LUCAS 19
19
Jesús yéetel Zaqueo
1J ooc Jesús Jericoe' táan ca'ach u káatal ti' le caajo'. 2Te'elo' ti' yaan jun túul ayikal máaque', Zaqueo u kaaba', leti'e' u nojochil le j kam páatano'obo'. 3Le Zaqueoa' tu yóoltaj u kaj óolt Jesús, ba'ale' ma' páatchaj u yilic ichil le ya'abcach máaco'ob yaan te'elo', tumen leti'e' jach cabal u baaquel. 4Áalcabnaj túun táanil ca j na'ac tu kab jun cúul che' sicómoro yaan naadz te tu'ux cun máan Jesuso' u ti'al ca páatac u yilic ma'alob. 5Jesuse', le ca j máan te'elo', tu líikesaj u yich ca tu ya'alaj ti': Zaqueo, éemen tu séeblaquil, tumen yaan in p'áatal ta wotoch bejela'e'.
6Zaqueoe' j éem tu séeblaquil ca tu kamaj Jesús yéetel qui'imac óolal. 7Tuláacal le máaco'ob, le ca tu yilajo'ob lela', jo'op' u tutucchi'ob, táan u ya'alico'ob j bin Jesús tu yotoch jun túul j keban wíinic. 8Ca j wa'alaj Zaqueoe' ca tu ya'alaj ti' Yuumtzil: Yuumtzil, bin in ca'aj in dzáa táancoch in ayikalil ti' le óotzilo'obo'. Wa in wocoltmaj wa máax yéetel tuuse' bin in ca'aj in suut ti' can téen u tip'a'anil.
9Ca túun j a'ala'ab ti' tumen Jesús: Bejela'e' dzo'oc u kuchul tocsajil ti' le naja' tumen le máaca' ti' u ch'i'ibal Abraham u taal xan. 10Tumen u Paal Máaque' j taal u caxant yéetel u toc le ba'ax saatale'.
U quet t'aanil le taakin t'o'oxo'
(Mt 25.14-30)
11Ca'aliquil le máaco'ob táan u yu'ubico'ob le ba'alo'oba', Jesuse' tu ya'alaj jun p'éel quet t'aan ti'ob, tumen tu yo'olal dzo'oc u náadzal Jerusalene' le máaco'obo' tu tucultajo'obe' séeba'an cun kuchul u ajawil Jajal Dios.
12Tu ya'alaj ti'ob: Yaan ca'ach jun túul dzuule' j bin táanxel lu'um u ti'al ca beeta'ac ajawil tu lu'um, cu dzo'ocole' cu suut. 13Ma'ili' jóokoc u binbale', tu t'anaj diez u palitzilo'ob, tu kubaj jujun p'éel co'ocoj taakin ti'obe', ca tu ya'alaj ti'ob: Meyajnene'ex yéetel le taakina' ca'aliquil in suut. 14Ba'ale' p'ecta'an tumen u yéet caajalo'ob, máaxo'ob tu túuxtajo'ob dze'edzec máaco'ob u ti'al a'alic: Ma' c káat ca u beet u ajawil le máac t óokola'. 15Ba'ale' j beeta'ab ajaw, cu dzo'ocole' j suunaj tu lu'um. Le ca j kuche' tu túuxtaj t'anbil le palitzilo'ob tu kubaj taakin ti'obe', tu yo'olal u yilic buca'aj tu náajaltaj jujun túul. 16Yáax jun túule' j taale' ca tu ya'alaj: Dzuul, a taakine' tu náajaltaj u láak diez. 17Le ajawo' tu ya'alaj ti': Sen ma'alob, jach ma'alob palitzilech; tumen ma'alob meyajnajiquech yéetel le jun p'íito', quin beetiquech jalachil tu yóokol diez caajo'ob. 18J taal u láak jun túule' ca tu ya'alaj: Dzuul, a taakine' tu náajaltaj u láak cinco. 19Ti' lela' tu núucaj xan: Teche' yaan in beetiquech jalachil yóokol cinco caajo'ob. 20J taal túun u láak jun túule' ca tu ya'alaj: Dzuul, je'el a taakina', tin to'aj yéetel jun xéet' nook. 21Sajacchajen ti' teech, tumen in wojel dzíidzic máaquech, ca molic ba'alo'ob ma' ta dzáaji' yéetel ca joch tu'ux ma' pakalnajechi'. 22Ca j a'ala'ab ti' tumen le ajawo': Kaakas palitzil, yéetel a t'aano'ob quin p'is óoltiquech. Wa a wojel dzíidzic máaquen, quin molic ba'alo'ob ma' tin dzáaje' yéetel quin joch tu'ux ma' pakalnajene', 23¿ba'axten túun ma' ta dzáaj in taakin tu'ux cu beeta'al u meyajo'ob u ti'al beyo', le quéen taalaquene', ca in kam yéetel le buca'aj tu náajaltaje'? 24Ca tu ya'alaj ti' le yano'ob te'elo': Lukse'ex le taakin ti'o' ca a dza'ex ti' le máax yaan diez ti'o'. 25Leti'obe' tu ya'alajo'ob ti': Dzuul, ti' leti'e' yaan diez taakino'ob. 26Le ajawo' tu núucaj: Quin wa'alic te'exe', le máax yaan ti'e' bíin dzaábic uláak ti', ba'ale' le máax mina'an ti' tac le jump'íit yaan ti'o' bíin luksa'ac ti'. 27Le máaxo'ob u p'ectmajeno'ob ma' u káato'ob ca'ach ca in beet in ajawile', taase'exo'ob waye' ca a quiimse'exo'ob tin táan.
Jesús cu yocol Jerusalén
(Mt 21.1-11; Mc 11.1-11; Jn 12.12-19)
28Cu dzo'ocol u ya'alic lela', Jesuse' j máan táanil u ti'al u binbal Jerusalén. 29Le ca j kuch ti' le pu'uc cu kaaba'intic Olivo'obo', naadz tu caajilo'ob Betfagé yéetel Betaniae', tu túuxtaj ca'a túul u aj canbalo'ob, 30táan u ya'alic ti'ob: Xeene'ex ti' le chan cajtalil yaan naadzo'; le quéen kuchuque'ex te'elo', yaan a wilique'ex jun túul burro kaxa'an, mix jun téen na'at'ac tumen mixmáac; wach'e'ex, taase'ex teen. 31Wa yaan máax cu káatic te'ex ba'ax o'olal ca wach'ique'ex le burroo', a'ale'ex ti'e' kaabéet ti' Yuumtzil.
32Le aj canbalo'obo' j bino'obe' ca tu yilajo'ob je'el bix a'ala'abic ti'ob tumen Jesuse'. 33Ca'aliquil táan u wach'ico'obe', j káata'ab ti'ob tumen u yuumilo'ob le burroo': ¿Ba'axten ca wach'ique'ex?
34Leti'obe' tu núucajo'ob: Tumen kaabéet ti' Yuumtzil.
35Ca tu bisajo'ob ti' Jesús, tu dzáajo'ob u nooko'ob tu yóokol le burroo' ca tu na'acso'ob Jesús cutal yóokol. 36Ca'aliquil táan u bin Jesuse', táan u jayico'ob u nooko'ob te j bejo'. 37Le ca j náadz tu níix u pu'uquil le Olivo'obo', tuláacal u múuch'ul le ocsaj óolo'ob tzaypachtico' jo'op' u ka'am qui'iqui' t'antico'ob Jajal Dios yéetel qui'imac óolal tu yo'olal tuláacal le chíiculalo'ob dzo'oc u yilico'obo'. 38Táan u ya'alico'ob: ¡Qui'iqui' t'anta'ac le Ajaw cu taal tu kaaba' Yuumtzilo'! ¡Jéedzel te j ca'ano' yéetel nojbe'encunta'ac Jajal Dios!
39Dze'edzec túun ti' le fariseob yano'ob ichil le máaco'obo' tu ya'alajo'ob ti': Aj ca'anbesaj key a aj canbalo'obo'.
40Ba'ale' Jesuse' tu núucaj ti'ob: Quin wa'alic te'exe' wa cu maquic u chi' lelo'oba', bíin ka'am t'aanac le tuunicho'obo'.
41Le ca j kuch naadz Jerusalén, ca tu yilaj le caajo', j okolnaj Jesús tu yo'olal, 42táan u ya'alic: Quexi' ca a na'at quex chéen ti' le a kiinila' le ba'ax cu páajtal u dzáic teech jéedzel óolalo', ba'ale' lelo' ta'aca'an bejela'e', ma' tu páajtal a wilic. 43Tumen yaan u taal kaakas kiino'ob ta wóokol le quéen beeta'ac jun p'éel ca'anal pak ta bakpach tumen a aj p'eeco'ob. Yaan u bakpachtiquecho'ob u ti'al u loobiltiquecho'ob tuláacal tzéel. 44Yaan a lúubsa'al lu'um. Yaan u quiimsa'al a cajnáalilo'ob. Ti' teche' ma' bíin p'áatac tuunich yóokol tuunichi', tumen ma' ta kaj óoltaj u kiinil ca j taal Jajal Dios u xíimbaltechi'.
Jesús cu jóokesic le máaxo'ob cu coonolo'ob kulnaj
(Mt 21.12-17; Mc 11.15-19; Jn 2.13-22)
45Ca túun j ooc Jesús kulnaj, ca jo'op' u jóokesic le máaco'ob cu coonolo'ob yéetel cu mano'ob te'elo', 46ca tu ya'alaj ti'ob: Ti' le Quili'ich Dzíibo'obo' cu ya'alique': In wotoche' u najil payalchi', ba'ale' te'exe' dzo'oc a sutique'ex u cúuchil j oocolo'ob.
47Sáansamal cu ca'ansaj ca'ach Jesús te j kulnajo'. U nojochilo'ob le aj kiino'obo' yéetel u aj ca'anbesajilo'ob le a'almaj t'aano' bey xan u nojochilo'ob le caajo' táan u yilico'ob bix úuchac u quiimsico'ob. 48Ba'ale' ma' tu caxtico'ob bix u beetico'ob, tumen tuláacal le máaco'obo' táan ca'ach u yutzil u'uyico'ob ba'ax cu ya'alic.
انتخاب شده:
LUCAS 19: YUA04
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
Maya de YucatánTumben Nupt'an NT © Sociedad Bíblica de Mexico, 2004.
