लूका 2

ईशु चा जनम

(मत्ती 1:18–25)

1वा ङिहां मां औगुस्तुस कैसर रोम चा राजे चे तरफु आज्ञा निकड़ली कि सारे रोम राज़ चे सारे देशा चे लौका चे नां लिखले जाओ। 2हा ओह बेले पेहली नां लिखाई हुली, जिसे बेले किवरिनियुस सीरिया चे देशा चा राज्यपाल हुता। 3ते सारे लौक नां लिखवाणे वास्ते आपणे-आपणे शहरा मां गेले।

4तां यूसुफ वी ऐवास्ते कि ओ दाऊद चे घराणे ते वंश चा हुता, गलील चे नासरत शहर महु यहूदिया मां दाऊद चे शहर बैतलहम नु गेला, 5कि आपणी मंगेतर मरियम लारे जको गर्भवती हुती नां लिखवाओ। 6उठे रेहते बेले मरियम नु ब़ाल जमावणे चा समय पूरा हुला। 7ते विचा आपणा पलेठी चा पूत जमला, ते ओनु ओढ़णे मां बलेठती कर बन्दरी मां नाखले, कांकि वांचे वास्ते सराय मां जग़हा कोनी हुती।

आजड़ी ते स्वर्ग़दूत

8ओ देश मां कितने आजड़ी हुते मैदाना मां रेहती, राती नु आपणे भेङा चे अज्जड़ा चा पाहरा ङिते। 9ते प्रभु चा हेक दूत वांचे गोढु आला ते प्रभु चा तेज वांचे चारो-तरफ चमकला वे घणे ङरती गेले। 10बल्ति स्वर्ग़दूता ने वानु केहले “ना ङरा, कांकि ङेखा, आनन्द चा सुसमाचार सुणावे जको सारे लौका वास्ते हुवी। 11कांकि आज़ दाऊद चे शहरा मां तम्चे वास्ते हेक मुक्‍तिदाता जमला, हाओ ही मसीह प्रभु छै। 12ते ऐची तम्चे वास्ते हा निशानी छै, कि हेक ब़ाल ओढ़णा मां लिपटले आले बन्दरी मां पले आले ङिसी।”

13बल्ति हेको हेक ओ स्वर्ग़दूता चे लारे स्वर्ग़दूता चा दल नरीकारा ची स्तुति करते हुले ते ईं केहते ङिसले,

14“स्वर्ग़ मां नरीकारा ची महिमा ते धरती उपर वा बन्दा मां जाये कनु ओ खौश छै, शान्ति हो।”

15जब स्वर्ग़ा मां स्वर्ग़दूत चाह्‍ले गेले तां आजड़ीया ने आपस मां केहले “आवा अम्ही बैतलहम मां जती कर हा बात जको हुली ते जको प्रभु ने अम्हानु बावङले, ङेखु।”

16ते वाणे तुरन्त जती कर मरियम ते यूसुफ नु, ते ऊं ब़ाल बन्दरी मां पले ङेखले। 17याहनु ङेखती कर वाणे वा बात जको स्वर्ग़दूता नु ऐ ब़ाल चे बारे मां केहले गेलती ली उजागर करली। 18सारे सुणने आला ने वा बाता चा जको आजड़ीया ने वानु केहले अचम्भा करला। 19पर मरियम ये सारीया बाता नु आपणे मना मां राखती कर सोचती रेहली। 20ते आजड़ी जिंवे वानु केहले गेलते, उसड़े ही सब कोच्छ सुणती कर ते ङेखती कर नरीकारा ची महिमा ते स्तुति करते हुले पुठे चाह्‍ले गेले।

ईशु चे नां राखले जाणे

21 # लूक 1:31 जिसे बेले आठ ङिहें पुरी हुली, ते ओचे खतने चा समय आला, तां ओचे नां ईशु राखले गेले, जको स्वर्ग़दूता ने विचे ढिड्डा मां आणे कनु उपर पेहले केहले हुते।

ब़ाला चे मन्दरा मां गेहती जाणे

22ते जब मूसा ची व्यवस्था चे अनुसार वांचे शोद्ध हुवणे ची ङिहें पुरी हुली, तां वे ओनु यरुशलेम मां गेहती गेली, के प्रभु चे सामणे आणो। 23जिंवे कि नरीकारा ची व्यवस्था मां लिखले पले, “कि हर हेक पलेठी चा पूत प्रभु चे वास्ते पवित्र ठहरी। ” 24नरीकारा ची व्यवस्था चे वचन चे अनुसार गैरा चा हेक जोड़ा जा कबूतर ची ङोन ब़च्‍ची आणती कर बलिदान करो।

25ते ङेखा, यरुशलेम मां शमौन नांवा चे हेक बन्दे हुते ते ऊं बन्दे धर्मी ते भग़त हुते, ते इस्राएल ची शान्ति ची बाट ङेखे पलते, ते पवित्र आत्मा ओचे उपर हुता। 26ते पवित्र आत्मा लारे ओनु चिताले गेलते ले कि, “जब तक तु प्रभु चे मसीह नु ङेखती ना गिही, तब तक मौत नी ङेखे।” 27ओ आत्मा चे सिखावणे लारे मन्दरा मां आला, ते जिसे बेले ईशु चे आई-ब़ा ने ओनु भीतर आणले, ताकि ओचे लारे व्यवस्था ची रीति चे अनुसार करु। 28तां शमौन ने ओनु आपणी गोङी मां गेहले ते नरीकारा चा धन्यवाद करती कर केहले,

29“हे स्वामी, हमा तु आपणे दासा नु

आपणे वचना चे अनुसार शान्ति लारे मरु ङे।

30कांकि माया आंखीया ने दुधे उद्धार नु ङेखती गेले।

31जानु तें सारे देशा चे लौका चे सामणे तियार करले।

32कि ओ नेरीया जातिया नु सोज़ले ङेणे वास्ते ज्योति

ते दुधे खौद्द ची प्रजा इस्राएल चे वास्ते महिमा हो।”

33ओचा ब़ा ते ओची आई यां बाता कनु जको ओचे बारे मां केहलीया जतीया, सुणती कर हैरान हुती 34बल्ति शमौन ने ओनु आशीष ङिती कर, ओची आई मरियम नु केहले, “ङेख, ओ तां इस्राएल मां ब़ोहता चे ढेणे ते खड़े हुवणे वास्ते, हेक इसड़ा चैन्ह हुवणे वास्ते ठहराला गेला, जाये विरोध मां बाता करलीया जाये। 35बल्कि दुधे प्राण वी तलवारी लारे वार पार छिदती जाये, ऐचे लारे ब़ोहत दिला चे विचार प्रकट हुवे। ”

36ते अशेर चे गोत्र महु हन्‍नाह नांवा ची फनुएल ची धूउ भविष्यवक्‍तनी हुती, वा घणी ब़ुढी हुती, ते बीहा हुवणे चे बाद सात साल ही आपणे मुणसा लारे रेहली। 37पर हमा वा बांढी चोरासी साला ची हुती, ते मन्दरा नु ना छोड़ती, पर उपवास ते प्राथना करती करती कर रात-ङिओ उपासना करती रेहती। 38ते वा ओही बेले आती कर प्रभु चा धन्यवाद करु लाग़ली, ते वा सारा लारे, जको यरुशलेम चे छुटकारे ची इन्तजार ङेखी पलते, ओह ब़ाला चे बारे मां किहुं लाग़ली।

नासरत शहरा नु वापिस चाह्‍ली गेली

39 # मत्ती 2:23 ते जिसे बेले वे प्रभु ची व्यवस्था चे अनुसार सब कोच्छ पूरा करती चुकली, तां गलील चे नासरत शहरा नु वापिस चाह्‍ली गेली 40ते ऊं ब़ाल बधते ते ताकतवार हुते, ते ब़ुध्दि लारे परिपूर्ण हुते गेले, ते नरीकारा चा अनुग्रह ओचे उपर हुता।

ब़ाल ईशु मन्दरा मां

41ओचे आई ते ब़ा हर साल फसह चे तेंहवार मां यरुशलेम जती। 42ईशु ब़ारहा साला चा हुवणे चे बाद, तेंहवार ची रीति चे अनुसार वे ओनु यरुशलेम मां गेहती गेली। 43ते जिसे बेले वां ङिहां नु पुरे करती कर वे वापिस आऊं लाग़ली, ईशु यरुशलेम मां रेहती गेला, ते ईं ओचे आई ते ब़ा नु कोनी पता हुता। 44वाणे ईं सोचले कि यात्रीया लारे हुवी, हेक ङिओ निकलणे चे बाद, ओणे आपणे आस-पास परिवारा मां ते जाण पिछाण जग़हा मां पूछले। 45जिसे बेले कोनी मिड़ले, तां वे यरुशलेम नु वापिस चाह्‍ले आली। 46तीन ङिहां चे बाद वे ओनु मन्दरा मां उपदेशका चे आधे मां ब़ेहले, ते वांची सुणते ते सवाल पूछते ङेखले। 47ते जितने ओची सुणी पलते वे सारे ओची समझ कनु ते ओचे उत्तर कनु अचम्भित हुते। 48ते बल्ति ओनु ङेखती कर अचम्भा करला ओची आई ने केहले, “हे पूत तु अम्चे लारे इसड़ा बर्ताव का करी? ते दुधा ब़ा दुधे कनु गुस्सा छै।”

49ओणे वानु केहले “तम्ही मनु कां सोती फिरा? का तम्ही ना जाणा कि मनु आपणे ब़ा चे मन्दरा मां रेहणे जरुरी छै?” 50पर जको बात ओणे केहली वाणे कोनी समझली।

51बल्ति ईशु वांचे लारे नासरत मां आला ते परिवारा मां रेहला, ते वांचे वशा मां रेहला ते ओची आई ने ये बाता मना मां राखलीया। 52ते ईशु ब़ुध्दि ते नैण नक्शे मां ते नरीकारा ते बन्दा चे अनुग्रह लारे बधते गेले।

انتخاب شده:

लूका 2: ODR

های‌لایت

به اشتراک گذاشتن

کپی