मत्ती 22
22
बीहा भोज़ ची मिसाल
(लूका 14:15–24)
1ईशु ने बल्ति वानु मिसाला मां केहले, 2“स्वर्ग़ चा राज़, ओ राजे चे समान छै, जेह्णे आपणे पूता चा बीहा करला। 3ते ओणे आपणे दासा नु भेज़ले कि छेड़ा ङिले आले लौका नु बीहा चे खाणे मां हकारा, पर वे आणे ना चाह्ले। 4बल्ति ओणे नेरा दासा नु हा केहती कर भेज़ले, ‘छेड़ा ङिले आले लौका नु हा किहा कि मैं खाणे तियार करती चुकला, माये आच्छे ते पड़ले आले ढौर बाढले गेले, ते सारे कोच्छ तियार छै। बीहा चे खाणे मां आवा।’ 5पर वे उम्मीद करती कर टुरती पले, कुई आपणे खेता नु, कुई आपणे व्यपारा नु। 6नेरे लौका ने जको बचले आले हुते, ओचे दासा नु पकड़ती कर वांची बेकदरी करली ते मारती नाखले। 7तब राजे नु गुस्सा आला, ते ओणे आपणी सैना भेज़ती कर वां हत्यारा चे नाश करले, ते वांचे शहरा नु फूकती नाखले। 8तब ओणे आपणे दासा नु केहले, ‘बीहा चे खाणे तां तियार छै, पर जानु छेड़ा ङिले आले लौक लायक कोनी ठहरले। 9ऐवास्ते चौराहा चे उपर जावा, ते जितने लौक तम्हानु मिलो, सारा नु बीहा चे खाणे मां हकारती आवा।’ 10तां वां दासा ने सड़का उपर जती कर का बुरे, का भले, जितने मिड़ले, सारा नु भेले करले, ते बीहा आले घर मेहमाना लारे भरीती गेले।
11“जिसे बेले राजा मेहमाना नु ङेखणे चे वास्ते भीतर आला, ते ओणे ओठे हेक बन्दे नु ङेखले, जको बीहा ची ओढ़णी कोनी घाली भीलता। 12ओणे ओकनु पूछले, ‘हे मित्र, तु बीहा ची ओढ़णी घाले बगैर इठे किवें आती गेला?’ ओचे मुँह बन्द हुती गेले। 13#मत्ती 8:12; 25:30; लूक 13:28बल्ति राजे ने सेवका नु केहले, ‘ऐचे हाथ पग़्ग़ ब़ांथी कर ऐनू ब़ाहरु अन्धारे मां नाखती ङिया, ओठे रोवणे, ते ङांत पीसणे हुवी।’
14“कांकि हकारले गेले तां ब़ोहत, पर चुणले आले थोड़े छी।”
रोमी राजे चा कर चुकावणे
(मरकुस 12:13–17; लूका 20:20–26)
15बल्ति फरीसिया ने जती कर आपस मां हा विचार करला कि ईशु नु किसे तरीके लारे ऐचीया खौद्द चा केहलीया आलीया बाता मां किवें फसाऊं। 16तां वाणे आपणे चैला नु हेरोदियां चे लारे, ओचे गोढु ईं केहणे वास्ते भेज़ले, “हे गुरु, अम्ही जाणु कि तु सच्चा छी, ते नरीकारा चा मार्ग़ सच्चाई लारे सिखावी, ते काई परवाह ना करी, कांकि तु इन्साना चे मुँह ङेखती कर बाता ना करी। 17ऐवास्ते अम्हानु बावड़ तु का सोची? कैसर नु कर् ङेणा वाजिब छै जा कोनी?”
18ईशु ने वांची दुष्टता जाणती कर केहले, “हे कप्पटी, मनु कां परखा पले? 19कर् चा सिक्का मनु ङिखाणा।” तब वे ओचे गोढु हेक चान्दी चा सिक्का गेहती आले। 20ईशु ने वाकनु पूछले, “हा छाप ते नां काये छै?”
21वाणे ओनु केहले, “कैसर चे।”
तब ओणे वानु केहले, “जको कैसर चे छै, ऊं कैसर नु ङिया। ते जको नरीकारा चे छै, ऊं नरीकारा नु ङिया।”
22ईं सुणती कर वाणे अचम्भा करला, ते ओनु छोड़ती कर चाह्ले गेले।
सदूकिया ची चाल
(मरकुस 12:18–27; लूका 20:27–40)
23 #
प्रेरि 23:8
ओही ङिओ, सदूकी जको हा किही कि मरला आला चे जीते हुवणे छै ही कोनी ओचे गोढु आले, ओकनु पूछु लाग़ले, 24“हे गुरु, मूसा ने केहले हुते कि अगर कुई बिना ऊलाद्धी चे मरती जाये, ते ओचा भऊ ओची घराआली लारे बीहा करती कर आपणे भावां चे वास्ते ऊलाद्ध पैदा करो। 25हमा अम्चे इठे सात भऊ हुते, पेहला भऊ बीहा करवाती मरती गेला, ते ऊलाद्ध ना हुवणे ची वजह आपणी घराआली नु आपणे भावां वास्ते छोड़ली गेला। 26यूं करती ङुजे ते तीजे ने वी करले, ते साता तक ईं ही हुले। 27सारा चे बाद वा असतरी वी मरती गेली। 28वा सारा ची घराआली हुती चुकली हुती, तां जीते हुवणे उपर वा साता महु काई घराआली हुवी?”
29ईशु ने वानु उत्तर ङिला, “तम्ही पवित्रशास्त्र ते नरीकारा ची सामर्थ ना जाणा, ये वजह कनु भूल मां पले। 30कांकि जीते हुवणे उपर वे ना बीहा करवावे ते ना बीहा मां ङिले जाये, पर स्वर्ग़ा मां नरीकारा चे स्वर्ग़दूता चे समान हुवे। 31पर मरले आला चे जीते हुवणे चे बारे मां का तम्ही हा वचन कोनी पढ़ला जको नरीकारा ने तम्हानु केहले, 32‘मैं अब्राहम चा नरीकार, ते इसहाक चा नरीकार, ते याकूब चा नरीकार छै?’ ओ मरले आला चा कोनी, पर जीता चा नरीकार छै।”
33ईं सुणती कर लौक ओचे उपदेश कनु हैरान हुले।
सारा महु बङी आज्ञा
(मरकुस 12:28–34; लूका 10:25–28)
34जिसे बेले फरीसिया ने हा सुणले कि ईशु ने सदूकिया ची ब़ोलती बन्द करती नाखली, तां वे भेले हुले। 35वांचे महु हेक व्यवस्थापक ने ओनु परखणे चे वास्ते ओकनु पूछले, 36“हे गुरु, व्यवस्था मां किसी आज्ञा बङी छै?”
37ईशु ने ओनु केहले, “ ‘तु नरीकार आपणे प्रभु लारे आपणे सारे मन, ते आपणे सारे प्राण, ते आपणी सारी ब़ुध्दि लारे प्रेम राख।’ 38बङी ते खास आज्ञा हाओ ही छै। 39ते विचे ही समान हेक ङुजी वी आज्ञा छै, ‘तु आपणे पड़ोसीया चे लारे आपणे समान प्रेम राख।’ 40#लूक 10:25–28मूसा ची सारी व्यवस्था ते भविष्यवक्ता ची किताब जा ङुंहु आज्ञा उपर ही टिकली आली छै।”
दाऊद चे पूता चे बारे मां सवाल
(मरकुस 12:35–37; लूका 20:41–44)
41जिसे बेले फरीसी भेले हुले भिलते, ते ईशु ने वाकनु पूछले, 42“मसीह चे बारे मां तम्ही का सोचा पले? ओ काया पूत छै?”
वाणे ओनु केहले, “दाऊद चा।”
43ईशु ने वाकनु पूछले, “तां दाऊद आत्मा मां हुती कर ओनु ‘प्रभु’ कां किहे?
44“ ‘प्रभु ने माये प्रभु नु केहले,
“माये सज़्ज़े पासु ब़ेस,
जब तक कि मैं दुधे बैरीया नु दुधे पग़्ग़ा तले ना करती ङिये।” ’
45“भला, जब दाऊद ओनु प्रभु किहे तां ओ ओचा पूत किवें ठहरला?”
46ऐचे उत्तर मां कुई वी हेक बात ना केह सग़ला। ओ ङिओ कनु कानु वी बल्ति ओकनु कोच्छ पूछणे ची हिम्मत कोनी हुली।
انتخاب شده:
मत्ती 22: ODR
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
CC BY-NC-ND 4.0
