LUKAS 3
3
Penasal Yohanes Pembaptis
(Mat 3:1-12; Mrk 1:1-8; Yoh 1:19-28)
1Ku tahut ke-15 raja kerajaan Rom de imuh Tiberius kimemerintah, Pontius Pilatus kimemerintah sebegei penguasa lengrik Yudea, Raja Herodes Antipas kimemerintah ku lengrik Galilea, Filipus tenek Raja Herodes Antipas kimemerintah lengrik Iturea ru Trakhonitis, ru Lisanias kimemerintah ku lengrik Abilene. 2Ku mase ajeh, Hanas ru Kayafas ajeh Imam Agong agame Yahudi. Ku mase ajehloh engrok Jenang lei nu Yohanes Pembaptis kenon Zakharia ku padag guron. 3Lalu Yohanes Pembaptis pen kiet nu belok-belok taleh ku dikdij kawasan Batag arik Jordan ru kibeajar mai. Kiurok, “Betobatloh ju dosa engkek ru hodloh engkek bibaptis supaye Jenang Kiampon dosa engkek.” 4Begei de bicot ku kateh kitab Nabi Yesaya,
“Mong numom kiurok ya suara de kuat ku padag guron,
‘Sedialoh nong ha TUHAN.
Pelurosloh nong ha Kek!
5Jap-jap wog lod hodloh bikop
ru jap-jap lod entoi ru lod macot biperata.
Nong de berkuna-kuna hodloh bitergak
ru nong de celeh-huj biperata.
6Dikdij mai ku dunia doh naineng
Jenang Kipeselamat ha manusia.’ ”#Yes 40:3-5
7Yohanes Pembaptis kiurok nu mai jengoi de naihod bibaptis ya kek, “Engkek cecenok selik! Agok sangka engkek dapat engketelas ju nehukom Jenang.#Mat 12:34; 23:33 8Behloh hal-hal de kiperneng engkebetobat ju dosa! Wesloh agok bual ku sengik engkek, ‘Abraham ajeh jenang rak jik.’ Cerngailoh abor, Jenang dapat Kibeh batu-batu adeh naijadi kenon-cenok ha Abraham!#Yoh 8:33 9Nengloh, kapak ya bisedia biha-gik jehuk lei nu ireis. Tiap-tiap jehuk de pek kiperhol pelek de bor doh bigik ru bipej nu kateh os.”#Mat 7:19
10Mai jengoi naitanya nu Yohanes Pembaptis, “Maka de patot jibeh?”
11Kiberlag nu enai, “Sengoi de mong nar henglei baju, hodloh kiog nuhenglei nu numom de walah ibaju, ru sengoi de mong icaknak hodloh kibemagek.”
12Memerip urag pengutep cukei pen naihol ru naisemanj enai bibaptis. Naitanya nu kek, “Guru, maka de patot jibeh?” 13Kek kiberlag, “Wes agok semanj cukei lebeh daripade ma de ya bitetap.”
14Aska-aska juga naibetanya nu kek, “Maka de patot jibeh?” Kiberlag, “Agokloh kot duet mai engkeguna kekerasan atao tenudoh palsu. Hodloh engkerasa honj ru gaji de engkekep!”
15Dikdij mai mimang ya liu naipoj ru naibeharap ha helnol Peselamat de bijanji ya Jenang, jadi naitetanya-tanya ku kateh sengik enai, entah Yohanes adehloh Peselamat ajeh. 16Yohanes Pembaptis kiurok nu enai, “Eng ngbaptis engkek ya teu tapi doh hol Numom de lebeh bekuasa daripade eng. Eng ngha-teg Icog kasot pen eng pek layak. Kek doh Kibaptis engkek ya Kelog Santen ru os. 17Ku Iteg mong jempir Kaha-gep dikdij gandom lei berseh. Kek doh Kikumpol gandom de ya berseh nu kateh gudang tapi Kitod isekap ya os de pek dapat biperlet.”
18Begei ajehloh Yohanes Pembaptis kiguna jeoi amaran kaha-nasihat ha mai jengoi mase kiperlei Gah Bor nu enai. 19Yohanes Pembaptis juga kitegor ha Raja Herodes Antipas kerana kijeg Herodias kenah imenang, juga ha kerana ijenghat-jenghat kilek de kibeh. 20Tapi Raja Herodes Antipas kitambah nij ijenghat. Ijenghat ajeh Kek kipermuj Yohanes Pembaptis nu kateh jel.
Yesus Bibaptis
(Mat 3:13-17; Mrk 1:9-11)
21Bile dikdij sengoi bibaptis, Yesus pen bibaptis juga. Mase Kibedoa, langit kitebuka 22ru Kelog Santen Kiceleh begei bentok cep merpati nu kemil Kek. Lalu, mong suara ju serga de kiurok, “Hekloh Kenon Eng de Nghok. Hekloh de Hapesenang sengik Eng.”#Mzm 2:7; Yes 42:1; Mat 3:17; Mrk 1:11; Luk 9:35
Senarei Muh Jenang Rak Yesus
(Mat 1:1-17)
23Yesus Kimula Ipelayanan mase Iumur lebeh kurang 30 tahut. Mai jengoi naikenal Yesus sebegei kenon Yusuf. Yusuf ajeh kenon Eli, 24Eli ajeh kenon Matat, Matat ajeh kenon Lewi, Lewi ajeh kenon Malkhi, Malkhi ajeh kenon Yanai, Yanai ajeh kenon Yusuf, 25Yusuf ajeh kenon Matica, Matica ajeh kenon Amos, Amos ajeh kenon Nahum, Nahum ajeh kenon Hesli, Hesli ajeh kenon Nagai, 26Nagai ajeh kenon Maat, Maat ajeh kenon Matica, Matica ajeh kenon Simei, Simei ajeh kenon Yosekh, Yosekh ajeh kenon Yoda, 27Yoda ajeh kenon Yohanan, Yohanan ajeh kenon Resa, Resa ajeh kenon Zerubabel, Zerubabel ajeh kenon Sealtiel, Sealtiel ajeh kenon Neri, 28Neri ajeh kenon Malkhi, Malkhi ajeh kenon Adi, Adi ajeh kenon Kosam, Kosam ajeh kenon Elmadam, Elmadam ajeh kenon Er, 29Er ajeh kenon Yosua, Yosua ajeh kenon Eliezer, Eliezer ajeh kenon Yorim, Yorim ajeh kenon Matat, Matat ajeh kenon Lewi, 30Lewi ajeh kenon Simeon, Simeon ajeh kenon Yehuda, Yehuda ajeh kenon Yusuf, Yusuf ajeh kenon Yonam, Yonam ajeh kenon Eliakim, 31Eliakim ajeh kenon Melea, Melea ajeh kenon Mina, Mina ajeh kenon Matata, Matata ajeh kenon Natan, Natan ajeh kenon Raja Daud, 32Raja Daud ajeh kenon Isai, Isai ajeh kenon Obed, Obed ajeh kenon Boas, Boas ajeh kenon Salmon, Salmon ajeh kenon Nahason, 33Nahason ajeh kenon Aminadab, Aminadab ajeh kenon Admin, Admin ajeh kenon Arni, Arni ajeh kenon Hezron, Hezron ajeh kenon Peres, Peres ajeh kenon Yehuda, 34Yehuda ajeh kenon Yakub, Yakub ajeh kenon Ishak, Ishak ajeh kenon Abraham, Abraham ajeh kenon Terah, Terah ajeh kenon Nahor, 35Nahor ajeh kenon Serug, Serug ajeh kenon Rehu, Rehu ajeh kenon Peleg, Peleg ajeh kenon Eber, Eber ajeh kenon Selah, 36Selah ajeh kenon Kanaan, Kanaan ajeh kenon Arpakhsad, Arpakhsad ajeh kenon Sem, Sem ajeh kenon Nuh, Nuh ajeh kenon Lamekh, 37Lamekh ajeh kenon Metuselah, Metuselah ajeh kenon Henokh, Henokh ajeh kenon Yared, Yared ajeh kenon Mahalaleel, Mahalaleel ajeh kenon Kenan, 38Kenan ajeh kenon Enos, Enos ajeh kenon Set, Set ajeh kenon Adam, ru Adam ajeh kenon Jenang.
انتخاب شده:
LUKAS 3: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
