɗa. »
27Teemb ndeem taalubeeciŋ ɗe reyeeɗa. Ɓa feyuusa ŋ ini ɓa hot Yeesu woyeeɗa na ɓitiɓ waaye ali ɓo' kaañɗi meeksoh ne : Fu waaɗ ye ? Wala fu na woye ye na ɓitɓii ?
28Ŋ ineem ɓitɓa faɗta neyohaanaŋ ɗe ŋ ndaam, a dokukka kur ka, a woosa ɓooɓa ne : 29« Hayaat ɗu hot ! Ŋ cohiɗ na ɓoyi woo so in ci ŋ tum jen. Andi a Mucɗohi Gapohse ? » 30Weɗ ɓi kur ka puloh, ɓa hayeeɗa ŋ Yeesu.
31Bala ɓi kur ka reyan ɗah, taalubeeciŋ ɗe ñaakka nga ɗe woyeeɗa ɗe ne : « Jangɗohohi, ñama. » 32Waaye a woosa ɓa ne : « Ŋ raakiɗ kañam ñamaah, wi ɗu inahɗi. » 33Taalubeeci woyeeɗa ŋ harmban ɓa ne : « Andi a ɓo' kom ɗe kañam ? » 34Yeesu woosa ɓa ne : « Kañam kiŋ ngo, weɗ ne ŋ tum waaɗ-waaɗiŋ Yi woos so te ŋ ɗiindoh pangki a nak ko.
35Ɓooɓa na woye ne : “ Ndii na caɓin nikiis weɗ nikan nguɗ. ” Waaye mi na woyee ɗu ne, jaɗtukaat ɗu marak yohon ci, ɗiski ca nik, ca ruundiɗ po ca suyiɗ, ca na seke nguɗu. 36Nguɗohi yii rahas wirndiŋ ɗe, te a hey nangɗohe mbong ciŋ ɗe ; mbong ceem, ɓeɗ ɓi raakan kipes ki heyɗi reehe. Ŋ ineem sokohi na nguɗohi hey hune, ɓa sum. 37Woyohaaɗii wa keeh ndii, an : “ Yii sok sok, yii nguɗta. ” 38Mi, ŋ tuuƴiɗ ɗu ne ɗu nguɗa ini ɗu guurɗi, ɓi ɓo' wiiriis ɓeɗ panguk, ɗu ɓii ñam opiŋ ɓa. »
39Ɓo' Samari laayiɗ gen kur keem, koseen Yeesu sagu woo ka ɓitɓa woyee ɓa ne : « A woyiɗ to in ci ŋ tum jen. » 40Weɗ tah po wa ɓi Samari hay ŋ Yeesu, ɓa kiimmba ɗe ne a nik na ɓa ; a nikka nga neeh kanak. 41Ɓooɓa kosee ɗe uuppa nga laay sagu woo kaŋ ɗe. 42Ŋ ndeem, ɓa woyeeɗa ɓitɓa ne : « Wa nikisɗi ne a woo kiŋ ɗa tah ɓoo kossa ɗe waaye ɓoo kerhootiɗ ɗe, te ɓoo inhiɗ ne wa keeh ne a yi Mucɗohiŋ Adina. »
Yeesu wirɗiɗ kuɓu dag buur
43Wa Yeesu tum neeh kanak ŋ kur ka, a kurkohha ndaam, a kaɗta Galile. 44Raak, a yi ŋ haf ce, a woyiɗ ne : « Woosuuɗ na eɗseeɗi cir ŋ kur ɓa. » 45Ɓi Galile, ɓa nameen kaɗ ŋ feetaŋ Paak ŋ Yerusalem, weɗ tah, wa a ree nga, ɓa taambɗukka ɗe taambɗuk moɗoɗ, laam ɓa hoteen ina a haɓiɗ ŋ Yerusalem jen, ŋ feeta. 46Yeesu dokukka Kanaa ngaŋ Galile, ɗiska a ɓoƴsohee masma biiñ.
Wa raakeen dag buur ŋ Kapernawum yi kuɓkiŋ ɗe ƴaari kosaaye. 47Wa a kerah ne Yeesu kurkohiɗ Yudee hayiɗ Galile, a kaɗta ɗe raaka ne a kiim ɗe ne a hay, a wirɗiɗ ɗe kuɓkiŋ ɗe, raak yeem heeɗa kaane. 48Yeesu woosa ɗe ne : « Ɗu hotɗi firnde wala keemaan ɗah, ɗu kosanɗi muk ! » 49Waaye daga loffa ɗe ne : « Kilifaani, haya bala kuɓkiŋ ngo kaanan ɗah. » 50Yeesu woosa ɗe ne : « Kaɗa, kuɓkaŋ ɗa wiriɗ, a yaa pes ! » Ƴaara kossa ina Yeesu woo, a kaɗta.
51Wa a kaɗe, ñaam ciŋ ɗe hayya cohe na ɗe, ɓa woosa ɗe ne : « Kuɓkiŋ ɗa wiriɗ, a yaa pes ! » 52A meekissa ɓa ne : « A ngisoh ŋ winde wahtu ? » Ɓa loffa ɗe ne : « Wotɓa, ŋ njooloor, ŋ ineer (1h), weɗ dohɗiŋ faaniŋ ɗe cootoh. » 53Baabiŋ kuɓki inahha ne wa ŋ wahtuuni Yeesu woyoh ɗe ne : « Kuɓkiŋ ɗa wiriɗ, a yaa pes ! » Jaarra, a nikka ɓo' kosiɗ, a yi na ɓi kahan ce jen. 54Wa nikka firndeeni Yeesu kanakɗoh tum ŋ pulohaŋ ɗe Yudee a kaɗta Galile.
انتخاب شده:
Saaŋ 4: YM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Wycliffe Bible Translators, Inc
