Matiyu 22
22
Hufwa a chu esǝ-ben
(Luka 14:15-24)
1Efwe Yeso è jan be fwa adi be hufwa jan, 2“Zǝnotì mo Ehwya no abu tì akan éè fǝ́dwa esǝ-ben mo nwen ye ndedon ángá. 3Gè tson be ya mochi mbwe be e ken jan be ya gè bo be adi esǝ hon ángá jan engga nè defǝ ara mo esǝ hon. Tea binbin mo be, è se be e bwa.
4“Efwe, gè tson be ya mochi embo efki ken a zǝn be ya hon a gè bo be ángá jan, ‘Ken jan be ya m̀ bo be ángá, jan m bwe fwa ara mode mo esǝ hon. M yagu ara be ndwa ekeke ngge ezon-ndwa ekeke mam hon, be bwe fwa ara be mò binbin nobà nye anga, nye bwa adi esǝ hon.’
5“Tea be ya hon a gè bo ángá, è ká be ra nè nya m̀ mo be chá efki akan è ken a kpèn mbwe, akan è nya chá mochi tse endam mbwe. 6Be ya e dan ángá, è fu be ya mochi hon, nè no be ebgenju nè gu be. 7Tì hon è fku tsuruku àywá nè tson be yakàn mbwe ken gu binbin mo be ya è gu be ya mochi mbwe ángá, nè to tkòn gu eten efifi mo be.
8“Kǝnggwa gè fǝ́ be ya mochi mbwe efki dwa, nè jan be jan, ‘Esǝ-ben hon defǝ ara, tea be ya m̀ bo be ángá kǝn be, be e bwa e de nó ra. 9Enona, nye tkukwa gu be efǝku a tswa eten, nye e bo egwa egwa a nye ben ángá ge e bwa.’ 10Be ya mochi hon è tkukwa be efǝku hon nè fǝ́ binbin mo be nobǝ a bè ben ángá dwa, be nobǝ esese ngge be ya mofǝ̀, afku mo esǝ-ben hon è mbo ngge be nobǝ.
11“Tea atan a tì hon è bwa evǝa ge e di be ya gè bo bwa ángá, gè di ndedon akan è no a zǝn nè nggwa ye mokàn mo esǝ-ben a be ya bè bo be bwa adi esǝ-ben hon è nggwano a ju ángá ra. 12Gè ká nobǝ hon eka jan, ‘Shushwa, o bwe engǝ o chà kwashwa ana, abu o fwa mbo ngge mokàn mo esǝ hon ra na?’ Ndedon hon è jan ti ye fwa akan ra.
13“Kǝnggwa tì hon è jan be ya è bwe ye mochi anga a zǝn esǝ-ben hon ángá jan, ‘Nye tè ye be bu ngge be kpwafu mbwe, nye e ti ye e twa e vǝ́ chá je a tswa zǝn etwafǝfǝ. Zǝn a be nobǝ a kpedwa na kǝ́n be san ángá.’ ”
14Ekǝn-etkyen, Yeso è jan, “Ya a bè bo bwa ángá no embo, tea ya a bè swa ángá no nwofyan.”
Eka ekam a chu tse-eten a be kpwa no Kaisa anga
(Marku 12:13-17; Luka 20:20-26)
15Kǝnggwa be Farisi è vǝ́ a je nè té fuchin evǝa be tswa e fu Yeso a chu be fwa a gè jan ángá. 16Bè tson be etsonchi mo be tangge be ya è dgyan Tì Hiridu anga ken a zǝn ye. Bè jan, “Etumo, je yi wa nobǝ egǝ̀ngǝ̀n ngge o tú be nobǝ efwa mo Ehwya anga adi ebi. O cha ebgan sǝ́ mbo ende akan anga ra, edgwa mo nobǝ fwa ye mò akan a zǝn o ra. 17Jan je mò a o ka anga. Ge se je e kpwa tse-eten a be kpwa no Kaisa anga nè, a je e kpwa je ra?”
18Tea adia a Yeso è yi ara shwa mofǝ̀ mo be a bè ka anga, gè jan be jan, “A nye be ya ayibangǝ̀. Ano bwe a ge, nye nda anga nye e fu m ngge edan? 19Nye tú m fwentse a nye ti kpwa tse-eten hon anga.” Bè ti dinari akan bwa ye. 20Gè ká be eka jan, “A engǝ́ mo fǝzǝn embǝgya ngge ti mo ara e no a ju mo nó?”
21Bè janfwe ye jan, “A ḿ mo Kaisa.”
Enona, ge jan be jan, “Nye no Kaisa mò e no ḿ mo Kaisa, nye e no Ehwya mò e no ḿ mo Ehwya.”
22Atan a bè fo enò ángá, bè tàn ebwikpe. Kǝnggwa, bè twagwa ye nè nya m̀ mo be.
Eka ekam a chu ezǝbwam a dì
(Marku 12:18-27; Luka 20:27-40)
23Nò eni, be Sadosi ya ehwyà è bwa a zǝn Yeso. Ya hon, a be ya e jan ezǝbwam a dì né fwa mo nó ra ángá. Bè ká ye eka jan, 24“Etumo, Mosa è jan je jan, ‘Ano nobǝ fǝ ara, n mbwa ye mbǝgya ngge gwa ye ra, ge no kenm, nwenjin ye e fǝ́ gwafǝ́n hon evǝa ge e mbwa mbǝgya e no nwenjin ye è fǝ ara ángá.’ 25Be nwenjwa chwen a fà è no a engga mo je. Ekwafya mo be è fǝ́ ndegwa nè fǝgwa ye nó ngge mbǝgya ra. Adia gè ben ye mbǝgya ngge nó ra ángá, nwenjin ye éè dgwa ye ángá, è fǝ́ gwafǝ́n hon. Nwenjin ye hon è fǝ èé ge, nè mbwa ye mbǝgya ngge nò ra. 26Mò hon ena è bwe ken tén enò ngge binbin mo be chwen a fà hon. Bè fǝ gu nè mbwa be mbǝgya ngge gwafǝ́n hon ra. 27Ekǝn-etkyen ndegwa hon fǝ èé ge. 28Kǝnggwa, atan a be nobǝ zǝ a bwa a dì angǝ ángá, ndegwa hon a no gwa ara, adia binbin mo be è fǝ́ di ara ye ángá?”
29Yeso è janfwe be, “Fwa ekam mo nye shwa ara, adia nye yi nye be Fwaebam eno e ra echakpo mo Ehwya ra. 30Atan a be ti be nobǝ nyi ara etkyen a dì ángá, be ndedon a fǝ́ be ndegwa ra, be ndegwa a nya be don ra. Tea be nobǝ a no abu be maleka mo Ehwya a kpe. 31A chu ezǝbwam a dì mo ya fǝ̀ ara ángá, nye chà ka nye mò a Ehwya è jan nye jan, 32‘A me ma Ehwya mo Ebrayi, Ehwya mo Eshaku ngge Ehwya mo Yakubu’ ra? (Be ya ena è fǝ dgyen ara fon, enona, ano Ehwya fǝ́ chu ye jan ga Ehwya mo be, je yi jan adi enò, ge ti be nyi ara etkyen a dì.) Adia Ehwya fwa ye Ehwya mo ya e fǝ ara ángá ra, tea ḿ mo ya e no angǝ ángá.”
33Atan a bè ya è fǝnno a zǝn è fo fwa ena ángá, bè tàn ebwikpe àywá a chu moetum mbwe.
Edon e dgwa ti ara ángá
(Marku 12:28-34; Luka 10:25-28)
34Atan a be Farisi è fo jan Yeso ne du be Sadosi jan ti be fwa efwe ra ángá, bè fǝ́ fǝn sojube. 35Akan a engga mo be è yi edon àywá ángá, tkyan ge e fu ye, ngge eka ekam ena jan, 36“Etumo, a tswa be edon mo Ehwya, edon nwone e dgwa ti ara ángá, a ani?”
37Yeso è janfwe ye, “‘Ge no kenm we dgyan Ehwya Etsodwe mbo ngge tsuruku mbo binbin, ngge nya mbo binbin, ngge engà mbo binbin.’ 38Ena a edon ekwafya ngge nwone e dgwa ti ara ángá. 39Nwone e ba nó ángá, no abu ekwafya hon. ‘We dgyan needwe mbo abu o dgyan chù o ángá.’ 40Binbin mo be edon mo Ehwya a bè ti no Mosa ngge mò a be efojan mo Ehwya è jan ángá, ndnyano a chu mo be edon fà ena.”
Kristi hon a nwen ara?
(Marku 12:35-37; Luka 20:41-44)
41A be Farisi è chà fǝnno adi zǝn akan ángá, Yeso è ká be eka jan, 42Mò a nye ka a chu Kristi hon anga, no engǝ? Ga nwen mo ara?
Bè janfwe ye, “Ga nwen mo Dawuda.”
43Gè jan be, “Ano ge no enò, ano bwe a ge Dawuda, atan a gè no a tswa mo Engǝ́ mo Ehwya ángá, gè fǝ́ Kristi hon, ‘Etsodwe’? Adia Dawuda hon è jan,
44“ ‘Ehwya Etsodwe hon è jan Etsodwe mam jan,
“Chu chá budgo mam ken a ngga atan,
a ma du be ya eze mbo
a nga be mò tu fù mbo ángá.” ’
45Ano Dawuda è fǝ́ Kristi hon, ‘Etsodwe,’ bwe engǝ Kristi a no nwen ye?” 46Nobǝ akan è janfwe ti ye ye mò akan ra. Ti nò eni ken chafya, ende akan è dgyan di ye ge e ká ye eka efwe ra.
انتخاب شده:
Matiyu 22: ICH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 Luke Initiative for Scripture Translation
