LUKAS 1
1
Imemula
1-2Teofilus de bihormat,
Mong jeoi mai de naineng hal-hal de bibeh ya Yesus sejak Kimula Ipelayanan. Enai naipasal hal-hal ajeh nu mai kilek. Ru mai de naicerngai hal ajeh naicot tentang hal-hal de bibeh ya Yesus. 3Eng juga ya ngsiasat dikdij hal ajeh sejak ju imemula, jadi ngrasa bor ngsusot ru ngcot teator cerite-cerite ajeh ha enjen juga 4supaye jenpanei ma de ya bipasal nu enjen ajeh mimang benar.
Penasal tentang Yisnos Yohanes Pembaptis
5Ku mase Raja Herodes Agong kijadi penguasa lengrik Yudea, mong numom imam agame Yahudi imuh Zakharia. Kek ju kumpulan imam Abia. Elisabet ajeh kenah Zakharia. Ubai ajeh kenon-cenok imam Harun.#1 Taw 24:10 6Sinui ubai kenah-gengsir benar ku mat Jenang, ru baijoi dikdij hukom ru perintah TUHAN. 7Tapi ubai pek bekenon kerana Elisabet manang ru liubai pen ya engrak.
8Ku nanek arik, tiba giliran kumpulan Zakharia naibeh tugas imam ku Deg Jenang. 9Mase ajeh, enai naibeundi naijoi kebiasaan de bibeh ya imam-imam, ru Zakharia bipileh supaye kimuj nu kateh Deg Jenang untok kijop kijai. 10Sementare kijai bijop ha sembahyang, dikdij mai naibedoa ku luar. 11Ku sarik ajeh, malikat TUHAN kiperneng idiri nu Zakharia. Malikat ajeh kijinjeg ku englag kentop tempat teknod kijai. 12Mase Zakharia kineng, kek kikekjet ru kisengoh. 13Tapi malikat ajeh kiurok, “Zakharia! Agok sengoh kerana Jenang ya Kicerngai doa hek. Kenah hek Elisabet doh kiperyos kenon keral. Hek hod hasebot imuh Yohanes. 14Hek habesuka ru hakerakmik bile ya kiyos doh, ru jeoi mai juga doh naibesuka ha iyisnos 15kerana ku mat TUHAN, kek doh kijadi sengoi de ihad penteng. Kek pek buleh kingut teu wain atao teu bel de kilek. Sejak ju kateh ked ikeneng, kek doh bikuasa ya Kelog Santen.#Bil 6:1-4 16Kek doh kipimpen jeoi mai Israel naijekjog nu TUHAN Jenang liknai. 17Ya kelog ru kuasa begei ha Nabi Elia, kek doh kicip canuk sebelom TUHAN. Kek doh kibeh sengik apak-amek naiberbor ru kekenon liknai, ru kibeh sengoi de pek taat naijog nu nong de benar. Begei ajehloh kek doh kipesiap nanek bangse ha TUHAN.”#Mal 4:5-6
18Zakharia kiurok nu malikat ajeh, “Begeiharok ngha-panei hal ajeh doh kitejadi? Eng ya engrak, ru kenah eng pen ya lanjot iumur.”
19Malikat ajeh kiberlag, “Eng Gabriel de selalo ngjinjeg ku ngar Jenang. Kekloh de Kior eng ngperlei gah bor adeh nu hek! 20Ma de ngpasal adeh doh betol kitejadi ku imase de ya bipetetap. Tapi kerana pek hapecaya, hek doh habisu ru pek dapat habelwal lei ma de ya ngpasal ajeh kitejadi.”
21Sementare ajeh, mai jengoi ku luar lekat naipoj ha Zakharia ru enai ihad naihiran kerana kek ihad liu ku kateh Deg Jenang. 22Mase kihol, kek pek dapat kibelwal nu enai. Kek kiog neuta ya iteg kerana kibisu. Bile mai ku pajeh naineng kek jadi begei ajeh, naipanei Zakharia mong kikep nengneng mase ku kateh Deg Jenang.
23Telas ya kipeselesei dij tempoh igiliran tugas ajeh, Zakharia pen kijog nu imadeg. 24Pek liu ju kenjeh, Elisabet ikenah ajeh kimakok ru lima gencek iluniu pek kihol nu luar deg. 25Kek kiurok, “TUHAN ya Kibeh hal adeh nu eng. Hunen Kek ya Kibeh bor nu eng. Neaep eng ku ngar mai jengoi ya Kipehapos.”
Gah tentang Yisnos Yesus
26Bile ya enam gencek Elisabet kimakok, Jenang Kior malikat Gabriel et nu pekan Nazaret ku lengrik Galilea. 27Malikat ajeh bior et nu numom menaleh de imuh Maria de ya kibetunang ru numom keral de imuh Yusuf ju kenon-cenok Raja Daud.#Mat 1:18 28Bile malikat ya kilei nu Maria, kek kiurok, “Salam nu hek, sengoi de ihad biberkat! TUHAN mong Kibesama hek!”
29Maria kirungseng bile kicerngai bengwal malikat ajeh ru kikerek ku isengik entah ma imaksod salam ajeh nek. 30Malikat ajeh kiurok nu kek, “Agok sengoh, Maria! Jenang Kibekenan nu hek. 31Hek doh hamakok ru haperyos numom kenon keral ru hasebot Imuh Yesus.#Mat 1:21 32Kek doh Kijadi numom Sengoi de agong ru Kek doh bigelar Kenon Jenang de Paleng Tinggi Ikedudukan. TUHAN Jenang doh Kipejadi Kek Raja begei Raja Daud Ijenang rak. 33Kek doh Kimemerintah bangse Israel lei ditehjeh. Kek doh Kimemerintah sebegei Raja lei ditehjeh.”#2 Sam 7:12, 13, 16
34Maria kiurok nu Malikat ajeh, “Eng pekseg ngbegengsir, jadi begeiharok hal ajeh buleh kitejadi?”
35Malikat ajeh kiberlag, “Kelog Santen doh Kibekerjak ku hek, ru kuasa Jenang de Paleng Tinggi Ikedudukan doh kikelimbog hek. Kerana ajehloh, Kenon de yos ajeh doh suci ru bigelar Kenon Jenang. 36Paneiloh! Sedara hek Elisabet de engrak ajeh pen ya kimakok. Kek manang tapi hunen kimakok ya enam gencek. 37Kerana, ku Jenang pek mong hal de mustahel.”
38Maria kiberlag, “Eng hambe TUHAN. Biarloh ma taleh de jenurok ajeh tejadi nu eng.” Telas ajeh malikat ajeh pen kiet ju Maria.
Maria Kisueg ha Elisabet
39Pek liu ju kenjeh, Maria gij-gij kiet nu nanek pekan ku kawasan berlod-lod de ku lengrik Yudea. 40Kek kiet nu deg Zakharia ru kiog salam nu Elisabet. 41Mase Elisabet kicerngai salam ju Maria ajeh, ikenon de ku kateh iked pen kiloj, ru Elisabet bikuasa ya Kelog Santen. 42Ru suara de kuat kibesurag, “Hekloh de paleng biberkat ku engkap dikdij kerdor! Kenon de haperyos doh pen biberkat juga! 43Eng ihad bihormat kerana keneng Tuhan eng kisueg ha eng de pek layak ngkep nehormat begei adeh! 44Telas taleh ngcerngai salam ju hek, kenon ku kateh ked eng kiloj kibesuka. 45Hek biberkat kerana hapecaya engrok TUHAN nu hek doh kitejadi!”
Penateh Maria
46Lalu Maria kiurok,
“Sengik eng kipemulie ha TUHAN
47ru kelog eng kibesuka ha Jenang Peselamat eng,
48kerana Kek Kiingat ha eng, hambe Kek de hina!
Ju hunen lei ditehjeh, dikdij mai doh naiurok eng sengoi de biberkat
49kerana Jenang de Bekuasa ya Kibeh hal de entoi ha eng.
Suciloh muh Kek.
50Kiyayak mai de sengoh ru hormat ha Kek,
ju nanek keturunan nu keturunan de kilek.
51Kek Kiperneng Ikuasa ju Iteg.
Kek Kibeh mai de sumbong naiceraklah ru Kipekacau nerancang enai.
52Kek Kicerleh raja-raja ju tahte enai
ru Kipetinggi mai de hina.
53Kek Kiperwas mai de cuag ya hal-hal de bor,
tapi Kiperet mai kaya ru teg de kusong.
54Kek Kitulog Ihambe-hambe mai Israel
kerana Kiingat ha Ijenanji nu enai.
55Kek ya Kibejanji Kaha-perneng Ineyayak nu Abraham
ru nu ikenon-cenok lei ditehjeh!”#Kej 17:7
56Maria kigei ru Elisabet iluniu lebeh kurang nik gencek ru telas ajeh kijog nu imadeg.
Yisnos Yohanes Pembaptis
57Bile ya lei imase Elisabet kiperikyos, kek kiperyos numom kenon keral. 58Mase ijiran-jiran ru isesedara-mara naicerngai gah tentang TUHAN ihad Kiyayak ha Elisabet, enai turot naikerakmik ru kek.
59Mase umur sanget ajeh ya cukop lapan arik, enai naihol naiha-sunat ha sanget ajeh. Enai naiha-og imuh Zakharia begei muh iapak#Im 12:3 60tapi iamek kiurok, “Wes! Imuh hod bisebot Yohanes.”
61Naiberlag nu kek, “Tapi pek mong numom pen ju sesedara-mara hek imuh Yohanes.” 62Lalu naibeh neuta naitanya nu apak sanget ajeh ha muh ikenon.
63Zakharia kisemanj papat ceknot lalu kicot, “Imuh Yohanes.” Hal ajeh kibeh dikdij mai naihiran. 64Ku sarik jijeh juga Zakharia dapat kibelwal semula ru kek pen mula kipateh ha Jenang. 65Dikdij ijiran naijadi sengoh ru gah tentang hal ajeh lei nu dikdij kawasan berlod-lod ku lengrik Yudea. 66Dikdij mai de cerngai gah ajeh naiserngik, “Entah ma sanget ajeh kijadi pigoi doh?” Naiserakngik begei ajeh kerana kuasa TUHAN mong kibeserta ru sanget ajeh.
Nubuat Zakharia
67Zakharia, apak sanget ajeh bikuasa ya Kelog Santen ru kibenubuat,
68“Beiloh hipateh TUHAN
Jenang bangse Israel
kerana Kek ya Kihol
Kaha-tulog ru Kaha-terlas Isengoi-sengoi.
69Kiog hik Peselamat de bekuasa,
numom ju kenon-cenok Raja Daud Ihambe ajeh
70kena begei de ya Kiurok melalui Inabi-nabi entem.
71Kek doh Kipeselamat hik ju musoh-musoh hik,
ru ju teg mai de naigetek ha hik.
72Kek Kiyayak ha jenang rak hik
ru Kiingat ha Ijenanji de suci ajeh.
73Kek Kibesumpah nu Abraham jenang rak hik begei adeh:
74Kek doh Kipeselamat hik ju musoh-musoh hik
ru Kibeh hik hisembah ru pek hisengoh ha Kek,
75supaye hijadi suci ru benar ku mat Kek selame hisui.”
76Zakharia teros kibenubuat, “Hek kenon eng doh bigelar
nabi de bingeng ya Jenang de Paleng Tinggi Ikedudukan
kerana hek bingeng canuk supaye hasedia nong ha TUHAN#Mal 3:1
77ru hapasal nu Isengoi-sengoi tentang hal adeh: TUHAN doh Kipeselamat enai
melalui Kiampon dosa enai.
78Kerana Jenang Kiyayak ha hik,
mat arik doh kiterbet ru kihol nu hik ju langit
79kaha-sog dikdij mai
de naisui ku kateh gengwer ru danan,
ru kaha-pimpen hik
nu nong de kituju nu neaman.”#Yes 9:1
80Kenon Zakharia ajeh guraknak ru isinui rohani pen gukuat. Kek kigei ku padag guron leiloh imase kiperneng idiri nu bangse Israel.
انتخاب شده:
LUKAS 1: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
