युहन्ना 8
8
कासबिरिको छुटकारा
1इङकोन्हुअ्सो इसु जाइतुन आरदाङता हानिहि। 2वा एअ् र्हिमाङ आरोङ थानता हानिहि रो झाराङ द्याङगेलाइ वाकोता लोहि। कालाउ इसु योम्हि रो द्याङगेलाइहेङ बिद्या पिहि। 3धरम मास्टरगेलाइ रो फरिसिगेलाइ कासबिरिता रिमनिङचाका एलोङ बेबालहेङ चुमाहि रो इङकोहेङ माझाता जाअ्पाहि। 4एम्बालाइ इसुहेङ दोअ्हि, “मास्टर, इदोइ बेबाल कासबिरि पालाउ रिम निङचाहि। 5न्यामता मोसा इस्कालाइहेङ उन्ठुइ तोतेङ सेअ्लि केलाइहेङ हुकुम पिका हि। ना याको बारेता हाइ दोअ्खेना?”#लेबि २०:१०; न्याम २२:२२-२४ 6एम्बालाइ वाको जाच पालि रो वासेहेङ दुसिलि द्वाङ बे दोअ्तेङ एसा दोअ्का हिघाखे। कालाउबुङ इसु तुघुरतेङ भोनोता आङगुलिहोइ लेखिलि तेङहि। 7जेलाउ एम्बालाइ वासेहेङ हिअ्तेङ दोङ हि, कालाउ वा जाअ्तेङ एम्बालाइहेङ दोअ्हि, “नेलाइता जाइ पाप पाका मान्थु, इङको इदोइ बेबालहेङ लाम्फा उन्ठुइ तोकाको।” 8कालाउ आरोङ तुघुरतेङ वा भोनोता लेखिलि तेङहि। 9जेलाउ एम्बालाइ इदोइ हिङहि, कालाउ वाराङगेलाइ रो जामालाइ एअ्मि एअ्मिपातेङ हानिहि। इङकोन्हुअ्सो इसुखिनिङ इङको बेबालदोफा एकालाङ हिन्दिन्हाहि। इङको बेबालचाहिँ वाको आगा जाअ्तेङहि। 10इसु इङको बेबालहेङ खाङतेङ दोअ्हि, “खोइ कुनु, नासेहेङ दुसिकालाइ हिसो हानिहि? हासुङ बुङ नासेहेङ दार मापिहि?” 11इङको बेबाल दोअ्हि, “प्रभु, हासुङ मापिहि।” इसु दोअ्हि, “का बुङ नासेहेङ दार माप्याङका। हाने, कालाउ आरोङ पाप मापा।”]#८:११ इदोइ दारजागेलाइ लाम्फाको हेन्जाङ बाइबलगेलाइता मान्थु।
इसु दुनियाको फाइसालाम्का
12इसु आरोङ एम्बालाइहेङ दोअ्हि, “का दुनियाको फाइसालाम्का हिघा। कासेहेङ पिताइका कितिकितिकाता माहिगिलावा, कालाउबुङ वा जिबनको फाइसालाम्का निनावा।”#मत्ति ५:१४; युहन्ना ९:५
13कालाउ फरिसिगेलाइ वासेहेङ दोअ्हि, “ना ताइकोङ बारेता दासि पिखेना। नाङको दासि सत्ते माज्यावा।”#युहन्ना ५:३१
14इसु दोअ्हि, “का ताइकोङ बारेता दासि पिखा, कालाउबुङ काङको दासि सत्ते हि। का गिखा, का हितासो लोका हिघा रो का हिसो हानिदोङखा। कालाउबुङ नेलाइ मागिस्वाना, का हितासो ल्वाङका रो हिसो हानिदोङखा। 15नेलाइ द्याङको बिचारआन्सार निया पासुखेना, का हासुकोङ निया मापाखा। 16का निया पाघा पानु बुङ, काङको निया सत्ते ज्यावा। हाइदोनु निया पाका का एकालाङ मान्थुघा, कालाउबुङ का हिघा रो कासेहेङ दिङगिल्का आबा हि। 17नेलाइको न्यामता बुङ न्हेमि द्याङको दासि सत्ते जेङखे दोअ्तेङ लेखिका हि।#न्याम १९:१५; गान्देका ३५:३० 18ताइको बारेता का ताइमिङ दासि पिखा रो कासेहेङ दिङगिल्का आबा काङको बारेता दासि पिखे।”
19एम्बालाइ वासेहेङ हिअ्हि, “नाङको आबा हिता हि?”
इसु दोअ्हि, “नेलाइ नाते कासेहेङ ना काङको आबाहेङ नाल्सुखेना। नेलाइ कासेहेङ नाल्का हिनु, काङको आबाहेङ बुङ नाल्सुधाना।” 20इदोइ काथा वा थानता बिद्या पिलाउ दान पिका भाकारको भेरपा दोअ्का हिघाहि। कालाउबुङ हासुङ वासेहेङ मारिम्हि, हाइदोनु वाको पहर आरोङ लोका मान्थुघाहि।
इसुको चेतानि
21इसु आरोङ एम्बालाइहेङ दोअ्हि, “का हानाङका, नेलाइ कासेहेङ भोस्वाना रो नेलाइ ताइको पापता सिस्वाना। जेता का हानाङका, नेलाइ लोलि मादोस्वाना।”
22यहुदिगेलाइ दोअ्हि, “याते ताइमिहेङ सेअ्ताङ ना हाइ? हाइदोनु या ‘जेता का हानाङका नेलाइ लोलि मादोस्वाना’ दोअ्तेङ दोअ्खे।”
23कालाउ इसु एम्बालाइहेङ दोअ्हि, “नेलाइ लेताको। का र्हुताको। नेलाइ इदोङ दुनियाको। का इदोइ दुनियाको माको। 24का नेलाइहेङ दोअ्घा, ‘नेलाइ ताइको पापता सिस्वाना, हाइदोनु का वाआङ दोअ्तेङ नेलाइ खान्धुर मापासुन्हा पानु ताइको पापता सिस्वाना।’”
25एम्बालाइ वासेहेङ दोअ्हि, “ना हासु कुनु?”
इसु एम्बालाइहेङ दोअ्हि, “का वाआङ, जाइ का नेलाइहेङ लाम्फासो दोङ दोअ्दोङखा। 26का नेलाइको बारेता दोअ्लि रो निया पालि हेन्जा दोङ हि। कालाउबुङ कासेहेङ दिङगिल्का सत्ते हि रो वासो का जेदोङ हिङघा इङको दोङ काथा का दुनियाहेङ दोअ्खा।”
27आबाको बारेता वा दोअ्का दोअ्तेङ एम्बालाइ मागिहि। 28आरोङ इसु दोअ्हि, “जेलाउ नेलाइ का द्याङको चानहेङ र्हुता कुरुसता तोल्हेस्वाना, का वाआङ दोअ्तेङ नेलाइ गिस्वाना। का ताइकोङ खाबराता हाइदोङ मापाखा, कालाउबुङ आबाको धिरपाका काथागेलाइ धुइखा दोअ्तेङ गिस्वाना। 29कासेहेङ दिङगिल्का कादोफा हि। वा कासेहेङ एकालाङ लाअ्नाङ मान्थु, हाइदोनु का दिनाङ वासेहेङ लेङचापाका काम पाखा।” 30इसु इदोइ काथा धुइलाउ हेन्जाङ द्याङगेलाइ वासेहेङ खान्धुर पाहि।
आब्राहामको चानचामिन्दि
31इसु ताइमिर्हुता खान्धुर पाका यहुदिगेलाइहेङ दोअ्हि, “नेलाइ काङको बचनता हिसुन्हा पानु नेलाइ जातिङकोङ काङको चात्या। 32कालाउ नेलाइ सत्ते हाइ इङको गिस्वाना रो सत्ते नेलाइहेङ फुक्का पाप्यावा।”
33एम्बालाइ वासेहेङ दोअ्हि, “केलाइ आब्राहामको सान्तान रो एलाथिकापा हासुकोङ बान्धाइता परेका मान्थुन्हाहि। ‘नेलाइ फुक्का जेङस्वाना’ दोअ्तेङ हेसापा दोअ्स्वाना?”#मत्ति ३:९; लुका ३:८
34इसु एम्बालाइहेङ दोअ्हि, “जातिङको, का नेलाइहेङ दोअ्खा, पाप पाका झाराङ पापको बान्धाइ। 35बान्धाइ जेलाउ बुङ साअ्ता माहिखे, कालाउबुङ चानचाहिँ जेलाउ बुङ साअ्ता हिखे। 36एन्साङपातेङ चान नेलाइहेङ फुक्का पापाहि पानु नेलाइ जातिङको फुक्का जेङस्वाना। 37का गिखा नेलाइ आब्राहामको चानचामिन्दि। कालाउबुङ नेलाइ कासेहेङ सेअ्लि भोसुखेना, हाइदोनु काङको बचन नेलाइता थामे मानिङखे। 38जेदोङ जेदोङ का काङको आबाहिलाउ तिङका हिघा, इङकोङ का दोअ्खा। नेलाइ बुङ जेदोङ नेलाइको आबासो हिङका हिसुन्हा, इङकोङ पासुखेना।”
39एम्बालाइ वासेहेङ दोअ्हि, “केलाइको आबा ते आब्राहाम।”
इसु एम्बालाइहेङ दोअ्हि, “नेलाइ आब्राहामको चानचामिन्दि हितेङ हिनुते, आब्राहाम जेदोङ काम पाहि इङकोङ पासुधाना। 40का परमेस्वरसो हिङका सत्ते काथा नेलाइहेङ दोअ्का हिघा, कालाउबुङ एला नेलाइ कासेहेङ सेअ्लि भोसुखेना। आब्राहाम इस्का काम मापाहि। 41नेलाइको आबा जेदोङ पाहि, नेलाइ इङकोङ काम पासुखेना।”
एम्बालाइ वासेहेङ दोअ्हि, “केलाइ कासबिरिता जोन्मिका माको! केलाइको आबा एलोङ हि, वा परमेस्वर हि।”
42इसु एम्बालाइहेङ दोअ्हि, “परमेस्वर नेलाइको आबा हिका हिनुते नेलाइ कासेहेङ माया पासुधाना, हाइदोनु का परमेस्वरसो ओल्हितेङ लोघा। का ताइकोङ इछासो लोका माको, कालाउबुङ वा कासेहेङ दिङगिल्हि। 43काङको दोअ्का नेलाइ हाइपालि मागिसुखेना? हाइदोनु नेलाइ काङको बचन हिङलि मादोस्वाना। 44नेलाइ ताइको आबा साइतानको रो नेलाइको आबाको इछा पोङघापालि नेलाइको बिचार हि। इङकोते लाम्फासो दोङ हात्यारा हिघाहि रो सत्तेदोफा इङकोहेङ हाइदोङ वास्ता मान्थु। हाइदोनु इङकोता सत्ते मान्थु। जेलाउ इङको आसत्ते धुइखे, इङको ताइकोङ आनिबानि आन्सार धुइखे, हाइदोनु इङको आसत्ते रो आसत्तेको आबा। 45का सत्ते धुइखा, कालाउबुङ नेलाइ कासेहेङ खान्धुर मापासुखेना। 46नेलाइता हासु कासेहेङ पापको दुस लागाइलि द्वावा? एदि का सत्ते धुइखा पानु, हाइपालि नेलाइ कासेहेङ खान्धुर मापासुखेना? 47परमेस्वरको चानचामिन्दि ते परमेस्वरकोङ काथा हिङखे। नेलाइचाहिँ परमेस्वरको चानचामिन्दि माहिनासिङ वाको काथा माहिङसुखेना।”
इसु रो आब्राहाम
48यहुदि आगुवागेलाइ इसुहेङ दोअ्हि, “केलाइको दोअ्का ठिकोङ, ना सामरि हिना रो नासेहेङ मासान खोअ्का हि।”
49इसु दोअ्हि, “कासेहेङ मासान खोअ्का मान्थु। का ताइको आबाको मानभाउ पाखा, कालाउबुङ नेलाइ कासेहेङ बादानामि पासुखेना। 50का ताइकोङ पारताप माभोखा, कालाउबुङ कासेहेङ पारताप पालि खाङका रो कासेहेङ जातिङको निया भेनाङ हि। 51जातिङको का नेलाइहेङ दोअ्खा, एदि हासुङ काङको बचन साअ्खे पानु इङको हेअ्लाउ सिका माचाख्यावा।”
52यहुदि आगुवागेलाइ दोअ्हि, “एला केलाइहेङ पाक्का जेङहि, नासेहेङ मासान निङचाकाङ हि। आब्राहाम सिहि, परमेस्वर पाहासो धुइकालाइ बुङ सिहि, कालाउबुङ ना दोअ्खेना ‘जाइ काङको बचन साअ्हि पानु इङको हेअ्लाउ सिका माचाख्यावा।’ 53हाइ केलाइको आजुखाल आब्राहामखान्तेङ बुङ ना बारका हिन्हा? वा सिहि, कालाउ परमेस्वर पाहासो धुइकालाइ बुङ सिहि। नाचाहिँ ताइमिङहेङ हासु दोअ्तेङ फोमपाखेना?”
54इसु दोअ्हि, “एदि का ताइकोङ मानपानु काङको मान बिथाको ज्यावा। कासेहेङ मान पाका काङको आबा हि, जाइहेङ नेलाइ ‘केलाइको परमेस्वर’ दोअ्सुखेना। 55नेलाइ वासेहेङ नाल्का मान्थुसुन्हा, कालाउबुङ का वासेहेङ नाल्खा। का वासेहेङ मानाल्खा दोअ्नु का नेलाइभाइपाङ आसत्ते जेनाङका। कालाउबुङ का वासेहेङ नाल्खा रो वाको बचन साअ्खा। 56नेलाइको खाल आब्राहाम काङको लोका दिना तिङलि रेसेतेङ हिघाखे रो इङको तिङहि कालाउ लेङचाहि।”
57इदोइभाअ्सिङ यहुदि आगुवागेलाइ इसुहेङ दोअ्हि, “ना एला बुङ द्याकुरिते बाअ्सार थुकाका मान्थुन्हा, कालाउ हेसापा ना केलाइको खाल आब्राहामहेङ तिङन्हा?”
58इसु एम्बालाइहेङ दोअ्हि, “जातिङको का नेलाइहेङ दोअ्खा, आब्राहाम हिकाखान्तेङ लाम्फासोङ का हिदोङघा।” 59कालाउ एम्बालाइ इसुहेङ तोलि दोअ्तेङ उन्ठुइ कुर्हाइहि, कालाउबुङ वा म्होअ्तेङ थानसो बाहार ओल्हितेङ हानिहि।
اکنون انتخاب شده:
युहन्ना 8: DHIM
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© 2025 by Nepal Bible Society and Wycliffe Bible Translators, Inc.
