KISAH 5
5
Ananias ru Safira
1Mong numom keral imuh Ananias. Kek ru ikenah Safira baijual nupenadag tik hak liubai. 2Ananias kidek engleg duet jengwal tik ajeh ru ikenah pen kipanei tentang hal ajeh. Ilembeh duet ajeh baiog nu rasul-rasul. 3Tapi Petrus kiurok, “Ananias, yama habiar sengik hek bikuasa ya Ibles lei halenglod Kelog Santen ru hadek engleg duet jengwal tik ajeh? 4Tik ajeh hak hek sebelom hajual. Ya telas hajual, iduet lekat hak hek juga. Hek pek patot habeh begei ajeh nu Jenang! Hek pek halenglod ha manusia tapi Jenang!” 5Telas Ananias kicerngai ha bengwal ajeh, kek teros kikol ru kidat. Dikdij sengoi de naicerngai tentang hal ajeh naisengoh. 6Lalu memerip urag keral nyengnyam naihol ru naibalot mayat Ananias teros naien nu luar ru naicop.
7Lebeh kurang tige jam ju kenjeh, kenah Ananias kimuj. Kek pek kipanei ma de ya tejadi ku pajeh. 8Petrus kiurok nu kek, “Pasalloh nu eng, adeh talehka hasel jengwal tik de jerkekep?”
“Hooh,” kiberlag, “Mimang ajehloh rimdij iduet.”
9Petrus kiurok, “Yama jerkebepakat jerkeuji ha Kelog TUHAN? Nengloh, mai de pai naicop gengsir hek ajeh ya mong ku ngar pintu. Hek doh juga naigandar nu luar.” 10Ku sarik jijeh juga kenah Ananias kikol ru kidat ku ngar Petrus. Mai nyengnyam ajeh naimuj ru naineng Safira ya kidat. Kerana ajeh, naien imayat nu luar ru naicop kek beg igengsir. 11Dikdij jemaah ru sengoi de ceringai tentang hal ajeh ihad naisengoh.
Tanda-tanda Ajaib
12Jeoi tanda-tanda ajaib ru hal-hal de luar biasa de bibeh ya rasul-rasul ku engkap mai jengoi. Dikdij sengoi de pecaya nu Yesus selalo naibekumpol ku Beranda Salomo. 13Dikdij mai naihormat ha pengikot-pengikot Yesus tapi pek mong mai kilek de berani naiha-bekumpol besama ru enai. 14Hamapen begei ajeh, ya gujengoi keral ru kerdor naipecaya nu Tuhan. 15Kerana ajehloh, mai de nyik bien nu nong ru biperdak ku tilam ru ceruk. Enai naibeharap naijadi bor bile wog Petrus kikena gek pen ku enai mase kilalu ku pajeh. 16Jeoi sengoi ju pekan-pekan ku sekelileg kote Yerusalem naihol ru naien mai de nyik ru mai de bisangrog ya nyanik. Dikdij enai ajeh biperbor.
Pengikot Yesus Bisiksa
17Tapi Imam Agong agame Yahudi ru dikdij mai de naisukong ha kek ihad naicemburu ha rasul-rasul ajeh. Dikdij enai ajeh mai Saduki. 18Naicap ru naipermuj rasul-rasul ajeh nu kateh jel. 19Tapi ku ikelem, numom malikat TUHAN kibuka pintu-pintu jel ajeh lalu kien naihol nu luar ru kiurok, 20“Et jinjeg ku laman Deg Jenang ru pasal nu mai jengoi tentang sinui de lei ditehjeh adeh.” 21Rasul-rasul ajeh pen naijoi ernor malikat ajeh. Ku ipepegelap, naiet nu laman Deg Jenang ru mula naibeajar.
Imam Agong agame Yahudi ru dikdij mai de naisukong ha kek naicereg pemimpen-pemimpen mai Yahudi naiha-beh mesyuarat Mahkamah Agame Yahudi. Telas ajeh, naiog perintah supaye rasul-rasul ajeh biperhol ju jel ru bien nu ngar enai. 22Tapi mase pegawei-pegawei naiet nu jel, naineng rasul-rasul ajeh ya walah ku pajeh. Lalu nailos ru nailapor hal ajeh nu Mahkamah Agame Yahudi. 23Naiurok, “Jineng pintu jel lekat bor bekunci ru mai bejaga pen lekat naijaga ku pintu. Tapi bile jibuka ipintu, pek mong numom pen ku pajeh.” 24Bile ketue pengawal Deg Jenang ru raknak-raknak imam agame Yahudi naicerngai laporan ajeh, naibingung ma de doh tejadi. 25Lalu mong numom sengoi kimuj ru kipasal nu enai, “Sengoi-sengoi de engkecap ru engkejel ajeh tengah naibeajar mai jengoi ku laman Deg Jenang!” 26Kerana ajeh, ketue pengawal Deg Jenang ru ipegawei-pegawei naiet nu majeh ru naien jog rasul-rasul ajeh nij. Tapi enai pek naipaksa kerana naisengoh doh bipej batu ya mai jengoi.
27Enai naien rasul-rasul ajeh nu ngar anggote-anggote Mahkamah Agame Yahudi. Lalu Imam Agong agame Yahudi kiurok, 28“Ihad tegas jik ya jipasal nu engkek wes agok ajar mai jengoi tentang Sengoi ajeh! Tapi hunen engkeajar tentang Sengoi ajeh nu dikdij kote Yerusalem ru engkeurok jik de betanggongjawab ha Idanan!”
29Petrus ru rasul-rasul de kilek naiberlag, “Lebeh bor jitaat nu Jenang daripade jitaat nu manusia! 30Jenang de bisembah ya jenang rak hik Kiberkos Yesus de engkesaleb ru engkeperdat ajeh ju Idanan. 31Jenang Kiangket Yesus nu kedudukan de tehormat nu Ienglag kentop supaye Yesus Kijadi Pemimpen ru Peselamat untok Kibeh mai Yahudi naibetobat ru Kiampon dosa enai. 32Jik ru Kelog Santen de biog ya Jenang nu dikdij sengoi de naitaat nu Kek jijadi saksi tentang dikdij hal adeh.”
33Bile anggote-anggote Mahkamah Agame Yahudi naicerngai bengwal ajeh, enai ihad naiberiknos lei naiha-perdat rasul-rasul ajeh. 34Tapi ku engkap Mahkamah Agame Yahudi ajeh mong numom mai Farisi imuh Gamaliel. Kek ajeh guru Hukom Taurat de ihad bihormat ya dikdij sengoi. Kek kijinjeg lalu kior en rasul-rasul ajeh et nu luar sekejap. 35Lalu kiurok nu dikdij anggote Mahkamah Agame Yahudi ajeh, “Sesedara mai Israel! Behati-hati ma de engkeha-beh nu enai. 36Memerip tahut canuk, Teudas kihol ru kianggap ilei ajeh pemimpen de entoi. Mong kira-kira 400 urag de jijoi kek. Tapi ipenyudah kek biperdat lalu ipengikot naiceraklah ru dikdij ikerenjak pen nyep. 37Telas ajeh Yudas mai lengrik Galilea kihol ku mase benanci. Kek kihasot ha jeoi mai tapi kek juga biperdat lalu ipengikot naiceraklah. 38Kerana ajeh, hunen ngnasihat nu engkek agok beh ma-ma nu enai. Biarloh naiet kerana amen nerancang ru kerjak ajeh hol ju manusia, dikdij doh kinyep begei jijeh taleh. 39Tapi amen hal ajeh kihol ju Jenang, engkek tentu pek dapat engkepealah ha enai. Jadi, behati-hati ma de engkeha-beh supaye pek engkelawan Jenang.”
Anggote-anggote mahkamah agame ajeh naiterima ha nasihat Gamaliel ajeh. 40Rasul-rasul ajeh pen bicereg lalu bipet ru biget naiajar nij nu bok-bok pen tentang Yesus. Telas ajeh enai pen biterlas. 41Bile naihol ju Mahkamah Agame Yahudi ajeh, rasul-rasul ajeh naikerakmik kerana Jenang Kianggap enai layak naiterima seniksa sebegei pengikot-pengikot Yesus. 42Jap-jap arik, ku laman Deg Jenang atao ku deg-deg mai, enai pek behenti-henti naibeajar ru naiperlei Gah Bor adeh: Yesus ajeh Peselamat de bijanji ya Jenang.
انتخاب شده:
KISAH 5: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
