मत्ती 3
3
यूहन्ना बपतिस्मा ङेणे आले चा प्रचार
(मरकुस 1:1–8; लूका 3:1–18; यूहन्ना 1:19–28)
1वा ङिहें यहूदिया चे बरब्याना मां वचन ङिते हुले बपतिस्मा ङेणे आला यूहन्ना आतीकर प्रचार करु लाग़ला, 2#मत्ती 4:17; मरकु 1:15 “पापा कनु मन फिरावा, कांकि स्वर्ग़ चा राज़ गोढु छै।” 3हा यूहन्ना ओही छै, जाये बारे मां यशायाह भविष्यवक्ता ने चर्चा करती कर केहले हुते,
“बरब्याना मां हेक हकारने आले ची अवाज किहे पलती ली,
‘प्रभु चे वास्ते मार्ग़ तियार करा,
ते ओचे वास्ते सड़का सिधीया करा।’ ”
4यूहन्ना ची ओढ़णी ऊंठा चे माला लारे बणली आली हुती, ते ओ कड़ी उपर चमड़े चा कमरबन्ध ब़ांहली आला हुता। तिङीया ते शहद ओचा भोज़न हुता। 5तब यरुशलेम शहर, ते सारा यहूदिया क्षेत्र चे ते यरदन नदी चे आस-पास चे सब जग़हा चे लौक ओचे गोढु निकलती कर आले, 6वाणे आपणे-आपणे पापा नु मनती कर यरदन नदी मां ओकनु बपतिस्मा गेहला।
7 #
मत्ती 12:34; 23:33 जब ओणे घणे फरीसिया ते सदूकिया नु बपतिस्मे वास्ते आपणे गोढु आते ङेखले, तां वानु किहुं लाग़ला, “हे नाग़ा ची ब़च्ची! तम्हानु केहणे चिताती ङिले कि तम्ही नरीकारा चे क्रोध कनु द्रोड़ा ? 8मन फिराव चे जोगा फल आणा। 9#यूह 8:33ते आपणे-आपणे मना मां ईं ना सोचा, ‘अम्चा ब़ा अब्राहम छै,’ कांकि मैं तम्हानु किहे पला कि नरीकार यां पत्थरा महु अब्राहम वास्ते ऊलाद्ध पैदा कर सग़े। 10#मत्ती 7:19ते हमा कुहाड़ा पेड़ा ची ज़हड़े चे उपर मेहला आला छै। ऐवास्ते जको-जको पेड़ आच्छे फल ना आणी, ओनु बाढती ते जाखते मां झोंकती ङिले जई 11मैं तां तम्हानु मन फिरावणे वास्ते पाणीया लारे बपतिस्मा ङिये, पर ओ जको माये बाद मां आणे आला छै, ओ माये कनु महान छै कि मैं ओचे ब़ूटा नु चवणे चे लायक कोनी, ओ तम्हानु खौद्द पवित्र आत्मा ते जाखते लारे बपतिस्मा ङी। 12ओचे छाज़ ओचे हाथा मां छै, ते ओ आपणा पेएड़ आच्छी रीति लारे साफ करी, ते आपणी कणकी नु तां पिएड़ा मां भेली करी। पर भूंआ नु वे जाखते मां ब़ाली जको ब़िझणे चे कोनी।”
ईशु चा बपतिस्मा
(मरकुस 1:9–11; लूका 3:21,22)
13ओ बेले ईशु गलील प्रदेस कनु टुरती कर यरदन नदी चे किनारे यूहन्ना चे गोढु बपतिस्मा गेहणे वास्ते आला। 14पर यूहन्ना ने ईशु नु रोकणे चा जत्तन करते हुले केहले, “मनु तां खौद्द दुधे कनु बपतिस्मा गेहणे ची जरुरत छै, बल्ति तु माये कनु कां आला?”
15उत्तर मां ईशु ने ओनु केहले, “हमा तां ऐनू ऐह तरीके लारे हुं ङे। अम्ही, जको नरीकार चाहवे ओनु पुरे करने वास्ते ईं ठीक छै।” बल्ति ओणे इसड़े ही हुं ङिले।
16ते ईशु बपतिस्मा गेहती कर तुरन्त पाणीया महु उपर आला, ते ङेखा, ओचे वास्ते आसमान खुलती गेला, ते ओणे नरीकारा ची आत्मा नु कबूतरा चे समान उतरते ते आपणे उपर आते ङेखले। 17#मत्ती 12:18; 17:5; मरकु 1:11; लूक 9:35ओही बेले हा आकाशवाणी हुली, “हा माया प्यारा पूत छै। ऐकनु मैं ब़ोहत खौश छै।”
انتخاب شده:
मत्ती 3: ODR
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
CC BY-NC-ND 4.0
