Peragenebesi 2
2
Allah Arogun ʼbogorl pam en enebam ʼbelakpou waga wene
1Aphwami Yahudi aʼge seni Paskah noʼgu legesarik agauwa 50 welegesarik e, hari Pentakosta welat, is aphwami enede Yesus ebam heʼberik welegesa aʼge enebe ʼberlegat mesikmu odoktak oruakma, 2erianoat, yasobu anni wiak punhau wagalat iak oso ai ʼgelaʼge, Allah ʼbogorl pam en ʼbelakpou wagama re, is aphwami o pam hweriogo welegesa aʼge ebano ʼberlegat iak enesaʼgo hweligisa. 3Enesaʼgo hweligisarik enil ʼgwelakhegesa ʼgal e, odouk magale abuk ʼbelak aʼge en pema melanghai lasulat, pema melanghau wagalat, tago ai ʼgelaʼge, enebe loʼbok enebam dadain lasukhwe enil hegesa. 4Enil asogo hogukhwe, Allah Arogun is ʼberlegat onogola ʼbetesogo ʼgwegei. ʼGwegeitik, Allah Arogun en,
“At ai iak disogo ese lemak o,” oluk epesi hegitsogoat, is aphwami muon eniak pam degenik lek yegenik lek uagoluk moʼgulentasukhwe elalinat il laga legesa o.
5O ai erlige re, aphwami Yahudi aʼge Allah iak hologo togu legesa aʼge, o di owi yu owi ʼberlek en o Yerusalem nak odoktu egesarik welegesa. 6Oruakma re, iak egei aʼge ano enesaʼgo hweligisarik aphwami enebe aʼbigat odoktu egesa. Odoktu egesarik oruakma, is Yesus osi ebano en is aphwami o di owi yu owi en wegesa aʼge ebano eniak loʼbok ogukhwe, enesaʼgo hweligisarik yuk egesa.
7Yuk egesarik erliktugulat e,
“Is wene moʼgulnontogwi aʼge yema enebe ʼberlegat e, onowi o Galilea erlak no? O Galilea aʼgeat o. 8Aʼgeat de, noʼgot agama en nis aphwami nonowi dagege aʼge neniak loʼbok ogwiam nenesaʼgo hologu lege epegep. 9Nis nenebe re, nonowi o Partia aʼge emin, Media aʼge emin, Elam aʼge emin, Mesopotamia aʼge emin, Yudea aʼge emin, Kapadokia aʼge emin, Pontus aʼge emin, Asia aʼge emin, 10Frigia aʼge emin, Pamfilia aʼge emin, Mesir aʼge emin, o Libia Kirene hegit etleba aʼge emin, o Roma etleba legerik nenebe o poluk ʼgelaʼgeat welegerik wege aʼge emin, nenemin welege ai o. 11Nis pema akhit demat Yahudi aʼge, ye, is pema we aʼge en nin Yahudi aʼge neneʼbek ʼgu otluk Allah iak wegesarik welegeat o. Ye, aphwami o Kreta aʼge emin, Arab aʼge emin nenemin oruakma, is yu en Allah anni pam elalin tiso aʼge moʼgulnentasuam, nonuʼgwarek neniak loʼbok nenesaʼgo hologu lege yu i o,” oluk, 12enede nalagama is-is nak en erliktugulat e,
“Ai aga ai re, ebe noʼgosogo hwe,” oluk egesa. 13Aʼgeat de, is nin pema en e,
“Erlak o. Is yema anggur eʼgen aʼbosu neʼgesarik en enede ʼbalegesarik ogwi o,” oluk eneida togu legesa.
Allah iak at Petrus en moʼgulentesi wene
14Eniak asogo ogukhwe re, at Petrus ano Yesus osi enebe 11 ebano enemin welat, peiyalogo inaga. Inagarik e, iak loksogoat disogo moʼgulentesi,
“His Yahudi aʼge emin, his logon yogodak ya o Yerusalem welegep aʼge ʼberlegat emin, narilak norokhwi. An wene ik aʼge yu henaluk orogup en e, henesaʼgo hwelip o. 15Yogodak hubet jam 9 agama welege ya i o. Aʼge re, jam eria ʼgelaʼge pam anggur eʼgen aʼbosu noluk enede ʼbalagai erlakma no oluk e, his en,
Is yema re, anggur eʼgen aʼbosu noluk enede ʼbalegesarik ogwi, oluk opogu legep ai re, erlakmayat o. 16We, at Yoel Allah iak moʼgulentasu laga aʼge Allah en moʼgulesimu egei ʼgelaʼgeat aga o. 17At en e, disogo egei,
At Allah en eselat e,
O ologun pam an Narogun ai, loksogo aphwami ʼberlegat enebam ʼbelakpou weik o.
ʼBelakpou wagoam e, henemalik logomalik et, hwelani et, is en an niak aphwami moʼgulontogulat,
honosi souwe aʼge en enabi ʼgelaʼge hogulat,
henaiklak sebal aʼge en enabi hogulat, togu lema o.
18Ai erlige re, an neragam aʼge, ap et, hwami et, an Narogun loksogo enebam ʼbelakpou weik o.
ʼBelakpou wagoam e, is en an niak moʼgulontogu lema o.
19Ye, aphwami en erliktogu lemagoluk,
elalin aʼge logon ʼbogorl pam erabu en tagalat,
wene pobi tuagoluk ʼgwiangma yema tagalat, tagalat e,
di aʼge yu aʼge pam, mep emin, odouk magale emin, ageromtom odouk hobu ʼgelaʼge emin, tua.
20An henaik ʼgain Nonuk Logo aʼge en loksogo tagoam aphwami en erliknobugukhwe weik ai erlige owan wom erlak oruakhwe re,
o mo orogole muat hik eselat,
dugwi orogole mep agalat, ai naduk tua o.
21Asogo agokhwe re, his aphwami en
an henaik ʼgain Nonuk Logo aʼge nonuk ʼbalogo yoʼgo nebagup aʼge enebe loʼbok delenebik o, (Yoel 2:28-32)
oluk Yoel en egei ai.
22Aʼge re, his Israel aʼge narilak norokhwi. An niak ik aʼge yu hwelit o. Yesus owi Nazaret aʼge ano Allah en yoʼgo pesimu, nenemin welat, wene pobi tuagoluk elalin tu puk aʼge Allah en eʼgik annisogo taga laga ai re, ebe Yesus enat taga laga o. Holuk e, Yesus Allah en perakpou wagama, oluk enagat aga ai re, henaluk o. 23Aʼge re, at Allah aluk welat, ogola en e,
Asogo tuak o, oluk epesi ano pamat, Yesus ebe heneʼgik pam pesimu, his en ap enebabut wiak aʼge eneʼgik wokho, at ebe e pam edikpoluk werigep ai o. 24Werigepma, at ebe nonouk tagalat waraga aʼgeat de, aphwami eneʼgik herle wusogo onobugumu welagai ai ʼgelaʼge, at asogo modok werak wolom puk ai en, eneʼgik herle hebilogo lebigonobogwi ai ʼgelaʼge, Allah en elalugap pesi ai o. 25At Yesus paget Daud en disogo egei,
An di aʼge yu aʼge en noborlogouk niouwano oluk
naik ʼgain Onuk Logo aʼge ebe neragam oruakma,
nin hwedik nan hwedik nil hasu modok welago yo.
26Ye, ai en, nogola nagai hasulat, niak pam erliktagalat, oso yo.
An watnobumu nebe werak pobuk op eik ani,
oluk nogola en mennei ʼgaroksogo weleik o.
27Asogo weleik ai re, an nebe aphwami warotluk lagaimu eba modok welemagoluk, hat en uknebasulat,
An hat homlogo hede hwedik aʼge nebe yu muk emagoluk ʼbullak nebasulat, togun erlak ai enat o.
28Hat en ebela nenelaluk wolomul ai aʼge moʼgulneselat,
hat hebe nemin modok welege ai en onogola enagai opogwi aʼge nogola ʼbetesogo wokneselat, tise legen o, (Mazmur 16:8-11)
oluk Daud en Yesus ebaget egei ai.
29Aʼge re, narilak norokhwi. At neneʼba Daud obok ʼbaksogo moʼgulhentaik. At ebe waragama, nis welegema yemayat ʼgwiang delogo sebeligisa aʼge, ebale naduk welagarik yogodak ogo oruak ai. 30At Daud ebe Allah iak moʼgulentasu laga aʼge ano en e, Allah en hoʼbuk ʼbalogo wene disogo oluk obok moʼgulesi aʼge alugat welaga,
Hat ʼgain welegen ai ʼgelaʼge welemagoluk,
ap hat en dogoʼgwe aʼge mesik hebalema edikpaik o, (Mazmur 132:11; 2 Samuel 7:12-13)
oluk obok moʼgulesi. 31Asogo obok moʼgulesi aʼge ano ebe owan edikpo erlak oruakhwe, at Daud Allah en tua aʼge aluk welat e,
Kristus waromma, Allah en elalugap pouwa o, oluk wene at en disogo egei,
Allah en at ebe aphwami warotluk lagaimu eba modok welemagoluk ukpouwa erlak o.
Ye, at ebe muk emarik, erlak emagoluk ukpouwa erlagat o, (Mazmur 16:10)
oluk egei. 32Asogo egei hegitsogoat, at Yesus Allah enat elalugaptegeimu, nis ya ʼberlegat nenil hegerik nenalugat welege ai o. 33At ebe Allah en elalugaptegeitik, eragam ʼgain welemagoluk edikpesimu oruak o. Welat e, Allah en,
Narogun wokhentaik, oluk obok woknentesi ʼgelaʼgeat Yesus wogesimu, at en loksogoat nis nenebam ʼbelakpou wagama re, nis tugukhwe henil nontogulat, henesaʼgo holugulat, togu legep ai o. 34-35Aʼge re, at Daud ebe ʼbogorl pam ligom erlak. Aʼgeat de, at en disogo egei,
Nenaik ʼgain Onuk Logo aʼge en e, an nue ʼgain Onuk Logo aʼge moʼguleselat e,
Aphwami hat heselei aʼge ebano,
hoyuk en al ʼbesilogo enebagun en, an en owan heʼbek onobuom erlak oruakhwe,
hat an neragam neʼgik ʼbekhit akhit hebe ʼgain hweriogo welerinok, oluk at Allah en moʼgulesi, (Mazmur 110:1)
oluk, at daud uʼgwarek en egei ai o. 36At Yesus ebe re, his en e pam edikpoluk werigepma, at Allah en,
Honue ʼgain Onuk Logo aʼge Kristus ebe yuat o, oluk edikpesi o. Holuk e, his aphwami Israel aʼge ʼberlek en e,
Wene ai demat, oluk henaluksogo wolomup o,” oluk moʼgulentesi.
37Asogo moʼgulentesimu, enesaʼgo hweligisarik, wene ai pam enede perik welat e, is en Petrus emin, is logon Yesus en yoʼgo onoboluk peragenebesi aʼge emin, moʼgulontogulat e,
“Narilak o. Nis nenebabut noʼgosogo tul,” oluk moʼgulentigisa. 38Asogo moʼgulentigisema, at Petrus en e,
“His wiak togu legep aʼge ai ukpoluk henebabut heberlemis o. Asogo heberlomma re, wiak togu legep aʼge ai, Allah en erlagapsogo ukpouwagoluk henebe loʼbok Yesus Kristus onuk ʼbalogo ik olomu ʼbelaphonobuak o. Asogo tumu re, Allah Arogun ai wokhontouwa o. 39At Allah en,
Narogun wokhentaik, oluk wene wusogo obok moʼgulnentesi ai re, his henebe emin, heneiyagai emin, is logon onowi walek aʼge eba emin, henebe nenaik ʼgain Onuk Logo aʼge Allah en,
Manis o, oluk worlhentasu aʼge ʼberlek enebaget wene hisat wene wusogo obok moʼgulhentesi o,” oluk moʼgulentesi. 40Wene ebe asogo yat wiak eselat e,
“Aphwami enebabut dagan til lagai aʼge yema, Allah en wene enebam pouwa aʼge ai, ukpoluk honuʼgwarek en delhorlomup o,” oluk enesaʼgo weregei.
41Asogo enesaʼgo weregeimu re, is wene wegesa aʼge ik olomu ʼbelabenebigisa. Ai erlige enebe 3.000 ʼgelaʼge ik olomu ʼbigisarik e, pobuk enemin laʼbulogo welegesa. 42Enemin laʼbulogo obat welat e, is ap Yesus en yoʼgo onoboluk peragenebesi aʼge ebano en wene moʼgulontogwiam hwedik-hwadigat enesaʼgo holugulat, soʼboru enemin ʼgusogo noʼgulat, seʼban enemin ogulat, togu legesa.
At Allah eiyagai enede Yesus ebam heʼberik poluk togu legesa wene
43Aphwami en wene pobi tuagoluk, is ap Yesus en enebe yoʼgo onoboluk peragenebesi aʼge ebano en elalin tu puk aʼge aʼbigat tugukhwe re, aphwami enebe loʼbok onogorlok aga laga. 44Is aphwami logon wene demat oluk wegesa aʼge emin enebe mesik aʼge ʼgelaʼge opsogo welat, enaʼge di aʼge yu aʼge paget,
“Nis nenemin mesigarat nenaʼge o,” oluk laʼbuksogo tenak welegesa. 45Asogo welat e, is pema en, onoʼgwiang emin, enaʼge emin, oʼgo uang wik-wok e, uang ai is Allah eiyagai aʼge ebano enebe loʼbok soʼburontogulat, is nin enaʼge erlak aʼge elirat soʼburontogu legesa. 46Asogo tugulat e, agauwa mesik pam mo u erlakma en hwedik-hwadigat Allah owi werikmu odoktugulat, onogola enagai hogulat, enede sebelogoat onowi loʼgwe soʼboru enemin ʼgusogo noʼgulat, togu legesa. 47Asogo tugulat, is en Allah erliktogwi oruakma, is aphwami ʼberlek en,
“Is op o,” oluk erligonobogu legesa. Erligonobogukhwe oruakma re, nonue ʼgain Onuk Logo aʼge en e, agauwa mesik mo u erlakma en, aphwami logon delogo Allah eiyagai enemin mesigat laʼbulogo enebasu laga.
اکنون انتخاب شده:
Peragenebesi 2: WUL
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
