Mateghusi 4
4
Mayerekero ghomumamboreya
(Mark 1:12–13; Luk 4:1–13)
1Ko kumuyenditha Jesusi Mupepo mumamboreya gha ka mu yereke Shatani. 2Mbadi gha dire mayuwa makumi mane nomithiku makumi mane. Munyima gha fire ndhara. 3Mukakumuyereka gheyire kukwendi no gha mu tongwerire eshi: “Ngeshi ngo ghoMwana Nyambi, ninge mawe gha gha thitunuke ghuroto.” 4Ene Ye gha mu huthire eshi: “Ya pwa kutjanga eshi:
‘Munu kadi wa kupara ghuroto keho,
ene pakehe n̂ando
edhi dhina kushwagha mukanwa kaNyambi.’ ”
5Popo ko kumutwara Shatani karo kumbara dhokupongoka no gha mwimekire kushungu‐shungu dhotembeli, 6no gha mu tongwerire eshi: “Ngeshi ngo ghoMwana Nyambi, reghe mwishi! Ya pwa kutjanga eshi:
‘Mbo ghana kurawera haengeli wendi,
awo mbana kushimbera panyara dhawo,
eshi di dhire kupunduka dipadhi dyoye kudiwe.’ ”
7Jesusi gha mu tongwerire eshi: “Ya pwa kutjanga eshi: ‘Wa yereka Fumu Nyambi ghoye.’ ”
8Munyima Shatani ha mu twara karo kudirundu dishare, ko ka mu neghedha ghutungi ghokaye noghuwa wako ghoghuhe, 9no gha ningire kukwendi eshi: “Yoyiheya yi na kuyikupa ngeshi ghutongamene kukwange no kunikanderera.”
10Ene Jesusi gha mu tongwerire eshi: “Finyaghuke Shatani, yoyi ya pwa kutjanga eshi:
‘Fumu Nyambi ghoye yo sho kanderere,
no ghu mu karere pithendi.’ ”
11Ndani ghana kumuthigha Shatani. Munyima heyire haengeli ha mu kunge.
Yirughana yokutanga yaJesusi
(Mark 1:14–15; Luk 4:14–15)
12Apa gha yuvire Jesusi eshi, Johannesi ne ghana mu paka Herodesi mutorongo, ko kuyenda kwendi kuGalileya. 13Ene mbadi gha karire nako tango muNasareti. Gha ka kuhorekire muKafarnaghumu kudikuruviya, muthiko thaSebuloni naNaftali. 14Kemo sho yi rikanye eyi gha ghambire muporofeta Jesaya eshi:
15“Owe ditunga Sebuloni, nowe ditunga Naftali,
kudikuruviya nothambodiya dhaJordani,
Galileya omu ha tunga hahayidena!
16Diko edi dya tunga mumakokore,
dina mono thishe thishokuru
awo ha para mumumvure ghokufa,
thina wa yandhurukera thishe.”
17Kutunda po ko kutanga Jesusi kuyaghura no gha ningire eshi: “Mu piruke, yoyishi ghufumu ghodiwiru ne pepi ghu di.”
Methero ghawakathishongero hokutanga
(Mark 1:16–20; Luk 5:1–11)
18Diyuwa dimweya, apa gha yendaghurire Jesusi kumbadi dhodikuruviya dyaGalileya, ha mono kwendi hanu naminendi: Simoni, oyu ha tire karo Petrusi, naminendi Andreyasi. Awo ku hana kuvukumena dikwe mudikuruviya, yoyi ha karire harutegha thi. 19Ha ningi kukwawo eshi: “Mwiye kuno! Na mu tu yende pofotji, no mbo na mu tendi mwarutegha hanu.”
20Nawo ko kuthigha wangu makwe no ha mu kuthire.
21Munyima apa gha yendire shime kughutho, ko kumona kwendi karo hanu naminendi hamweya. Jakobusi ghomwana Sebedeghusi naminendi Johannesi. Awo ha karire muwato nawihawo, oku hana kuroghitha makwe ghawo. Jesusi gha wethire, 22nawo ha thighire wato nawihawo wangu no ha mu kuthire.
Yitenda yoyiwa yaJesusi kwawengi
(Luk 6:17–19)
23Ko kuyendaghura kwendi muGalileya yomuhe, no gha hongire hanu mumasinagoge ghawo, no gha wa yuvithire mbudhi dhoghufumu no gherukithire kehe thikorwa noyinyanda yoyihe yodiko. 24Nombudhi dhokukwendi dha pupanine muSiriye yomuhe. Hanu ha mu reterire wa ha korwire kehe thikorwa nomipya dhodhihe, nawa ha karire mumandengure ghongcamu dhawashatani nomipepo dhodhimango, nawayirema. Waheya wa gha manine kuwerukitha. 25Mbunga dhodhikuru dha mu kuthire, kutunda kuGalileya nomambara dikumi, no kuJerusalema naJudeya no kuthambodiya dhaJordani.
اکنون انتخاب شده:
Mateghusi 4: MHW1986
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Mbunga dhoBayibili dhaNamibia (Bible Society of Namibia) 1986
