San Lucas 24

Cha'cux tel te Jesuse

(Mt 28.1-10; Mr 16.1-8; Jn 20.1-10)

1Ta buen sab ta sba c'aalil semana bajt'ic te antsetic ta yilel xan te muquenale. La yich'ic bael poxil te bujts'an nax yic' te chajbanbil yu'unique. Soc ay yantic antsetic te la sjoinic baele. 2Balch'unbilix loq'uel c'o staic te ton macbil a te muquenale. 3Ochic bael ta yutil muquenal, ja'uc me to, ma la staic tey a te sbaq'uetal te Cajwaltic Jesuse. 4Bayal xiwic yu'un, ma la sna'ic te bila ya spasique. Ja'uc me to, la yilic ay cheb winiquetic te teq'uelic ta sts'eelique. Xlemet nax te sc'u'-spaq'uique. 5Te antsetique la stinan sbaic coel c'alal ta lum yu'un xiwel. Jich albotic yu'un te winiquetique:

—¿Bi yu'un ya aleic ta bay animaetic te mach'a cuxule? 6Ma ba li' ayix to, melel cha'cuxemix. Juluc me ta awo'tanic te bila la yalbeyex te c'alal ajoinejic to ta Galilea, 7te jich la yale: “Ya me x'ac'ot ta sc'ab jmulawiletic te Nich'anile, soc ya me yich' milel ta cruz, soc ta yoxebal c'aal ya me xcha'cux tel”,#Mt 16.21; 17.22-23; 20.18-19; Mr 8.31; 9.31; 10.33-34; Lc 9.22; 18.31-33. te xie —xiic.

8Jich jul ta yo'tanic te jich nix albilic yu'un a te Jesuse. 9Jich la yijq'uitayic jilel te muquenale. Sujt'ic bael, ba yalbey yaiyic te buluchtul jpuc-c'opetic soc te yantique. 10Te antsetic te ba yalbey yaiyic te jpuc-c'opetique, ja' te María Magdalena, te Juana, te María te sme' te Jacoboe, soc te yantic antsetique. 11Te jpuc-c'opetique, la scuyic ta jowil c'op nax te bila la yalique. Jich ma la xch'uun yo'tanic.

[ 12Yan te Pedro la stejc'an sba jajch'el. Animal bajt' ta bay te muquenale. La stinan sba ta yilel ochel te yutil ch'ene. Ja' xanix la yil tey a te sábana te potsbil ae. Jich sujt' bael. Bayal yac ta aiyej bael yo'tan yu'un te bila c'oemix ta pasele.]

Ta sbelal lum Emaús

(Mr 16.12-13)

13Ja' nix sc'aalelal a te ay cha'tul te sjoy sbaic soc te jnopojeletique yacalic ta beel ta sbelal lum Emaús te nopol bulucheb kilómetro yiloj sba soc te Jerusalene. 14Yacalic ta yaanel bael spisil te bila c'oemix ta pasele. 15Te bit'il jich yacalic ta yaanel a, noptsaj tel te Jesuse. Jich la sjoinic bael. 16La yil ta sitic, ja'uc me to, macbot sitic, ma la sna'beyic sba te mach'a a. 17Soc jojc'obotic yu'un:

—¿Bila a te yacalex ta yaanel ta beele? ¿Bi yu'un te ayex ta mel-o'tane? —xi'.

18La yal te jtul te Cleofas sbiile:

—Spisil ants-winiquetic ya sna'ic stojol te bila c'oem ta pasel ta lum Jerusalén te wojey chajeye. ¿Yu'un bal q'uejel talemat te ma ba ana'oj stojol te bila c'oem ta pasele? —xi'.

19Albotic yu'un:

—¿Bila a te c'oem ta pasele? —xi'.

La yalic:

—Ja' te bila la spasbeyic te Jesús te Nazarete. Ja' te j'alwanej yu'un Dios te ay bayal yu'el soc te ay bayal yip sc'op ta stojol te Dios soc ta stojol te lume. 20Te jwolwanej-sacerdoteetic soc te jtuuneletic yu'un te jlumaltique la stejc'anic ta stojol te ajwalile, swenta yu'un ya x'ac'ot ta lajel. Jich la yich' milel ta cruz. 21Yan te jo'otique, la jcuytic te ja' ya yac'botic ta libre te jlumaltic Israele. Ja'uc me to, ayix ta yoxebal c'aal te ac'ot ta lajele. 22Pero ay cha'oxtul antsetic te bayal la yac' ayanuc te co'tantique. Yu'un buen sab xc'otuquic ta bay te smuquenale. 23Ma la stabeyic tey a te sbaq'uetale. Tal yalbotic caiytic te ac'bot yilic ch'ul abatetic te ja' albotic yu'un te bit'il cuxulix te Jesuse. 24Soc ay cha'oxtul jo'tactic te ora bajt'ic ta bay te smuquenale. Jich nix c'o staic te bit'il la yalic te antsetique, ja'uc me to, ma'yuc bila ac'bot yilic stuquelic —xiic.

25Jich albotic yu'un te Jesuse:

—Wocol cati ya xc'ot ta awo'tanic. ¿Bi to ora ya xch'uun awo'tanic spisil te bila yaloj jilel te namey q'uinal j'alwanejetic yu'un te Diose? 26¿Ma bal jichuc la sc'an te puersa ya xc'ax swocol neeluc te Cristo te ma to x'och ta bay te utsilale? —xi'.

27Jich jajch' xcholbey spisil te bila ts'ibubil jilel ta Sjun Dios te bit'il ay sc'oplal te Cristoe. Tey jajch' ta Moisés ja' to c'alal ta slajibal te namey q'uinal j'alwanejetic yu'un te Diose.

28Jich c'otic tey a ta ba ay te ch'in lume. Te Jesús c'an jelawuc bael yilel. 29Ja'uc me to, la yalbeyic wocol te yacuc xcome:

—Joinawotic, melel malix c'aal soc nopol x'ijc'ubix q'uinal —xiic.

Jich la sjoin ochel. 30Te c'alal nacalic ta mesa soc, la stsac ta sc'ab te waje. La yalbey wocol Dios yu'un, soc la xet', soc la spucbey. 31Jich jambot te sitique soc la sna'beyic sba, ja'uc me to, ora tup' ta sitic. 32Jich jajch' yalbey sbaic:

—Ja' cati swentail te bayal sbujts' la caiytic ta co'tantic te c'alal yac tel ta aiyej ta be soc te la xcholbotic caiytic te Sc'op Diose —xiic.

33Jich jajch'ic ta beel ta ora nax. Sujt'ic bael ta Jerusalén. Stsoboj sbaic c'o staic te buluchtul jpuc-c'opetic soc te sjo'taque. 34Soc ora albot yaiyic:

—Melel nix a te cha'cuxemix te Cajwaltique, soc la yilix te Simone —utotic.

35Jich jajch' yalic uuc te chebic te bila c'ot ta pasel ta be, soc te tey la sna'beyic sba a te c'alal la xet' te waje.

Jesús la yac' sba ta ilel ta stojol te jnopojeletique

(Mt 28.16-20; Mr 16.14-18; Jn 20.19-23)

36Yacalic to ta yaanel a te teq'uel julel ta yolilic te Jesuse. [Jich la yal:

—Muc'ubenuc me q'uinal ya awaiyic —xi'.]

37Bayal xiwic soc nijc' yo'tanic yu'un, melel la scuyic ta ch'ulelal te la yilique. 38Jesús la yalbey yaiyic:

—¿Bi yu'un te ayex ta xiwele? ¿Bistuc te wocol ya xch'uun awo'tanique? 39Ilawilic te jc'abe soc te cacane. Jo'on nix ya awil. Picawonic ta lec, melel te ch'ulelale ma'yuc sbaq'uetal soc ma'yuc sbaquel stuquel, yan te jo'one ay jbaq'uetal soc ay jbaquel ya awilic —xi'.

[ 40Te c'alal jich la yalbey yaiyique, la yac'bey yilic te sc'abe soc te yacane.] 41Ja'uc me to, ma xna'baj ta ch'uunel yu'unic la yaiyic, ta scaj te ay bayal sbujts' te yo'tanique soc bayal yac ta aiyej te yo'tanique. Jich te Jesuse la sjojc'obey yaiyic:

—¿Ay bal we'elil awich'ojic jtebuc? —xi'.

42Jich la yac'beyic jc'asuc wobil chay soc xejt'uc chab. 43La stsac stuuntes ta sitic. 44La yalbey yaiyic ts'iin:

—Te bila c'ot ta pasel ta jwentae, ja' te la calbeyex awaiyic te c'alal joinejex to a. Puersa jich c'ot ta pasel spisil te bila ts'ibubil jilel jc'oplal ta mandalile yu'un te Moisés soc ta sjun te namey q'uinal j'alwanejetic yu'un te Diose soc ta salmoetic —xi'.

45Soc la sjambey yo'tanic yu'un sna'el stojol te bila ts'ibubil ta Sjun te Diose. 46Jich la yalbey yaiyic:

—Jich ts'ibubil jilel te puersa ya xc'ax swocol te Cristoe, soc te ya xcha'cux tel ta yoxebal c'aal ta bay te animaetique. 47Soc ja' ta swenta te ya yich' alel ta bay chajbalchajp nacionetic te ya sujt'es yo'tanic yu'un te smulique, swenta yu'un jich me ya spasbotic perdón yu'un. Tey me neel ya xjajch' ta alel ta bay Jerusalén. 48Te ja'exe ja' me testigoex yu'un spisil te bila c'otix ta pasele. 49Soc ya calbeyex awaiyic, jo'on ya jticunbeyex tel te bila yaloj te Jtate.#Hch 1.4. Jich yu'un te ja'exe, ainanic li'to ta Jerusalén, ja' to c'alal ya xjul ta awentaic te yu'el Dios te ya xtal ta toyole —xi' te Jesuse.

Jesús mo bael ta ch'ulchan

(Mr 16.19-20)

50Te Jesús la yic' bael te jnopojeletic yu'une. La yijq'uitayic jilel te muc'ul lume. Bajt'ic ta bay nopol ch'in lum Betania. Tey la stoy xchebal sc'ab a la yac'bey bendición te jnopojeletique. 51Yac ta yaq'uel bendición a te la yijq'uitay jilele. Ic'ot moel ta ch'ulchan.#Hch 1.9-11. 52Soc la squejan sbaic ta yich'el ta muc'. Jich ay bayal sbujts' yo'tanic te sujt'ic bael ta Jerusalene. 53Jujun c'aal bajt'ic ta templo. La yalbeyic bayal wocol ta stojol te Diose. Jichuc.

اکنون انتخاب شده:

San Lucas 24: TZOXCH

های‌لایت

به اشتراک گذاشتن

کپی