Mateo 16
16
Le runn'be' kie' Jonás
(Mr 8:11-13; Lc 12:54-56)
1Bënni fariseo len bënni saduceo yajyu'ke Jesús, len tzal gunn lazi'be'e Le' gulunaabe guune tu yëla wak xhën le gunn'be' ki Le' ze'e ulaaz kie' Dios.
2Ati Jesús gudxe leke: «Kati chi za rdzë' lbi'ili rnaali: “Gunn latj, koma chi gulula' buaj gach”; 3Len ziil'a rnaali: “Ti gunn latj na'dza, koma yu buaj len gulula' buaj gach.” Ati xhki rak'be'i'li nakxh rna' lu xhba, ¿Koma ti rak'be'i'li yugu le tunn'be dza zuaali na'a? 4Bunach ti tabëëze dxia'a len bënni chop'laadxi tunaabe tu le gunn'be' yëla wak xhën, san kaaz guk kie' Jonás gak le gunn'be' kieke.»
Na' pka'ane leke ati zuwëëje.
Le rzaaxh leke bënni fariseo
(Mr 8:14-21)
5Bënni useed kie' guladëëde tzala'a nis, ati glal'laadxi'ke lua'ke yët'xhtiil. 6Na' Jesús gudxe leke:
—Gulun'chi'i kuin'li ki le rzaaxh leke bënni fariseo len bënni saduceo.
7Bënni useed kie' te' lza'a'ke:
—¡Ti nua'ru yët'xhtiil!
8Jesús guk'be'i'de ati gudxe leke:
—¿Bixhkia' rnaali ki ti nua'li yët'xhtiil? ¡Tibi nak'kz yëla rajle' kieeli! 9¿Naru ti rajni'i'li, len ti rajnei'li kati gdisia' ga'yu' yët'xhtiil kieke ga'yu' mil'ke bënni, len balxh bdë'ë buzi'li? 10¿Ati lekz'ka' ti rajnei'li kati gdisia' gaadx yët'xhtiil kieke tap mil'ke bënni, len balxh bdë'ë buzi'li? 11¿Bixhkia' ti rajni'i'li ki ti rui'a diidza ki yët'xhtiil? Gulun'chi'i kuin'li ki le rzaaxh leke bënni fariseo len bënni saduceo.
12Na' gulayajni'i'de ki Jesús ti gudxe leke ki lun'chi'ke kuin'ke ki le rzaaxh yët'xhtiil, rui'e diidza ki le tuseed'de bënni fariseo len saduceo.
Pedro gne' ki Jesús nake Cristo
(Mr 8:27-30; Lc 9:18-21)
13Kati Jesús bdxiine gia'a yeego ki Cesarea ki Filipo, bnaab'de bënni useed kie':
—¿Bixh taná bunach, nuxh nake Le' Xi'ine Bënni?
14Leke gulubi'ke diidza:
—La'ke tanáke ki nake Juan bënni rkiile nis bunach, ye la'ke tanáke ki nake Elías, len ye la'ke tanáke ki nake Jeremías u tue' bënni be'e diidza ulaaz kie' Dios.
15Na' Jesús bnaab'de leke —Ati lbi'ili, ¿Bixh rnaali, nuxh naka neda?
16Simón Pedro bubi'e diidza:
—Li' naku Le' Cristo, Le' Xi'ine Dios ban.
17Na' Jesús gudxe le':
—Bixhgabou' li' Simón bënni xi'ine Jonás, koma keg bënni bunach gulului'de li' le ni, Xuuza zue' yewayuba blui'de li'. 18Ati neda rea' li', ki li' naku Pedro, ati lau'i giaj ni kuekia xhliibi dxin'lau'i kieke bënni'a tayajle'ke, ati yëla rnabe' ki yëla gut ti gde'li'i ley. 19Gzua lu no'u xi'in'gia ki yëla rnabe' ki yewayuba; yugute' le li' guugu'u lu yëdz'lyu ni, lekz'ka' gaaga' yewayuba, ati yugute' le li kseedxu lu yëdz'lyu ni', lekz'ka' tseedx yewayuba.
20Buudx'a Jesús gnabe'e bënni useed kie' ki nutunu bënni lagixhji'de ki le' nake Le' Cristo.
Jesús rgixhjë'e ki yëla gut kie'
(Mr 8:31—9:1; Lc 9:22-27)
21Na' Jesús gzulau'e rgixhji'de bënni useed kie' ki rala tziije Jerusalén, ati bënni guul tuzeajni'i'de, bënni tunabe'i'de pxuuz len bënni useed xhba kie' Dios ulusaka'dë'tzka'ke Le'. Uludëëd'de le', san na' gak tson dza ubaane lu yëla gut. 22Na' Pedro pche'e Le' ga yubl ati gdil'leene, rne':
—¡Dios ti ksaane Li', Xan! ¡Ti gunn gak ki kiu'!
23Na' Jesús bueikje len gudxe le':
—¡Bënni xëwi, gyaj kiu', re'enz'du gzaagu neda!, Li' ti ryaazlaadxu'u le nak kie' Dios, ryaazlaadxu'u le te'en'de bunach.
24Buudx'a Jesús gudxe bënni useed kie':
—Xhki nuul'li re'eni'li gak'li bënni useed kia', rala gal'laadxi'li kuin'li, gua'li yaag kruuz kieeli len giid'leen'li neda. 25Koma xhki re'eni'li usláli yëla naban kieeli, unit'li ley; san bënni gnitie' yëla naban kie' nia'a kia', udzëël'de ley. 26Gaxhkz de gun kie' bënni gaki kie' gdu yëdz'lyu xhki gnitie' yëla naban kie', lekz'ka' tibi gunn'kz kiixhje bënni ki usle' yëla naban kie'. 27Koma le' Xi'ine Bënni wëëde len yëla xhën kie' Xuuze len gbaaz la'ay kie', ati na' guune ga luzi'ke xhbei tu tu'ke ki le gluune. 28Blikz'da rnia' ki la'li' lbi'ili zuaali ni, ti gat'li nakati gle'ir'li'ne Le' Xi'ine Bënni giide gnabe'e.
اکنون انتخاب شده:
Mateo 16: PZD
هایلایت
به اشتراک گذاشتن
کپی
می خواهید نکات برجسته خود را در همه دستگاه های خود ذخیره کنید؟ برای ورودثبت نام کنید یا اگر ثبت نام کرده اید وارد شوید
© Sociedad Biblica de México AC
