LUKAS 6
6
Tenanya tentang Arik Sabat
(Mat 12:1-8; Mrk 2:23-28)
1Ku nanek arik Sabat mase Yesus tengah Kilintas selai gandom, Ipengikot-pengikot naileh mat gandom, naigersej mat gandom ajeh ku teg liknai, lalu naicak. 2Memerip urag mai Farisi naiurok, “Yama engkebeh pekare de biget ku arik Sabat?”
3Yesus Kiberlag, “Pek pernah engkebacaka ma de bibeh ya Raja Daud mase kek ru ianak buah naicuag? 4Kek kimuj nu Kemah Jenang lalu kikot ruti de bipesembah nu Jenang, lalu kicak. Kek juga kiog ruti ajeh nu ianak buah. Amen hijoi ha Hukom Taurat, ruti ajeh had buleh bicak ya imam agame Yahudi taleh.”#Im 24:9; 1 Sam 21:1-6
5Telas ajeh Yesus Kiurok nu enai, “Eng Kenon Manusia adehloh Tuhan de bekuasa Ngha-petentu ma de buleh bibeh ya manusia ku arik Sabat.”
Yesus Kiperbor Numom de Lumpoh ku Arik Sabat
(Mat 12:9-14; Mrk 3:1-6)
6Ku arik Sabat de kilek, Yesus Kimuj nu deg sembahyang ru Kibeajar. Ku pajeh mong numom de iteg kentop lumpoh. 7Ku pajeh juga mong memerip urag guru Hukom Taurat ru mai Farisi de mimang naiha-kek ha senalah Yesus supaye dapat naitudoh Kek. Kerana ajeh, naiperatik Kek Kiperborka tok mai nyik ku arik Sabat. 8Tapi Yesus Kipanei ma de tengah naiserngik. Jadi, Yesus Kiurok nu sengoi de iteg lumpoh ajeh, “Kosloh ru jinjeg ku ngar mai jengoi.” Sengoi ajeh kikos ru kijinjeg ku pajeh. 9Lalu Yesus Kiurok nu enai, “Eng Ngha-tanya nu liengkek. Amen hijoi ha Hukom Taurat, ilei belokka de buleh hibeh ku arik Sabat? Hiha-beh bor atao hiha-beh nej? Hiha-peselamat mai atao hiha-pecelaka mai?” 10Yesus Kineng nu dikdij mai de mong ku pajeh, lalu Kiurok nu sengoi de iteg lumpoh ajeh, “Ulurloh teg hek.” Lalu kibeh begei ajeh ru iteg ajeh pen bor!
11Tapi mai Farisi ru guru-guru Hukom Taurat ihad naibelal ru mula naibebincang ratak liknai ma de patot naiha-beh nu Yesus.
Yesus Kipileh 12 Urag Ipengikot
(Mat 10:1-4; Mrk 3:13-19)
12Telas ajeh, ku arik de kilek, Yesus Kiet nu nanek lod Kaha-bedoa. Ku pajeh Kek Kibedoa nu Jenang sepanjang kelem ajeh. 13Bile iarik ya yah, Kek Kicereg Ipengikot-pengikot lalu Kipileh 12 urag antare enai ajeh ru Kisebot enai rasul.#6:13 Rasul: Perkataan adeh kirujok nu sengoi-sengoi de bilantek ha tugas has pelayanan. Icuntohjeh: Paulus, Barnabas, 12 urag pengikot Yesus, ru mai kilek juga. 14Adehloh 12 urag de bipileh ya Yesus: Simon (de Kisebot juga Petrus) ru imenang Andreas, Yakobus, Yohanes, Filipus, Bartolomeus, 15Matius, Tomas, Yakobus kenon Alfeus, ru Simon (de bigelar juga Patriot de pernah kijoi mai Israel kilek naiha-lawan penjajah Rom), 16Yudas kenon Yakobus, ru Yudas Iskariot de doh kikianat Yesus.
Yesus Kibeajar ru Kiperbor Sengoi
(Mat 4:23-25)
17Lalu Yesus Kiceleh ju lod ajeh besama ru Ipengikot-pengikot ajeh ru Kijinjeg ku tempat de rata. Ku pajeh mong jeoi Ipengikot-pengikot, ru mong juga ihad jeoi mai kilek de ju dikdij lengrik Yudea, ju kote Yerusalem, ru juga ju kawasan beg laot de rek beg kote Tirus ru kote Sidon. 18Enai naihol naiha-cerngai neajar Yesus ru juga naihod nyaknik enai biperbor. Mai de bisangrog ya nyanik pen biperbor. 19Dikdij mai naikerekwat naiha-pep Yesus kerana mong kuasa de hol ju Kek ru kiperbor dikdij mai.
Keremmik ru Celaka
(Mat 5:1-12)
20Yesus Kineng nu dikdij Ipengikot-pengikot lalu Kiurok,
“Jenang Kiberkat engkek de sedar engkeperlu ha Kek.
Engkekloh sengoi-sengoi de biperintah ya Jenang sebegei Raja!
21Jenang Kiberkat engkek de cuag hunen.
Engkek doh biperhonj!
Jenang Kiberkat engkek de jinjap hunen.
Engkek doh engkeleklog!
22Bile engkek bigetek, binyek, bihina, ru muh engkek bipitnah kerana engkejadi pengikot Eng Kenon Manusia, Jenang doh Kiberkat engkek. 23Begei ajehloh juga jenang rak enai naibeh nu nabi-nabi. Besukaloh bile hal ajeh belaku, ru kerakmikloh ihad isenuka, kerana benalas de entoi ku serga ya bisedia ha engkek.#2 Taw 36:16
24Tapi celakaloh engkek de kaya
kerana ya engkerasa sinui de bor ku dunia adeh!
25Celakaloh engkek de bakhek hunen
kerana doh engkecuag!
Celakaloh engkek de leklog hunen
kerana doh engkesedeh ru engkejinjap!
26Celakaloh engkek amen dikdij sengoi naipateh ha engkek. Kerana, begei ajeh juga jenang rak enai naipateh ha nabi-nabi palsu.”
Hok ha Musoh
(Mat 5:38-48; 7:12)
27“Tapi Ngbesat begei adeh nu engkek de ceringai ha engrok Eng: Hokloh musoh engkek ru behloh bor nu sengoi de naigetek ha engkek. 28Hodloh engkeberkat sengoi de naisumpah ha engkek. Bedoaloh ha mai de naibeh jehat nu engkek. 29Amen numom kitampar ming engkek, ogloh kitampar ming englag nij juga. Amen numom kirampas jubah engkek, ogloh juga baju engkek. 30Amen bok taleh de kisemanj ma-ma ju engkek, ogloh ma de kisemanj ajeh. Amen hak engkek bikot, wes agok semanj balek hak engkek ajeh. 31Begeiharok de engkehod mai naibeh nu engkek, begei ajeh juga de hod engkebeh nu enai.#Mat 7:12
32Amen engkehok had mai de naihok ha engkek, Jenang doh pek Kipateh ha engkek. Sengoi bedosa pen naihok mai de naihok ha enai. 33Amen engkek beh bor nu mai de naibeh bor nu engkek, Jenang doh pek Kipateh ha engkek. Sengoi bedosa pen naibeh begei ajeh. 34Amen engkeog pinyap ma-ma nu mai kilek de dapat naiperjog nij, Jenang doh pek Kipateh ha engkek. Sengoi bedosa pen naiog pinyap nu mai bedosa de kilek de dapat naiperjog nij. 35Tapi hokloh musoh engkek, behloh bor nu enai, ogloh pinyap ru agok harap naiperjog balek. Amen engkebeh begei ajeh, engkek doh engkekep benalas de entoi ju Jenang, ru doh engkejadi kekenon Jenang de Paleng Tinggi Ikedudukan kerana Jenang pen bor nu sengoi jehat ru nu sengoi de pek kipanei beterima kaseh. 36Hodloh sengik engkek nekbeyayak begei ha Menek engkek de nekbeyayak juga.”
Agok Hakem ha Mai Kilek
(Mat 7:1-5)
37“Amen pek engkeneng nej ha mai kilek, doh Jenang pen pek Kineng nej ha engkek juga. Amen pek engkehukom ha mai kilek, doh engkek pek bihukom juga. Amen engkeampon mai kilek, doh engkek biampon juga. 38Amen engkeog nu mai kilek, Jenang doh Kiog nu engkek berkat de jeoi ru tebeg lei melimpah-limpah. Care de engkeguna nu mai kilek doh biguna balek ya Jenang nu liengkek juga.”
39Telas ajeh Yesus Kicerite perumpamaan adeh nu enai: “Amen mai buta kibetek ha mai buta kilek, ubai rimnar doh baijer nu kateh lubang.#Mat 15:14 40Pek mong numom mureb pen lebeh entoi daripade iguru tapi bok taleh de tamat ipelajaran doh kijadi begei ha iguru.#Mat 10:24-25; Yoh 13:16; 15:20
41Engkeperatik gengsej ku kateh mat mai kilek, tapi pek engkebakek dendog ku kateh mat liengkek sendiri! 42Engkek pek buleh engkeurok nu mai, ‘Bei madeh ngperhol gengsej ju mat hek,’ padehal pek engkebakek dendog ku kateh mat liengkek sendiri. Engkek mai de bepure-pure! Perholloh canuk dendog ju mat liengkek. Telas ajeh doh baruloh dapat engkenengneng lebeh bik engkeha-perhol gengsej ju mat mai kilek.”
Keneng Jehuk ru Ipelek
(Mat 7:16-20; 12:33-35)
43“Keneng jehuk de bor pek kiperhol pelek de niknej. Begei ajeh juga keneng jehuk de niknej pek kiperhol pelek de bor. 44Tiap keneng jehuk bipanei ju ipelek. Hek pek haleh pelek are ju cengcog bejerlak, atao pelek anggor ju semak.#Mat 12:33 45Sengoi de bor kiperhol hal-hal de bor kerana isengik tebeg ya bernor. Tapi sengoi de jehat kiperhol hal-hal de niknej kerana isengik tebeg ya jenghat. Kerana, ma de bibual ya empag kihol ju kateh isengik.”#Mat 12:34
Nar Urag Bahbeh Deg
(Mat 7:24-27)
46“Yama engkek cereg ha Eng, ‘Guru, Guru,’ tapi pek engkebeh ma de Ngurok? 47-48Tiap sengoi de kihol nu Eng ru kicerngai ru kibeh engrok Eng, kek begei sengoi de kibeh ideg begei adeh: Kicop lubang ihad jerek ru kibeh iasas deg ku kemil batu. Mase beag kihol nu deg ajeh, deg ajeh pek yahyoh kerana deg ajeh bibeh ihad icenggeh. 49Tapi sengoi de kicerngai ru pek kibeh engrok Eng ajeh, kek begei sengoi de kibeh ideg ku kemil tik de walah iasas. Mase beag kihol, deg ajeh dij kitateh!”
انتخاب شده:
LUKAS 6: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
