YOHANES 18
18
Yesus Bicap
(Mat 26:47-56; Mrk 14:43-50; Luk 22:47-53)
1Telas Yesus Kibedoa, Kek ru Ipengikot-pengikot naidek kote Yerusalem ru nailintas Batag arik Kidron. Ku pajeh Yesus ru Ipengikot-pengikot naimuj nu nanek taman. 2Yudas pengkianat Yesus ajeh kipanei tempat ajeh kerana ya jeoi kali Yesus Kibekumpol ru Ipengikot-pengikot ku pajeh. 3Jadi, Yudas kiet nu tempat ajeh kien aska-aska Rom ru memerip pengawal Deg Jenang de bingeng ya raknak-raknak imam agame Yahudi ru mai Farisi. Enai naien senjate, lampu, ru os. 4Yesus Kipanei dikdij ma de doh belaku ku diri Ilei. Kerana ajeh, Kek Kiperek nu enai lalu Kitanya, “Bok de engkekek?”
5Naiberlag, “Yesus Mai Nazaret.”
Yesus Kiurok nu enai, “Engloh Yesus.”
Yudas pengkianat ajeh mong kijinjeg besama ru enai ku pajeh. 6Bile Yesus Kiurok nu enai, “Engloh Yesus,” dikdij liknai naijerled lalu naikol nu matik. 7Nukali nij Yesus Kitanya nu enai, “Bok de engkekek?”
Naiberlag, “Yesus Mai Nazaret.”
8Yesus Kiberlag, “Eng ya Ngurok Engloh Yesus. Amen Eng de engkekek, biarloh pengikot-pengikot Eng adeh naiet.” 9(Kek Kiurok begei ajeh supaye ma de Kiurok entem kitejadi: “Menek, pek numom pen de Jenog nu Eng kirikroj.”)
10Simon Petrus mong ipedang. Kek kiperhol ipedang ajeh lalu kitas entag kentop hambe Imam Agong agame Yahudi. Muh hambe ajeh Malkhus. 11Yesus Kiurok nu Petrus, “Dekloh pedang hek ajeh! Eng hod Ngtempeh ma taleh seniksa de ya bitentu ya Menek Eng.”
Yesus Bien nu Hanas
12Telas ajeh aska-aska Rom, komanden aska Rom, ru pengawal-pengawal Deg Jenang naicap ru naibeg Yesus. 13Mula-mula naien Yesus nu Hanas belok Kayafas. Ku tahut ajeh, Kayafas ajeh Imam Agong agame Yahudi. 14Kekloh de pernah kinasihat pemimpen-pemimpen mai Yahudi begei adeh: “Lebeh bor amen numom kidat ha bangse hik.”#Yoh 11:50
Petrus Pek Kiaku Kikenal Yesus
(Mat 26:69-70; Mrk 14:66-68; Luk 22:55-57)
15Simon Petrus ru numom nij pengikot de kilek baijoi Yesus. Pengikot ajeh kikenal ha Imam Agong agame Yahudi. Kerana ajeh, pengikot ajeh biog muj besama ru Yesus nu kateh laman deg Imam Agong 16tapi Petrus kipoj ku luar, ku ngar pintu. Pengikot kilek ajeh kikerlos nij nu pintu ajeh ru telas kibelwal ru hambe kerdor de bejaga pintu ajeh, kek kien Petrus muj nu kateh. 17Hambe kerdor ajeh kiurok nu Petrus, “Pekka hek adeh numom ju pengikot-pengikot Sengoi ajeh?”
Petrus kiberlag, “Tok, enyuk.”
18Ku mase ajeh, iarik sengij. Hambe-hambe ru pengawal-pengawal ku pajeh ya nairup os naiguna arang naiha-berked berog enai. Petrus pen kijinjeg besama ru enai kiberked iberog beg os.
Imam Agong Hanas Kisoal Yesus
(Mat 26:59-66; Mrk 14:55-64; Luk 22:66-71)
19Imam Agong Hanas kitanya nu Yesus tentang Ipengikot-pengikot ru Ineajar. 20Yesus Kiberlag, “Eng sentiase Ngbelwal ku ngar mai jengoi. Eng selalo Ngbeajar ku deg sembahyang ru ku laman Deg Jenang ku belok dikdij mai Yahudi naibekumpol. Eng pek pernah Ngbual ma-ma serakngek. 21Yama hatanya nu Eng? Tanyaloh nu enai de ya naicerngai neajar Eng kerana ya naipanei ma de Ngurok!”
22Mase Yesus Kiurok begei ajeh, numom pengawal de kijinjeg ku Ibeg kitampar Yesus ru kiurok, “Biadap betol care bengwal hek adeh. Agok bual begei ajeh nu Imam Agong!”
23Yesus Kiurok nu kek, “Amen Eng ya Ngbual ma-ma de sek, pasalloh ma senalah Eng ajeh. Tapi amen bengwal Eng betol, yama hatampar Eng?”
24Telas ajeh Hanas kior Yesus de lekat bibeg ajeh bien nu Imam Agong Kayafas.
Nar Kali Nij Petrus Pek Kiaku Kikenal Yesus
(Mat 26:71-75; Mrk 14:69-72; Luk 22:58-62)
25Mase Simon Petrus lekat kijinjeg kiberked iberog beg os, mong mai naitanya nu kek, “Pekka hek numom ju pengikot-pengikot Yesus?” Petrus pek kiaku ru kiberlag, “Tok, enyuk!”
26Mong numom ju hambe-hambe Imam Agong kijinjeg juga ku pajeh. Kek ajeh sedara sengoi de ientag bitas ya Petrus. Kek kiurok nu Petrus, “Pekka ngbakek hek besama ru Yesus ku taman ajeh?”
27Petrus kiurok nij, “Tok.” Ku sarik jijeh juga pog pen kibetader.
Yesus Bisoal ya Pilatus
(Mat 27:1-2, 11-14; Mrk 15:1-5; Luk 23:1-5)
28Ku ipepegelap, pemimpen-pemimpen mai Yahudi naien Yesus ju deg Kayafas nu kediaman rasmi penguasa Rom. Enai pek naimuj nu majeh supaye pek naijadi haram,#18:28 Supaye pek naijadi haram: Ku adat mai Yahudi, sengoi Yahudi de kimuj nu kateh deg mai pek Yahudi kijadi haram. Sengoi de kijadi haram pek buleh kiraya Paskah ru kisembahyang besama ru mai Yahudi de kilek. kerana naiha-cak Jenamu Paskah. 29Kerana ajeh, Pilatus kihol ru kibakek ha enai. Kek kitanya, “Maka tenudoh engkek tentang Sengoi adeh?”
30Naiberlag, “Jik pek jien Kek nu jen amen Kek pek Kibesalah.”
31Pilatus kiurok nu enai, “Kotloh ru peadelloh Kek joi hukom liengkek sendiri.”
Tapi naiberlag, “Jik pek mong kuasa jiha-perdat mai.” 32(Hal adeh belaku supaye tejadi ma de biurok ya Yesus tentang care Kek doh Kidat.)
33Pilatus kimuj nij nu kateh lalu kicereg Yesus ru kitanya, “Hek adeh raja mai Yahudika?”
34Yesus Kiberlag, “Tenanya hek adeh ju lihek sendirika atao ju mai kilek de bepasal nu hek tentang Eng?”
35Pilatus kiberlag, “Eng adeh enyuk pek mai Yahudi. Bangse LiHek sendiri ru raknak-raknak imam agame Yahudi naiserah Hek nu eng. Jadi, senalah ma de ya Habeh?”
36Yesus Kiurok, “Kerajaan Eng pek ku dunia adeh. Amen kerajaan Eng ku dunia adeh, pengikot-pengikot Eng doh nailawan supaye Eng pek biserah nu pemimpen-pemimpen mai Yahudi. Tapi kerajaan Eng ju tempat kilek!”
37Lalu Pilatus kiurok, “Jadi, Hek adeh raja!”
Yesus Kiberlag, “Ma de habual ajeh betol. Eng adeh raja. Eng Ngyos ru Nghol nu dunia adeh Ngha-pasal neajar de benar. Dikdij mai de naijoi neajar de benar naijoi engrok Eng.”
38Pilatus kitanya nu Kek, “Ma neajar de benar ajeh?”
Yesus Bihukom Dat
(Mat 27:15-31; Mrk 15:6-20; Luk 23:13-25)
Telas ajeh Pilatus kihol nij nu luar ru kiurok nu dikdij mai Yahudi ku pajeh, “Eng pek ngkep ma-ma isebab ngha-hukom Kek. 39Tapi engkek mong adat begei adeh: Biasajeh ku Arik Raya Paskah engkesemanj eng ngterlas numom sengoi de bijel. Engkehodka ngterlas Raja mai Yahudi adeh?”
40Enai naihai, “Tok, pek Kek! Terlas Barabas!” (Barabas ajeh numom pemberontak.)
انتخاب شده:
YOHANES 18: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
