मत्ती 17

ईशु चा स्वर्ग़ीय रुप चैला ने ङेखला

(मरकुस 9:2–13; लूका 9:28–36)

1छियां ङिहां चे बाद ईशु ने पतरस ते याकूब ते ओचे भऊ यूहन्‍ना नु लारे गेहले, ते वानु हेकले मां कुई ऊंचे पहाड़ा उपर गेहती गेला। 2ओठे वांचे सामणे ईशु चा रुप बदलती गेला, ते ओचे मुँह सूरजा आलीकर चमकले ते ओची ओढ़णी सोज़ले आलीकर चिट्टी हुती गेली। 3ते ङेखा, वानु मूसा ते एलिय्याह ङिसले वे ईशु लारे बाता करी पलते।

4ऐचे उपर पतरस ने ईशु नु केहले, “हे प्रभु, अम्चे इठे रेहणे आच्छे छै। दुधी इच्छा छै तां अम्ही तीन मण्डप बणाऊ, हेक दुधे वास्ते, हेक मूसा वास्ते, ते हेक एलिय्याह वास्ते।”

5 # मत्ती 3:17; 12:18; मरकु 1:11; लूक 3:22 # 2 पत 1:17,18 ओ ब़ोले ही पलता कि हेक चिट्टे बदला ने वानु घेरती गेले, ते ओ बदला महु हा अवाज आली, “हा माया प्यारा पूत छै, जाये कनु मैं खौश छै। ऐची सुणा!”

6चैले ईं सुणती कर मुँहा चे भराणे ढेती पले ते ब़ोहत ज्यादा ङरती गेले। 7ईशु ने गोढु आती कर वानु हाथ लाला, ते केहले, “ऊठा, ङरा ना।” 8बल्ति वाणे आपणीया आंखीया लारे ङेखले ते ईशु नु छोड़ती नेरे कानु कोनी ङेखले।

9जब वे पहाड़ा कनु उतरी पलते तब ईशु ने वानु हा आज्ञा ङिली कि, “जब तक मैं इन्साना चा पूत मरला आला महु जीता ना हुती जाये, तब तक जको कोच्छ तम्ही ङेखले कानु ना केहजा।”

10ऐचे उपर ओचे चैला ने ओकनु पूछले, “बल्ति शास्त्री कां किही कि एलिय्याह चे पेहले आणे जरुरी छै?”

11ओणे उत्तर ङिला, “एलिय्याह जरुर आवी, ते सब कोच्छ सुधारी। 12#मत्ती 11:14पर मैं तम्हानु किहे पला कि एलिय्याह आती चुकला, ते लौका ने ओनु कोनी पिछाणले, पर जिसड़े चाह्‍ले उसड़े ही ओचे लारे करले, ये रीति लारे मैं इन्साना चा पूत वी वांचे हाथा कनु ङोख चवी।”

13जब चैला ने समझले कि ओणे अम्हानु यूहन्‍ना बपतिस्मा ङेणे आले चे बारे मां केहले।

मिर्गी मां जकड़ले आले ब़ाला नु ठीक करने

(मरकुस 9:14–29; लूका 9:37–43a)

14जिसे बेले ओ बङी भीड़ चे गोढु पुज़ला, तां हेक बन्दे ओचे गोढु आले, ते गोङे टेकती कर किहुं लाग़ले, 15“हे प्रभु, माये पूता उपर दया कर! कांकि ओनु मिर्गी आवे, ते ऊं ब़ोहत ङोख चवे, ते बार-बार जाखते मां ते बार-बार पाणीया मां ढेती पडे़। 16मैं दुधे चैला चे गोढु ओनु आणले हुते, पर वे ठीक कोनी कर सग़ले।”

17ईशु ने उत्तर ङिला, “हे अविश्‍वासी ते हठीले लौक, मैं कब तक तम्चे लारे रिही? कब तक तम्ची सेहता रिही? ओनु माये गोढु गेहती आवा।” 18बल्ति ईशु ने दुष्टात्मा नु दड़काले, ते वां ओचे महु निकलती गेली, ते छोर ओही बेले ठीक हुती गेले।

19तब चैला ने हेकले मां ईशु चे गोढु आती कर केहले, “अम्ही विनु कां कोनी काढ़ सग़ले?”

20 # मत्ती 21:21; मरकु 11:23; 1 कुरि 13:2 ओणे वानु केहले, “आपणे विश्‍वास ची कमी ची वजह, कांकि मैं तम्हानु सच्‍च किहे पला, अगर तम्हानु राई चे ङाणे चे बराबर वी विश्‍वास हो, तां ऐ पहाड़ा नु केह सग़ा, ‘इठु सरकती कर ओठे चाह्‍ला जा’ तां ओ चाह्‍ला जई, नेरी कुई बात तम्चे वास्ते असम्भव नी हुवी।

21“पर हा जाति बिना प्राथना ते उपवास चे ना निकली।”

ईशु आपणी मौत चे बारे मां बावड़े

(मरकुस 9:30–32; लूका 9:43b–45)

22जिसे बेले वे गलील मां हुते, तां ईशु ने वानु केहले, “मैं इन्साना चा पूत, बन्दा चे हाथा मां पकड़वाला जई। 23वे ओनु मारती नाखे, ते ओ तीजे ङिओ जीता हुती जई।”

ऐचे उपर वे ब़ोहत उदास हुले।

मन्दरा चा कर्

24जिसे बेले वे कफरनहूम मां पुज़ले, तां मन्दरा चा कर् गेहणे आला ने पतरस चे गोढु आती कर पूछले, “का तम्चा गुरु मन्दरा चा कर् ना ङी?”

25पतरस ने केहले, “हव्वे, ङिये वे।”

जिसे बेले ओ घरे आला, तां ईशु ने ओचे पूछणे कनु पेहले ही ओनु केहले, “हे शमौन, तु का सोची पला? धरती चे राजा जा चुंगी जा कर् काये कनु गिही, आपणे पूता कनु जा पराया कनु।”

26पतरस ने ओनु केहले, “पराया कनु।”

ईशु ने ओनु केहले, “तां पूत बचती गेले। 27तांवी ऐवास्ते कि अम्ही वानु ठोकर खुलाऊं तु झील चे किनारे जती कर कांटा नाख ते जको माछली पेहले निकले, विनु चा, विचे मुँह खोलणे उपर तनु हेक सिक्‍का मिली, ओनु चती कर माये ते आपणे बदले वानु ङिती ङियो।”

انتخاب شده:

मत्ती 17: ODR

های‌لایت

به اشتراک گذاشتن

کپی