Peragenebesi 9
9
At Saulus ebabut heberlaga wene
1Asogo togukhwe re, at Saulus ano olot het agarik e, aphwami nonue ʼgain Onuk Logo aʼge iak wegesa aʼge ebano warenebiogoluk ogola en onobok ʼbaliselat e, is ap Allah eiye aʼge onue ʼgain aʼge eʼbek ʼgoluk e, disogo moʼgulesi,
2“Nue. An o Damsyik laiktik e, is aphwami logon Yesus iak wogulat eʼberlik noʼgwi aʼge logon oruak holuk, ap et, hwami et, hwiagonoboluk e, eneʼgik herle wusogo wogonoboluk o Yerusalem yema onobou weik en e, is aphwami Yahudi aʼge o kota Damsyik eba o seʼban ogwiʼgwe loʼbok odoktogwi aʼge enebaget surat mesik wokho woknemin o,” oluk moʼgulesi. 3Asogo moʼgulosoam, wogesimu re, waga lagarik e, o kota Damsyik eba horoksogo ʼgwik ʼgalma re, ʼbogorl pam en mesik erligeat, at eragam oʼgwe amulit yebektak aʼge atiasogo yoso ʼbu aga. 4Yoso ʼbu aga ʼgal e, at Saulus ano ʼgwiangma erleʼgalogo ʼbulak ti laga. Lagama re, at mesik en moʼguleselat e,
“Saulus. Saulus. Anat di obotut yu obotut taknebaigoluk muknoboluk denaga legen ai nopaget,” oluk moʼgulesi. 5Asogo moʼgulesimu, at Saulus en e,
“Nue. Hat hebe sa,” oluk moʼgulesimu, at en e,
“An nebe Yesus o. Hat en di obotut yu obotut taknebanogoluk muknoboluk denaga legen aʼge anoat o. 6Hebe inotluk e, o kota ai laguntik e, ʼgwin o. ʼGwisoam, ap mesik en,
Hat disogo tip, oluk moʼgulhema aʼge oruak o,” oluk moʼgulosoam, 7is ap at emin wegesa aʼge ebano enesaʼgo hweligisarik e,
“Ap ebe ʼge en iak egei,” oluk enil orlok tigisa aʼge re, ebe erlak en yuk egesarik e, eniak u mia agama mo egesa. 8Asogo oruakhwe re, at Saulus ano inagarik, il dek egei aʼgeat de, di aʼge yu aʼge il yetho mia aga. Asogo mia agama re, eʼgik tenakho o Damsyik woluk ʼgwigisa. 9Woluk ʼgwigisema, agauwa henagan welat e, di aʼge yu aʼge il hasu erlagat, soʼboru emin, ik emin, no erlakma en modok welaga.
10Oruakhwe, o Damsyik eba ap mesik nonue ʼgain Onuk Logo aʼge Yesus iak wesi aʼge onuk e, Ananias welaga. Oruakma, nonue ʼgain Onuk Logo aʼge en e, abi ʼgelaʼge pam disogo moʼgulesi,
“Ananias,” oluk iak pakhasuam, at en e,
“Wo? Nue. Nebe yu welegi o,” oluk egei. 11Egeimu re, nonue ʼgain Onuk Logo aʼge en e, disogo moʼgulesi,
“Hebe siaksogo inoroguntik e, ebela onuk ʼBekhiroʼgwe ogwi ʼgwe ai lak o. Laguntik e, o ap Yudas oruakma ʼgwi laguntik, hat en e,
Ap onuk Saulus, owi Tarsus aʼge ano, yema oruak a? oluk hin wogontomup o. At ebe seʼban oso ani o. 12Seʼban asogo osoma, at abi ʼgelaʼge pam disogo hesimu o. Hat Ananias hebe re, at eʼbek ʼgoluk en, il dek uagoluk heʼgik ebam sebelak pasumu abi ʼgelaʼge hesi o,” oluk moʼgulesi. 13Asogo moʼgulesimu, at Ananias en e,
“Nue. Aphwami en e,
Ap ai en, hat heiyagai o Yerusalem aʼge di obotut yu obotut tagenebasu, oluk enebe esan enat ogukhwe obok nesaʼgo hwelegismu re, 14yogodak e, o yema wotluk, aphwami hat honuk ʼbalogo yoʼgo hobogwi aʼge ʼberlegat, eneʼgik herle woruagoluk e, is ap Allah eiye aʼge onuelak ʼgaindek ebano en moʼgulegisema wagarik oruak ai o,” oluk moʼgulesi. 15Asogo moʼgulesi aʼgeat de, nonue ʼgain Onuk Logo aʼge en e,
“Lak o. At en e, aphwami oʼborl oʼgwe aʼge emin, onuelak ononuk logo aʼge emin, aphwami Israel aʼge emin, an nonuk moʼgulentil denaga lemagoluk, an en ap ai ebe pulogo yoʼgo pegimu ani o. 16Asogo yoʼgo pegimu re, at en nonuk asogo moʼgulentil nosokhwe, at di obotut yu obotut hasulommayat hasulema aʼge, an en moʼguleik aʼge oruak o,” oluk moʼgulesi. 17Asogo moʼgulesimu, at Ananias ano lagarik e, olema ʼgwegeitik e, eʼgik Saulus ebam sebelak welat e, disogo moʼgulesi,
“Saulus, nare o. Nonue ʼgain Onuk Logo aʼge Yesus, hat o yema weigoluk ebela pam wagoma, horogolema inagama, hil hegen aʼge ano en, hat hil dek eselat, Allah Arogun hogola ʼbetesogo ʼgwiselat, tuagoluk peraknobou wagama wegi o,” 18oluk moʼgulosoam erianoat, at il solum laga aʼge ano noʼgorlogo ʼbegeitik e, il op aga. Il op agarik e, ebe inagama re, ik olomu ʼbelakpesi. 19Ik olomu ʼbelakpesimu re, soʼboru noluk anni aga.
At Saulus en wene aphwami o Damsyik aʼge moʼgulentasu laga wene
At Saulus ano o Damsyik welat e, aphwami nonue ʼgain Onuk Logo aʼge Yesus iak wegesa aʼge enemin agauwa weiyat welegesa. 20Asogo welegesa eria erlige re, o is aphwami Yahudi aʼge seʼban ogu legesema ebano ʼgoluk, wene Yesus paget moʼgulentasulat e,
“At Yesus ai, ebe Allah omlogoat o,” oluk moʼgulentasu laga. 21Moʼgulentasuam e, is aphwami enesaʼgo hologu legesa aʼge ebano, enebe ʼberlegat onogorlok agarik e,
“Ap yu o Yerusalem welat, aphwami ʼberlegat at Yesus ai onuk ʼbalogo yoʼgo pogwi aʼge enebe modok wolloʼgen dagalogo erlagap paigoluk taga laga aʼge ano ebe yu erlak no? Ebe yuat ani o. At yema wotluk e, is Yesus onuk ʼbalogwi aʼge ebano, eneʼgik herle wusogo, is ap Allah eiye aʼge onuelak ʼgaindek aʼge eneʼbek wogonoboluk laigoluk waga erlak no? Nogorlok o,” oluk erliktogu legesa. 22Erliktogukhwe re, at Saulus en, iak annisogoat onogola ʼgagaliselat, disogo moʼgulentasu laga,
“Allah en e,
Ap mesik delhonobuagoluk perakpou weik, oluk wene obok moʼgulnentesi aʼge ano ebe re, Yesus aiat o,” oluk ʼbaksogoat moʼgulentasuam, hegit agama re, is aphwami Yahudi aʼge o Damsyik welegesa aʼge eba en oʼgo no u ʼgelaʼgeat wongsogo mo ogu legesa.
23Asogo welat, agauwa aʼbigat welegesarik e, Saulus ebe woruogoluk obok hisakho ʼbaligisa. 24Asogo ʼbaligisa aʼgeat de, is aphwami pema en Saulus hosoʼbi moʼgulegisema at aluk aga. Asogo aluk oruakhwe, ap ebano en at ebe ebelaʼgwe de, leget pakleget emde ʼbelakma libagoma woruogoluk hup erlige ʼgagalak modok welegesa. 25ʼGagalak oruakhwe, is aphwami Saulus iak wogu legesa aʼge en e, o hubaʼgo mesik erlige, at ebe mul egeik aʼge ogola yagarak poluk e, leget pakleget yat werik aʼge ano pam ele mesik likhoʼgwe delak oruakma re, lebikpoluk e, ʼgoʼbi erlilogo leget edip oʼborl akhit ʼbelebak pegesa.
At Saulus o Yerusalem ʼbi lagarikmu tigisa wene
26Asogo ʼbelakpegesema, at Saulus o eba en o kota Yerusalem ʼboluk e, is aphwami logon Yesus iak wogu legesa aʼge enemin mesikmu laʼbulogo wolomogoluk walhesi aʼgeat de, is ʼberlek en,
“At demat Yesus iak wesirik oso yo,” oluk pobitu erlakma en, at ebe onogorlok welegesa. 27Asogo oruakhwe, at Barnabas en Saulus ebe wesirik woluk e, is ap Yesus en enebe yoʼgo onoboluk peragenebesi aʼge ebano logon eneʼbek laga. Woluk lagarik e, disogo moʼgulentesi,
“Ap yu re, ebela lok oʼgwe lasulat, nonue ʼgain Onuk Logo aʼge il hesimu, at en wene disogo moʼgulesimu en, at ebe o Damsyik welat, ogorlok erlagat Yesus onuk ʼbalogo wene ʼbaksogo moʼgulentasu laga aʼge woluk wegi o,” oluk ʼbeliʼgogo moʼgulentesi. 28Asogo moʼgulentesimu, at is enemin op nak welat, o Yerusalem da ʼgwil ya ʼgwil neselat e, ogorlok erlaksogoat nonue ʼgain Onuk Logo aʼge Yesus onuk ʼbalholuk wene ʼbaksogoat moʼgulentasu laga. 29Moʼgulentasulat e, is logon enebe Yahudi aʼgeat de, eniak Yunani aʼge eniak ogu legesa aʼge wene moʼgulentasuam, is en hin wogwiam e, oʼgo moʼgulentasulat tagokhwe re, ebe woruogoluk walhogu legesa. 30Woruogoluk walhogukhwe re, is Allah eiyagai is-is enarilak onorokhwi enemin mesigat aʼge logon en, Saulus ebe o Kaisarea woluk wegesarik e, eba en o Tarsus orlumagoluk perakpou wegesa.
31Asogo tigisema, pobuk en e, is aphwami Allah eiyagai o propinsi Yudea aʼge emin, Galilea aʼge emin, Samaria aʼge emin, wiagabonobu erlakma en lioksogoat op nak welegesa. Oruakma, Allah Arogun en lerentasuam e, enede hurle agalat, nonue ʼgain Onuk Logo aʼge onogorloksogo welat, togulat e, enebe logetil laga legesa.
At Petrus en ap Eneas ou obaptagalat, hwe Dorkas waraga aʼge elalugaptagalat, tegei wene
32Ye, at Petrus en Allah eiyagai aʼge o da ya il ʼgogolentil lasu laga. Asogo lasu lagarik e, agauwa mesik erlige re, is Allah eiyagai o Lida welegesa aʼge il entil ʼbi laga. 33ʼBi lagarik e, ap mesik onuk Eneas. O page enat oyuk soborak modok welat e, mo ligom ʼbugom osokhwe 8 tahun ʼbourak modok welaga aʼge, asogoat oruakma, il hesi. 34Il holuk e, disogo moʼgulesi,
“Eneas nare. Yesus Kristus en obaphebegei yo. Holuk e, inotluk hegerlis demogo nogo ese legen aʼge eba oʼgulogo pemen o,” oluk moʼgulosokhwe, erianoat siaksogo inaga. 35Inagama re, is aphwami o Lida aʼge emin, Saron aʼge emin, welegesa aʼge ʼberlegat enil holuk e,
“Demat o,” oluk enebabut heberlegesarik onolukhwe nonue ʼgain Onuk Logo aʼge wogegisa.
36O Yope eba, hwe mesik onuk Rusa onuk aʼge aphwami Yunani aʼge eniak pam Dorkas u ʼgelaʼge, is eniak pam Tabita oluk ogu legesa aʼge welaga. At hwe ai, nonue ʼgain Onuk Logo aʼge Yesus iak wesirik, di aʼge yu aʼge op nak tiselat e, aphwami eneʼgikmu erlak welat enerlagaik aʼge lerentasu modok welaga. 37Asogo tiso oruakma, eria hegirat ou wesirik en ebe waragama, ebetne emesogo o holiʼbo pei ligegesa. 38Asogo pei ligegesarik oruakhwe, o Yope eba en, o Lida ai horogatma re, is aphwami logon en,
“Petrus ebe o Lida wagarik oruak o,” oluk ogwiam, is aphwami Yesus iak wegesa aʼge ebano enesaʼgo hweligisarik e, is ap enebe ʼbiren Petrus yoʼgo louwagoluk, disogo moʼgulegisa,
“His laguptik e, Petrus disogo moʼgulomup,
Haloʼgwe ebisogo wolom erlakma en nenemin perleneat louwok o, oluk moʼgulomup o,” oluk peragonoborlu egesema orlu egesarik, moʼgulegisema, at Petrus en e,
39“I o. Holuk e, ʼbuok o,” oluk enemin ʼbigisa. ʼBigisarik e, Petrus ebe woluk holiʼbo emin ligegesa. Holiʼbo ligegesarik oruakma, is hwami sugwe aʼge at eʼbek horoksogo odoktu egesarik, loʼgu marogulat e, sum ogolaʼgwe aʼge emin, oʼborl oʼgwe yat aʼge emin, hwe Dorkas elalukhwe enemin welat, igentesi aʼge onukhegesa. 40Onukhegesema re, at Petrus en enebe ʼberlegat lebigenebesirik e, odogorlu pam hurotluk seʼban egeitik e, orogole edenogo hwe werak aʼge ano wogotluk e,
“Tabita. Inemen o,” oluk moʼgulesi. Moʼgulosoam, erianoat il degegeitik e, Petrus ebe il holuk inagarik aloʼgwe yamuksogo huraga. 41Huragama, at Petrus en eʼgik tenakho edikpoluk en, is Allah eiyagai logon emin, hwami sugwe aʼge ebano emin, worlentesimu ʼgwigisema re,
“At ebe elaluk aga yu o,” oluk wogentesi. 42Wogentesimu re, wene aga aʼge ai, is aphwami o Yope eba aʼge enebe ʼberlegat enaluk egesarik e, enebe esanat enede nonue ʼgain Onuk Logo aʼge Yesus ebam heʼberik pegesa.
43Asogo heʼberik pegesema, at Petrus ano o Yope eba welat e, ap Simon wam sapi agap emin, wam domba agap emin, noʼgorlak aʼge ereʼgise laga aʼge ai owi pam eʼbirek agauwa esanat welegesa.
اکنون انتخاب شده:
Peragenebesi 9: WUL
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
