Matiyu 19
19
Eka ekam a chu ben egum
(Marku 10:1-12)
1Atan a Yeso è jan gu ara be fwa ena ángá, gè nyagwa sǝnsen mo Galili nè kwa ken chá efa mo Yahudiya, chá jengǝ̀ mo Kǝn a Joda. 2Be nobǝ embo è ba ye, gè matswa be ya modwa ya è dwa a engga mo be ángá.
3Be Farisi ya ehwyà è bwa evǝa be e mbwà e di ye. Bè ká ye eka jan, “Edon mo je chadwa jan ndedon ge e gu ben mbwe ngge gwa ye, a chu mò e no engǝ ra, a ndegwa hon bwe, nwone a ge dgyan ye ra?”
4Gè janfwe be jan, “Nye cha ká nye a tswa be Fwaebam zǝn a bè bá jan ne ekwafya Ehwya-emmò hon, ‘È mmò be, ndedon ngge ndegwa, ángá ra?’ 5Fwaebam hon è jan efwe jan, ‘Enona, ndedon a gwa ate ye ngge ayi ye, na fyàn a tan ngge gwa ye, a be fà hon ba nga amngo akan.’ 6Enona, be fwa be fà efwe ra, tea akan. Mò a Ehwya bantan ara eso ángá, nobǝ akan e ngga e kwa ye be ra.”
7Bè ká ye eka jan, “Bwe engǝ ekǝnggwa, Mosa è jan a tswa edon jan ne ndedon ne bá afketa ejantum e no gwa ye, ne nyo nó e nya?”
8Yeso è janfwe be, “Mosa è cha nye dwa nye e gu be gwa nye ben adia nyè cha fí re chu ángá. Tea adi ekwafya gè fwa ye enò ra. 9M jan nye ebi anga, ende e gu ben mbwe ngge gwa ye, e ma no ye a chu sen-eten ra, n fǝ́ ndegwa efki, bwe anga sen-eten.”
10Be ya è ba ye anga, è jan ye jan, “Ano ena a abu zǝno ben no a engga mo ndedon ngge ndegwa ángá, ge setkyan a ge, ndedon e fǝ́ ye ndegwa ra.”
11Yeso è janfwe be, “Fwa ye egwa egwa nwene a chadwa mo moetum ena ángá ra, tea kpwà tén be ya Ehwya no ara be echakpo, a bwe nó a be. 12Be ya ehwyà no afatkya adia bè mbwa be enò. Ya ehwyà be nobǝ è bwe be nó a be, be ya ehwyà dgyan a be, be e no be afatkya a chu fwa mo zǝnotì mo Ehwya. Ende e di jan ge cha a ti dwa mo moetum ena, ge e cha nó.”
Yeso è tso mbǝgyashan dwavǝ esese
(Marku 10:13-16; Luka 18:15-17)
13Kǝnggwa bè nobǝ ya ehwyà è kpu mbǝgyashan bwa a zǝn Yeso evǝa ge e tso be dwavǝ esese ngge ge e bgó ebgo a chu be. Tea be etsonchi hon è tkyá be ya è kpu be bwa ángá etkya.
14Yeso è jan, “Nye e gwa mbǝgyashan be e bwa a zǝn m, nye e jan e ngga nye be ra, adia zǝnotì mo Ehwya no ḿ mo be nobǝ ya e ka tashwa yishwa mo be anga.” 15Atan a gè tu ara be bu a chu evǝ mo dwavǝ esese etsom hon ángá, gè nyagwa zǝn hon.
Ezon-ndedon yamo ngge zǝnotì mo Ehwya
(Marku 10:17-31; Luka 18:18-30)
16Dgyen ye fon ra chashin mo nó, nobǝ akan è bwa a zǝn Yeso nè ká ye eka jan, “Etumo, mò esese e no kenm a ma bwe evǝa me e ben nya e no a fwa efwam ángá a ano?”
17Yeso è janfwe ye, “Ano bwe a ge o ká m eka a chu mò e no esese ángá? Kpwà ende Akan e no esese. Ende hon a Ehwya. Ano o dgyan anga we ben nya e no a fwa efwam ángá, tse be edon.”
18Nobǝ hon è janfwe ye jan, “Be edon ani?”
Yeso è janfwe ye, “ ‘We gu mbo nobǝ ra, we bwe mbo sen-eten ra, we zǝ́ mbo jú ra, we jan mbo fwa amme a chu nobǝ ra, 19no ate o ngge ayi o edgwa’ ngge ‘we dgyan needwe mbo abu o dgyan chu o ángá.’ ”
20Ezon-ndedon hon è jan, “Be mò ena binbin, m̀ tse be bwa anga ebwam, mo efki e chà dan shi m ángá, a ano?”
21Yeso è janfwe ye, “Ano o nda anga we no ende e no ebitete chafya mo Ehwya, ken jwade gu be mobenben mbo, we ti tse a o ben ángá e no be ya ekan, wa no ngge mobenben a kpe. Kǝnggwa, bwa ba m.”
22Atan a ezon-ndedon hon è fo enò ángá, gè nya m̀ mbwe a tswa nya ebgenm, adia gè no ngge mobenben àywá ángá.
23Kǝnggwa, Yeso è jan be ye è ba ye anga jan, “Ebi m jan nye anga, ge no ngge ekan a yamo e kwa a tswa zǝnotì mo Ehwya. 24Efwe m jan nye anga, ge shànfo tkyan a ge, a gwemo a be fǝ́ anga rakumi e kwavǝ́ e nya adi edu mo ebgon-yi, chàshín yamo a tswa zǝnotì mo Ehwya.”
25Atan a be ye è ba ye anga è fo eno ángá, bè tàn ebwikpe àywá, nè jan, “Ano ge no enò, kǝnggwa, ara a ben nya e no a fwa efwam ángá a ge?”
26Yeso è di be nè jan, “A zǝn nobǝ, mò ena fwa ye ebwetim ra, tea a zǝn Ehwya binbin mo be mò no ebwetim.”
27Kǝnggwa, Bitru è ká ye eka jan. “Di, je gwa gu ara be mò binbin, je bwa ba o, mò a ja ben ángá a ano?”
28Yeso è jan be jan, “M jan nye ebi, adi ekǝn e nyabwa ángá, atan a a me Nwen Nobǝ, ma chu a chu botì egǝ̀ngǝ̀n mam ángá, a nye be ya è ba m ángá, nya chu a chu botì gwi chu fà, nya kpèn be efi gwi chu fà mo Esǝrela kǝ́n. 29Ngge egwa egwa e gwa be mu mbwe, be nwenjwa ye ndedon èé ndegwa, ate ye, ayi ye, mbǝgya mbwe, be sǝnsen mbwe a chu m, a ben be mò e ken a ngga gwé kè akan (100) mo be, ngge ga defǝ́n mo nya e no a fwa efwam ángá gaten. 30Tea embo mo be ya e no chafya asuswana ángá, twabǝ bwa a no chashin, be ya e no chashin asuswana ángá, twabǝ bwa a no chafya.
انتخاب شده:
Matiyu 19: ICH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2024 Luke Initiative for Scripture Translation
