Matta 2
2
Nǝb Nyǝmtǝmɔ A Ba Yal Yesu
1Nǝn kwama ja bʌm Yesu a Baitalami a Yahudiyaɨ, Hiridus nǝn gɔ fɔlɔ a kwama gɨɨ. Nǝngɔ kaam dʊʊm nǝb nyǝmtǝm a bɛ a twal a Urushalimaɨ, 2ja bʌ gɔ, “Fɔlɔ Yahudawagɔ ja bʌi n fee? Nǝn kuwo nyanyamɨ gǝnɔ a twal. Nǝngɔ nǝn bɛ sǝ ba nǝn jʊng nǝn nǝ gǝn dʊʊnɨ.” 3Kwama Hiridus fɔlɔgɔ a nyʊwam kɛl nɨɨ, nǝl gǝnɔ a kala jǝbɔ nǝb nɨ a Urushalimaɨ gwam. 4Nǝngɔ a jo mʊrkalɨ dʊʊm nǝbkǝlamɔ jǝbɔ nǝb mɛlalɨ diilɔ gwamɨ, a bʌ ji daagɔ jǝ bʌm Kiristi lɛɨ. 5Nǝngɔ ja jǝla gǝn gɔ, “A Baitalami, a Yahudiya, kanga nǝkuwotǝmkǝgagɔ a mʊla gɔ,
6“ ‘Mɔ tǝmʊn Baitalami,
a tǝm Yahudiya,
Mɨ mɔ dǝm a nǝb maatǝm
fɔlɔnɔ gǝm a tǝm Yahudiyaɨ.
Jʊ a bwɨɨ kaa nǝ maatǝm fɔlɔn
jel jel a mɔ gǝm,
wʊnɨ yǝlam nǝb mǝndɨ Israila gǝm dʊʊ lɛɨ.’ ”
7Nǝngɔ Hiridus a jo dʊʊm nǝb nyǝmtǝm nɨ shig shigi, a bʌ ji kwama ja kuwom nyanyamɨ nɨɨ. 8Nǝngɔ a tʊng ji a Baitalamii, a sʊwa ji gɔ, “Ya jǝ́ saa bwɛ feli nɨ nǝn lǝma. Na jǝ́ nya gǝnɨ, sǝ ba jǝ́ sʊwa ɨ, mǝ tǝmɨ sǝ ya n jʊng n nǝ gǝn dʊʊn.”
9Kwama ja nyʊwa kɛl fɔlɔgɨɨ, nǝngɔ ja ja kǝga nǝn yɔm jini. Nyanyamɨ nɨ ja kuwo a twalɨ, nǝn gɔ a ja jim kǝgaɨ ba tɨ dǝngdǝng a daa nɨ ja bʌm bwɛ dwalɨ nɨɨ. 10Nǝn kwama ja kuwo nyanyamɨ nɨɨ, ja maa fulotǝm nǝl dangǝn. 11Ba ja dɔ lɔngɨɨ, nǝngɔ ja kuwo bwɛ jǝbɔ nyɨya gɔ Maryamui. Nǝngɔ ja gǝla ja jʊng nǝn dun ja nǝ gǝn dʊʊnɨ. Nǝngɔ ja wumo bǝla kemʌn jini, nǝngɔ ja nǝ gǝn lǝma mʊn, jǝbɔ kaam kanjǝl twɨtǝm nɨ nǝn kunʌn lǝmɨ nɨ jǝ jo lɛ gɔ luban jǝbɔ mʊng. 12Kwaama a kwɛl a gʊ lɔl jinɔ a dʊgam gɔ, ka ja yǝla lɛ a daa Hiridus woi. Nǝngɔ ja yǝla ja do kaa gola ja shu a tǝm jini.
Tɛtǝlam Yesui A Mwal A Shu Nǝn Gɔ A Masar
13Nǝn kwama nǝb nɨ a shui, nǝngɔ bwɛ twama Tɛlalɔɨ a nʊng Yusufu a mʊgɔ dʊgam gɔ, “Gun guni, do bwɛ dwalɨ nɨ jǝbɔ nyɨya gɔ ń mwal ń yɔ nǝn a tǝm Masar. Bɛ ka ń yǝla lɛ ń bɛ, na mǝ twam mʊn bɔ twamaɨ, jʊ a bwɨɨ Hiridus saa lɛ sǝ gǝ jʌ gǝn.” 14Nǝngɔ Yusufu a do bwɛ dwalɨ nɨ jǝbɔ nyɨya gɔ a mwal nǝn ji a Masarɨ, 15n daagɔ ja yɨmɨ, a yɔ nǝn a kwama Hiridus a bʊlamɨ. Jʊ nɨ a bwɨ sǝ ja yii jʊ Tɛlalɔ a sʊwa a nyiyo nǝkuwotǝmkǝgagɨɨ gɔ, “N jo bʊla mɨ a Masar.”
Ja Jʌbo Bɛtɔ Dwalǝnɔ
16Nǝn kwama Hiridus a nyǝm gɔ nǝb nyǝmtǝm nɨ a swag gǝn swagɨ, nǝngɔ a maa nabwɨlɨ. Nǝngɔ a sʊwa gɔ ja jʌ bɛtɔ batǝnɔ gwam a Baitalamii jǝbɔ daatɨn nɨ a kɔtʌgo gwamɨ, ja jʌbo bɛtɔ batǝn nɨ a shu bɔ jolɔ yoi. A yɔ dǝngdǝng jǝbɔ kwamagɔ a nyʊwam bʌtʌm bwɛ balɨ nɨ a nyiyo nǝb nyǝmtǝm nɨɨ. 17Wʊnɨ n yiitǝm kɛl nɨ nǝkuwotǝmkǝga Irimiya a sʊwaɨ gɔ,
18“Ja nyʊwa diil a Rama,
n jitǝm wi bwaa,
Rahila ji lɛ a dul bɛtɔ lɔ gɨɨ,#2:18 Dʌng: Irimiya 31:15.
a kɔ yotǝm kang bwaangɔ,
jʊ a bwɨɨ bɛtɔ lɔ gɨɨ mɨ wo.”
Yǝlatǝm A Tǝm Nazaratɨ
19Nǝn kwama Hiridus a bʊlaɨ, nǝngɔ bwɛ twama Tɛlalɔɨ a bɛ Yusufu gǝm a mʊgɔ dʊgam a tǝm Masarɨ gɔ, 20“Gun, do bwɛ jǝbɔ nyɨya gɔ, ń yǝla nǝn ji a tǝm Israila. Nǝbɔ swɨ lɛ a jʌ gǝnɨ, ja bʊlala.”
21Nǝngɔ a gun a do bwɛ jǝbɔ nyɨya gɨɨ, a yǝla a bɛ a tǝm Israilaɨ. 22Nǝn kwama a nyʊwa gɔ nǝn Arkilayus bʊla Hiridusi a gwi fɔlɔn tɨya gɨɨ a Yahudiyaɨ, nǝngɔ a nyʊwa taal yɔtǝmɔ woi. Ja gʊ lɔl gǝnɔ a mʊgɔ dʊgam, nǝngɔ a tang a tǝm Galilii. 23A shu ya yɨ nǝn gɔ a kaa tuulɔ nɨ jǝ jo lɛ gɔ Nazaratɨ, sǝ a yii jʊ ja sʊwa a nyiyo nǝbkuwotǝmkǝgagɨɨ gɔ, “Jǝ jo gǝn gɔ Bwɛ Nazarat.”
اکنون انتخاب شده:
Matta 2: DBD
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
©️2024 Luke Initiative for Scripture Translation
