KISAH 3
3
Mai Lumpoh Biperbor
1Ku nanek arik, ku pukol tige dui bile mai Yahudi selalo naisembahyang, Petrus ru Yohanes baiet nu laman Deg Jenang. 2Ku pajeh mong numom keral de lumpoh sejak kiyos. Jap arik kek bidek ku ngar pintu gerbang de bisebot ‘Pintu Indah’ ku laman Deg Jenang supaye buleh kisemanj duet nu sengoi de mikmuj nu laman Deg Jenang ajeh. 3Bile kibakek Petrus ru Yohanes baiha-muj nu laman Deg Jenang, kek kisemanj duet nu ubai. 4Petrus ru Yohanes baineng nu kek lalu Petrus kiurok, “Neng nu jar.” 5Lalu sengoi ajeh pen kineng nu ubai ru kibeharap kikep ma-ma ju ubai ajeh. 6Petrus kiurok, “Eng pek mong duet perak atao duet mas ngha-og nu hek. Tapi ma de mong ku eng adeh ngog nu hek. Ku kateh muh Yesus Kristus mai Nazaret, kosloh ru ciploh!” 7Petrus pen kicap teg kentop sengoi ajeh ru kitulog berkos. Ku sarik jijeh juga jog sengoi ajeh pen kijadi kuat. 8Kek teros kibelumpat ru kijinjeg lalu kicekcip. Telas ajeh kimuj nu laman Deg Jenang besama Petrus ru Yohanes sambel kicekcip, kibelumpat, ru kipateh ha Jenang. 9Dikdij mai naineng kek kicekcip ru kipateh ha Jenang. 10Bile naisedar kek ajeh sengoi de selalo gigei ru kisemanj ha duet ku pintu gerbang laman Deg Jenang de bisebot ‘Pintu Indah,’ enai pen ihad naikekjet ru cengang empag enai naineng ma de tejadi ku ilei ajeh.
Petrus Kibekotbah ku Laman Deg Jenang
11Mase sengoi ajeh lekat kijoi Petrus ru Yohanes ku tempat de imuh Beranda Salomo, dikdij sengoi de ihad naikekjet ajeh naijerjar nu enai. 12Bile Petrus kineng ha mai jengoi ajeh, kiurok nu enai, “Sesedara mai Israel, agokloh kekjet bile engkeneng hal de tejadi adeh. Agokloh kekjet neng ha jar. Pek ya kuasa lijar sendiri atao ya sinui alim jar jarbeh sengoi adeh kicekcip. 13Jenang de bisembah ya jenang rak hik Abraham, Ishak, ru Yakub Kipemulie Ihambe Yesus. Yesus ajeh ya engkeserah supaye biperdat ru de engkenyek ku ngar Pilatus hamapen kek kibeh keputusan kaha-terlas Yesus. 14Engkenyek ha Ilei de Suci ru Benar ku mat Jenang ajeh tapi engkesemanj sengoi de kiperdat mai biterlas.#Mat 27:15-23; Mrk 15:6-14; Luk 23:13-23; Yoh 19:12-15 15Lalu engkeperdat Yesus de Kiog sinui de lei ditehjeh. Tapi Jenang Kiberkos Kek ju Idanan ru jik adehloh isaksi tentang hal ajeh. 16Kerana jipecaya nu Yesus, sengoi de lumpoh entem de engkeneng ru engkekenal adeh ya kibor. Kerana jipecaya nu Yesus, kek ya betol-betol biperbor ku ngar engkek semua.
17Sesedara, eng ngpanei hal adeh: Engkek ru pemimpen-pemimpen engkek ya engkeperdat Yesus kerana pek engkepanei ma de engkebeh ajeh. 18Tapi, Jenang Kiguna bahneh engkek ajeh untok Kipegenap nubuat adeh de bicot ya dikdij nabi: Peselamat de bijanji ya Jenang patot bisiksa. 19Kerana ajeh, betobatloh ru jekjogloh nu ngar Jenang supaye dosa engkek bipehapos. 20Sesedara, amen engkebetobat, Jenang doh Kiog sinui pai ru Kingeng Yesus de ya Kipetetap Kijadi Peselamat engkek. 21Yesus hod Kigei ku serga lei imase Jenang Kipuleh dikdij ma de mong naijadi pai, begei de ya biurok manah entem melalui Inabi-nabi de suci. 22Nabi Musa pernah kiurok, ‘TUHAN Jenang engkek doh Kipileh numom Nabi begei ha eng ju engkap bangse liengkek sendiri ru doh Kingeng Kek nu engkek. Cerngailoh dikdij ma de Kiurok nu engkek.#Ul 18:15, 18 23Bok-bok de pek kitaat nu engrok Nabi ajeh doh bipeaseg ju sengoi-sengoi Jenang ru bipebinasa.’#Ul 18:19
24Nabi Samuel ru dikdij nabi telas kek ya naibenubuat tentang jaman adeh. 25Engkekloh de mewarisi jenanji Jenang de biperlei ya nabi-nabi. Engkek jugaloh de mewarisi jenanji Jenang de Kibeh ru jenang rak hik. Jenang Kiurok nu Abraham, ‘Dikdij bangse ku dunia doh biberkat ya kenon-cenok hek.’#Kej 22:18 26Jenang Kipileh ru Kingeng Ihambe Yesus canuk nu engkek Kaha-berkat engkek ru Kibeh jap-jap engkek betobat ju sinui de jehat.”
انتخاب شده:
KISAH 3: AEH
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.
