LUKAS 10
10
Yesus Kingeng 72 Urag Ipengikot
(Mat 10:7-14; Mrk 6:7-13)
1Telas ajeh Tuhan Kipileh 72 urag de kilek ru Kingeng penar mom cip canuk nu jap pekan ru tempat de Kaha-et. 2Kiurok nu enai, “Kiknej ihad jeoi tapi mai kerakjak nek gek. Kerana ajeh, semanjloh nu Tuan selai ajeh supaye Kingeng gulebeh nij mai kerakjak ha kiknej ajeh.#Mat 9:37-38 3Etloh! Eng Ngngeng engkek begei ha dombe nu semakdek cok lig.#Mat 10:16 4Wesloh agok en dabal, jaben, atao kasot, ru agok og salam nu bok-bok pen ku kateh ceknip engkek kerana ajeh kibuang mase. 5Bile engkemuj nu madeg bok taleh, urokloh canuk, ‘Semoge mong neaman ku deg adeh.’ 6Amen sengoi ku pajeh naigemar ha neaman, berkat ju engkek ajeh doh mong ku enai. Tapi amen tok, berkat ju engkek ajeh doh kijekjog nu liengkek sendiri. 7Geiloh ku deg ajeh ru agok pindah majeh-manen. Cakloh ru ngutloh ma taleh de kijamu, kerana numom pekerjak layak kikep iupah. 8Bile engkemuj nu pekan de beterima engkek, cakloh ma de bijamu nu engkek, 9ru perborloh mai nyik de mong ku pajeh ru urokloh nu enai, ‘Pek liu nij Jenang doh Kimemerintah engkek sebegei Raja!’ 10Tapi amen engkemuj nu pekan de pek naiterima ha engkek, etloh nu nong-nong pekan ajeh ru urokloh, 11‘Habok ju pekan engkek de cektat ku jog jik, jitapes ku ngar liengkek sebegei tanda amaran Jenang doh Kihukom engkek. Tapi hodloh engkepanei tentang hal adeh: Pek liu nij Jenang doh Kimemerintah sebegei Raja!’ ” 12Yesus Kiurok nij nu enai, “Cerngailoh, ku arik Jenang Kipeadel dikdij mai, nehukom nu mai ku kote Sodom doh lebeh hayok daripade nehukom nu mai ku pekan ajeh.”#Kej 19:1-29; Mat 10:15; 11:24
Yesus Kiog Amaran nu Mai Yahudi
(Mat 11:20-24)
13“Celakaloh engkek mai Yahudi ku pekan Korazin ru pekan Betsaida! Amen ku kote Tirus ru kote Sidon mong Ngbeh ajaib-ajaib de ya Ngbeh ku engkek, tentu ya liu nailog abat guni ru naidol habu ku kui liknai sebegei bukti naibetobat. 14Ku arik Jenang Kipeadel dikdij mai, nehukom nu mai ku kote Tirus ru kote Sidon doh lebeh hayok daripade nehukom nu engkek. 15Engkek mai Yahudi ku pekan Kapernaum, engkepiker engkek doh bipetinggi lei engkekep nehormat de entoi ku serga? Tok, engkek doh bipej nu kateh os nyeng!”
16Yesus Kiurok nu 72 urag Ipengikot ajeh, “Bok imai de kicerngai ru kipecaya engrok engkek, kek kicerngai ru kipecaya engrok Eng. Bok imai de kinyek engkek, kek kinyek Eng. Bok imai de kinyek Eng, kek kinyek Kek de Kingeng Eng.”#Mat 10:40; Mrk 9:37; Luk 9:48; Yoh 13:20
72 Urag Naijog
17Tujoh puloh due urag de bingeng ya Yesus ajeh naijog ru sengik de suka ru naiurok, “Tuhan, nyanik-nyanik naijoi ernor jik bile ya kuasa muh Jen jior naihol ju mai.”
18Lalu Yesus Kiurok, “Mase engkeperet nyanik-nyanik, Ngneng Ibles kiyog ju langit begei kilat. 19Eng ya Ngog engkek kuasa ha jebat tijik ru mangai, ru kuasa ha pealah dikdij kengwat musoh. Pek mong ma de dapat naipeluka ha engkek. 20Hamapen begei ajeh, agok kerakmik kerana kelog-kelog jehat naijoi ha engrok engkek, tapi kerakmikloh kerana muh engkek ya mong bicot ku serga.”
Yesus Kikerakmik
(Mat 11:25-27; 13:16-17)
21Ku mase ajeh juga, Kelog Santen Kibeh Yesus betol-betol Kikerakmik. Yesus Kiurok, “Menek de memerintah langit ru bumi, Eng Ngpateh Jen kerana dikdij hal adeh Jenbercep ju mai cerdeg ru mai panei. Tapi Jenpasal nu mai de sengik enai begei ha sengik sesanget de sedia naiha-pecaya neajar de benar. Hooh Menek, ajehloh heknod Jen.
22Dikdij hal ya biserah nu Eng ya Menek Eng. Pek numom pen kikenal Kenon tapi had Menek taleh de Kikenal Kenon. Juga, pek numom pen kikenal Menek tapi had Kenon ru mai de biog panei ya IKenon taleh de naikenal ha Menek.”
23Telas ajeh Yesus Kiceleg nu Ipengikot-pengikot ru Kiurok, “Engkek biberkat kerana mat engkek kibakek ma de engkeneng! 24Cerngailoh, jeoi nabi ru raja naiha-neng ma de engkeneng hunen tapi pek kep naineng, ru naiha-cerngai ma de engkecerngai hunen tapi pek kep naicerngai.”
Mai Samaria de Bor Isengik
25Ku nanek arik, numom guru Hukom Taurat kihol kaha-uji Yesus. Kek kitanya, “Guru, ma de patot ngbeh supaye ngkep sinui de lei ditehjeh?”
26Yesus Kiberlag, “Maka de bicot ku kateh Hukom Taurat? Ma de hapaham ju hal de habaca ku pajeh?”
27Guru Hukom Taurat ajeh kiberlag, “ ‘Hokloh TUHAN Jenang hek ru segenap sengik hek, ru segenap sengrog hek, ru dikdij kengwat hek, ru dikdij peniker hek,’ ru ‘Hokloh ratak manusia begei hahok diri lihek sendiri.’ ”#Ul 6:5
28Yesus Kiberlag, “Berenglag hek ajeh betol. Behloh ajeh ru hek doh hakep sinui de lei ditehjeh.”
29Tapi guru Hukom Taurat ajeh kaha-bernang ha idiri, jadi kitanya nij nu Yesus, “Ratak manusia ajeh bok?”
30Yesus Kiberlag, “Mong numom keral kicip ju kote Yerusalem kaha-et nu pekan Yerikho. Ku kateh iceknip ajeh, kek birumpak ya mai jehat. Ileknog birampas ru ilei bipet lalu biwes kaha-dat. 31Mase ajeh, mong numom imam agame Yahudi kilalu nong ajeh. Bile kineng sengoi ajeh, kek kiwir ru teros kicip. 32Begei ajeh juga, mong numom mai ju suku Lewi de kilalu nong ajeh. Bile kineng sengoi ajeh, kek pen kiwir ru teros kicip. 33Tapi mong numom mai Samaria kilalu nong ajeh. Kiburuk sengoi de luka ajeh ru kiyayak ha kek. 34Kek kiterbuk rek, lalu kicuci luka sengoi ajeh ya teu wain, ru kikoh ya minyak. Telas ajeh kibalot luka sengoi ajeh, lalu kiterbot sengoi ajeh ku kemil ibinatag ru kien kek nu deg siwa ru kijaga kek. 35Ku ihuper nij, mai Samaria ajeh kiog nar kepeg duet perak nu tuan deg siwa ajeh ru kiurok, ‘Jagaloh kek. Amen iduet pek cukop, doh ngbayar nij bile nglos nu madeh.’ ”
36Lalu Yesus Kitanya nu guru Hukom Taurat ajeh, “Ku peniker hek, bokka ilei antare nik mom ajeh de kihok ratak sesama sengoi de birumpak ajeh?”
37Guru Hukom Taurat ajeh kiberlag, “Sengoi de kiperneng iyayak nu kek.”
Yesus Kiurok, “Etloh ru behloh begei ajeh!”
Marta ru Maria
38Yesus ru Ipengikot-pengikot naipeteros ceknip enai, lalu nailei nu nanek kampug. Ku pajeh, numom kerdor imuh Marta kiterima Yesus nu imadeg. 39Marta mong imenang imuh Maria. Maria teros kigei beg jog Tuhan ru kicerngai Ineajar. 40Tapi Marta kiyal kaha-bejamu, jadi kiperek nu Yesus ru kiurok, “Guru, menang eng kibiar ngbeh kerjak nghalei-halei. Yama pek Jenpeduli? Orloh kitulog eng!”
41Tapi Tuhan Kiberlag, “Marta, Marta. Hek harisau ru hapesusah diri lihek sendiri ya jeoi hal, 42tapi had nek nanek hal taleh de penteng. Maria ya kipileh hal de bor de pek bikot ju kek doh.”
انتخاب شده:
LUKAS 10: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
