Mateus 2
2
ONTOPORUA 2.
Aanongo jatatu mu Betlehem
1Ano Jesus sho a varua mu Betlehem motshirongo tsha Judea, muujum ua Herodes omukuaniirua, tara, aanongo oja za kuuziro, je ja ko Jerusalem.
2Oja ti: Omukuaniirua guAajuda, ngu a varua ngashiingika, oku ri peni? Oshoka otua mona onjoci he kuuziro, nde ss’otue ja tu mu injongamene.
3Ndere Herodes, sho e tshu uvu, okua ri a haruka unene, nAajerusalem ajeshe puamue na he.
4H’ota gongere aapristeri aakuruntu naatshiui jomambo jotshirongo, te ja pura, Kristus mp’a varua.
5Jo otaa ti ku he: Omo Betlehem, motshirongo tsha Judea, oshoka otsho pua tshangerue ngii komuprofeti:
6Nguee Betlehem, motshirongo tsha Juda, ku shi nand’okatshonatshona mokati keemukunda domarenga mu Juda, oshoka mu ngueje otamu zi Muene, ngu ta ka ninga omureri guorudi ruandje Israel.
7Nena Herodes eti icana aanongo mofuci, he tu uvu ku jo tshiri, ecimbo ri ini onjoci he jo orokere.
8He te ja tumu ku Betlehem, ta ti: Indeni ko ano mu ka konge okanona, nde nge mue ka mono, omu tshiuica ndje, ndi he uo ndi ki injongamene.
9Shi ja puakene omukuaniirua, oja hi. Nde tara, onjoci, ndji ja monene kuuziro, ohe ja tetekerera, tahi ja kombanda heshara, mpa pu nomunona, nde tahi cikama.
10Sho ja mono onjoci, oja njanjukua unene.
11Oja hi megumbo, nde taa mono okanona na hina Maria; oji ishata poshi, taji injongamene. J’otaa suukura iikeca, nde taa ka p’omagano: iingoldi niizimba nomaka.
12Mondjodi oja rombuerua kaa tshune ue ku Herodes; otsho ano ja tshunine kotshirongo tshauo nondjira hi iri.
Etembukiro ku Egipte.
13Sho ja zi po, omujengeli gua Muene okuo orokere Josef mondjodi, ta ti: Cikama, kuca omunona na hina, nde to h’onda po ku Egipte, oko to kara sigo otii ku rombuere, oshoka Herodes a hara a konge okanona, e ka dipage.
14Naanzija ta cikama, ta kuca okanona na hina uusiku, nde ta hi ku Egipte.
15Oko a kara sigo okusa kua Herodes, opo tshi ningue shi tsha popirue ku Muene momuprofeti, ta ti: Ondi icana omumuandje ku Egipte.
16Herodes sho a mono, nokutja okua tshendjerekua kaanongo, okua geje unene; he ta tumu ko okudipagica mu Betlehem no mehero rjago uunona uumati aushe, mbu u neevura mbaari na mbu inau ada, nokuereka ecimbo, ndi a huva kaanongo.
17Otsho tsha guanicua shi tsha rombuerua komuprofeti Jeremias, ta ti:
18Eui orju uvika mu Rama, neriragano neenkari; Rakel ta ririre aanona je, h’ina ara okuekerericua, oshoka kaa po ue.
19Herodes, sho a si, tara, mondjodi omujengeli gua Muene okuo orokere Josef mu Egipte, ta ti:
20Cikama, kuca okanona na hina, u tshune kotshirongo tsha Israel, oshoka mba kua ja tanta ja dipage okanona, oja sa.
21He ta cikama, ta kuca omunona na hina, nde ta tshuna kotshirongo tsha Israel.
22Sho a huvu, nokutja Arkelaus ta pangere mu Judea peshara rja she Herodes, okua tira ko, nde sho a rombuerua mondjodi, ho ota hi motshirongo tsha Galilea.
23Nokue ja a kare momukunda gua rukua Nazaret, opo tshi ningue, shi tsha tiua kaaprofeti: He ta rukua omunazareta.
اکنون انتخاب شده:
Mateus 2: KWM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Omission Heklesia Ekatolika, 1951. Namibian Catholic Bishops Conference.
